අවසන් සඳ

මහ නිළමේ

වලවුව යන වචනයට අනුරූප චිත්ත රූපයක් අප කාගේ කාගේත් සිත් වල සටන් ව ඇත. නමුත් ඉහල ඉහත්තාවේ මහ වලවුව යනු වචනයේ පරිසමාප්තියෙන්ම වලවුවකි. අඹ සහ කොස් යන කිරි ගස් දෙකක් මැද්දෙන් වැටුනු වැලි පාර දිගේ අඩි කිහිපයක් ගොස් පොල් අතු රටාවට අතුගෑ සිහින් වැලි සහිත මිදුල හරහා ප්‍රවේසමෙන් අඩිය තබා ගිය පසු මහ වලවුවේ පිළ හමුවෙයි. පිළට වම් පසින් තැනූ මඩුවක බරසාර කැටයම් ඇති කරත්තයක් ගාල් කර ඇති අතර ඒ අසලම කරත්තයේ එන්ජිම තණකොළ උලාකමින් ඉන්නේ මේ කරත්තය පෙනුමට තබා ඇති කරත්තයක් පමනක් නොවන බව පෙන්වීමට මෙනි. රතු සිමෙන්ති ගා මට්ටම් කරන ලද පිල මතට ගොඩ වූ පසු කළුවර ලීයෙන් කල උළුවහු ඇති ප්‍රධාන දොරටුව හමුවේ. දොරට වම් පසින් පිටතින් ඇත්තේ තේක්ක ලී හාන්සි පුටුවකි. ඒ අසලම අලුත කැඩූ බුලත් කොළ සහිත හෙප්පුවක්ද අවසන් ගමන් ගිය බුළත් සදහා පඩික්කමක් ද වෙයි. දොරට දකුණු පසින් තවත් තේක්ක ලී පුටු පෙළකි. ඒවා ඉදිරියෙන් කොට කැටයම් මේසයක්ද ඒ මත ඉතා කුඩා පිත්තල අලි තෙදෙනෙකු ඔසවාගෙන සිටින පිත්තල පාත්‍රයක්ද වේ. පුටු පෙල කෙළවර මා මෙතෙක් දැක තිබූ උසම පිත්තල කුකුලා පහන වූ අතර ඒ දෙපස වූ පිත්තල මල් පෝච්චි වල අලුත නෙලූ මල් විය. හිසට ඉහලින් වූ සිංහල උළු වහලය ආරුක්කු කණු වලට බර වී තිබුනේ හෙල පාරම්පරික ගෘහ නිර්මාණය ශිල්පයේ සුන්දරත්වය මනාවට විදහා දක්වමිනි. ලොකු සර් අනුගමනය කරමින් මමත් දොරට දකුණු පසින් වූ පුටුවකට බර උනෙමි.

"මහ නිළමෙ ආවාම ගරු කටයුතු ඇතිව හිටියනං හොඳයි ඕං!" ලොකු සර් මගේ කනට කර කීවේය. මම එය පිලිගත් බව හැඟවීමට හිස වැනීමි. දොර දෙසින් ඇසුනු උගුර පාදන හඬත් සමඟම මහ නිළමේ තුමා දර්ශන පතයට අවතීර්ණ විය.

'මහ නිළමේ' යන වචනය ඇසෙන විට ඔබේ සිතේ මැවෙන චිත්ත රූපයක් ඇත. සද්දන්ත සිරුර, දිගට වැවූ ඝන රැවුල, සත් පොට හවඩිය, සුදු බැනියමට ඇඳි කොටු සිංහල සරම, අතේ බස්තම... නැත. ඉහළ ඉහත්තාවේ මහ නිළමේ යනු මේ කිසිවක් නොවේ. මා පවා පුදුමයට පත් කරමින් ඔහු සිහින් සිරුරකින් යුතු විය. සුදු සරමක් හැඳ ගෙල වටේ ලා කහ ලේන්සුවක් ගැටගසා සිටි ඔහුට තිබුනේ මහා කළු සිංහල හමකටත් වඩා, කිරි වැඩි වුන කෝපි කෝප්පයක් බඳු වූ ලා දුඹුරු පැහැ සමකි. බඳින්නට තරම් වත් දිග නැති කළු කොණ්ඩය මනාවට පීරා තිබූ අතර හෙතෙම බුලතින් තොර බව විදහා දක්වමින් සුදෝ සුදු වන් දත් දෙපළකින් යුතු විය. සිහින් දිග ඇඟිලෙන් හෙඹි දිගූ දෑතක් හිමි ඔහු වමතින් පොතක්ද, දකුණතින් උපැස් යුවලක්ද දරා සිටියේ මේ සුලු මොහොතකට පෙර ඔහු පොතක් කියවමින් සිටි බව පෙන්වමිනි.