العشق المظلم قصص مغربية

Part 1 : امال و حطام

الجزء الاول
كانت واقفة كتشوف راسها فالمراية الي حدا باب الدار و هي فرحانة بزاف بزاف لابسة كسيوة صيفية فالابيض فوف من الركبة بشوية و غير سميطات دايرة عليها فيست ديال دجين و صنديلة بلا و هازا تيليفونها كتصوني عليه و والو واش كايجاوبها
الام جنان : ابنتي فين غادا على هاد الصباح واش باغا تحمقيني اليوم العرس و خاصنا مزال نوجدو شحال من حاجة
اسراء :ههههه و ماما كاين شي عرس بلا عريس خليني نمشي نشوف حلالي من الصباح كنصوني و تقول واش بغا يجاوب
جنان : باينه فيه هرب اصلا شكون يقبل عليك و على هبالك
اسراء : (و هي تحل الباب باش تخرج ) حصليه الشرف نقبل  عليه هههه(اسراء بنت غزالة بزاف قلبا و قالبا عندها 22 عام ، الفورمة هي هاديك ما رقيقة ما غليضة الصدر واقف و الكرش مكاينش حسها و تريمة هيا هاديك و شعرها طويل شوية فالنص ديال ضهرها و شهب شويا و عندها واحد الوجه طايح عليه السر غير بوحدو العينين مجبدين و لونهم عسلي و الى ضربات فيهم الشمس كيوليو يبانو بحالا خضرين و الشنايف غوز غير بو حدهم ، اسراء انسانة  عنيدة و ضريفة فنفس الوقت ، انسانة مجتهدة و معكازة فنفس الوقت اهم حاجة انها بريئة و شويطينة الشخصية ديالها كتبدل على حساب الشخص الي كتعامل معاه و لكن هي غاليا عزيزة عليها الحياة عزيزين عليها الالوان و المغامرات و التقشاب ، عزيز عليها يكو ن الجو زوين و مشمس و تكون خارجة و كتشوف الدنيا...)

جنان : سيري سيري ابنتي ماعندك عقل و انا دايرا فيك راسي متبعاك
اسراء : (رجعات كتجري عند ماماها و هي تعناقها و بقات كتبوس فيها ) انا فرحانة ا ماما فرحانة بزاف
جنان: (عينيها تغرغرو عليها و عنقاتها حتى هي ) حتى انا ابنتي و فرحتي جوج فرحات ،فرحانة لحقاش بنتي فرحانة و فرحانة لحقاش تانا بنتي كبرات و غادي تزوج و دير دارها و حتى انا نشوف ولادها
ليلى : (بتهكم حيت هي من الناس اللي كيصبحو خاسرين على الصباح ) صباحنا عالله هاهوما تاني ايبداو تاني و يحميوها بكاوات
اريج : ( و هي كضحك على ليلى ) و مالكي خاسرة فيك السيفة حتى نتي ياكما باغا تكلي الحلوة و لا بقات فيك ختك حيت غادة بحالها لدارها
ليلى : لاش اتبقا فييا و حنا بيناتنا km 70 ،اويلي راسيمانة هادي و هوما عاطيينها غير لبكا اما الحلوة كوليها اختي غير نتي 25 عام و مزالة بايرة نخاف عليك غير تموتي هاكا عمرك مادقتيها
اريج : هههههه و انا كرهت اختي راحنا واقفين عليها و لكن راماكينش معامن
اسراء : اويلي يا ماما شوفي هاد الكلبات ديال بناتك مابقاو لا كيحشمو لا كيرمشو
جنان : ( و هي كتشير عليهم بصندالتها) الله ينزل على طواسلكم النعلة مابقاتش كاع الحشمة ف هاد الدار
ليلى (و هي كتحلف على اسراء و فنفس الوقت هاربة) و الله لا بقات فيك يا اسراء غاتزوجي سحابليك طفرتيه عايني غي يفوت العرس يا ختي و الي نديرو ليك ما نقولو ليك
اريج : ( هاربة حتى هي و ضحك ) نموت ياختي و نعرف من جايبة هاد التجلويق ديالك
ليلى : ههه تكبري ابنتي و نقريه ليك
اريج : لا لا اختي بلاش ماتقريني ما نقريك ، قراي غير لداك الباك الي عندك
ليلى : مالقيتي فاش تفكريني
جلسو فوق الطبلة ديال الفطور و جلسو كايكلو و كايهضرو و كايضحكو كل مرة وحدة شدة فوحدة و تقول واش كيتقاداو  ليلى و اريج ديما دايرن هاكا ، ليلى هي الاخت ديال اسراء الصغيرة عندها 17 عام
غزيولة بحال ختها غير و بيبضة غير هي الملامح ديالها كوحل كتشبه لماماها جنان ، واحد الجعواقة منها ما كان لسانها فيه مترو و اريج هي بنت الخت ديال جنان ماتو واليديها و هي صغيرة فتربات مع خالتها و بناتها هي انسانة ضريفة و نية و كتيق دغيا و قلبها بيض هي  طويولة على البنات بشوية  شوية و ضعيفة دايرة فحال شي عارضة ازياء و بيبضة حتى هي و ملامحها كوحل  تقولو اريج هي الاخت ديال ليلى و ماشي اسراء عالعموم عايشين بتلاتة بحال الخوتات و واحدة كتخاف على وحدة و ما بينتهم لا سم لا غيرة لا ولو و هادشي بالفضل ديال جنان الي رباتهم يحنو على بعضياتهم