العشق المظلم قصص مغربية

Part 34 : فهد و ليلى

الجزء 34
ليلى و فهد

دازت 15 يوم على الحادثة اللي وقعات ليلى .. سيمانة دوزاتها فالمستشفى و سيمانة دابا باش خرجات و راها فالدار ... فديك 15 يوم كانت دايما كلشي معاها تواحد مافارقها و خصوصا فهد كان معاها دايما لي زابيل و كان كل نهار كيجي عندها فاش كانت فالمستشفى و فاش تحولات مكانش كايجي بزاف مرة مرة فين كان كايجي مع ملك اللي كانت بدورها كاتجي باش تشوف ليلى و حتى ادم بلا مايعرف فهد الشي اللي خلا اسراء دوز حتى هي ديك السيمانة فالدار مع جنان و البنات و حتى اريج كانت جالسة دافعة شهادة طبية للخدمة حيت اثرت فيها الحادثة ديال بصح ... دازت ديك السيمانة هكاك و دابا ليلى الحمد الله بدات كتبرى يعني كتمشي كاتجي بوحدها فالدار كتهز ادم كتلعب معاه ديجا الجرحة بدات كتبرى مهم رجعات لحياتها العادية و قررات الغد ليه تبدا حتى هي تمشي ليكول من مور ما كلشي رجع لحياتو اسراء لدارها و اريج لخدمتها

مهم جا نهار جديد الي غتمشي فيه ليكول ديالها و كانت دايرة مع فهد يوصلها فاقت شوية بكري وجدات راسها سرحات شعرها بالبريسا و جدات امورها و كاع داكشي اللي تحتاج يلاه كانت غاتجلس تفطر مع ماماها و اريج و هي تشوف الميساج ديال فهد كيساينها لتحت فخرجات من بيتها و مشات بطيرة لجيهت الباب باش تمشي بحالها
ليلى : هاني مشيت
جنان : مازال الحال
ليلى : خاصني نطبع شي ورقة فالمكتبة عاد قالتها لي لبنت غانتعطل
اريج : ايوا تسناي حتى نمشيو انا وياك
ليلى : و ناري شحال فيكم مكاين لاش ، اصلا دايرة مع صاحبتي نتلاقا بيها و نمشيو بجوج
جنان : و شكون هاد صاحبتك بالسلامة
ليلى : يا ويلي يا ماما كلشي بغيتو تعرفوه صاحبتي كتقرى معايا و صافي .. مهم هانا مشيت

زربات عليهم  و خرجات و سدات الباب .. هبطات من العمارة لقات فهد لابس سروال دجين سامبل فيه شوية ديال تقاطع مع تيشرت و داير واحد الكاسكيط فالكحل ديال وان بيس جايا معاه كيبان  ناضي ... مهم كان كيساينها و متكي على الطوموبيل ديالو BMW M8 فالابيض ( اللي كان دايز من حداها كيبدا يشوف فيها حيت اخر مكاين تقريبا واخا الصراحة خارجة ف 2021 و لكن راه ساوية 2,000,000 ديال الدرهم )
ليلى :( اول مرة اتشوفها عندو ) بشااااااخ عليك اولد العبد هاد الخير كولوو عندك
فهد:  (كتهربو ليه بالهضرة ) هههههه كي جاتك
ليلى :( مشات كتلمس فيها ) اويلي على كي جاتني واش هادا سؤال تاعت الله واش هاد سؤال... راه كتغوت راه مايمكنش ... واش عاد خديتيها ؟
فهد : دخلها علي البارح ليه و عطاها ليا من بعد
ليلى : ههههه اوبييلي واش BMW  ا عيباد الله كتعطى ... لا لا انا را عارفاكوم لاباس عليكم و لكن ماشي حتى لهاد الدرجة
فهد : ههه شنو تسوقيها
ليلى : واش وجهي وجه وحدة عندها البيرمي
فهد : اصلا مانخليكش تسوقيها يديك مفافيين غير بحدهم نخاف دخلينا فشي عجب
ليلى :( ضرباتو لكتفو ) الله يمسخك ماكتمركش
فهد : شنو دابا عندك حصة حتى ل 10 ياك نمشيو نفطرو ؟
ليلى : واييه راني غانموت بالجوع قلتي ليا راك لتحت هبطت بلا ما نفكر نفطر حتى لقيت راسي حداك
فهد: ( عجبو الحال ) هههه هاي هاي ههههه و طيحة خايبة هي
ليلى : (كتعوج فيه ) بلا ماتحس براسك راه غير حيت ادير ليا الشبوهات مع الناس د العمارة و صافي يبداو يسولو شكون هادا و عندمن جاي ( ديك ساعة ردات ليه الصرف ) واييه فكرتيني يلاه نتحركو قبل مايشوفنا شي حد ... عرفتي هاد خوتنا و بركاكين لاقصى درجة
فهد : ( حل ليها الباب ) ركبي نتي كتخافي ما تحشمي