Unicode Version
အခန်း - ၄၃
စက်ကွင်းအက်စီးဒန့်ဖြစ်တဲ့အဲဒီနေ့
"ဟင် ကို နောက်တစ်ခေါက်ထပ်ပြောအုံး။ သစ်ခွမှားကြားမိနေလို့။"
ပန်းသစ်ခွ၏စကားကြောင့်စက်ကွင်းနောက်တစ်ခါထပ်ပြောလိုက်သည်။
"မှားကြားတာမဟုတ်ဘူး။ တကယ်ပြောနေတာ။ ငါတို့လမ်းခွဲရအောင်။"
"ဘယ်လို သစ်ခွဘာအမှားတွေ၊ သစ်ခွ ကိုမကြိုက်တာဘာလုပ်မိလို့လဲ။"
"သစ်ခွဘက်ကအမှားလုပ်ထားတာမရှိဘူး။ အမှားလုပ်ထားတာကိုယ့်ဘက်ကပါ။"
ပြာပြာသလဲလဲပြောလာသည့်သစ်ခွစကားကိုစက်ကွင်းပြန်ပြောလိုက်တော့သစ်ခွဘက်ကတစ်ခုခုစဥ်းစားမိဟန်နဲ့
"မဖြစ်နိုင်ဘူး။ ကိုကအခြားတစ်ယောက်ရှိနေတာတော့လုံးဝမဖြစ်နိုင်ဘူး။ သစ်ခွရှိရင်တော့မပြောတတ်ပေမယ့်သစ်ခွအတွက်ကိုကသာအချစ်ရဆုံးကို။ ကို ဆိုတာကလည်းသစ္စာတရားကြီးတဲ့လူမျိုးလေ။ ဒါဆိုဘာလို့လဲ ကို။"
သစ်ခွ၏စကားအဆုံးတွင်စက်ကွင်းပြောမိသည်က
"အကြောင်းအရင်းက ကိုယ် သစ်ခွ ကိုမချစ်ဘူး။"
တည်ငြိမ်စွာစက်ကွင်းပြောမိသည့်ထိုစကားအဆုံးတွင်စက်ကွင်းရင်ထဲပေါ့သလိုခံစားလိုက်ရသလိုသစ်ခွ၏မျက်နှာသည်ချက်ချင်းပျက်ယွင်းသွားခဲ့သည်။
"မချစ်တော့တာကနှစ်တွေကြာလာရင်ဖြစ်လာနိုင်တာပဲ ကိုရဲ့။ ကော်ဖီတောင်အချိန်ကြာသွားရင်အေးသွားတတ်တာပဲ။ အချစ်လည်းအေးသွားတာမဆန်းပါဘူး။ သစ်ခွဘက်ကအချစ်တွေပိုပေးရင်အချစ်တွေထပ်ဖြစ်လာနိုင်တာပဲမဟုတ်လား။"
ပျက်ယွင်းသွားသောမျက်နှာထားကိုသစ်ခွချက်ချင်းပင်ပြန်ပြင်ပြီးကိုယ့်ကိုယ်ကိုအားပေးသလို၊အဆင်ပြေဟန်နဲ့ပြောလာသောသစ်ခွကြောင့်စက်ကွင်းစိတ်မကောင်းဖြစ်မိသွားသည်။သို့သော်လည်းနောက်ထပ်အချိန်ထပ်ဆွဲလျှင်သစ်ခွဘက်ကပိုနစ်နာလာနိုင်သည်။ထိုကြောင့်
"ကိုယ် သစ်ခွကိုမချစ်တာ အခုမှမဟုတ်ဘူး။ အစကတည်းကမချစ်နိုင်ခဲ့တာပါ။"
