Unicode Version
ကူညီပေးနိုင်မလား။
"စက်ကွင်း ညို့စက်ကွင်းလား။"
ကျွန်တော်ကိုမြင်သွားပုံရကာကျွန်တော်ကိုကြည့်ရင်းပြောလာသည့်အမိကြောင့်ကျွန်တော်အံ့သြကာထခုန်မိမတတ်ဖြစ်သွားပြီး
"ဘာလဲ အမိကငါကိုမြင်ရသွားတာလဲ။ ငါကိုသိနေတာလား အမိ။"
အစီအစဥ်မကျစွာကျွန်တော်ပြောနေ၊မေးနေမိသော်လည်းအမိကမူကျွန်တော်မမြင်ရတော့ဟန်နဲ့ဟိုဒီဘေးဘီလျှောက်ရှာနေသည်။
လျှပ်စီးအလင်းရောင်ပျောက်သွားသည်နှင့်ရွက်ကြွေ,စက်ကွင်းကိုမမြင်ရတော့သဖြင့်ပတ်ဝန်းကျင်ကိုပတ်ရှာကြည့်နေမိသည်။ထိုစဥ်
"ဖိုင်တွဲလေးတစ်ခါရှာတာဘာလို့အဲလောက်ကြာနေတာလဲ။ မသဇင်နွယ်ကမေးနေတယ်။"
အသံနဲ့အတူဖိုင်တွဲအဟောင်းများသိမ်းသည့်ဤအခန်းထဲသို့နေ့တေးဆိုကတံခါးဖွင့်ကာဝင်လာသည်။နေ့တေးဆိုအခန်းထဲသို့ဝင်လိုက်သည်နှင့်အခန်းထဲတွင်ရွက်ကြွေဝေရှေ့ရပ်ကာရွက်ကြွေဝေကိုကြောင်အစွာကြည့်နေသောဟိုသရဲနဲ့တစ်ခုခုကိုလိုက်ရှာနေပုံရသောရွက်ကြွေဝေတို့ကိုနေ့တေးဆိုတွေ့လိုက်ရသည်။ရွက်ကြွေဝေကနေ့တေးဆိုကိုတွေ့သည်နှင့်
"ကိုနေ့တေးဆို ဒီကိုလာတော့တစ်ယောက်ယောက်ထွက်သွားတာများမမြင်မိဖူးလား။ရွက်ကြွေအသိတစ်ယောက်ကိုခုနကမြင်လိုက်ပြီးအခုဘယ်ရောက်သွားလဲမသိဘူး ပျောက်သွားတယ်။"
စိတ်လှုပ်ရှားစွာပြောနေသောရွက်ကြွေဝေကိုနေ့တေးဆိုတစ်ချက်ကြည့်ပြီးဟိုသရဲဆီသို့အကြည့်ရောက်လိုက်တော့
"သူ သူ ငါကိုမြင်လိုက်တယ်။ အဲဒီအမိကငါကိုကြည့်ပြီးစက်ကွင်းလို့ခေါ်လိုက်တယ်။ ငါကိုအဲဒီအမိသိနေတာများလား။"
ထိုသရဲကလည်းရွက်ကြွေဝေကိုလက်ညိုးတစ်ထိုးထိုးဖြင့်စိတ်လှုပ်ရှားစွာနဲ့ပြောနေသည်။နေ့တေးဆိုတစ်ယောက်လည်းတစ်ယောက်ရှေ့တစ်ယောက်ရှိနေသောသူတို့နှစ်ယောက်ကိုကြည့်ရင်းခေါင်းတစ်ချက်ခါပြီး
"ဒီကိုငါတစ်ယောက်တည်းလာတာ ရွက်ကြွေဝေ။ဘယ်သူမှလည်းမတက်လာသလို၊ဘယ်သူမှလည်းဆင်းသွားတာမရှိဘူး။"
"ဒါဆိုဘာကဘယ်လိုဖြစ်တာလဲ။ ရွက်ကြွေသေချာပေါက်စက်ကွင်းကိုတွေ့လိုက်ရတာကို။"
"မင်းတွေ့တာကလူမှမဟုတ်တာ။"
နေ့တေးဆိုစကားကိုပြန်ပြောလာသောရွက်ကြွေဝေကိုကြည့်ရင်းနေ့တေးဆိုမကြားတကြားပြောမိသည်။
"စက်ကွင်းကလူပါ။ ညို့စက်ကွင်းကလူစစ်စစ်ပါလို့။"
"ဒါဆိုငါပဲဘာလို့မြင်နေရမှာလဲ။ မင်းလည်းမြင်ရမှာပေါ့။ ဒါပေမယ့်မင်းမှမမြင်ရတာ။"
နေ့တေးဆိုစကားကြောင့်ရွက်ကြွေတစ်ယောက်နေ့တေးဆိုကိုအသေအချာစိုက်ကြည့်ပြီး
"ရွက်ကြွေမြင်လိုက်ရတဲ့စက်ကွင်းကလူမဟုတ်ဘူးပေါ့။ အဲဒါဆိုဘာလဲ။"
"ဝိညာဉ်ဒါမှမဟုတ်သရဲပေါ့။"
လေသံအေးအေးနဲ့အဖြေပေးလာတဲ့နေ့တေးဆိုကြောင့်ရွက်ကြွေယိုင်လုလုဖြစ်သွားသော်လည်းစိတ်ကိုပြန်တင်းလိုက်ပြီး
"ရွက်ကြွေစကားရွက်ကြွေသက်သေပြနိုင်တယ်။ ကိုနေ့တေးဆိုလည်းကိုနေ့တေးဆိုစကားကိုသက်သေပြပေးနိုင်မလား။"
"အဲဒီသက်သေထက်အခုမသဇင်နွယ်ရဲ့ဖိုင်တွဲကအရေးကြီးတယ်။ အလုပ်ကိုအရင်လုပ်ကြတာပေါ့။"
"ကောင်းပါပြီ။ ဒီမှာပါမသဇင်နွယ်ရှာခိုင်းတဲ့ဖိုင်တွဲ။"
နေ့တေးဆိုစကားကိုရွက်ကြွေခေါင်းညိတ်ကာပြောပြီးလက်ထဲကဖိုင်ကိုနေ့တေးဆိုလက်ထဲထည့်လိုက်ပြီးသည်နှင့်နှစ်ယောက်သားမသဇင်နွယ်ရှိရာသို့ပြန်ဆင်းလာခဲ့ကြသည်။
