Unicode Version
စက်ကွင်းရည်းစားကဘယ်သူလဲ။
အခန်းကိုပြန်ရောက်လာသောရွက်ကြွေတစ်ယောက်ထမင်းစားပွဲကထိုင်ခုံတွင်ဝင်ထိုင်နေရင်းခုနကအဖြစ်အပျက်ကိုပြန်တွေးမိသွားသည်။..
ရွက်ကြွေစီးလာသောကားအမည်းရောင်လေးသည်အလွန်ကျယ်ဝန်းသောခြံကြီးတစ်ခြံ၏အဝင်ဂိတ်ကိုဖြတ်သန်းမောင်းနှင်ပြီးနောက်တွင်ခမ်းနားတောက်ပထည်ဝါသည့်အိမ်ကြီး၏အမိုးအောက်သို့ရောက်ရှိလာသည်။ကားရပ်လိုက်သည်နှင့်ရွက်ကြွေကိုကားပေါ်ကဆင်းရန်လူတစ်ယောက်ကရွက်ကြွေရှိရာကားတံခါးကိုအသင့်ဖွင့်ပေးပြီး
"မမလေး ကျွန်တော်နောက်လိုက်ခဲ့ပါ။"
ဟုပြောလေသည်။ရွက်ကြွေလည်းဘာမှပြန်မပြောပဲထိုလူနောက်သို့လိုက်လာခဲ့သည်။ရွက်ကြွေရှေ့ကဦးဆောင်သွားနေသည့်လူကခမ်းနားထည်ဝါသည့်အိမ်ကြီး၏တံခါးမကြီးနှစ်ချပ်ကိုဖွင့်လိုက်သောအခါတွေ့လိုက်ရသည်ကကြမ်းပြင်တွင်ခင်းထားသောတောက်ပြောင်နေသည့်ကော်ဇောနီနီကိုပင်။တောက်ပြောင်နေကာဖုန်တစ်စက်ပင်မရှိသည့်ထိုကော်ဇော်နီကနှမြောတတ်သူတို့အဖို့နင်းရက်စရာပင်မရှိသော်လည်းရွက်ကြွေကတော့ဖိနပ်စီးရင်းနှင့်ပင်တစ်လှမ်းချင်းလှမ်းမိသည်။ကော်ဇော်နီတစ်ဖက်တစ်ချက်တွင်တန်ဖိုးကြီးအလှပြပစ္စည်းများစွာကလှပထည်ဝါစွာနေရာယူထားသည်။အနီရောင်ထိုကော်ဇော၏သုံးပုံတစ်ပုံသို့အရောက်တွင်ရွှေဝါရောင်ခြယ်ထားသောရှေးလှေကားကြီးနှစ်ဖက်ရှိနေသည်။ထိုလှေကားကြီးနှစ်ဖက်ဆုံရာအထပ်၏ဝရံတာမှရွက်ကြွေကိုစိုက်ကြည့်နေသောလူတစ်ယောက်ရှိနေသည်။ထိုလူကိုရွက်ကြွေအရိုအသေတစ်ချက်သာပြုလိုက်သည်။
"ရွက်ကြွေ ရောက်လာပြီလား။"
အသံနဲ့အတူဒေါ်လေးငယ်ကလျှောက်လာရင်းရွက်ကြွေကိုမေးသည်။ရွက်ကြွေခပ်ပါးပါးပြုံးပြရင်းခေါင်းညိတ်ပြလိုက်သည်။ထိုအချိန်တွင်
"ရွက်ကြွေ ဦးကြီးနဲ့စကားပြောရအောင်ခဏလာခဲ့အုံး။"
ဦးကြီးကရွက်ကြွေကိုလာခေါ်သဖြင့်
"ခဏလေးနော် ဒေါ်လေးငယ်။"
ရွက်ကြွေ,ဒေါ်လေးငယ်ပြောပြီးဦးကြီးနဲ့အတူလိုက်လာခဲ့သည်။ဦးကြီးကအခန်းတစ်ခန်းရှေ့တွင်ရပ်လိုက်သဖြင့်ရွက်ကြွေလည်းရပ်လိုက်ကာဦးကြီးရပ်လိုက်သည့်အခန်း၏တံခါးတွင်ချိတ်ထားသောစာတန်းကိုဖတ်ကြည့်လိုက်သည်။
”စိုးမိုးစံ စံအိမ်တော်ကြီးရဲ့ စာကြည့်ခန်း”
ဟုရေးထားသောစံအိမ်ကြီး၏စာကြည့်ခန်းထဲသို့ဦးကြီးဝင်သွားသဖြင့်ရွက်ကြွေလည်းလိုက်ဝင်လာခဲ့သည်။အခန်းထဲသို့ဝင်လိုက်တိုင်းခံစားနေကျစာကြည့်တိုက်တစ်ခုသို့ရောက်သွားသည့်ခံစားချက်ကိုရွက်ကြွေခံစားလိုက်ရသည်နှင့်အတူဤအခန်းထဲတွင်အရွယ်မတိမ်းမယိမ်းကလေးသုံးယောက်ဆော့ကစားနေသည့်ပုံရိပ်အချို့ကိုပါ
ပြန်မြင်ယောင်လာသည်။
"ရွက်ကြွေ ထိုင်လေ။ ဘာဖြစ်နေတာလဲ။"
တောင့်တောင့်ကြီးရပ်နေမိသောရွက်ကြွေတစ်ယောက်မေးလာသည့်ဦးကြီးစကားကိုခေါင်းခါပြရင်းထိုင်နေသည့်ဦးကြီးရှေ့ကခုံအလွတ်တွင်ရွက်ကြွေဝင်ထိုင်လိုက်သည်။
"ရွက်ကြွေတို့မိဘနှစ်ပါးဆုံးပြီးကတည်းကဦးကြီးတို့ကသာရွက်ကြွေရဲ့အုပ်ထိန်းသူတွေလိုဖြစ်နေခဲ့တာကိုရွက်ကြွေသိတယ်မလား။"
"ရွက်ကြွေသိပါတယ်။"
"ရွက်ကြွေအသက်ကလည်းမငယ်တော့တာဆိုတော့ဦးကြီးကိုရွက်ကြွေကိုတစ်ယောက်ယောက်နဲ့ပေးတွေ့ချင်တယ်ကွယ်။"
"Blind Dateလိုလား ဦးကြီး။"
ဦးကြီးစကားကြောင့်ရွက်ကြွေမေးလိုက်တော့ဦးကြီးကပြန်ဖြေလာသည်။
"ဟုတ်တယ်။ နောက်အပတ်တနဂ်နွေမှပါ။ နေရာနဲ့အချိန်ရောက်ရင်ဦးကြီးကားလွှတ်လိုက်မယ်။"
"ဦးကြီးပြောမှာဒါပဲမလား။"
ရွက်ကြွေမေးလိုက်တော့ဦးကြီးကခေါင်းညိတ်ပြသဖြင့်
"သွားတွေ့ဖို့ရွက်ကြွေလက်ခံပါတယ်။ ဒါပေမယ့်ရွက်ကြွေလုံးဝလက်ခံမယ်လို့တော့မပြောဘူးနော်။ ရွက်ကြွေလည်းရွေးချယ်ကြည့်ချင်သေးတယ်။"
"ဒါပေါ့။ ရွက်ကြွေရွေးချယ်ရမှာပါ။ ဦးကြီးကလည်းငါ့တူမကိုသာမန်လူစားမျိုးရှာပေးမှာမဟုတ်ဘူးဆိုတာတော့ယုံထား။"
ရွက်ကြွေစကားကိုဦးကြီးကသဘောကျသလိုပြုံးရင်းပြောလာသည်။
"ကောင်းပါပြီ ဦးကြီး။ ဒါဆိုရွက်ကြွေ,ဒေါ်လေးငယ်နဲ့သွားတွေ့လိုက်အုံးမယ်။ ပြီးရင်ရွက်ကြွေပြန်မယ်။"
ဦးကြီးကရွက်ကြွေစကားကိုပြန်မဖြေပဲခေါင်းသာညိတ်ပြသည်။ထိုနောက်ရွက်ကြွေ,စာကြည့်ခန်းထဲမှထွက်လာခဲ့သည်။
