Unicode Version
အခန်း - ၄၅
ဆက်မိသည့်ပဟေဠိအပိုင်းအစများ
"ဒါဘယ်သူ့ဓာတ်ပုံလဲ။"
ရွက်ကြွေလက်ထဲသို့သူဇာဦးလေးထည့်ပေးလာသည့်ဓာတ်ပုံကိုကြည့်ရင်းရွက်ကြွေရေရွတ်မိသည်။ဓာတ်ပုံထဲရယ်မောနေသောကလေးငယ်မှာထိုက်ငယ်လေးတစ်ပုံစံတည်းပင်။ ဓာတ်ပုံလာပြသူသည်သူဇာဦးလေးသာမဟုတ်ခဲ့လျှင်အဲဒီဓာတ်ပုံတွင်ပါသောကလေးငယ်ကိုရာနှုန်းပြည့်ထိုက်ငယ်လေးဟုရွက်ကြွေပြောမိပေလိမ့်မည်သာ။
"ဓာတ်ပုံကိုအရင်ကြည့်လိုက်ပါ။"
ခုံတန်းရှည်တွင်ဝင်ထိုင်လိုက်ပြီးမှသူဇာဦးလေးကရွက်ကြွေလက်ထဲအနည်းငယ်ဟောင်းနေပြီဖြစ်သောဓာတ်ပုံတစ်ပုံကိုထည့်ပေးလာသဖြင့်ရွက်ကြွေ၏အမေးကိုဓာတ်ပုံကိုသာကြည့်ရန်ပြန်ပြောလာ၍ရွက်ကြွေ,ဓာတ်ပုံကိုကြည့်လိုက်သည်နှင့်အလိုလိုထွက်လာသည့်စကားက
"ဒါကထိုက်လေးငယ်ငယ်ကပုံပဲ။ ဦးလေးမိုးလ,ဒါကဘယ်သူလဲ။ ဘယ်သူမို့လို့ရွက်ကြွေတို့မောင်ငယ်နဲ့ဆင်နေတူနေရတာလဲ။"
"အဲဒါကသော့်ငယ်ငယ်ကပုံပဲ။ အတိအကျပြောရရင် 'သော်' ဆိုပြီးနာမည်မတပ်ခင်နေ့ကရိုက်ထားတာ။"
"သော် ကဒါဆိုဦးလေးတို့တူအရင်းမဟုတ်ဘူးလား။"
ဦးမိုးလစကားအဆုံးတွင်မေးမိသောရွက်ကြွေစကားကိုဦးမိုးလကခေါင်းညိတ်ပြလာပြီး
"သော့်ကိုတောထဲကလျို့ဝှက်အိမ်ငယ်လေးရှေ့မှာဦးလေးစတွေ့ခဲ့တာ။ မိုးသည်းသည်းတွေကြားမှာတစ်ကိုယ်လုံးရွဲရွဲစိုပြီးရပ်နေခဲ့တာ။"
ဦးမိုးလ၏စကားအဆုံးတွင်ရွက်ကြွေ၏စကားကြောင့်ပြေးထွက်သွားသည့်ထိုက်ငယ်၏ပုံရိပ်များကိုရွက်ကြွေပြန်မြင်ယောင်လာသဖြင့်
"ဦးလေးမိုးလ ရွက်ကြွေထင်နေတာ မှန်ရဲ့လား။"
"အဲဒီနေ့ကဦးလေး,စိုးမိုးနိုင်ဆီရောက်တော့ကြမ်းပြင်ပေါ်လဲနေတဲ့ကလေးမနှစ်ယောက်ကိုတွေ့တယ်။ ကလေးတစ်ယောက်ကသွေးထွက်နေပေမယ့်တစ်ယောက်ကတော့ဒီအတိုင်းသတိလစ်နေရုံ။ ဒါပေမယ့်စိုးမိုးနိုင်ကငါကိုသတိလစ်နေတဲ့သူ့မျက်စိရှေ့ကကလေးမကိုခေါ်သွားခိုင်းခဲ့တယ်။ အဲဒီနေ့ကငါ့ကားပေါ်မှာကလေးနှစ်ယောက်ပါလာခဲ့တယ်။"
