العشق المظلم قصص مغربية

اللعبة الغير منتهية :part 11

الجزء 11
فهد : هادي نتي
ليلى : شنو كدير نتا هنا
فهد : ( دار كراخ بضحك ) ههه راه انا لي خاصني نسول شنو كديري نتي هنا
سلوى : بلاتي بلاتي شنو واقع ؟
امين : منين كتعرفو بعضياتكم ؟
ليلى :( جلسات فالكرسي اللي قدام فهد ) دابا غير بالشوية راه من قبيلا و سلوى مجرجراني معاها ، خليونا غير نعتقو شوية
فهد : ( بقا كيضحك عليها ) نتي باقا هي نتي مايمكنش
سلوى : (جلسات حتى هي فالكرسي الي مقابل مع امين ) دابا واش مناويينش تشرحو لينا شنو وقع
جلسو فهد و ليلى كيعودو ليهم على ديك الليلة فاش تلقاو اول مرة نهار اريج عالجات ياسين و علي وصلهوم للمستشفى ، و هنا امين دارت ليه طرين فراسو او واش هادو هوما خياتي اللي تمسحو من كاميرات المراقبة داك النهار كيفاش هادشي و هنا امين سول ليلى و سلوى
امين : اهاه و لكن نتوما بجوج منين كتعرفو بعضياتكم
ليلى : انا الاخت ديال صاحبتها
سلوى : اه ، و قلع شكون ختها ؟
امين :(شاف فيها بمعنى شكون)
سلوى : ليلى هي الاخت الصغيرة ديال اسراء السليماني
فهد : وايلي واش اسرء ديالنا ؟
ليلى : هههه اييه
امين جاه عجب كل هاد العلاقات المعقدة و اللقاءات بحال هاكا عاد داكشي الي كان طرا شحال هادي ، حيت هادشي راه بزاف على الصدف ، دابا بقات ليه حاجة وحدة هي يتأكد من علي شكون البنت اللي كانت معاه ، حيت على حساب هدرتو شحال هادي ، البنت اللي كان معاها ديك الليلة كتعرف هاد ليلى و اريج و لا كانت هضرتو بصح اذن را هاد البنات بربعة من موراهم مافيا كبيرة ، و لكن كيفاش هادشي هوما ما باين عليهم والو زيد عليها مايمكنش حتى سلوى تكون معاهم مايقدرش يتخايلها حيت هو من داك النوع اللي صعيب يميل لشي وحدة و نهار غيقرر يفتح قلبو لشي وحدة اطلع مافيوزية مايمكنش . فبقى هكاك غارق في افكاره حتى فيقاتو سلوى دايرا واحد الابتسامة بريئة على وجهها
سلوى: امين مالك فين سهيتي ؟!
امين : (بقا كيشوف فيها ) ا لا والو غير تفكرت شي حاجة
و هنايا امين قرر انه يسالي هاد اللقاء باش يمشي يشوف علي ضروري اما فهد فكان نسا كاع ديك الهضرة ديال ديك المرة و منغامس فالهدرة مع ليلى
ليلى : وتا سير عولنا عليك بكري الناس كانت كتموت حداك و نتا مكاوي (زعما ناعس )
فهد: (بقا كيضحك ) قولي ليا نتي من اصحاب الماضي لا يموت
ليلى : لا لا انا من اصحاب الحقيقة المرة
فهد : واش نتي ديما هكا لسانك ماضي
سلوى : اللسان الماضي و الدراع الفاضي
المهم بقاو كيضحكو و منساجمين الا امين و هادشي كانت راضا ليه البال سلوى
امين : المهم دابا خاصنا نمشيو عندنا الصراحة بزاف ما يدار
فهد: منين خرجتي لينا هاد ما يدار ياك من قبيلا و نتا داير لينا السبة ب لي بلون باش تلاقا بسلوى هاهي قدامك
سلوى تحرجات و فنفس الوقت عجابها الحال
ليلى : هههه هالي قلنا صدق السي فهد كتر مني و نتي جاسة كتوصي فيا عنداك تبيني بلي السيد راه كيعجبني
هنايا عاوتاني سلوى مكارهاتش تشق الارض و دخل غرقات في حوايجها و امين منين سمع هاد الهدرة شي حاجة تحركات فيه للداخل و بحالا نقدرو نقولو فرح حيت كيفما هو كيفكر فيها حتى هي كتفكر فيه
امين : المهم الصراحة خرجات لينا شي حاجة مكانش معولين عليها ، نعوضو هاد الجلسة مرة اخرى
سلوى :ماشي مشكيل خود راحتك
امين خلص لحساب د كلشي و زاد بحالو و تبعو فهد و كيخرجو هواما مابقاتش ليلى و سلوى بزاف مشاو ديك الساعة بحالهم لدار اسراء هاد الاخيرة الي كي جات للدار شافت ولدها و مشات نعسات بحالها مبغاتش تفكر فهادشي لي وقع ( النعاس هو الحل د المشاكل عند اغلب البنات واخا الصراحة راه ما حل ما والو ) اما حتى اريج فقالت ليها اه حقا راه تكفحات عليا القهوة و السي علي الرايس هو اللي عطاني قميجتو باش منبقاش بديك الحالة و انا كنت حشمانة منو عليها هدرت بديك الطريقة حتى  صدراتها . المهم بقات ناعسة تا فيقها البكا ديال ولدها
اسراء: مالك امامي مالك (هزاتو عندها ) عارفة احبيبي باغي ترضع ياك
ولدها غير كيشوف فيها و كيبكي حيت هي مابقاتش كترضعو البزولة لحقاش دابا مع الخدمة ما عندها كيدير فناضت و صاوبات ليه رضاعة غير حداها فالبيت و بقات كترضعو و مرة تهدر معاه مرة كضحك معاه
اسراء: عرفتي شنو نتا و هداك الي مايتسماش عندكوم نفس لوين د العينين بجوجكم عويناتكم بحر
مع هي نطقات بهاد الجملة بدا كيجيها بحال التشاش ديال ديك الليلة و كتفكر راسها كتقول لشي واحد عويناتك بحر ولكن وجهو ماباينش مضبب داكشي
و رجعات كتشوف تاني فولدها و مركزة مع ملاميحو مزيان ، كتشوف انه بصح كاين شبه بينو و بين علي الرايس كيفما كانت قالت ليها ختها ليلى

——————فلاش باك ————-
ليلى : ناري ياختي ولدك شحال كيحمق باينة باه زوين
اسراء :(بقات كضحك ) و شنو مالنا كندوخو حنايا راه كنطيحو غير مع التيتيز
ليلى : و تي سيري ما عاقلة تا على وجهو و كتهدري
اسراء : و المهم من وجه ولدو باينة على باه غزال
ليلى :بصح هادي كاينة ، عرفتي شنو انا بعدا كيجيني ولدك كيشبه لعلي الرايس زعما مايكونش هو باه
اسراء : ( تفركعات بالضحك ) من نيتك اليلى ، نتي راه شي نهار اتحماقي مع ديك العائلة ، يقدر يكون كيشبه ليه شوية فالعينين و لكن اش جابني انا لهاد علي ديالك
ليلى : راغا ضحكت معاك اما را عارفة ماعندنا زهر و اجي نتي ماحاولتيش تقلبي على بابات ادم
اسراء: حاولت اختي و مشيت لداك الاوتيل و سولتهم داك نهار شكون كان حاجز الغرفة و مابغاوش يقولولي و حاولت انني نعطي الرشوة كاع و كانو غايديوني للحبس
ليلى: هههه لا نتي بزاف حياتك كلها مغامرات
—————نهاية الفلاش باك ———————-