အချိန်က မွန်းလွဲချိန် ၂ နာရီ တိတိ။
အပြင်မှာ နေလုံးကြီးက ရဲရဲတောက်ပြီး လောကတစ်ခွင်လုံးထွန်းလင်းနေသော်လည်း ဟိုတယ်ဝန်းတစ်ခုထဲက ဘန်ဂလိုလေးတစ်လုံးကတော့ ပိန်းပိန်းပိတ်လုနီးနီး မှောင်နေ၏။ ပြတင်းတံခါးများဖွင့်ထားခြင်းမရှိသလို ရှိသမျှ လိုက်ကာများကိုလည်း နေရောင်တစ်ပြောက်တောင်မမြင်ရသည်အထိ ပိတ်ထားတာဖြစ်သည်။
ဝမ်ရိပေါ် တစ်ယောက် စားသောက်စားပွဲထက်တွင် ပြင်ဆင်ထားသည့် အရာများကို အသေအချာ စီစီရီရီလုပ်လိုက်ပြီးနောက် စားပွဲ အလယ်ရှိ ဖယောင်းတိုင်မီးများကို ကြိုတင်ထွန်းညှိထားလိုက်သည်။ ကြယ်ပန်းလေးတွေ ထိုးစိုက်ထားသည့် ပန်းအိုးလေးကလည်း မပါမဖြစ်။
လေအေးပေးစက်အရှိန်ဖြင့် ချမ်းစိမ့်စိမ့်ဖြစ်နေသည့် ဘန်ဂလိုလေးအတွင်းတွင် ဖယောင်းတိုင်မီးမှိန်မှိန်တို့၏ အရောင်က တစ်မျိုးတစ်မည်သော ခံစားချက်တို့ကိုပေးစွမ်းသည်။ ရင်ခုန်ခြင်းဆိုတာထက် ရင်ထဲတသိမ့်သိမ့်ဖြစ်နေသည့် ခံစားချက်မျိုး။
မွန်းလွဲချိန်မှာ ဟိုဟာလေး တောင်းဆိုလို့ မဖြစ်ဖြစ်အောင် ဖန်တီးထားသည့် Date Night တစ်ခုဟာ သူ့အတွက်လည်း ပထမဦးဆုံးပါပဲ။
ဝမ်ရိပေါ် သူကိုယ်တိုင် စိတ်တိုင်းကျပြင်ပြီးသည့်နောက် မှာထားသော ဝိုင်ပုလင်းကို ယူကာ ဘန်ဂလိုတွင်ပါရှိပြီးသားဖြစ်သော မီးဖိုချောင်ငယ်လေးဆီသို့သွား၍ ဝိုင်ပုလင်းထဲက ဝိုင်တွေကို ဘေစင်ထဲသို့ သွန်လိုက်၏။ ထို့နောက် ပုလင်းကို ရေသန့်ဖြင့် အသေအချာပြန်ကျင်းကာ သူကြိုတင်စီစဉ်ထားပြီးသည့် ဝိုင်နဲ့အရောင်တူ ကလေးတွေသောက်လို့ရသည့် အချိုရည်အပျော့စားကို ပြန်ထည့်လိုက်သည်။
ထိုအရာတွေကို ဝမ်ရိပေါ် ခပ်သွက်သွက်လုပ်နေရခြင်းဖြစ်သည်။ ဒါတွေကို ရေချိုးခန်းထဲရောက်နေသည့် အားကျန့်မြင်သွားလို့မဖြစ်။ အားကျန့်က "ရုပ်ရှင်ထဲကလို ဝိုင်ခွက်လေးတွေကိုင်ပြီး ဝိုင်သောက်ချင်တယ်" တကဲကဲလုပ်နေခဲ့တာကြောင့် စိတ်ချမ်းသာအောင် မျက်စိရှေ့မှာ ဟန်ပြမှာခဲ့ပေးထားခြင်းဖြစ်၏။ ဒါ့ကြောင့် ရေချိုးခန်းထဲရောက်နေတုန်း ရှိသမျှ ဝိုင်တွေကို အချိုရည်နဲ့ အစားထိုးပြီး လက်ရာမပျက် ဖော့ဆို့အဖုံးလေးဖြင့် ပြန်ပိတ်ထားခြင်းဖြစ်သည်။
