ထင်းရှူးမြေမှာ လွမ်းရိပ်တို့ဝေ ထင္းရွဴ းေျမမွာ လြမ္းရိပ္တို႔ေ၀

29

​ဆောင်းရာသီမနက်​တိုင်း လားရှိုးပညာ​ရေး​ကောလိပ်​က​တော့ တဖြိုင်​ဖြိုင်​ကျဆင်း​နေတဲ့မြူ နှင်းစက်​တွေ​ကြောင့်​ပျောက်​ကွယ်​နေတာပါပဲ။ စာ​မေးပွဲကလဲနီးလာပြီ။ သင်​တန်းမှာချစ်​ခင်​ရတဲ့လူ​တွေနဲ့လဲ ခွဲခွာရ​တော့မည်​။ ပညာ​ရေးဝန်​ကြီးဋ္ဌာန​အောက်​မှာ အလုပ်​ဝင်​ကြရမှာဖြစ်​ပေမယ့်​ဘယ်​တိုင်းဋ္ဌာ​နေဘယ်​အရပ်​ဆီ​တွေမှာတာဝန်​ကျမလဲမသိ။ ခုတစ်​ခါဆုံပြိ်း​နောင်​တွင်​ဆုံချင်​မှဆုံရ​တော့မည်​။
ည ည​တွေဆို ခွဲခွာခါနားနီးလာ​တော့စာကျက်​ချိန်​တွေအစား စကားဝိုင်းဖွဲ့​ပြောဖြစ်​လာတာကများသည်​။
ဆရာမ​တွေမသိ​အောင်​အခန်းတစ်​ခန်းနဲ့တစ်​ခန်းခိုးခိုးလည်​ရတာလဲအ​မော။
ညနက်​ထိစကား​တွေ​ပြော။ တိုးတိုးတိတ်​တိတ်​နဲ့ကစားရင်​ကစား။ စာ​တော့ဘယ်​သူမှမလုပ်​ကြ​တော့။
ထူးဆန်းသည်​က​သွေးတစ်​ယောက်​သာ။ စစ်​နဲ့ပတ်​သက်​ပြီး တပတ်​တစ်​ခါ​လောက်​ကိုညနက်​သန်း​ခေါင်​အိမ်​မက်​ဆိုး​တွေထ ထမက်​နေတတ်​တာပင်​။​ယောင်​ပြီး​အော်​နေသံကလဲအပြင်​သို့ပါထွက်​ကျလာတာ​ကြောင့်​တခန်းထဲအတူ​နေတဲ့နန်းမြသီကပါလန့်​နေရသည်​။
စစ်​ဖုန်းကို​ခေါ်ကြည့်​သော်​လဲ ဆက်​၍မရ။ လိုင်း​ပေါ်မှာ​တော့စစ်​ရဲ့​ပျော်​နေတဲ့ပုံ​တွေအမြဲတမ်းတင်​ပြီး လူတိုင်းနဲ့စကား​ပြောဖြစ်​နေလားမသိ။​သွေးဆီသို့​တော့​ယောင်​၍မျှပင်​စာတစ်​လုံးမပို့လာ​လေ​တော့။
သူမပို့​တော့မှကိုယ်​ကပို​မျှော်​မိ​နေသလို။ ကိုယ်​တိုင်​လဲမပို့ဖြစ်​။ ပို့မိရင်​လဲ​တောင်​သူ့ဖက်​က
မ​နေ​ကောင်းလား အဆင်​ပြေလား ဂရုစိုက်​ဆိုတာကလွဲပြီးဘာမှပြန်​မ​ပြောတတ်​တော့သလားမသိ။
"​သွေး....​စောစီးနိုး​နေတာလား"
အိမ်​မက်​ဆိုးမက်​ပြီး ပြန်​အိပ်​မ​ပျော်​တော့တာနဲ့လိုင်း​ပေါ်တက်​တွေ့သမျှစစ်​ပုံ​လေး​တွေသိမ်းပြီးအ​တွေးနယ်​ချဲ့​နေစဉ်​တဖက်​ကုတင်​မှနန်းမြသီနိုးလာကာ​မေးလိုက်​ခြင်းဖြစ်​သည်​။
"နိုးဆို ညတည်းကအိပ်​မ​ပျော်​တော့တာ​လေ"
"ဟုတ်​လား...​နေမ​ကောင်းဖြစ်​ဦးမယ်​ဟာ...ပြန်​အိပ်​လိုက်​လေ...ခုမှ​လေးနာရီပဲရှိ​သေးတာကို"
"အိပ်​လို့ကိုမရ​တော့တာရှင်​...."
"ညတိုင်းဘုရားရှိခိုးပြီးမှအိပ်​တာကိုဘာလို့အိမ်​မက်​ဆိုး​တွေချည်းမက်​ပြီး​အော်​နေရတာလဲ...မဟုတ်​မှလွဲ​ရောတစ်​ခုခုများပူးကပ်​နေတာလား"
"​စော​စောစီးစီးဘာ​တွေ​လျှောက်​ပြော​နေတာတုန်း....မဟုတ်​တရုတ်​တွေဟယ်​"
"ဟုတ်​ပါတယ်​...စာမ​ဖြေခင်​ဆရာသမား​တွေနဲ့ပြကြည့်​ချင်​လား....ရှင်းသန့်​က ဒီမှာအသိမိတ်​ဆွေကများတယ်​လေ...သူစုံစမ်း​ပေးရင်​ရမှာ"
ဒီမိန်းမက​တော့...​သွေးမှာဘာကိစ္စပဲရှိ​နေ​နေ​နေရာတကာရှင်းသန့်​မှမပါရင်​မပြီးဘူးဟု ယူဆထားသလားမသိ။
"အဲ့လို​တွေမလုပ်​ချင်​ပါဘူး...ပြီး ယုံလဲမယုံတတ်​ဘူး...ဘုရားပဲယုံတယ်​"
တကယ်​တန်း​တော့ ဒီလိုမ​ကောင်းဆိုးဝါးပူးကပ်​တာမျိုးကျ​သွေး မယုံရဲ​ပေမယ့်​လို့ ရှိလဲရှိဖူးသည်​ကအမှန်​။ ခုဟာက​စော​စောစီးစီးကြီး တ​ရေးနိုးထ​ပြော​နေတဲ့ နန်းမြသီ​ကြောင့်​ကျောပင်​ချမ်းလာရသည်​။ မြန်​မြန်​စကားစပြတ်​သွား​စေရန်​သာ​ပြောလိုက်​ပေမယ့်​စိတ်​ထဲမှာအရပ်​ရှစ်​မျက်​နှာ​မြေ​ပေါ်​မြေ​အောက်​ကသက်​ရှိသက်​မဲ့​တွေက​တောင်းပန်​ပြီးသား။ ကိုယ်​တိုင်​ကြုံလာရမှာလဲ​ကြောက်​တယ်​လေ။ မယုံဘူးဆိုရင်​ပိုကပ်​တတ်​သည်​မဟုတ်​ပါလား။
"​အေး...​အေး..ရှင့်​အတွက်​ပြောတာပါ​တော်​....အိပ်​လိုက်​တော့...ရှင်​တော့မသိဘူး...ကျမ​တော့ညတိုင်းရှင်​ဘယ်​ချိန်​ထ​အော်​တတ်​တယ်​ဆိုတာသိတာနဲ့သန်း​ခေါင်​မ​ရောက်​ခင်​ကိုအရင်​နိုး​နေနှင့်​ပြီ"
"ခုက သန်း​ခေါင်​မှမဟုတ်​တာကိုရှင်​...ပြန်​အိပ်​လိုက်​ဦး...ကျမ မျက်​နှာသစ်​ပြီး စာခဏကြည့်​လိုက်​ဦးမယ်​"
ခုပဲစကား​ပြော ခုပဲအိပ်​ပျော်​သွား​လေ​သော နန်းမြသီအား​သွေးအားကျလွန်းပါသည်​။ သူ့မှာဘာအပူအပင်​မှ မရျှ​လေသလားမသိ။​သွေးတို့များ​ခေါင်းချတာနဲ့အိပ်​ပျော်​ဖို့ဆိုတာ လွယ်​ကူတဲ့ကိစ္စမဟုတ်​ဖူး​လေ။
​ပျော်​သလို ဟန်​ဆောင်​နေတာမဟုတ်​ပဲနဲ့ စိတ်​ရင်းနဲ့​တကယ်​ပျော်​နေပါ​စေ စစ်​က​လေး​ရေ..
ပြီး ကျန်းမာ​ရေးလဲအဆင်​ပြေပါ​စေကွယ်​...
...
ယမင်းရုပ်​သွင်​၂ ဆိုပြီး ထင်းရှူးသားသစ်​သားပြား​ပေါ်မှာ အနက်​ရောင်​စာလုံး​လေးကဝံ့ကြွားစွာ​နေရာယူလို့​နေသည်​။​ဈေးနဲ့လဲနီးပြီး လမ်းကလဲသာ အချက်​အချာလဲကျ၊ လမ်းသွယ်​လေးအစွန်​မှာဖြစ်​တဲ့အပြင်​တောင်​ထပ်​နေရာမြင့်​မြင့်​လေးကျ​နေ​တော့​နေရာ​လေးကသာယာလို့​နေသည်​။ အနက်​ရောင်​သံပန်းတံခါးက​တော့ ခုမှ​ဆေးသုတ်​ထားလို့လားမသိ။​ပြောင်​လက်​လို့​နေသည်​။
အဖြူ​ရောင်​ကား​လေးကဝင်းတံခါး​ရှေ့တည့်​တည့်​မှာ ငြိမ့်​ညောင်းစွာ ရပ်​လာသည်​။ ကားအ​နောက်​ခန်းမှ တံခါး​လေးဖြည်းညင်းစွာပွင့်​လာပြီး နက်​ပြောင်​နေ​သော လည်​သာရှူးဖိနပ်​လေးအရင်​မြေပြင်​ပေါ်ကျဆင်းလာသည့်​နောက်​တွင်​....။
"Wow....တကယ်​ဖြစ်​လာပြီပဲ....စိတ်​ကူးနဲ့တစ်​ထပ်​တည်းကျ​အောင်​ပြင်​ဆင်​ပေးထားလို့​ကျေးဇူးပါ မကြီးနဲ့ခဲအို"
ကား​ပေါ်မှ အနက်​ရောင်​မင်းသမီး​လေးအပြင်​နောက်​ထပ်​မိန်းမနှစ်​ယောက်​နဲ့​ယောကျာ်းတစ်​ယောက်​ဆင်းလာသည်​။ ဒါ​တွေကဘယ်​သူ​တွေလဲဆိုတာမိတ်​ဆက်​ပေးစရာမလို​တော့။ ခဲအိုဖြစ်​သူက ဝင်းတံခါး​သော့​လေးဖွင့်​ပေးရင်း
"အထဲဝင်​ကြည့်​ပါဦး....ကြိုက်​မကြိုက်​ဆိုတာအထဲ​ရောက်​မှ​ပြော​ပေါ့...လာ"
ဟု ဆိုကာ​ရှေ့ကပင်​ဦး​ဆောင်​၍ ဝင်​သွား​လေသည်​။ အလှပြု ပြင်​ခြင်းနှင့်​သက်​ဆိုင်​သော ပစ္စည်းပစ္စယ​တွေအကုန်​လုံးသူ့​နေရာနှင့်​သူ စီရရီရှိလို့​နေသည်​။ ဆိုင်​ခန်း​သေး​သေး​လေးထဲမှာ အကုန်​လုံးကစနစ်​တကျထားရှိမှု​ကြောင့်​သန့်​ရှင်း​သေသပ်​လွန်း​နေသည်​။
"မမစစ်​ဆိုင်​က​တော့ ရှယ်​ပဲ...နန်း​တော့ဒီကိုပဲ​ပြောင်းလာ​ရ​တော့မယ်​ထင်​တယ်​"
အဝါ​ရောင်​ကုတ်​အင်္ကျီထူကြီး​ဘေးအိတ်​ကပ်​ထဲလက်​နှိုက်​ရင်း နန်းကဆိုင်​ထဲကသ​ဘောကျစွာကြည့်​၍​ပြော​လေသည်​။
စစ်​ဘာမှမ​ပြောရ​သေးခင်​မကြီးက
"ဘယ်​ရမလဲ မိနန်းရဲ့...အသစ်​တွေ့လို့အ​ဟောင်းမ​မေ့ရဘူး​လေ....စစ်​မရှိ​တော့မကြီးဆိုင်​ကနန်းကိုပဲလက်​ထောက်​ချပြီးလုပ်​ရ​တော့မှာကို"
မကြီးစကား​ကြောင့်​စစ်​မျက်​နှာ အနည်းငယ်​ပျက်​ယွင်းသွားရ​သေးသည်​။ သို့​သော်​အတိတ်​ကအတိတ်​ပါပဲ​လေ။ ခုဆို သူလဲပဲတစ်​ခြားသူနဲ့ သာယာ​နေ​တော့မှာကို။ စစ်​ပုံစံမြန်​မြန်​ပြောင်းလိုက်​ပေမယ့်​နန်းကမျက်​စောင်းလှမ်းထိုးလိုက်​သည်​။
"သိပါတယ်​...မမစစ်​ကလဲ နန်းကိုမ​ခေါ်ချင်​ပါဘူး...ဆိုင်​ဟောင်းမှာလုပ်​တာကမှလစာတိုးဦးမယ်​...မမစစ်​ဆီမှာဆိုမုန့်​ဖိုးသာသာပဲရ​နေဦးမှာ...ဟွန့်​"
"ငါက မုန့်​ဖိုး​တောင်​စဉ်းစားပြီးမှ​ပေးမှာ..."
"ကြည့်​ပါလား...ကပ်​စီးနည်းမှာလူတိုင်းသိပါတယ်​တော်​..​နေပါ​ပြော.​တောင်​မ​နေနိုင်​ဘူး"
"ကဲ ...​နောက်​မှငြင်း​တော်​မူကြ...​နောက်​မှာကြည့်​စရာရှိ​သေးတယ်​"
နှစ်​ယောက်​သားအပြန်​အလှန်​စောင်းချိတ်​ရင်း မကြီး​နောက်​လိုက်​ရပြန်​သည်​။ ဆိုင်​ခန်းနဲ့ အိမ်​အကြား​မြေကွက်​လပ်​လေးတစ်​ခု။ ကားတစ်​စီး​တော့​ကောင်း​ကောင်းရပ်​လို့ရသည်​။​လျှောက်​လမ်း​လေးကို သဘာဝဆန်​ဆန်​ကျောက်​ပြား​လေး​တွေနဲ့ခင်းထားပြီး​ဘေးတွင်​ပန်းခြံအ​သေးစား​လေးလုပ်​ဖို့အုတ်​ဘောင်​လေး​တွေနဲ့ အကန့်​လိုက်​လုပ်​ထား​ပေးသည်​။ ဘာအပင်​မှ​တော့မစိုက်​ရ​သေး​ချေ။
​ဆယ့်​ငါး​ပေပတ်​လည်​သစ်​သားအိမ်​သေး​သေး​လေးတစ်​လုံး။ အမိုးကိုနိုင်​ငံခြားစတိုင်​ချွန်​ချွန်​လေး။ အထဲဝင်​တော့ တစ်​အိမ်​လုံးထင်းရှူးနံ​တွေသင်းလို့​နေသည်​။ အ​ပေါအထပ်​ခိုးတက်​မယ့်​လှေကား​သေး​သေး​လေး​ပေါ်သို့ စစ်​အရင်​ဆုံးတက်​လိုက်​သည်​။
လိုက်​ကာမတပ်​ရ​သေး​သော မှန်​ပြတင်း​ပေါက်​လေးတစ်​ခု။ သစ်​သားစားပွဲ​လေးတစ်​လုံး၊ တစ်​ခြားဘာမှမရှိ။ သစ်​သားကြမ်းပြင်​လေးက​ပြောင်​လက်​လို့​နေသည်​။ ရှူ မိလိုက်​တာနဲ့နှာ​ခေါင်းဝကိုတိုးဝင်​လာ​သောအနံ့​လေးကို စစ်​ချစ်​သည်​။ ပြတင်း​ပေါက်​လေးဖွင့်​တော့ပြင်​ပက​လေ​အေးတစ်​ချို့ အခန်းအတွင်းအစုအပြုံလိုက်​တိုးဝင်​လာ​တော့ကိုယ်​ကိုကျုံ့ပစ်​လိုက်​သည်​။ ပြတင်းက​နေလှမ်းမြင်​နေရ​သော မြို့ရှုခင်းကိုသ​ဘောကျစွာ ကြည့်​ပြီးပြုံးလိုက်​သည်​။
​မွေ့ယာ​လေးတစ်​လုံးဝယ်​ပြီးအ​ပေါ်တင်​မည်​။ ဒီ​နေရာက အိပ်​ယာသီးသန့်​။​နွေရာသီဆို​တောင်​အောက်​ကဖြတ်​တိုက်​လာတဲ့​လေ​အေး​အေး​တွေခံစားရင်း ပြတင်း​လေးဖွင့်​ကာအိပ်​မည်​။​ခုလို​ဆောင်းဆို​မွေ့ယာထူထူ​လေးနဲ့သစ်​သားခန်း​လေးထဲမှာအိပ်​မည်​။ ပြတင်းပိတ်​ထားရင်​နွေး​ထွေး​နေ​သောအခန်း​လေး။
ရှင်းသန့်​နေတဲ့​အောက်​ထပ်​လေးမှာ​တော့ ထမင်းချက်​ရာ​ရေချိုးခန်းအိမ်​သာကိုတကယ့်​တ​ယောက်​စာ​လေး​နေရာကျဉ်း​ပေမယ့်​သက်​တောင့်​သက်​သာဖြစ်​အောင်​ဖွဲ့ထား​ပေးသည်​။ အ​ပေါ်တက်​တဲ့သစ်​သား​လှေကား​အောက်​မှာစာအုပ်​စင်​လေးကပ်​ရက်​။
"သ​ဘောကျ​တော်​မူရဲ့လား"
"ကျဆိုစကားလုံး​တောင်​ရှာမ​တွေ့​တော့ဘူးမကြီးရာ..."
"တစ်​ယောက်​စာ​လေးပဲအကုန်​လုပ်​ပြီး အပိုဧည့်​သည်​တောင်​လက်​မခံဘူး​ပေါ့"
"ဟင့်​အင်း...ဒါ စစ်​ရဲ့ကိုယ်​ပိုင်​သီးသန့်​နေရာ​လေ...အမြဲ​တော့မ​နေပါဘူး...အ​မေစိတ်​မချဖြစ်​အောင်​မလုပ်​ရဲ​ပေါင်​..."
"ဟုတ်​ပါပြီ...ခု​တော့ပြန်​ရ​အောင်​မနက်​ဖြန်​အိမ်​သစ်​တက်​နဲ့ဆိုင်​ဖွင့်​ပွဲအတွက်​ပြင်​ရဦးမယ်​ဆို​တော့"
"စစ်​တွေးထားသလို​လေး​တွေလုပ်​မယ်​...အများကြီးပဲ"
'မမစစ်​ကလဲ​ရောက်​ရောက်​ချင်းနားလဲမနားပဲနဲ့....သူ့​နောက်​လိုက်​ရတာ​မောတယ်​...ဆိုင်​မှာဆို​စောင်​ပတ်​ပြီးလူမလာရင်​ကွေး​နေရုံ"
"ငပျင်းမ...လစာညာယူ​နေတယ်​မကြီး သတိထား"
ခဏကြာ​တော့ အသံစာစာ​လေး​တွေ​ပျောက်​သွားသည်​။ ကား​လေးတငြိမ့်​ငြိမ့်​နဲ့ခြံဝင်း​တွေ​သော့ခတ်​ပြီးထွက်​သွား​လေ​တော့သည်​။
...
"ဒီ​နေရာက​နေ လမ်းခွဲပြီးရင်​ကျ​နော်​တို့ဘယ်​တော့မှ ထပ်​ဆုံခွင့်​ရဦးမလဲ"
အ​အေး​ဗူးကို ဖွင့်​ဖောက်​ပေးရင်း ရှင်းသန့်​က​ဆွေးလျလျ​လေး​ပြောလာသည်​။ သူကမ်း​ပေးတဲ့​ဗူးကိုတစ်​ချက်​ယူ​မော့လိုက်​ပြီး
"ဘွဲ့ယူချိန်​တွေ့ရမယ်​လေ"
"မဟုတ်​ဖူး​လေ....ဒီအတိုင်း အပြင်​မှာ​ပြောတာပါ"
"​တွေ့ဦးမှာပါ...ရှင်းသန့်​လက်​ထပ်​ပွဲကျင်းပတဲ့အခါဖိတ်​လိုက်​ပေါ့....ဘယ်​ဆီမှာပဲ​ရောက်​နေ​နေ​ကျမကလာမှာ"
​သွေးစကား​ကြောင့်​နုပျို​နေတဲ့သူ့မျက်​နှာ​လေးအနည်းငယ်​အိုစာသွားသ​ယောင်​။ ခုချိန်​ထိလဲ အများအမြင်​မှာ​သွေးနဲ့ရှင်းသန့်​က ချစ်​သူ​တွေ။
"မ....မ​သွေး ရာ....ကျ​နော့်​ကိုဘာ​ကြောင့်​များငြင်းရတာလဲ​ဗျာ....ကျ​နော့်​ဖက်​ကများမ​သွေးချစ်​သူဖြစ်​ဖို့အတွက်​ဘာချို့ယွင်းချက်​တွေရှိ​နေခဲ့သလဲလို့"
"မရှိပါဘူး...အရင်​က​တော့ဘယ်​လိုစိတ်​မျိုး​တွေနဲ့ရှင့်​ကိုငြင်းပစ်​ခဲ့တာလဲ​တော့မမှတ်​မိ​တော့ဘူး...ဒါ​ပေမယ့်​ခုချိန်​မှာ​တော့ ပိုင်​နိုင်​သေချာတဲ့ဆုံးဖြတ်​ချက်​တော့ရခဲ့ပြီ"
သူ​သွေးရဲ့မျက်​နှာသို့​မျှော်​လင့်​ချက်​တွေတသီကြီးနဲ့အားကိုးတကြီးကြည့်​လာသည်​။ ဒါကိုမြင်​ရ​တော့​သွေးသည်​လဲပဲစိတ်​တော့မ​ကောင်း။
ချစ်​ခြင်းတရားကိုစတင်​လက်​ခံဖို့ဆိုတာ အားနာခြင်း​တွေနဲ့မှအစပြုလို့မရ​ပေပဲ​လေ။
"အခု ကျမ ရင်​ထဲမှာလူတစ်​ယောက်​နဲ့တင်​ပြည့်​သွားပြီ"
"​ဗျာ....အဲ့လူကဘယ်​သူဆိုတာ​ကော သိခွင့်​ရမလား"
တုန်​ယင်​စွာ​မေးလာတဲ့သူ့စကားကို​သွေးဘယ်​လိုပြန်​ချေကရမလဲမသိ။ အမြဲဂရုစိုက်​ပြီး​သွေးဆီကအချစ်​တွေကို စိတ်​ရှည်​ရှည်​နဲ့​စောင့်​ပေး​နေတဲ့သူ့ကို​တော့သနားမိပါရဲ့။ သနားစိတ်​နဲ့အချစ်​စိတ်​လွန်​ဆွဲတဲ့ပွဲမှာ နှလုံးသားက အချစ်​ကိုပဲဦးစား​ပေးဖြစ်​သည်​။
ကိုယ်​ရွေးချယ်​လိုက်​တဲ့လမ်းဟာ စိတ်​ကူးထဲမှာ​တောင်​လွယ်​ကူတဲ့လမ်းမျိုးမဟုတ်​ဖူးဆိုတာလည်းသိသည်​။
"ရှင်းသန့်​...ဒီ​လောကမှာကျမတို့​တွေစိတ်​တိုင်းကျ​ရွေးချယ်​နိုင်​တဲ့အရာ​တွေကဘာ​တွေဖြစ်​တယ်​လို့​တွေးမိလဲ"
"ကျ​နော့်အတွက်​တော့ ဘာမှမရှိခဲ့ဘူးလို့ပဲဆိုရမလား....ဒါ​ပေမယ့်​ရည်​မှန်းချက်​ပေါ့...​ကျောင်းလဲပြီး​ရော ကျ​နော်​ကျောင်းဆရာတစ်​ယောက်​ဖြစ်​ချင်​လာတယ်​...အိမ်​ကသိပ်​တော့သ​ဘောမကျခဲ့​ပေမယ့်​ကျ​နော့်​တသက်​စာ​ရွေးချယ်​မှုကို​တော့မကန့်​ကွက်​ခဲ့ဘူး...ဒီကျ​နော်​ရွေးလိုက်​တဲ့လမ်းမှာ​လျှောက်​နေရတာစိတ်​ချမ်းသာတယ်​...ပြီး​တော့​နောက်​တစ်​ခုက အချစ်​...ကျ​နော်​ဘဝတစ်​လျှောက်​လုံးအတွက်​ဆိုပြီးမ​သွေးကိုချစ်​တယ်​...မ​သွေးပြန်​မချစ်​လို့ဝမ်းနည်းတာ​တော့မှန်​ပေမယ့်​ကျ​နော့်​ကိုချစ်​ခွင့်​ပေးထားတဲ့အတွက်​ကျေးဇူးလဲတင်​တယ်​...ခုလိုမ​သွေး​ဘေးနား​နေခွင့်​ပေးထားတာကိုလဲ ကျ​နော်​ပျော်​တယ်​...ကျ​နော့်​နဲ့အနီးမှာမ​သွေးရှိ​နေရင်​စိတ်​ချမ်းသာတယ်​ဗျာ...မ​သွေးက​ကော"
"ကျမတို့​တွေ​မွေးလာတည်းက ဘယ်​မိသားစုထဲဝင်​စားမယ်​ဆိုပြီး​ရွေးချယ်​ခွင့်​မရခဲ့ဘူး...ကျ​မတို့လူဖြစ်​နေတုန်းမှာကိုယ်​တိုင်​ရွေးချယ်​စရာဆိုလို့ သူငယ်​ချင်း​တွေနဲ့ချစ်​သူပဲရှိတယ်​....ရှင်​ပြောသလိုပဲ အချစ်​ဟာကိုယ့်​ကိုစိတ်​ချမ်းသာ​စေတယ်​ဆိုရင်​ကိုယ်​လိုချင်​တဲ့ကိုယ့်​ကိုချစ်​ပြီးကိုယ်​ကလဲပြန်​ချစ်​တဲ့ထပ်​တူညီအချစ်​မျိုးနဲ့ဆို ဘယ်​လောက်​များ​ပျော်​စေလိမ့်​မလဲလို့...ကိုယ့်​မှာ​ရွေးချယ်​နိုင်​တဲ့အရာဆိုလို့အဲ့ဒါပဲရှိတယ်​လေ"
"ဒါဖြင့်​ကျ​နော်​ကျ​တော့​ရွေးချယ်​ခွင့်​တော့ရ​ပေမယ့်​ဘာလို့မပိုင်​ဆိုင်​ရတာလဲ​ဗျာ...ဒါ​တော့မတရားဘူး​နော်​"
"အခါအခွင့်​မသင့်​သေးလို့ပါ..ရှင်းသန့်​ရယ်​....လူဆိုတာဖြစ်​လာတာနဲ့ ကိုယ့်​ကံကြမ္မာကသတ်​မှတ်​ပေးထားတဲ့ပါရမီဖြည့်​ဖက်​ဆိုတာ လူတိုင်းမှာပါလာပြီးသားပါ အ​ကြောင်းကြုံကြိုက်​ဆုံရတဲ့အခိုက်​မှာ အခွင့်​သင့်​သလို​ပေါ်လာတတ်​တာမျိုးပါ....ဘယ်​သူမဆို ဘဝမှာကိုယ်​ကချစ်​ရပြီးကိုယ့်​ကိုလဲပြန်​ချစ်​တဲ့သူဆိုတာ တစ်​ခါမှာတစ်​ယောက်​လောက်​တော့ရှိလာဦးမှာပါ..."
"မ​သွေး​ပြောတာ​တော့ ကျ​နော်​သိပ်​နားမလည်​ဘူး...ဒါ​ပေမယ့်​လို့ကျ​နော်​က​တော့အချစ်​ဆိုတာချစ်​နေဖို့....မ​သွေးချစ်​သူရလို့လက်​ထပ်​သွား​တောင်​ကျ​နော်​ကချစ်​နေဦးမှာပဲ"
အမှန်​တော့ ဒါဟာမ​ကောင်းမှန်း​သွေးသိ​နေသည်​ပဲ။ ဟုတ်​တယ်​လေ။ ပိုင်​ရှင်​ရှိမှန်းသိသိကြီးနဲ့ချစ်​နေဦးမယ်​ဆို​တော့ ပစ်​မှားရာကျ​မ​နေဘူးလားလို့။ သို့​သော်​သူ့ကိုမတားရက်​။
"ကျမ မတားပါဘူး....နှလုံးသားဆန္ဒဆိုတာ လူကထိန်းချုပ်​လို့မှမရ​ပေပဲ​လေ....စိတ်​ရင်းအမှန်​နဲ့​တော့ဆု​တောင်း​ပေးချင်​မိတယ်​....ရှင်းသန့်​ကချစ်​တဲ့ ရှင်းသန့်​ကိုလဲချစ်​တဲ့သူတစ်​ယောက်​နဲ့မြန်​မြန်​လေးဆုံစည်းပါ​စေလို့"
"ဘယ်​တော့မှမပြည့်​နိုင်​တဲ့ဆုပဲဖြစ်​လိုက်​မယ်​မ​သွေးရာ...ဒီလိုတစ်​ဖက်​သတ်​ဖြစ်​ဖို့အတွက်​လဲကံတရားက ရှိလာပြီသားထင်​ရဲ့..."
အမြဲလို သွက်​လက်​တက်​ကြွပြီးလန်းဆန်း​နေတဲ့ သူ့မျက်​နှာ​ချော​ချောမှာ ဝမ်းနည်းအားငယ်​စိတ်​တွေကထင်​ဟပ်​လို့​နေသည်​။​သွေးလဲဘယ်​လို​ချေပစကားဆိုရမည်​မသိ​တော့ ငြိမ်​နေလိုက်​တော့သည်​၊ သူ့ကိုအားလဲနာသည်​။ ဒါမဲ့နှလုံးသားဆန္ဒကလဲတားမရတာ​တွေရှိ​သေးသည်​လေ။သူနဲ့ဆုံလိုက်​တိုင်း စစ်​ကိုပိုချစ်​တာ​သေချာလာသည်​။ သူ့ကိုမြင်​တိုင်းစစ်​ကိုသတိရသည်​။​
နေမှ​ကောင်းရဲ့လား က​လေးရယ်​....စာ​တွေကျက်​နေရ​တောင်​မင်းအ​ကြောင်း​တွေချည်းစိုးမိုး​နေလို့ စိတ်​နှစ်​ပြီးကျက်​လို့မရဘူးကွယ်​....စိတ်​တွေပူလိုက်​တာ​လေ...
....
ဒုတိယအပတ်​မလာခင်​အ​မေ့ကိုအပ်​ခိုင်းထားတဲ့ အင်္ကျီဖြူ​လေးကိုအသစ်​စက်​စက်​ထုတ်​ဝတ်​လိုက်​သည်​။ ည​ရေးပျက်​တာများတာ​ကြောင့်​အင်္ကျီကအနည်းငယ်​တောင်​ပွချင်​ချင်​။ ဒီ​နေ့ စာ​မေးပွဲ​ဖြေပြီးတာနဲ့ ဒီ​ကောလိပ်​ကြီးကိုနှုတ်​ဆက်​ရ​ပေ​တော့မည်​။
ဒီပညာသင်​နေစဉ်​ကာလအတွင်း​သွေးတအားရင်းနှီး​နေတာဆိုလို့ အခန်း​ဖော်​နန်းမြသီထက်​ရှင်းသန့်​မောင်​ကပိုလို့​နေသည်​။ ထူးထူးခြားခြား လွမ်းစရာဆိုလို့ သူပဲရှိသည်​ပဲ​လေ။
သူ့မှာလဲ​သွေးအမှားအယွင်းတစ်​ခု​ကြောင့်​နဲ့​သွေးချစ်​သူဖြစ်​နေရသည်​မဟုတ်​ပါလား။ သူ့အ​ကောင့်​မှာ relationship တင်​ထားတုန်း။​သွေးကိုဆိုပြီး ရည်​ရွယ်​ထား​ပေမယ့်​သွေးဖက်​မှာဘာမှတင်​မထား။ ပုံ​တော့ပြန်​ဖျက်​ထားဝည်​။ အရင်​ကအ​ပျော်​ရိုက်​ဖူးခဲ့​သောပုံ​တွေကသည်​အတိုင်း။
ညက စာကျက်​နေသဖြင့်​အိပ်​ရာဝင်​နောက်​ကျခဲ့တာ​တောင်​အိမ်​မက်​ဆိုးကမက်​ဖြစ်​အောင်​မက်​သေးသည်​။
အိမ်​မက်​ဆိုးတိုင်းမှာ စစ်​ဟာတစ်​ခုပြီးတစ်​ခုဆိုးဆိုးဝါးဝါးဖြစ်​နေခဲ့တာချည်း။ နိုးလာရင်​လဲ​ချွေး​တွေရွှဲနစ်​နေပြီး အသက်​ရှူ မဝသလိုအမြဲဖြစ်​နေခဲ့သည်​။
ဒါ​ကြောင့်​စာ​မေးပွဲကိုအမြန်​ပြီး​စေချင်​ပြီ။ ပြီးတာနဲ့စစ်​ဆီသွားမည်​။ အိမ်​မက်​ထဲကလို​သေကွဲမကွဲခဲ့ရင်​တောင်​ရှင်​ကွဲလဲမကွဲ​လို။​သွေး စစ်​အ​ပေါ်သိပ်​ချစ်​တဲ့အ​ကြောင်းကိုမျက်​နှာချင်းဆုံပြီး​သေ​သေချာချာ​ပြောပြချင်​သည်​။ ပြီး​တော့ စစ်​လိုချင်​တဲ့ အနမ်း​လေးလဲ​ပေးချင်​သေးသည်​ပေါ့။
စစ်​နဲ့​တွေ့ရင်​ဆိုပြီးလဲ အမြဲစိတ်​ကူးယဉ်​တတ်​နေခဲ့ပြီ။
စိတ်​ထဲမှလည်း စစ်​ခွင့်​လွှတ်​ပါ​စေဟု အထပ်​ထပ်​အကြိမ်​ကြိမ်​ဆု​တောင်းရင်း​...။
"ဟယ်​...​သွေး...ဘာလို့ ပါးကွက်​ကြားကြီးနဲ့တုန်း"
အမြဲလိုလို အခန်းထဲဝင်​ရင်​တံခါးမ​ခေါက်​တတ်​တဲ့နန်းမြသီ​ကြောင့်​အ​တွေးလွန်​နေတဲ့​သွေးထိတ်​ခနဲလန့်​သွားရသည်​။
"လန့်​အောင်​သိပ်​လုပ်​တာပဲ...​အေး​ဆေး​ပြောလဲရသားနဲ့ကို"
"အကျင့်​ပါ​နေလို့ပါ​တော်​...ရှင်​ကလဲအ​တွေးလွန်​လွန်း​နေတာကြီး"
"မ​တွေးလဲရုတ်​တရက်​ဆိုလန့်​တာပဲ​လေကွယ်​"
"အဲ့ဒါထားဦး...ပုံရိုက်​မှာဆိုရင်​သနပ်​ခါးပါးကွက်​နဲ့ဆိုမလှဘူး​လေဟယ်​...နည်းပါးမိတ်​ကပ်​လေးလိမ်းပါဦးဆို"
"ဘာဖြစ်​လို့လဲ ကျမနဲ့မတည့်​ဘူး မိတ်​ကပ်​တွေ က"
"တစ်​ခါ​လေးပဲကို...ပုံရိုက်​ပြီးတာနဲ့တန်းဖျက်​မှာ​လေ..အရင်​အပတ်​စဉ်​တွေထဲကအတွဲပုံ​တွေကြည့်​ပါလား...အလန်​စ​လေး​တွေကို....ခုအပတ်​စဉ်​ကျမှ ရှင်​ကပါးကွက်​နဲ့ဆိုမလှဘူးပ"
"ဒါဖြင့်​ရင်​တခြားသူ​ရွေး​ပေါ့...ကျမထက်​လှတဲ့သူ​တွေမှပုံလို့ကို....စတည်းက​ပြောပြီးသား​နော်​...လက်​မခံချင်​ပဲငြင်းမရလို့လက်​ခံထားတာလို့...ဟိုဟာလုပ်​ဒါလုပ်​လို့ခိုင်းရင်​တော့မရိုက်​ဘူး...ဘယ့်​နှယ်​အေးက​အေးနဲ့ကို....အဖြူအစိမ်းနဲ့ချည်းရိုက်​ရမယ်​ဆို​တော့ ဒုက္ခ​ရောက်​လွန်းတယ်​"
"သ​ဘောရှိပါ​အေ...မ​ပြော​တော့ဘူး ဆံထုံး​လေး​တော့ကျမထုံး​ပေးပါရ​စေ...ငြိမ်​ငြိမ်​လေးခံ​တော်​မူ"
​သွေးကုတင်​ပေါ်တက်​လာပြီး​သွေး​နောက်​မှ​နေ၍ ဆံပင်​ထုံး​ပေး​နေ​လေသည်​။
အပတ်​စဉ်​တစ်​ခုပြီးတိုင်း​ကျောင်းသား​ကျောင်းသူ​တွေကgroupဖွဲ့ထား​နေကျ​လေ။ အဲ့မှာ​ပေါ်ပြူလာ​အတွဲကိုပုံတင်​ဖို့ဆိုပြီး​သွေးနဲ့ရှင်းသန့်​ကိုကမ်းလှမ်းလာတာပင်​။​သွေးကဘာမှမဟုတ်​ပေမယ့်​လို့ လူအများကြား​ရေပန်းစားနဲ့ရှင်းသန့်​ကြောင့်​အလိုလို​နေရင်းကို လူ​တွေသိ​နေကြတာ။ ဒီကြားထဲ ဘယ်​သူ​တွေလက်​ကမြင်းထားလဲမသိ။ we love ရှင်းသန့်​မောင်​&​သွေး ဆိုတဲ့ ဂရုပါရှိ​နေ​သေးတာ။ ဖျက်​ခိုင်းလဲမရ။ ဒါ​ကြောင့်​သွေးနဲ့ရှင်းသန့်​ဆက်​ဆံ​ရေးကိုအလွယ်​တကူဖျက်​ချလို့မရ​လေ​တော့ နှစ်​ယောက်​သားပဲပွင့်​လင်းမှုယူလိုက်​ပြီးကျန်​သူ​တွေဘာလုပ်​လုပ်​အမှုကိုထားမ​နေ​တော့တာ။ ဒီ​နေ့​နောက်​ဆုံး​နေ့ဆို​တော့စာမ​ဖြေခင်​နှင်း​တွေကျ​နေတုန်း​ကျောင်းအ​ရှေ့မှာ ပုံရိုက်​ချင်​လို့တဲ့။ ပုံရိုက်​သူကလဲသင်​တန်းနည်းပြဆရာတစ်​ယောက်​ဆို​တော့ငြင်း၍မရ။ ချည်​ပြီးတုပ်​ပြီးမှ​ခေါ်​လေ​တော့ အကျပ်​ရိုက်​။စိတ်ကမပါနဲ့။ တမင်​တကာသနပ်​ခါးပါးကွက်​ကိုလိမ်းပစ်​သည်​။ ပြီးရင်​သွေးတို့အတွဲပုံ​တွေ​နေရာတကာမှာမြင်​နေရပါဦးမည်​။
အ​ဝေးက ချစ်​ရသူက​တော့ဘယ်​လောက်​တောင်​မှ​သွေးကိုမုန်းတီး​နေမည်​မသိ၊
....
အထုတ်​တွေအပြည့်​နဲ့ပြန်​လေ​တော့ ရှင်းသန့်​ကသူ့ကားနဲ့ဂိတ်​ထိလိုက်​ပို့​ပေးသည်​။
ပြတင်းအပြင်​ဖက်​သို့​ငေးရင်းပါလာ​သော​သွေးအားအရိပ်​တကြည့်​ကြည့်​နဲ့ဖြစ်​နေပြီးတစ်​ခုခု​ပြော​ချင်​သလိုမို့လို့
"ရှင်းသန့်​ဘာ​ပြောချင်​လို့လဲ"
​သွေးကပဲအစ​ပျိုး​ပေးလိုက်​ရသည်​။
"ကျ​နော်​တို့နှစ်​ယောက်​ကို သူများ​တွေအထင်​လွဲ​နေတာဘယ်​လို​ဖြေရှင်းရမလဲလို့ပါ...ကျ​နော့်​ဖက်​က​တော့ တကယ်​လဲချစ်​နေ​တာမို့ကိစ္စမရှိ​ပေမယ့်​မ​သွေးဖက်​ကျမ​ကောင်းဘူး​လေ..အဲ့ဒါ"
ပွင့်​ပွင့်​လင်းလင်းနဲ့သူ့စိတ်​ထဲရှိတဲ့အတိုင်း​ပြောတတ်​တဲ့ရှင်းသန့်​။ ဟုတ်​တာ​ပေါ့။ သူကချစ်​နေရသူဆို​တော့သူများ​တွေ​ပြော​နေကြတာကို အပြုံးနဲ့ရင်​ဆိုင်​နိုင်​တာ​ပေါ့။ မိန်းက​လေးဖြစ်​တဲ့​သွေးမှာသာ ချစ်​သူလဲရှိပြီးသား။ ရှိတဲ့ချစ်​သူကလဲမုန်းသွား​လေပြီ။​ဖြေရှင်းဖို့နည်းလမ်းကလဲဘာမှရှိမ​နေ။ မိမိ​ကြောင့်​ဖြစ်​ခဲ့တာချည်းမို့လို့ ကိုယ့်​ဖက်​ချည်းပဲကြည့်​ပေးလို့ကလဲမရ​တော့။
"ရပါတယ်​...စိတ်​ထဲမထားပါနဲ့...ကျမအဆင်​ပြေတယ်​...ကျမအမှား​ကြောင့်​လေ"
"မဟုတ်​တာ​ဗျာ....လူ​တွေကလဲနည်းနည်းဆိုများများပွားဖြစ်​ရမှ...တဖက်​သားကဘယ်​လိုဆိုတာကျအ​သေအချာမသိပါပဲနဲ့"
"အချိန်​တန်​ရင်​သူ့အလိုလိုပြီးသွားမှာပါ...အပြစ်​လဲမတင်​ပါနဲ့...သူတို့အမှားလဲမှမဟုတ်​တာကို​လေ....ဒီအတိုင်းကြာလာရင်​မေ့သွားမှာ...စကားစပ်​မိမှပဲဒီအ​ကြောင်း​တွေပြန်​သတိရကြမှာပါ"
"မ​သွေး​ကော....ကျ​နော့်​ကိုစကားစပ်​မိမှပဲသတိရမယ်​မလား"
"မဟုတ်​ပါဘူး...ရှင်းသန့်​က ကျမအတွက်​အ​ကောင်းဆုံးသူငယ်​ချင်း​လေးပါ...အမြဲသတိရ​နေမှာပါ...ဘွဲ့ယူရင်​လဲ​တွေ့ရဦးမှာ​လေ"
"​ကျေးဇူးပါ​ဗျာ...ကျ​နော့်​ကိုမုန်းမသွားလို့"
အထူးအဆန်းစကားသဖွယ်​ပြောလိုက်​သည်​မို့​သွေးမျက်​ခုံးပင့်​ပြီး သူ့ကိုကြည့်​လိုက်​သည်​။
"ဘာကိစ္စမုန်းရမှာလဲ"
"ဒီလို​လေ..မ​သွေးကမချစ်​ဖူးလို့ငြင်းထားတာ​တောင်​ကျ​နော်​ကချစ်​နေတယ်​လေ....တစ်​ချို့​ကောင်​မ​လေး​တွေဆိုပါးချပြီးအပြီးတိုင်​မုန်း​တော့မှာ​ဗျ"
"ဪ...ဒါ​တော့ ဘယ်​တတ်​နိုင်​မလဲ...ကိုယ့်​ကိုချစ်​တာနဲ့မုန်းစရာလား...ချစ်​ကံရှိလို့ချစ်​ခွင့်​ရှိ​နေ​သေးတာ...ကံမရှိ​တော့ရင်​ချစ်​ပါဆိုပြီးကျမကအတင်းလိုက်​ကပ်​နေရင်​တောင်​ရှင်​ကချစ်​တော့မှာမဟုတ်​ဖူး"
​ပြော​နေရင်း စစ်​မျက်​နှာ ဖျပ်​ခနဲ​ပေါ်လာသည်​၊ စစ်​အတင်း​တွေသူမကိုချစ်​နေတုန်းက သူမဂရုမစိုက်​မိ။ ဒီချိန်​မှသူမဖက်​ကအရူးအမူးချစ်​မိလာမှ အဆုံးရှုံးမခံနိုင်​ဖြစ်​လာမှ စစ်​ဖက်​ကအဆက်​အသွယ်​ကိုမလုပ်​တော့။ သိသိသာသာကြီး​သွေး​အေးတိတ်​ဆိတ်​နေသည်​။
ချစ်​ကံရှိတုန်းချစ်​ပေးခဲ့ပြီး သူမကပြန်​ချစ်​ကာမှ စစ်​ဖက်​ကချစ်​ကံမရှိ​တော့သည်​များလား။
စကားကိုပင်​ဆက်​မ​ပြောနိုင်​တော့​လောက်​အောင်​ရင်​ဘတ်​ထဲ​အောင့်​တက်​လာသည်​၊ တကယ်​များ​ဝေးသွားခဲ့လျှင်​.......
ငြိမ်​သက်​သွား​သော​သွေး​ကြောင့်​ရှင်းသန့်​စိတ်​ပူသွားဟန်​တူသည်​။ ကားကို လမ်း​ဘေးထိုးရပ်​လိုက်​ပြီး
"အဆင်​ပြေရဲ့လား...မ​သွေး....ကျ​နော်​မှားသွားလားဟင်​....မှားလဲမှားတာ​ပေါ့...ဒါ​ပေမယ့်​ချစ်​နေတာကိုမချစ်​ဖူးလို့လဲမညာဝံ့ဘူး...နှလုံးသားကိုညာရင်​အကြိမ်​တရာမကစိတ်​ဆင်းရဲရတတ်​လို့"
ကျလုလုမျက်​ရည်​တစ်​ချို့က​ခေါင်းငုံ့ကာမျက်​တောင်​ခတ်​၍ သိမ်းဆည်းပြီး နှုတ်​ခမ်းထက်​အပြုံးဖန်​ဆင်းကာ
"ရှင်းသန့်​မမှားပါဘူး....ရှင်​ကသိပ်​ချစ်​ပေးတာ​တောင်​ကျမကရှင့်​ကိုပြန်​ချစ်​လို့မရဘူး​လေ...အဲ့အတွက်​စိတ်​မ​ကောင်းဖြစ်​နေမိတာပါ..."
"ဟာ​ဗျာ...ကျ​နော်​ပြောသလိုပဲ​လေ...နှလုံးသားကိုမညာရဘူးလို့....မ​သွေးမှာလဲချစ်​ရသူ​ပေါ်လာဦးမှာ...သူ့အတွင်​ပဲထားလိုက်​ပါ...စိတ်​ချလက်​ချနဲ့..စိတ်​သန့်​သန့်​နဲ့​ပေါ့"
အမယ်​...သူကပဲပြန်​အား​ပေးတယ်​ရှိရ​သေး။
"သံသရာဆိုတာ အမြဲလည်​နေတာမလား.....အခြားတစ်​ကွေ့မှာပြန်​တွေ့ခဲ့ရင်​ရှင်းသန့်​ချစ်​သူဖြစ်​ပေးပါမယ်​"
​သွေးစိတ်​ထဲမှာ ဘယ်​သူနဲ့ဆိုပြီးသံသရာအဆက်​ဆက်​ပါရမီဖြည့်​ဖက်​ဆိုပြီး​တွေးမထား။ စစ်​ကို​ကော​ပေါ့။
​သွေး အဆင်​ပြေမှန်းသိ​တော့ သူကကားပြန်​မောင်းထွက်​ရင်း
"ဒါဖြင့်​ရင်​ကျ​နော်​အရင်​သွား​စောင့်​နေ​တော့မယ်​ဗျာ"
ငြိမ်​သက်​သွားတဲ့အ​ခြေအ​နေကို ပြန်​ထိန်းတဲ့သ​ဘောနဲ့ ရှင်းသန့်​က​ပြောင်​ချော်​ချော်​ပြောရင်းသူ့ဟာသူရီ​နေ​လေ​တော့​သွေးလဲစိတ်​ပေါ့​စေရန်​လိုက်​ရီလိုက်​ပြီး
"လုပ်​ပါနဲ့ကွယ်​...ခက်​ခဲ​ဒေသက က​လေး​တွေကိုစာသင်​ပြီးကုသိုလ်​ယူပါဦး...ရှင်​နဲ့အတူငရဲပြည်​တော့ကျမမလိုက်​ဘူး​နော်​"
"ဟုတ်​ပါပြီ​ဗျာ...နတ်​ပြည်​ပဲ​ခေါ်မှာပါ​ဗျ"
တရိပ်​ရိပ်​ကျန်​ခဲ့တဲ့ လွမ်းစရာ့နယ်​မြေ​လေးတစ်​ခုလဲ ဒီလားရှိုး​မြေကဖြစ်​ခဲ့​သေးသည်​ပဲ။ တကြိမ်​တော့ထပ်​လာရဦးမည်​။ သို့​သော်​သွေးစိတ်​ထဲမှာဒီမြို့​လေးကိုခွဲခွာလာရတာ​နောက်​ဆုံးသ​ဘောလိုမျိုးရင်​ထဲနင့်​နေ​အောင်​လွမ်းမိသလို။​ဘေးကကား​မောင်း​နေတဲ့ လူ​ချော​ကောင်​လေးကို​ကော​ပေါ့။ သူသတိမထားမိတဲ့အချိန်​တွေဆို​သွေးကြည့်​နေမိသည်​။ သူ့ကိုလဲထပ်​ပြီးမ​တွေ့နိုင်​တော့တဲ့လူတစ်​ယောက်​လိုမျိုးခံစားလို့ရ​နေသည်​။
အိမ်​မက်​ထဲကစစ်​နေရာမှာ သူများဖြစ်​နေခဲ့ရင်​ဆိုတဲ့အ​တွေးကလဲဝင်​လာ​တော့ ကားထွက်​ကာနီးအထုတ်​တွေတင်​ပြီး လူလဲအ​ပေါ်​ရောက်​ပြီးမှလက်​ပြ​နေတဲ့သူ့ဆီသို့ ထပ်​ဆင်းလာလိုက်​သည်​။
"ဟင်​...ဘာလို့လဲ မ​သွေး....ဘာလိုလို့လဲ"
ရုတ်​တရုတ်​တက်​ထိုင်​နေပြီးမှပြန်​ဆင်းလာတာမြင်​တော့အံ့သြ​နေ​လေသည်​။​သွေး ဘာမှမ​ပြောပဲ သူ့ကိုဖက်​လိုက်​သည်​။ အရပ်​ရှည်​တဲ့သူ့ကိုဖက်​ရသည်​မှာခါးပတ်​လည်​သာ။
သူက​တော့ပြန်​ဖက်​ရမလို ဒီအတိုင်းပဲဂပ်​နေရမလိုနဲ့ဒုက္ခ​ရောက်​နေမှာအမှန်​။
အဖြူ စင်​ဆုံးစိတ်​နဲ့​နောက်​ဆုံးအကြိမ်​ဆိုရင်​တောင်​ပွေ့ဖက်​ပြီးနှုတ်​ဆက်​ခွင့်​လေး​တော့ရခဲ့ချင်​သေးတာ​ပေါ့။ ကိုယ့်​အ​ပေါ်​ကောင်း​ပေးခဲ့တဲ့သူပဲ​လေ။
ကားဂိတ်​နားရှိတဲ့လူ​တွေ​တော့ ရှပ်​အင်္ကျီအနက်​ကွက်​ကြား​လေးနဲ့ကချင်​ပုဆိုးတွဲဝတ်​ထား​သော​ကောင်​ချော​လေးအားလည်း​ကောင်း၊ ရှမ်းထမီနဲ့ အဖြူ​ရောင်​အ​နွေးထည်​ဝတ်​ထားတဲ့​ကောင်​မ​လေးကိုလည်း​ကောင်းကြည့်​နေကြပြီးအကဲပိုတဲ့အတွဲ​လေးအဖြစ်​ထင်​ကောင်းထင်​နေလိမ့်​မည်​၊ ကား​ပေါ်မှာလဲသီ​ပေါ​ကျောက်​မဲဖက်​က​ကျောင်းလာတက်​တဲ့​ကောလိပ်​က​သွေးတို့လို​ကျောင်းသူ​တွေလဲရှိ​နေသည်​လေ။
ဒါ​တွေ​သွေးဂရုမစိုက်​။ တစ်​ခုခုကိုဆုံးရှုံးရ​တော့မည့်​ပုံစံမျိုးလို့ ရင်​ထဲမှာလှိုက်​၍ လှိုက်​၍ နင့်​နေ​အောင်​ကြေကွဲနာကျင်​ရသည့်​ခံစားချက်​မျိုးမို့လို့ ငိုလဲငိုချင်​နေပြီ။ မျက်​ရည်​တစ်​ချို့လဲကျ​နေပြီ။
အတန်​ကြာဖက်​ထားပြီးမှ လက်​ကို​ဖြေလွှတ်​လိုက်​ပြီးသူ့​ဂှေ့တည့်​တည့်​ရပ်​သည်​။
"ရှင်းသန့်​ဒီကအပြန်​ကားကိုဂရုစိုက်​မောင်း​နော်​...ကျန်းမာ​ရေးဂရုစိုက်​...ဒဏ်​ရာအနာတရလဲမဖြစ်​စေနဲ့....ကျမတို့ထပ်​ဆုံချင်​သေးတယ်​"
​သွေးစကားကို နားမလည်​သလို​ကြောင်​ကြည့်​နေသည်​။​သွေးမျက်​ရည်​တွေမြင်​တာနဲ့သူမျက်​နှာပျက်​သွားသည်​။ ထို့​နောက်​လက်​က​လေးကမျက်​ရည်​သုတ်​ဖို့​သွေးမျက်​နှာ​ရှေ့​ရောက်​လာ​တော့​သွေးကိုယ်​တိုင်​အရင်​သုတ်​ပစ်​ရင်း
"ဂရုစိုက်​ပြီး​နေ​နော်​....ကျမ ရှင့်​ကိုသတိရ​နေပါ့မယ်​..."
သူ​ကြောင်​အ​နေတုန်းချာခနဲလှည့်​ထွက်​မည်​ပြင်​တော့မှ​သွေးလက်​တစ်​ဖက်​လှမ်းဆွဲထားသည်​။ ပြီး​တော့
"ဟို..မ​သွေး...ကျ​နော့်​ကို...."
"ဟင့်​အင်း...ရှင်​ထင်​သလိုမဟုတ်​ဖူး...ဒီတစ်​ခါ​ပွေ့ဖက်​တာကစိတ်​သန့်​သန့်​နဲ့ပါ...သူငယ်​ချင်း​တွေခွဲခွာသလိုမျိုး​ပေါ့"
သူ ကားထဲက maskတစ်​ခုယူပြီး​သွေးမျက်​နှာမှာတပ်​ပေးလိုက်​သည်​။
"မျက်​ရည်​စီး​ကြောင်း​တွေနဲ့ကား​ပေါ်တက်​သွားရင်​လူ​တွေကြည့်​နေလိမ့်​မယ်​....မ​သွေးရဲ့....ဂရုစိုက်​ကျ​နော်​လဲအမြဲလွမ်း​နေမှာပါ....ပြန်​ဆုံဖို့ရက်​တွေ​ရေ​တွက်​နေပါ့မယ်​"
သူ့စကားဆုံးတာနဲ့ကား​ပေါ်ပြန်​တက်​လာ​တော့ကား​ပေါ်ကလူ​တွေကြည့်​နေကြသည်​ကို မသိဟန်​ဆောင်​ကာ ထိုင်​ခုံမှာဝင်​ထိုင်​ပြီးမျက်​လုံးမှိတ်​လိုက်​သည်​။ ကားစထွက်​ခွာစဉ်​မှာ​တောင်​ရှင်းသန့်​ကိုလှည့်​မကြည့်​ဖြစ်​တော့။ သူမတို့ပုံက​တော့ ဂရုမှာတက်​လာဦးမည်​မှာအမှန်​။ ကား​ပေါ်က​ကောင်​လေးတစ်​ယောက်​ရိုက်​နေသည်​လေ။
ဘယ်​လိုပဲဖြစ်​ဖြစ်​သူအန္တရာယ်​ကင်းပါ​စေ။
....
အရင်​ကဆို သည်​လိုနှင်း​တွေကြားမှာ နှင်းဆီခင်းထဲရှိ​နေရခြင်းကို​သွေးသိပ်​သ​ဘောကျ​တာ။ ခု​တော့​ကျောင်းကပြန်​လာပြီးလဲငြိမ်​သက်​နေသည်​။ စိတ်​ခံစားချက်​မရှိသလို။
မျက်​လုံး​တွေလဲအရင်​လိုမ​တောက်​ပ​တော့​မှေးမှိန်​နေသည်​။ အ​ဖေတစ်​ခါတ​လေအရက်​မူးလာရင်​ခွန်းတုံ့ခွန်းပြန်​ပြောလို့​သွေးနဲ့စကားများ​နေကျ။ ခု​တော့အ​ဖေဘယ်​လိုပဲပြသနာရှာရှာ​ခေါင်းငုံ့ခံသည်​။ သူ့ဖုန်း​တွေအငယ်​တွေဘယ်​လောက်​ယူသုံးသုံး​အော်​ဟစ်​ဆဲဆိုမ​နေ။
သူ့​ကျောင်းကသတင်း​တွေ ကြားပါသည်​။​သွေးနဲ့​ကောင်​လေးတစ်​ယောက်​ချစ်​သူဖြစ်​နေတဲ့အ​ကြောင်း။​သွေးတို့အတွဲပုံ​လေး​တွေကိုအ​တော်​များများရဲ့ပရိုဖိုင်​တွေဂရု​တွေမှာမြင်​နေရသည်​။ မပြန်​ခင်​လေးကားဂိတ်​မှာဖက်​နေတာ​တောင်​မှပုံကပါလာ​သေးတာ။
ရည်းစားတစ်​ခါမှမထားဖူး​သေးလို့အချစ်​ဦး​လေးကိုခွဲခွာရခက်​ခဲ​နေ​လေသည်​လား။
ညီမဖြစ်​သူကို ကြည့်​ပြီး ကိုဟိန်းတစ်​ယောက်​အားမရ။​မေးမယ်​မေးမယ်​နဲ့လူမလစ်​တော့မ​မေးရ​သေး။ ခု​တော့ အ​ဖေနဲ့အ​မေက တဲဖက်​မှာမို့ ပန်းညှပ်​နေတဲ့​သွေးကို​မေးရန်​စကားစလိုက်​သည်​။
"​သွေး...ဘာဖြစ်​နေတာလဲ"
ကြည့်​ပါလား။ တိတ်​ဆိတ်​နေတဲ့ပတ်​ဝန်းကျင်​မှာ သူနဲ့ကိုယ်​နှစ်​ယောက်​တည်းရှိပါလျက်​နဲ့​မေး​နေတာကိုကြားပုံမ​ပေါ်။
"ဟဲ့...မ​သွေး...ကြားရဲ့လား"
ခပ်​ဆတ်​ဆတ်​အော်​ချလိုက်​မှ မျက်​စိပြူးပြီးလှည့်​ကြည့်​သည်​။
"ဘာဖြစ်​နေတာလဲလို့​ခေါ်မကြား​အော်​မကြား"
"ပန်းညှပ်​နေတယ်​လေ....ဘာ​ပြောလိုက်​တာလဲ"
"ဘာဖြစ်​နေတာလဲ"
သူ့စကားအဓိပ္ပါယ်​ကိုနားမလည်​သလိုမျက်​လုံး​ပေကလပ်​ပေကလပ်​နဲ့ကြည့်​ပြန်​သည်​။ ခါတိုင်းလိုသာဆို ထိပ်​ထုပစ်​မှာ။
"ရည်းစားကိုခွဲရလို့မှိုင်​တွေ​နေတာလား တစ်​ခါတည်းမှိုင်​ပြ​နေတာ တရက်​လဲမကနှစ်​ရက်​လဲမက မြင်​နေရတာစိတ်​မချမ်းသာဘူးတကယ်​"
ရည်းစားဆိုတဲ့စကား​ကြောင့်​ပြောကာမှပဲ ပိုမှိုင်​သွားသလို။ မျက်​ရည်​တောင်​ဝိုင်းလာသလို အကြည့်​တွေလွှဲသွားသည်​။
"မဟုတ်​ပါဘူး"
"ဘာဖြစ်​နေတာလဲနင့်​ပုံ​တွေမြင်​တယ်​နော်​...အဲ့​လောက်​ပွထ​နေတာ​တော့မ​ကောင်းဘူး"
"အဲ့ဒါအမှန်​မဟုတ်​ပါဘူး သူများ​တွေတင်​တာပါ...ပြီး ရှင်းသန့်​က​သွေးချစ်​သူမဟုတ်​ပါဘူး"
"အမ်​...ဘာလို့လဲ...မကြိုက်​ကြပဲသူများ​တွေလဲတင်​ကြသလား...​နေပါဦး ဒါဆိုခုနင်​ကဘာဖြစ်​နေတာလဲ"
​မေး​နေတာကို မ​ဖြေပဲ လက်​ထဲကပန်းခက်​တစ်​ချို့ကို တစ်​နေရာမှာသွားပုံလိုက်​သည်​။ သူလဲထပ်​မ​မေး​တော့။ တစ်​ခုခု​တော့ဖြစ်​နေတာ​သေချာသည်​။ မ​ဖြေချင်​တာလား။​ဖြေဖို့အ​ဖြေမရှိတာလားမသိ​တော့တာမို့ ကိုယ့်​အလုပ်​ကိုယ်​ပဲ ပြန်​လုပ်​နေရ​တော့သည်​။
....
"ဘာ....​တောင်​ကြီးသွားချင်​လို့ ဟုတ်​လား"
သရက်​ပင်​အောက်​မှာ မီးဖို​လေးဖိုပြီး ည​နေ​စောင်းမိသားစုဝိုင်းဖွဲ့ကာမီးလှုံ​နေတုန်း အ​ဖေ့အသံကဟိန်း၍ထွက်​လာသည်​။
"ဘာသွားလုပ်​မှာလဲ​သွေးရယ်​"
"ကိစ္စ​လေးတစ်​ခုရှိလို့ပါ...အ​ဖေနဲ့အ​မေ"
အိမ်​မက်​တွေသိပ်​မက်​ပြီး စစ်​အတွက်​စိတ်​ပူ​နေမှု​တွေပိုပြီး ဆိုးလာ​တော့​သွေး စစ်​ကိုသွား​တွေ့ချင်​စိတ်​က တားမနိုင်​ဆီးမရဖြစ်​လာတာမို့​ဖွင့်​ပြောဖြစ်​သည်​။
ကိုဟိန်း​တော့ သူ့ဂျူတီကျတာမို့လို့ အိမ်​မှာမရှိ။
"ဘာများအ​ရေးကြီးလို့လဲ​နောက်​လပဲဘွဲ့ယူရ​တော့မှာကို...အလကားပိုက်​ဆံကုန်​အောင်​လုပ်​ချင်​နေတယ်​"
"မကုန်​ပါဘူး အသွားအပြန်​လမ်းစရိတ်​ပဲကုန်​မှာ အ​ဖေတို့​ပေးစရာမလိုဘူး​သွေးမှာရှိတယ်​"
​ကျောင်းတက်​တုန်းကပိုက်​ဆံ​တွေမသုံးရက်​ပဲစုထားခဲ့သည်​ကခုမှအသုံးဝင်​မယ့်​ကိန်း။ အ​ဖေ​တော့ခွင့်​ပြုမယ့်​ပုံမ​ပေါ်။ အ​မေကလဲ
"ဟုတ်​သားပဲကွယ်​...ဘွဲ့ယူပြီးအလုပ်​ခွင်​ဝင်​ရ​တော့မှာကို ဘာလို့ သွား​နေဦးမှာလဲ...ဘယ်​လောက်​များအ​ရေးကြီး​နေလို့လဲကွယ်​"
"အ​မေရယ်​...ဘယ်​လောက်​အ​ရေးကြီးလဲဆိုရင်​သွေးရဲ့​သေ​ရေးရှင်​ရေးကိစ္စထက်​တောင်​အ​ရေးကြီးပါတယ်​"
အ​ဖေ့တို့​ရှေ့မှာလဲမရှက်​တော့။ တနုံ့နုံ့နဲ့ရင်​ထဲမှာ ခံစား​နေရတာ​တွေက များသထက်​များလာ​တော့နှလုံးသားမှာဒဏ်​ရါ​တွေပဲဆင့်​ကာထပ်​လို့။
"ခရီး​ဝေးကြီးကွယ်​...​တော်​ကြာတစ်​ခုခုဖြစ်​နေပါဦးမယ်​...ဆရာမဖြစ်​ကာနီးမှကို...ဘာကိစ္စများလဲ"
"ကိုယ်​ရေးကိုယ်​တာပါ အ​မေ...အ​ဖေ့ကိုကူ​ပြော​ပေးပါဦး...သိပ်​မကြာပါဘူး...အသွားတစ်​ရက်​အပြန်​တရက်​ပဲကြာမှာပါ....​နော်​အ​မေ..ခွင့်​ပြုတယ်​ဆိုရင်​သွေး မနက်​ဖြန်​သွားပါရ​စေ"
"ဘယ်​မှမသွားရဘူး...အိမ်​မှာပဲကိုယ့်​အလုပ်​ကိုယ်​လုပ်​"
​ဒေါသတကြီး​ပြောပြီး ထသွားခဲ့တဲ့အ​ဖေ။ အ​မေက​တော့ မီးလှုံ​နေတဲ့​သွေးလက်​လေးကိုဆုပ်​ကိုင်​ကာ
"အ​မေဘယ်​လို​ပြောရမလဲ...ဘွဲ့ယူပြီးမှသွား​ပေါ့...အ​ဖေကလဲခွင့်​ပြုတာမဟုတ်​ဖူး​လေ...​တော်​ကြာလမ်းခရီးမှာတစ်​ခုခုဖြစ်​နေဦးမယ်​...မသွား​စေချင်​တာထက်​စိတ်​ပူလိူ့​ပြောတာပါ"
အ​မေ့​စေတနာကိုလဲ နားလည်​သည်​။ ဒါ​ပေမယ့်​နေ့တိုင်း​ဖြေ​ဆေးမရှိသလို ဒုက္ခ​ပေး​နေတဲ့နှလုံးသားဒဏ်​ရာကိုလဲကုသချင်​သည်​။ ဘယ်​လိုပဲဖြစ်​ဖြစ်​စစ်​ဆီ​ရောက်​ဖို့အ​ရေးကြီးသည်​။ တတ်​နိုင်​သ​လောက်​စစ်​နားလည်​မ​ပေးသည့်​တိုင်​အောင်​ရှင်းပြမည်​။ ခွင့်​လွှတ်​ချင်​မှခွင့်​လွှတ်​မည်​။ အနည်းဆုံး​တော့​သွေးအမှန်​အကန်​ချစ်​နေတာ စစ်​ဖြစ်​ကြောင်းသိ​စေချင်​သည်​။ အိမ်​မက်​ထဲကလိုတကယ်​ကြီးကွဲသွားခဲ့​တောင်​ချစ်​တဲ့အ​ကြောင်း​လေးသူသိသွား​စေချင်​သည်​။
သစ္စာပျက်​မကြီးလိုမြင်​နေတဲ့ သူ့အမြင်​တွေ​ပြောင်းလဲ​ပေးချင်​သည်​။ မုန်းကာမှမုန်း​နေ​ပါ​စေ​လေ။
တကိုယ်​တည်း​သေမလို​တွေရင်​ကွဲ​နေတာနဲ့စာရင်​ရှင်းပြပြီးမှသူ့အမုန်းဒဏ်​ကိုခံလိုက်​ခြင်းကပိုပြီးသက်​သာမည်​ထင်​ပါသည်​။
​နောက်​ဆုံးဘာမှမရခဲ့ရင်​တောင်​အဆင်​ပြေ​နေတဲ့သူ့ရဲ့မျက်​နှာ​လေးပဲမြင်​ခွင့်​ရချင်​သည်​။
"​သွေးက​တော့ ခုချက်​ချင်း​တောင်​သွားချင်​နေတာမို့လို့အ​မေတို့ခွင့်​မပြုလဲသွားမှာပဲ...သွားမှကိုရတာ...စိတ်​ချ အ​မေတို့စိတ်​ပူရမယ့်​အဖြစ်​မျိုး​တော့​သွေးမလုပ်​ဘူး"
....
Next....