العشق المظلم قصص مغربية

Part 16 : خبايا و اسرار

الجزء 15

امين و سلوى دوزو داك النهار كامل بجوج بيهم و شرا ليها الخاتم اللي عجبها و ماتفرقو حتى وصل الليل و بحكم ان سلوى واليديها فبرة فمشات نيشان للدار ديال جنان اليوم كانو البنات مجموعين حتى من اسراء و كاينة فالدار فغير كي دخلات سلوى للدار بدات كتعاود للبنات بتلاتة شنو وقع و بدات كتغوت و البنات كيغوتو معاها و فرحانين بزاف و دوزو ديك الليلة غير ضحك و تكركير ، حتى من اسراء اللي كانت مضيومة مسيكينة تفاجات بهاد الاخبار ديال صاحبتها و لا نقدرو نقولو ختها حيت مادوزوش قليل و كملو الليلة زاهية حتى الصباح اللي مقدرات حتى وحدة فيهم تفيق حيت كانو سهرانين البارح فغير بزز ناضت اسراء و سلوى كلاو و لبسو حوايجهم و مشات اسراء باست ولدها و خرجو بجوج من الدار
سلوى : يلاه نمشيو غير بطوموبيلتي و فالعشية رجعو بجوج للدار
اسراء : لا اختي نتي غادة لشركة د الرايس اما انا غادة غير لديالنا
سلوى: علاش واش مغاتحضريش للاجتماع ؟
اسراء: لا مافيا لي يمشي ليه
سلوى : و علاش
اسراء: اختي كاينين شي وجوهة تما مباغاش نتلاقا بيهم
سلوى : ههه باينة كتهدري على علي ياك
اسراء: و شكون من غير داك وجه النحس من نهار شفتو ما شفت الربح حياتي كاملا قلبها ليا الله يعطيه مصيبة
سلوى: هههه لا مايمكنش هاد الدعاوي كلها على الصباح باينة فيك قلبك طايب
اسراء : قلبي خاري ماشي طايب سيري اختي لا باغا تمشي لشي شركة سيري نتي معامن جات
سلوى : هاهي غادا هههه نمشي نخدم على راسي و نتلاقا مع زماني شكون بحالي
اسراء: مابحالك حد غير بعدي مني هاد الساعة صابحة خاسرة فيا السلعة بقلة النعاس
سلوى: نتي راك ديما خاسرة ماشي عاد
اسراء: المهم انا فالعشية ماجاياش للدار انمشي لداري نشان
سلوى: شغلك هداك سيري فين بغيتي
سلاو هضرتهم و ركبات كل وحدة فطوموبيلتها و مشات كل وحدة فالاتجاه اللي بغات ها لي مشات لشركة د الرايس و اسراء لي مشات لشركة د برادا تفاديا انها تلاقا بعلي معندهاش كاع الكانة لي يهدر معاه المهم داز داك النهار عادي على كاع الابطال ديالنا من غير اريج و ياسين اللي كانو مدوزين النهار بجوج
كانت واقفة كتشوف فغروب الشمس و هو خلاتو جالس فالطوموبيل شوية حتى كتحس بشي يدين تلواو على خصرها و حط وجهو فعنقها باسها و قال
ياسين : فاش كانت ساهية بنت قلبي
اريج : (ضحكات و هي مزالا كتشوف فالغروب ) منين جبتي هاد بنت قلبي حيت من نهار الول و نتا كتقولها
ياسين : حيت من نهار اللول دخلتي ليا لقلبي خليتيه يتعلق بيك و فداك العام كامل لي غبرتي كان كيفكر فيك و من غير هادشي كتفهميني كاتجيني على الكانة و على القلب
اريج : هههه تبارك الله عليك عندك مع التعبير
ياسين: و مالنا ندوخو
اريج : فخبارك اليوم خالتي تقتلني النهار كامل و انا غابرة و من قبيلا و هي كتصوني و مكانجاوبهاش
ياسين : اجي بعدا علاش ماسكناش مع واليديك و ساكنة مع خالتك
اريج :( دارت لعندو و بتاسمات ليه ) انا الصراحة بنت يتيمة ماتو واليديا فاش كانت عندي 10 سنين و من تما رباتني خالتي و راجلها و لكن للاسف راجل خالتي حتى هو مات فبقات خالتي جنان مربيانا
ياسين : شفتي علاش كنقولك بنت قلبي هههههه الصراحة حتى انا يتيم ماتو واليدية فاش كانت عندي ديك 15 لعام و مقطوع من شجرة تقدري تقولي نتي بعدا عندك خالتك اما انا عندي الله
اريج : (بتاسمات ليه بحنان ) عندك الله و عندك حتى انا
ياسين: (بتاسم ليها حتى هو باسها فجبهتها ) الله يخليك ليا العمر
اريج: و ليا حتى انا اللوز ديالي
ياسين: هانا عاوتاني على العنب بدا كيتشتت
اريج: هههه دير راسك ما قلت ليك والو ، اجي و منين ماتو واليديك شكون رباك ديك الساعة زعما حتى وصلتي 18 لعام
ياسين : بابات علي سي سيلمان الرايس كان صاحب الواليد ، جابني لعندو و تهلى فيا و تهلى حتى فالممتلكات دياولي و من بعد فاش مابقيتش قاصر عطاني رزقي ، عرفتي أ اريج كنت كنقول لا تزوجت غادي نولد بزاف ديال الولاد ، باش حتى يلا مت انا و مهم ولادي يلقاو خوتهم و مايبقاوش يحسو براسهم واحيدين و ماعندهومش عائلة
اريج :( دارت يديها بجوج على وجهو ) فاهماك و حاسا بيك
ياسين: ههه تبغي تولدي ليا بزاف
اريج :(بمياعة ) شحال هاد بزاف نشوف
ياسين : فرقة د الكورة ههههههه
اريج : لا نتا باينة هرب ليك ههههه يلا يلاه و صلني للدار (و مشات طالعة فالطوموبيل )
ياسين: غادة هاربة من الموضوع ماشي مشكيل غير هربي تا نوصلو لصحيح و ما يبقى ليك هروب
و بقاو هكاك كيضحكو و يتناقشو تا وصلها للدار سالا داك النهار و دازو يومين اخرين و لحد الان علي و اسراء ماتلاقاوش ، اسراء غالبا البلاصة اللي كيعمرها هو كتخويها هي حتى لنهار الثالث كانت جالسة اسراء فدارها لابسة غير واحد الكسيوة خفيفة صيفية فالاورونج شدا الطاسة صغيورة ديال لا كلاس و كتفرج حتى كتسمع الصونيت ديال الباب مشات حلات حتى كتفاجا بعلي قدام الباب
علي : مالكي كلا ليك القط لسانك ولا شنو
اسراء مجاوباتوش حاولت مباشرة تسد الباب عليه في وجهو
علي :(حل الباب تاني بيديه قبل ماتسدو ) واش من نيتك دابا
اسراء: راه نتا اللي واش من نيتك علاش جاي عندي
علي : عندنا شي هضرة باقي مساليناها ازين
اسراء: لا سالينا هضرتنا و مابقى مايتقال
علي : واخا (قالها و دفع الباب دخل و سدو موراه )
اسراء: مافهمتكش قلتي ليا قحبة و ديك الهضرة قلتي بلي انا و ياك ماشي في علاقة ، و انا بعدت منك عطيتك التيساع و حتى الشركة ديالكم مابقيتش كانوصلها ، فعلاش جاي تابعي
علي : علاش كنتي باغا نكونو انا و ياك فعلاقة ؟
اسراء : (وترها بهاد السؤال) هاد ساعة باغاك غير تخرج عليا من داري
علي : واخا نخرج و دابا نيت ايلا جاوبتيني على هاد الحاجة (جبد تيليفونو و دخل الميساجات ووراها واحد الميساج فيه " السبب الوحيد اللي مخليك عايش هو اسراء و داكشي لي مخبيا عليك فماتيقش براسك بزاف -البوص ")
علي : نتي ديجا قلتي مخبيا عليا شيحاجة ، زيدي عليها هاد الميساج فمن الاحسن تقولي ليا دابا شنو كاين
اسراء: (بدات كتصفار و تخضار غير بوحدها ) شكون هاد البوص ؟
علي : اول حاجة ماشي نتي اللي كتسولي انا اللي كنسول تاني حاجة نتي اللي خاص تقولي لي شكون هاد البوص و منين كتعرفيه ولا كيعرفك
اسراء: انا راه والله معارفا شي حاجة على هاد البوص
علي: اهاه و الحاجة اللي مخبية شنو هي
اسراء : ديك الهضرة قلتها غير باش نخلي راسك كيضرك و صافي يمكن سمعني شي حد فاش قلتها و بغا يضحك معاك
علي : ماتحمقينيش ا اسراء و قولي لي كاين هاد الهضرة كلها اللي قلتي راه ماتيقتهاش فمن الاحسن قولي شنو كاين و شري روحك معايا
اسراء: عاودها لراسك تيق و لا كعلا تيق مامضطراش نشرح ليك
علي: واخا حتى هادي هضرة ، و لكن ا اسراء نهار نعرف بلي مخابيا عليا شي حاجة كتخصني ماتلومينيش ديك الساعة
اسراء : (بتوتر ) راه قلت ليك ما مخبيا والو
علي: واخا الالاة (بدا كيحيد لافيست اللي لابس و هز اليدين د القميجة ديالو )
اسراء : شنو كدير نتا
علي : (مداهاش فيها و مشا لجيهت الكوزينة ) كاين شي عشا ؟
اسراء: واش دابا نتا كتحماق عليا و لا شنو يصحاب لراسك كتسارى فدار باك القديمة (هزات لافيست عطاتها ليه ) لبس حوايجك و خرج عليا من داري
علي :(طلق ديك لافيست و شد اسراء من خصرها و بحركة خفيفة قربها ليه و خشا وجهو فعنقها ) اخير مرة غادة ديري هاد الحركة و انا مغانمشي حتى يقولها ليا راسي ( و هو يبوسها فعنقها نيت )
اسراء: ( كاتجي اصلا حتى ليديه و كتفشل عارف نقط ضعفها و لكن فلحظة فاقت من المخدر ديالو و بعداتو ) دير اللي بغيتي شغلك هداك
حتى هو طلقها و مشا الكوزينة كيبقشش اسراء بقات جالسة غير فالصالون كتسمع البلاكارات و المجورة د الكوزينة كيتحلو و يتسدو عصبها مشات عند الكوزينة تشوفو
اسراء: من قبيلة و نتا حل سد فدوك البلاكارات علاياش كتقلب ؟
علي : يمكن راني مساكنش معاك عاد كنحاول نستكشف هادشي عندك
اسراء:(عارفة لا بقات كتراد معاه مغاتساليش ) قوليا شنو بغيتي انا نمد ليك
علي : شفتي كي كتولي زوينة فاش مديري عقلك ، يلا جبدي ليا les pâtes لا عندك
اسراء عوجات فيه و مشات تجبد ليه ليبات خلاتو كيضحك عليها و على التصرف اللي دارت
المهم جبدات ليه داكشي كاع الي يحتاج و بدا كيطيب و كتبان فيه بحال شي واحد محترف ماشي غير كيرون قطح الصدر ديال الدجاج و صوطاه مع زبيدة و مليحة و حيدو من ديك المقلة و دار فيها البصلة و بقى كيديها و يجيبها حتى تشحرات و زاد عليها لاكريم فريش و الشومبنيون و الفرماج لحمر حتى ختارت ديك لاصوص و زاد عليها داك الدجاج و ليبات اللي كان سلق دار عند اسراء باش يقولها وجدي الطابلة لقاها ساهية فيه
علي : ملكي عمرك شفتي شيواحد كيطايب
اسراء : ناري كون يشوفك شي واحد مكايعرفكش هكا يغلط فيك و يقول هاد الراجل مكاينش بحالو
علي : (قرب حتى لعندها )و راه مكاينش بحالو (شفها توترات و هو يبتاسم ) زيدي لا باغا تاكلي
اسراء: (بصوت منخفض ) تاكل فيه السم
علي: شنو قلتي
اسراء: قلت ليك هاني جاية
مشاو بجوج جلسو فالطابلة اللي كانت وجدات اسراء هو غير حط داكشي و بدا كياكل و اسراء غير كتشوفيه ساهية فيه كيبان هادىء تقول ماشي هو لي كيلوح غير السم من فمو ماشي هو اللي كيقيل يعطيها القرطاس
علي: (كياكل ماكلتو مشافش حتى فيها ) غادا تاكلي و لا اتبقاي تشوفي فيا
اسراء : (تحرجات ) على زينك نبقى نشوف فيك
(بدات كتاكل داكشي اللي طيب و كتبنن ف خاطرها ميصحابش ليها هادشي غادي يكون بنين لهاد الدرجة ، بقاو كاياكلو و مرة يرمي ليها هضرة مرة ترميها ليه حتى سلاو داكشي و ناضت كتجمع الطابلة اما هو فمشا لصالون جلس على الكانابي و شد التيليكوموند بغا يتفرج و دار رجل على رجل فوق الطابلة اللي قدامو
اسراء: اويلي نتا واش من نيتك واش مغاتمشيش بحالك ياك تعشيتي
علي : فاش اترشق ليا راه غانمشي
اسراء : (معصبة ) لا نتا لا بقيت متبعاك غادي تحمقني (مشات الكوزينة كتجمع الروينة الي دار باش طيب و كتغسل الماعن و بدات كتغني ساهية و تغسل و تغني ، حتى كيسمع علي صوتها و بدا كيتمعن فيه اصلا صوتها فاش كتسمعو كيطربك ، المهم بقات هي كتغني و كتجمع حتى كتقفز فاش حسات بيديه دورهم على خصرها و حط وجهو فعنقها
علي : شنو باغا ديري زعما
اسراء: (قلبها كيضرب و كتحس فشكل شي مشاعر مختلطة )شنو كتقصد راه نتا اللي شنو كدير
علي: (بقا يد شدها بيها من خصرها و اليد التانية خشاها تحت الكسوة و بدا كيتلمس ليها ففخضها ) ايلا كنتي باغا غا تجهليني عليك و تفيقي السبع فنبشرك راه درتيها ( و باسها فعنقها تاني )
اسراء: (متوترة ) علي عافاك طلق مني
علي: مالكي توترتي لهاد الدرجة كناثر فيك
اسراء: ههه ما عرف والو ا علي و عمرك غتعرف
علي: اذن داك الميساج بصح
اسراء: الصراحة اه انا مخبية شيحاجة كبيرة و عمرني غادي نقولها ليك فهمتي ( و بعدات عليه ) حاول تبعد مني شوية ، انا كنتفداك فحاول حتى نتا دير بحالي ، المهم انا غادا نعس فاش تخرج سد الباب
طلعات لبيتها و خلاتو دازت شي نص ساعة و الحس مقطوع يسحاب ليها راه مشا و بدات هي كتبدل حوايجها لبسات بيجامة عبارة عن شورط قصير مامغطي والو تقريبا و الدباردور ديالو و مشات تنعس تخشات فالنموسية حتى كتسمع باب البيت تحلات عليها ضارت تشوف شكون لقاتو علي مازال فالدار
اسراء:واش مازال نتا هنا واش مغاتمشيش
علي : فرعتي ليا كري بهاد مغاتمشيش مغاتمشيش ، انا ا لالاة غادي نبات هنا (بدا كيحيد حوايجو القميجة و السروال و بقا غير البوكسر )
اسراء: (وقفات ) خرج عليا من داري فهمتيها خرج
علي : ( بدا كيقرب ليها و هي كترجع اللور ) و ايلا ماخرجتش شنو غادا ديري
اسراء: (بقات راجعة اللور حتى وصلات للحيط ) ايلا ما خرجتيش (كتهدر و تبلع ريقها ) ايلا ماخرجتيش غادي نعيط ليك للبوليس
علي :(حط يديه على الحيط بقات هي الوسط ) و ديريها شنو كتسناي
اسراء: ( كتسرط ريقها من هاد القرب اللي فيه هما ) بغيت نعرف غير شنو كتصنع مكاتحملنيش و جاي لعندي
علي : (زاد قرب ليها ) و شكون قاليك مكانحملكش
اسراء: شنو بغيتي تقول زعما ..
يلاه بغات تكمل هضرتها وهي تحس بيه جرها تاتضربات فيه وبدا يبوس فشفايفها بالجهد وهو شاد راسها بين يديه كان كيتلدد بشفايفها ماكيشبعش منهم..هي كانت غير واقفة مصدومة ويديها على يديه..مادارت تاشي تجاوب بقا مدة كيبوس فيها تا تسمع صوت طليفونو بعد عليها بشوية عنيه فعنيها نایمین کیلهت جبد طليفون من جيبو وجاوب وهو مزال كيشوف فيها..كانت تاهي كتلهت بقات واقفة.....

يتبع