العشق المظلم قصص مغربية

Part 29 : طائر العنقاء

الجزء 29

علي بقات كتسمع ليه ديك كريم مجاهد بحال الصدا ديال الصوت فاش كتكون فبلاصة خاوية ، مافهم والو ، كيفاش ماقدرش يعرف ان كريم هو اللي قتل باه و المشكلة عاد كان حداه
علي:(عينيه حومر شوية و غادي ينفجر ) شنو طلب منك ... الا طلب منك انني مانقتلوش عرف بلي لا نتا لا تواحد مغايمنعني نديرها
البوص : ههه لا للاسف ماشي داكشي اللي طلب مني ، كريم طلب مني مانقولش ليك علاش قتل سلمان ايلا سولتيني علاش ... نتا بغيتي تعرف و هو بغا يخبي ... و كيفما قلت ليك على وديت الدم اللي جامع بيناتنا انا غادي نصحك و نقولك عرف علاش قتل سلمان و ديك الساعة دير معاه اللي بغيتي
علي : (زاد قرب ليه مخرج فيه عينيه بدا كيتقندش ) كيفاش الدم اللي جامع بيناتنا
البوص : للاسف الامنيات التلاتة ديال مصباح علاء دين سلاو ليك السي علي ، جاوبتك على شكون قتل سلمان و الطلب ديال كريم و نوع العلاقة الي بيني و بينك ، بغيتي تعرف شي حاجة كثر قلب عليها
و هوما يجيو واحد 6 ديال لي كارض كيشوفو فعلي و البوص غادي متاجه لطوموبيلتو كيحرسوه دوك لي كارد من اي رد فعل يقدر يدير علي
علي :(ببرود عكس العافية اللي شاعلة فيه ) غادي نجيبك فيدي البوص و نهار غاتجي مغانرحمكش سير دابا فحالك
و مشا علي ديك الساعة هز طوموبيلتو حتى هو و عينيه جمرة كيقلب غير كيضور كيقلب على كريم شوية و هو يفكر انه شريك معاهم فالبروجي اذن غادي يكونو فالشركة معلومات عليه و فعلا ديك ساعة دور الطوموبيل متجه للشركة و غير مسافة الطريق لقاتو وصل ، و مشا نيشان للبيرو ديال الموارد البشرية دخل للحاسوب قلب عليه مالقاهش او بالحرى لقا غير المشاراكات ديالو فالمشاريع و ماكاينة حتى معلومة شخصية و هو يزيد يتعصب علي هز داك البيسي و ردخو مع الارض و هو يمشي جيهة الملفات بدا كيقلب على الملف ديالو بين الملفات ديال الشركاء ، كيقلب و يلوح فالارض حتى رض هاداك البيرو حالتو و لكن فالاخير لقا علاياش كيقلب (دار واحد الابتسامة شريرة في عز الغضب ديالو ) حلو بدا كيقلب فدوك الوراق حتى لقا وريقة فيها المعلومات الشخصية ديالو ( الاسم و النسب العنوان .... ) هزها و مشا طار لطوموبيلتو اول حاجة دارها حل ديك البواطكون ديال الطموبيل جبد منها السلاح ديالو قادو و هو يديماري نيشان فاتجاه دار كريم غادي و ناوي على خزيت عوال تكون هاد الليلة هي اخير ليلة فعمر كريم ...
ماخداش بزاف ديال الوقت حتى وصل للفيلة ديالو اول حاجة ضرب عليها هي الضواو بانو ليه كلهم طافيين ، ماهمو والو داخل عليها كيقول مع راسو يا هو يا انا مشا للناحية ديال الباب الاول ديال الجردة لقاه حتى هو محلول قال شي فخ هادا يمكن جبد السلاح ديالو قدو فيديه و هو داخل كيقلب فنفس الوقت بعينيه ، دخل للباب التاني ديال الفيلا حيت لقاه حتى هو محلول كال صافي القوادة هادي و لكن واخا هكاك ماعندو مايخسر بقى مكمل فالتقلاب كاتبان ليه الدنيا مرون كلشي مخربق كيدخل للبيوت كليلقاهم حتى هوما مقلوبين سفاهم على علاهم ، حتى بدات كطيح ليه حاجة و حدة فراسو و هو يسمع تيليفون فيكس ديال الدار كيصوني لتحت ، بقى غادي متبع الصوت ديالو حتى بان ليه و مفكرش جوج مرات نيشان مشا هز جاوب
علي : صحاب ليك غاتسلك منها
كريم : هههه جبتيها اولد با سلمان
علي : زبي اللي معاك هاد الساعة ، و لكن اولدي سير فينما بغيتي نجبدك نجبدك
كريم : ماشي دائما نتا اللي غادي تكون عندك اليد العلية على اللعبة
علي: (عكس العافية اللي شاعلة فيه ) هههه دابا راه ماشي اللعبة الي غاتكون عندي فيها اليد العلية راه حياتك كولها و الايام بيناتنا
كريم : الايام بيناتنا اولد با سلمان (و قطع عليه )
علي كان كايبان مبرد و لكن هو العافية شاعلة ليه للداخل و هو يرمي داك الفيكس رضخو مع الحيط و بدا كيغوت و داك الغوات بحال الزمجرة ديال شي اسد باغي ينقض على الفريسة ديالو و الي لقاها قدامو كيهرسها زاد كمل على الروينة اللي كان لقا ، بانت ليه عصا ديال الغولف تما ديال شي لاعب كان معلقها كريم ، هزها علي و بدا كيشخشخ فالتلفازة و الي بانت ليه بيها حتى بدا كينهج عاد خرج بحالو من ديك الدار مشا جلس قدام لبحر بطوموبيلتو
اما فالمستشفى فكانت اسراء متكية على كتف ماماها فدوك كراسي الانتظار قدام العناية المشددة و حداهم فهد واقف عينيه فارغين من اي شعور غير كيشوف فليلى من الزاج الي كانت ممددة فوق السرير و ضايرين بها السلوكة ديال الاجهزة و السيروم و زيد دوك الاصوات اللي كيديرو الاجهزة حالتها كتقطع القلب اما ياسين فكان جالس مع اريج ف البيرو ديالها ، اريج اللي كانت حاسة بالارهاق  في نهار واحد قدرات تعيش اكثر الحوايج اللي كتخشاهم اول حاجة انها تفقد شي واحد عزيز عليها و زيد فوبيا المرتفعات و هاهي اليوم كانت اتموت ليها ليلى بين يديها و نقزات من فوق شلال و ركبات في هيليكوبتر لاول مرة فحياتها
ياسين : كانت عارف بنت قلبي قادة بشغلها
اريج : عرفتي ا ياسين الرعب اللي عشت اليوما
ياسين : (عنقها و بدا كيمسح ليها على شعرها ) عارف ا حبيبتي عارف ( و هو يشدها من وجها بيديه بجوج ) كنواعدك اخير مرة غاتعيشي هادشي ف حياتك (باس ليها راسها ) كنواعدك
اريج : شكون دوك الناس و علاش بغاو يقتلونا
ياسين : ماعرفتش ا حياتي
اريج : (دفعاتو ) كيفاش ماعرفتيش ، واش يسحابليك محساش انك داخل فشي اعمال مشبوهة ، ديك المرة حليت البواطاكون ديال الطوموبيل لقيت سلاح تما ، و البارح سمعتك كتهضر مع علي المافيا و لا مانعرف
ياسين : اعصابك متوترين عليها كدخلي و تخرجي ف الهضرة
اريج : داكشي الي بقى ليك حمقني ، ردني حمقة مكانفهم والو
ياسين : (جرها عندو ) حاشة ابنت قلبي انا اللي قصدت انني ماعرفتش واش اصلا جايين علا ودنا حنا و لا علا ود شي حاجة اخرى
اريج : (تفكرات هضرتو ديال داك النهار فاش كانو فالغابة ) شنو بغيتي تقول جايين على وديت اسراء
ياسين : مانعرف مامتأكدين من والو
اريج : من نيتك دابا كتهضر ( كتهمو ) شنو الحاجة الي خلاتك تفكر انه على ود اسراء جايين و زايدون شنو علاقة اسراء بهادشي كامل
ياسين : ونتي شنو هي الحاجة اللي خلاتك تقولي اسراء
اريج : حيت عارفة شي حوايج معارفهومش نتا
ياسين: حتا انا عارف شي حوايج معارفاهومش نتي ، قولي ليا شنو عارفة باش نقدر نلاقي الاحداث
اريج : سمحليا ولكن هادشي ماشي ديالي باش نعاودو و لكن دير فبالك حاجة وخدة ان اسراء داقت العذاب فالدنيا و مزال كدوقو (و تغرغرو عينيها ) عييت اياسين والله مانقدرش نستحمل نفقد شي واحد عزيز عليا باراكا خسرت واليديا
ياسين : (عنقها ) صافي ا بنت قلبي ماتبكيش ، فاش نتي كتبكي راه قلبي انا اللي كيضرني ، كنواعدك نكون انا هو واليديك و خوك و راجلك و نتي و ولدي ليا شي وليد فحال داك الوليد ادم فنيكيش باراك عليك
اريج : (تصعقات من سمية ادم حيت ملك داتو قبل ماتخرج اريج و اسراء و جنان ماقالو ليها والو ) منين كتعرف نتا ادم
ياسين : (بعفوية ) راه قبيلة خالتك جابتو معاها للصبيطار و من بعد داتو ملك و علي  يبات معاهم حيت خالتك بايتة هنا و مابغاتش تعدبو
اريج : اويلي كيفاش داو معاهم الولد واش باغي تحمقني و اسراء كيفاش سمحات ليه يديه
ياسين : (حس بيها ماشي هي هاديك ) هىء و شنو دخل اسراء مالها مو و زايدون لا كنتي خايفة عليه غير تهناي ، راه ملك ماشي بوحدها كاينة خالتي حياة و غزلان يتهلاو فيه
اريج: (عاد فهمات الموضوع ) اههه ... و صافي ... راك عارف ملك مزال صغيرة ماتقدرش على الوليد بحدها
ياسين : اهه فهمت ، (اصلا هو شك ف شي لعبة حيت سلوى قالت هضرة و جنان قبيلا قالت هضرة ) و شنو كيجيك ادم ؟
اريج :(كتحاول تصنع شي كدبة ) اه ... ادم .. فالاصل .. هو ... راه .. ولد صاحبة ليلى مسكينة صغيرة و كتاب عليها المكتاب و هربات من ضارهم ، كتقرى فالصباح و كتخدم بالليل
ياسين :(ياسين هنا عرف القضية فيها ان و داك الولد موراه شي قصة ) (كيطنز ) اهه مسكينة بقات فيا
اريج: واييه كتقطع فالقلب
ياسين عرف انها كتكدب و ماشي غير هي كلهم كيكدبو فقضية الولد ، بقى فيه الحال شوية علاش كتخبي  اريج و لكن صافي قرر يعرف القصة راسو ، اما سلوى و امين فكانو جالسين فالجردة ديال لوبطال فدوك الكراسا هو مسرح يديه و هي متكية ليه على يدو و صدرو
امين : يلاه نديك ترتاحي فالدار راك عيانة و الجلسة ديالك هنا ما عندها باش تفيدهوم
سلوى: لا مايمكنش نخليهم على الاقل تفيق ليلى
امين : (باس ليها راسها ) كون وقعات ليك شي حاجة كون راه حماقيت
سلوى : و نتا على ود هادشي باغي تزوج بيا دغيا ، حيت باغي تحميني
امين : اييه صراحة باش و نحميك (قرب ليها ) و زيد عليها وليت باغيك غير امتا تكوني مابين يديا
سلوى: (ولات حمرة )  ههه الماسخ لاخر
امين: (كيطنز عليها ) ههه زعما نتي دابا منين طيرتي هضرتي فالسما ماماسخاش
سلوى :(بقات كضربو لكتفو ) و لايني ماكتحشمش
امين :(شد ليها يديها و قرب ليها بزاف ) علاش نتي قادرة تصبري تكوني بعيدة عليا
سلوى :(كيعرف يلعب عليها ) انا زعما بغيت نقول ... (بقات كتمتم عليه و ولات حمرة )
امين : ههههه صافي هنينا نتي ولتي كي مطيشة يعلم الله نهار نشدك ، غدا انضربو اللاكط
سلوى : لا مايمكنش و ليلى فهاد الحالة
امين : (تنرفز ) دابا حنا هاد اللاكط ديالنا شنو غايزيد و لا اينقص ل ليلى
سلوى : راه مايمكنش فظروف بحال هادي على الاقل غير حتى تفيق
امين :(تفهمها ) واخا غير تفيق مانرحمكش
سلوى : (باستو فحنكو ) واخا اسيدي مايكون غير خاطرك
امين:(تحلات ليه ) و اجي زيدي شي وحدة هنايا ( و مد ليها فمو )
سلوى : هههه تما بقيتي (ناضت من حداه طالعة لعند اسراء و جنان بالجري )
امين : ( بقى كيضحك ) هههه اشوفي تانشداك
هي ماداتهاش فيه بقات هاربة حتى طلعات عندهم ، اما ف جيهة اخرى عند علي اللي كان داخل للقصر من بعد ما حس براسو تهدن شوية و مع دخل سمع صوت لبكا ديال شي دري صغير جاي من جيهة الصالون مشا يشوف نسا اصلا بلي راه جاب ادم و ملك ، دخل للصالون لقا ملك كتبكي و شدا ادم كيبكي بين يديها
علي :(تخلع ) مالكي شنو واقع
ملك : مكاتشوفش شنو واقع ادم من قبيلا و هو كيبكي مابغاش كاع يسكت ليا
علي: (فشلاتو بهاد الجواب ) الله يعطيني غير الصبر معاكوم ، و عيطي للواليدة و لا خالتي غزلان يشوفو مالو
ملك :(كتبكي ) وراه هادا هو المشكل راه ماكاينينش ، مشاو للفيلا ديال الريف (ادم كيزيد يغوت بالبكا )
علي :(كيمسح على وجهو ) الصبر يا ربي الصبر اللي ما يضبر ، يلاه نديوه لماليه يسكتوه
ملك : اخويا راه ايلا ديناه لتما مايجي فين يوصل حتى يسكت ليه القلب بالبكا
علي : واخا ، و عطيتيه ياكل واش  مابغاش ؟
ملك صقلات بقات غير كتشوف ف علي
علي : (اصلا هو على نغزة ) (شاف فيها بعينيه حمر ) ماتقوليش ليا ماعطيتيهش يرضع اصلا
ملك : والله اخويا مارضيت البال كنا جالسين ما بينا ماعلينا و هو يحميها بكاوات ما عرفت ماندير و نتا دخل ، عرفتي شنو هاك شدو نصايب ليه رضاعة بالزربة
علي :(خداه من عندها ادم و هو مزال كيبكي ) جري  دابا تجيبيليه داكشي ديالو نتي ماتعرفي ديري تاخرية فحياتك
مشات ملك كتجري كتصاوب ليه الحليب و علي بقى هاز ادم كيحاول يراري بيه يسكت و ادم كان مزال كيبكي ، علي بقا كيشوف فادم الي كان مدلي شنايفو و كيبكي ( و هو يتفكر شيحاجة و بتاسم ) و هو يشوفو ادم مبتاسم صحابليه راه كيحاول يضحك معاه و هو يسكت من البكا علي عجبو الحال و بدا كيحاول يهز للسما و كيلعب معاه اما ادم عاجبو الحال بزاف بدا كيدير دوك الاصوات ديالو (غغ غغغ ) و كيضحك ( الدم كيحن ) ، ملك جات و شافتهم استغربات من الولد من قبيلا و هو حاميها غواتات و دابا هاهو كيضحك مع علي بحالا ماخاصو حتى خير .
مشات عندهم ملك و حاولات تاخذ ادم من علي و بدا كيبكي ليها و هو ياخذو من عندها علي قالها غير خليه حيت غير كيمشي عند ملك كيبكي ، قال ليها خوها تمشي ترتاح بحالها تنعس حيت هاد النهار داز صعيب ديال بصح و فعلا مشات ملاك و خلات ادم مع علي
علي انسان بصح قاسح و صارم و ماكايحنش و قلبو مكايعرف لا شفقة لا رحمة و انسان بارد من ناحية المشاعر و لكن كايجي حتى لهاذ الكائنات الصغيورة و كيفشل .
(حيت شحال هادي فاش كان غابر هاديك 8 سنين علي كان مع واحد البنت لمدة ديال عماين كانو فاللول غير اصدقاء علي و ياسين و هي و لكن من بعد ولاو كثر من اصدقاء و ديك البنت حملات منو و لكن هي كانت باغا تولي ممثلة و هي طيح البيبي ديال علي بلا ماتقوليه اصلا واش هي حاملة و علي للاسف وصلاتو الاخبار بالصدفة و فرح بزاف ولكن من منين قالها ليها اكتاشف انها طيحاتو و قطع علاقتو بيها ) و قبيلا ابتاسم لادم حيت ماكرهش كون كان حتى هو عندو وليد هاكا يبقى يهزو و يلعب معاه و يشوف طرف منو معاه ، معارف ان اصلا هاداك اللي شاد هو ولدو الحقيقي .
علي عطا الرضاعة لادام حتى نعس و هو يديه لبيتو حطو فوق النموسية و هو دخل دوش عليه و مشا نعس ، طاح كاو بالعيا و بداكشي اللي داز اليوم
و هاكا دازت الليلة عند الابطال ديالنا اللي كلا واحد فيهم و فاش كان كيفكر ....
     اصبحنا واصبح الملك لله
يوم جديد
في المستشفى كان كلشي فالغرفة ديال ليلى العادية من بعد مانقلوها من العناية المركزة ...
ليلى كانت حلات عينيها و لكن واخا ماقدرش تهضر غير بزز باش كتخرج شي كليمات
اسراء :(جالسة حداها فالكرسي مبدلة حوايجها لابسة توني سبورتيف مانبعد ماجابت ليهم الحوايج سلوى من دارهم و كتبوس ليها فيديها ) كون وقعات ليك شي حاجة كون حماقيت
ليلى :( بصعوبة ) حتى كون وقعات ليا .. شي حاجة .. ماشي الذنب ديالك... ديريها فراسك نتي ما مسؤولة على والو
اسراء: (ابتاسمات ليها )ايمتاش كبرتي البرهوشة
ليلى :ههه .. اه .. غير لبارح (شافت ف جنان ) ياكما اخير مرة تخليني نمشي لشي بلاصة
جنان :(كتمسح ليها على شعرها ) تواحد ما كيهرب من قضاء الله ، انا متاكدة و لو انك كنتي معايا كان ايوقع ليك نفس الحاجة حيت مكتاب عليك هادشي
سلوى : عرفتي كون وقعات ليك شيحاجة انا متاكدة مكناش انعرفو كيفاش انبقاو عايشين
ليلى :(ابتاسمات ليها ) ههه وايلي هادشي كامل درتو فيكم مايسحابش ليا راني عزيزة بزاف
سلوى : ههه الله يعطينا وجهك ، و لكن شوفي الفضل كلو كيرجع ل اريج من بعد الله اما كون راحنا كناكلو عليك كسكسو
اسراء : بصح حتى توقف ليك القلب و اريج عتقاك
ليلى : (تأثرت) عارفة ختي اريج دير المستحيل على ودي ، و حتى انا فاش كنت فالعملية كنت كنسمع صوتها غير هي ماعرفتش علاش و لكن كنت كنحلم انني غادا فشي طريق و هي توقف اريج مورايا كتقوليا بقاي ...
سارة : يمكن تكوني كنتي كتسمعيها فالعملية
سلوى : ياك مبنجة
سارة : اه ولكن حنا درنا ليها تخدير غير موضعي حيت خفنا لا دخل ف غيبوببة
ليلى : (ممتنة ) شكرااا ليكوم بزااف ختي اريج الحبيبة ديالي هه نتي راه بنت قلبي و ليك حتى نتي ا سارة
ياسين :حدك تما انا بوحدي اللي من حقي نقولها بنت قلبي
اريج : (طلقات من ياسين و مشات عند ليلى ) شفتي غير منين مزال حية خليها تقول اللي بغات
ياسين  : دابا اضسروها علينا قفرناها معاها
امين : (كيضحك حتى هو ) وا عطاتك الايام اليلى  ديري ما بغيتي شكون بحالك ، سعداتك كون يصحابلي هكا كون حتى انا تضربت
ليلى : ههه الله يستر حتى الضربة حسدتونا عليها
جنان : يا بنتي حياتك كاملا داك اللسان ايبقا فيه مترو مناوياش تنقصي منو
اريج : ههه غير خليها ا خالتي تقول اللي بغات دابا
سلوى : واييه ، خلاها امين عطاتها الايام
ليلى :(شافت فهد من قبيلا و هو ساكت ما قالها والو ما موالفاش ليه غير كيشوف فيها ) و نتا ماغاديش تقوليا على سلامتك ولا كنتي باغي غير تهنا مني
فهد : علا سلامتك (قالها و خرج بحالو من الغرفة خلا ليلى مافاهمة والو )
ليلى : مال هذا ؟؟!
امين : غير العيا و صافي
ياسين : ماشي غير هو كلنا فالصراحة ، الحاصول اختي ليلى علا سلامتك و انا غانمشي حيت يمكن من البارح بحال هاد الوقيتة ما شافت النعاس
سارة : الصراحة كلكم خاصكم تخرجو حيت ليلى خاصها ترتاح بعدا و حتى نتوما محتاجين هاد الراحة مايمكن احتى واحد يبقى هنا من غير خالتي جنان
اسراء : لا حتى انا نبقى !
ليلى :(تفكرات كلشي كاين هنا ) اجيو فين ادام ؟
كلشي استغرب من السوال ديالها خصوصا ياسين اللي ولا متاكد ان داك الولد ادم موراه شي لعبة ، حيت مايمكنش لواحدة يلاه فايقة من العملية تسول على ولد الجارة و لا ولد صاحبتها
سارة : ادم راه داه معاه علي و ملك باش يرتاح مايمكنش وليد صغير يدوز الليلة كاملة هنايا
ليلى :(عينيها وسعو ) كيفاش علي و ملك ؟
ياسين : اه علي و ملك علاش كاينة شي حاجة
اسراء : (مع كانت اصلا شادة ليها فيديها فزيرات عليها حتى شافت فيها و هي دير ليها لشارة بعنيها زعما واياك ) اه ا ليلى داه علي معاه و ملك باش يرتاح حيت اصلا مو ماكيناش فضطرينا نخليوه معاهم
ليلى : (مافهمات والو و لكن عرفات انها خاصها تسكت ) اه عليها ، ايوا صافي
اريج :(حسات بياسين بحالا رد البال لشي حاجة ) ياللاه دابا الصراحة كلنا نخرجو حيت ليلى كيخصها ترتاح
سلوى :(متوترة ) اهه يلاه امين حنا نخرجو
امين :(حتى هو مافهم والو فهاد اللقطة ) صافي يلاه
اريج : ياسين مشينا
ياسين : (كيقول فخاطرو واخا تخبيو غادي نعرف شنو كاين ) يلاه مشينا
سارة : حتى نتي ا اسراء خرجي سيري ترتاحي
اسراء : اه بصح عرفتي شنو انا غدا نمشي نجيب الولد من عند ملك كون راه صدعها
سارة : واخا انا غادة دابا للدار يلاه نديك معايا
اسراء : يلاه دابا نيت
و خرجو البنات من مور ما خرج كولشي و كل واحد فين مشا ....

  يتبع ....

الويكاند انشاءالله مكاينش الاجزاء حتى ل الاثنين لحقاش انا معرسة 😂😂😂 ماشي انا العروسة انا غير معروضة و ماعنديش كي ندير