𝐻𝑜𝑙𝑑𝑖𝑛𝑔 𝐴 𝑅𝑜𝑠𝑒 ( Completed )

Part 8

Unicode

အလင်းရောင်ကို အမှောင်ထုက တဖြည်းဖြည်း ဝါးမြိုသွားသည်နောက် တောမြိုင်တစ်ခုလုံး ပိန်းပိတ်အောင်မှောင်သွား၏ ။ မီးဖိုထားသောနေရာ၀န်းကျင်၌သာ အလင်းရောင်ရှိသည် ။ ၀မ်ရိပေါ်က မီးစာထိုးရင်း မလှမ်းမကမ်းရှိ သစ်တုံးပေါ်တွင် တည်ငြိမ်စွာထိုင်နေသည့် အိမ်ရှေ့စံကို လှမ်းကြည့်မိသည် ။

ယခုညပင် ယာယီတဲကိုပြန်မည် တကဲကဲလုပ်နေတာမို့ သူမနည်းတားထားရခြင်းသာ။ သာမန်လူပင် ‌ညဘက်တောလမ်းခရီးမသွားရဲ၊တောကောင်ကြီးများ အစာရှာထွက်လာသည်နှင့်ကြုံနိုင်သည်။  မမြင်ရတဲ့ ထောင်ချောက်တွေ၊ အန္တရာယ်တွေဆိုတာ စုံလို့ ။ ပြီးတော့ အိမ်ရှေ့စံက ဒဏ်ရာရထားတာကြောင့် လမ်းပင်ကောင်းကောင်းမလျှောက်နိုင် ။ ထို့ကြောင့် ဒီနေရာမှာ တစ်ညအနားယူဖို့ သူဆုံးဖြတ်လိုက်ခြင်းသာ ။

၀မ်ရိပေါ်အတွက် ဤအခြေနေက မထူးခြားတော့။ သိတတ်စအရွယ်ကတည်းက တောတောင်ရေမြေကို ဖက်တွယ်ကြီးပြင်းလာသူမို့ စာမဖွဲ့လောက်ချေ ။ ထမင်းမစားရတဲ့နေ့တွေလည်း သူ့ဘ၀မှာ မရေမတွက်နိုင်အောင်ရှိဖူးသည်။ သူ့အတွက် ပင်ပန်းမှုဆိုတာ ချိုနဲ့လားဟု မေးရလောက်သည် ။ အိမ်ရှေ့စံနှင့်တော့ မတူ၊  ဘယ်လောက်အကြမ်းတမ်းခံနိုင်ပါသည် ပြောပြော ရွှေနန်းတော်မှာ ခြွေရံသင်းပင်းနဲ့ နေမခ လေမခ‌ နေလာခဲ့ရသူမို့ အတော်ပင်ပန်းနေလောက်မည်ဆိုတာ သူရိပ်မိသည်။
သည့်အပြင် နေ့လည်ကတည်းက အစာနဲ့တူတာ ဘာတစ်ခုမျှမစားရသေး။ မျက်လုံးကြည်ကြည်လေးတွေက မလန်းဆန်း၊ အမြဲသွေးရောင်လွှမ်းသည့် နှုတ်ခမ်းတွေပင် အရောင်ဖျော့နေသည်မို့ သူဒီတိုင်းမနေနိုင်တော့ ။

" ကျုပ် စားဖို့တစ်ခုခုသွားရှာဦးမယ်၊
ဒီအနီးနားတင်ပဲ "

အိမ်ရှေ့စံက ခေါင်းသာငြိမ့်ပြသည်။ ၀မ်ရိပေါ်လည်း ချထားသည့်လေးကို ‌ကောက်ကိုင်ကာ  မီးတိုင်ကိုယူလျက် ထွက်ခဲ့သည် ။ အသီးအနှံတစ်ခုခုတော့ ရကောင်းပါသည်လေ ။

သူသိပ်မရှာလိုက်ရ ။ မျှော်လင့်ထားသည့်အတိုင်း စမ်းချောင်းငယ်ဘက်တွင့် အလေ့အကျပေါက်နေသည့် ငှက်ပျောပင်ကို့တွေ့လိုက်ရသည် ။ ငှက်ပျောဖီးတစ်ခိုင်ကို အမြန်ခုတ်ယူပြီး အိမ်ရှေ့စံရှိရာဆီ မပြေးရုံတမယ်အမြန်လျှောက်လာလိုက်သည် ။ ညမှောင်မှောင်မှာ အရှင့်သားကို ကျားသေတစ်ကောင်နဲ့ထားခဲ့ရသည်မို့ သူစိတ်ပူမိပါ၏။ မီးပုံနံဘေးတွင် ငြိမ်သက်စွာထိုင်နေသည့် အိမ်ရှေ့စံကိုမြင်မှ စိတ်ဒုန်းဒုန်းချနိုင်သည် ။