لعله القدر

Bart 26

ليتها تدوم تلك الاوقات التي نشعر بها بالسعاده والفرح، تلك الاوقات التي تٌزهر قلبنا، ليتها تدوم الي النهايه او ان تكون هي النهايه❤️‍🩹
♡♡♡♡♡♡♡♡♡♡♡♡♡♡♡♡♡♡♡♡♡♡
جري الشباب خلفهم بسرعه وظلت الفتيات تصرخ وتجري بضحك ومرح، منهم من جري الي الحديقه ومنهم من جرى باتجاه المطبخ والاخر الي اعلى...
ليتقسموا كالتالي...
بالحديقه...
كانت تجري وهي تضحك وتنظر خلفها...
كريم: تعالى هنا والله ما هسيبك... انا هوريكي ي كيان...
كيان: اعلى ما ف خيلك اركبه انت اصلا بوء ع الفاضي...
كريم: بقا كدا طب والله لوريكي تعالى بقا...
جرت ووقفت ورا الشجره الكبيره ليحاصرها هو بسرعه..
كريم: باااس وريني بقا هتجري منين وقعتي ي قطه..
كيان: طب بس استنا هفهمك والله... مش انا الي قولت ع المقلب دي البت شهد مش انااااا...
كريم: ولو مش كنتي معاها انا هوريكي لا وانا الي خوفت عليكي... تعالي هنا...
حاولت ان تجري بسرعه ولكن خانها هذا الدريس الذي لعنته بتلك اللحظه ف هو كبير عليها او بمعني اصح فضفاض ليتناسب مع خمارها التي تعشقه...
داست عليه لتقع علي هذا العشب الذي بارض الحديقه... ليخبط كريم بقدمها ويقع هو فوقها ولكن وضع يده ليستند عليها وتتلاقي اعينهم...
كريم وهو ينظر بعيناها: انتي كويسه...
كيان بهيام من نظراته: ها...
كريم: حصلك حاجه..
كيان بتوتر: هو... اه كويسه محصلش حاجه...
كريم: هو اي الي حصل اصلا...
كيان: اتكعبلت ف الدريس ف وقعت...
كريم: عشان واسع...
كيان بضيق: وانت مش عجبك اني بلبس واسع ولا اي...
كريم بابتسامة جذابه: عجبني... دا عجبني اوي..
كيان بتوتر: هو اي...
كريم: كله...
كيان: هو اي دا.... وبعدين قوم انت بتعمل اي...
كريم: يووه بقا ما كنا كويسين...
كيان: كويسين اي احنا وقعنا لو مش واخد بالك...
كريم: طب ما نقع هو في احلى من كدا..
كيان: بمعني...
كريم وهو يقترب اكثر من اذنها: بمعني اني هنتقم منك دلوقتي...
كيان بصدمه وخوف: نعم يعني اي...
ثواني و قطع كريم البعض من العشب والقاه بوجهها وجري بسرعه... وهو يضحك علي شكلها...
كيان: ي حيواااان انت اي الي هببته دا الزرع في تراب...
كريم بضحك: انتي لسه شوفتي حاجه اصبري...
جري كريم نحيه خرطوم الماء الموجود بالحديقه وفتح الحنفيه ووجهه بوجه كيان...
كيان بصراخ وضحك: اعااااااا لالا كريم بلاش اعااااا يخربيتك.. هههههه
كريم: بقا انا تعملي فيا كدا طب اهو.... هههههه وريني بقا هتعملي اي...
ترك كريم الخرطوم من يده ارضا ومشيا بخطوات واثقه تجاه باب الفيلا ليدخل ولكن لم تتركه كيان.. لتجري هي الاخري وتمسك الخرطوم وتوجهه بظهره وهي تضحك..
كيان بضحك: مش حوت وريني بقا شطارتك هههههه
كانت تعتقد انه سيجري ولكن هذا ما كان ينتظره كريم بالفعل...
كريم بضحك: هو انا حوت فعلا ههههه انتي فاكره اني هجري من المياه زيك ولا اي انا انزل المحيط واطلع مبسوط ي حلوه...
خلع كريم قميصه لتظهر عضلاته وصدره العريض لتشهق كيان بخجل...
كيان: انت بتعمل اي... انت مجنون...
كريم بضحك: في اي عادي كلها كام يوم وهبقا خطيبك رسمي... مع ان عادي يعني تشوفيني كدا دلوقتي ههههه اول مره اشوف بنت بتتكسف لسه...
كيان بغضب: معلش بعيد عن انك اكيد مقبلتش بنات متربيه قبل كدا... الا ان ملحوظه مهمه بقا ياريت تشيل موضوع دا من دماغك خالص انا وانت مستحيل نكون سواااا... فااااااهم...
كانت تتحدث وهي تعطيه ظهرها ليتجه هو اليها بغضب ويسحبها من خصرها تجاهه..
كريم: وانا احب اقولك اني بعمل الي بقوله والي بعوزه بيكون ليا بيتنفذ وبمزاجك او غصب عنك هتكوني لياااا فاااااهمه....
كيان وهي تحاول الافلات من يده: ابعد ايدك دي عني خالص.... اوعاااااااا و مستحيل شوف كدا مستحيل... لما السما تمطر ورد وفل وياسمين كدا هبقا اوافق ولا اقولك لما تحصل معجزه كدا والسما تكتب كيان وكريم وترسم قلب هبقا اواااافق....
تركته كيان واتجهت الي الفيلا...
______________________________________
وبنفس التوقيت الذي حدث به شجار كريم وكيان ومرحهم بجانب اخر من الفيلا خصوصا المطبخ كانت تجري منه لتقف خلف التلاجه وهي تحاول كتم ضحكاتها قدر الامكان...
احمد: والله ما هسيبك ي روضه بقا عايزه تقتليني بالسكينه.. انا.... ماااشي هوريكي...
لم تستطع تمالك نفسها ليخرج صوت ضحكتها وهي تضع يدها علي فمها محاوله كتم صوتها.. ولكن كان قد سمعه بالفعل لتأتي بباله فكره...
احمد: اه اي دا.... اووووف نسيت اخد علاج السكر... اهو الصداع والدوخه ومش عارف اقف خالص... اااه اي دا لالا حاسس اني هقع...
ثواني وخرجت روضه بسرعه اليه وبخوف: دا بجد انت عندك سكر...
احمد: اي دا انتي هنا... روضه دا سر محدش يعرف الموضوع دا... اياكي تعرفي حد... اااه راسي...
مال الي الخلف وكأنه سيسقط لتمسكه بسرعه...
روضه: احمد انت كويس...
هنا امسكها احمد ولفها حتي اصبح ظهرها للحائط ووجهها له وهو يقف امامها ويمسك يدها الاثنان باحكام...
احمد بضحك: ههههه خلاص وقعتي ي قطه....
روضه بصدمه: انت كنت بتكدب... بقااا كداااا..
احمد: وانتي صدقتي زي الهبله... عيب عليكي ي دكتوره...
روضه بغضب: انت معندكش دم صح....انا الي غلطانه عشان بخاف ع واحد زيك اصلاااا اوعااا ايدي سبهااا
احمد: تؤتؤ رايحه فين...
روضه: رايحه فين اي اوعااا هطلع براا زمانهم بيدورا علينا...
احمد: يدورو براحتهم... المهم انك مش هتمشي من هنا الا بشرط...
روضه: اي هو بقااا
احمد متصنع التفكير: امممم هتجيبي بوسه...
روضه بشهقه: ي نااااااااااعم هي مين دي...
احمد بضحك: انتي في حد غيرك ولا اي اكيد مش بكلم التلاجه...
روضه: ابوس مين ي بتاع انت فاكر نفسك مين عشان تقولي حاجه زي دي اوعااااا بدل والله اطلع عفريتي عليك انا مجنونه اصلا...
احمد: قولت مش هتمشي لحد ما تنفذي الشرط...
روضه: انفذ اي ياض انت عبيط ولا متكهرب وانت صغير بستك عقربه بثم لحظي ي بعيد عشان تموت ف ثانيه زي الصرصار المقلوب... ويجي واحد يدوس عليك كدا....لحد ما تبقا زي الاستيكر ع الارض...
احمد وترك يدها وامسك بطنه من الضحك عليها: خلاص خلاااااص هموووت يخربيتك هههههههه اي كل داا هههههههه انا حسيت نفسي فتحت بلاعه..... اهديييي... مش كدا...
روضه: اوباااا هما بيجوا ع السيره ولا اي...
احمد بعدم فهم: هو اي دا..
روضه: حته صورصار وراك انما اي اكبر من قفاك كدا..
احمد بضحك: يخربيتك اي الي بتقوليه دا... مالك ومال قفايا بقا...
روضه: يعم هو قفا تامر حسني يعني وبعدين شوف الصورصار الاول احنا هنسيبه ونمسك ف قفاك...
احمد وهو مستمر بالضحك لف لينظر: هو فين دا...
روضه: هناك اهو...قرب كدا اهو جنب البتاع الي فوق دي..
اقترب احمد قليلا باتجاه اصبعها: فين دا...
ثواني وجرت روضه الي الخارج وهي تصرخ: عليك وااااحد وضحكت عليك ايواااا وضحكت عليك ايوااا
كان يقف مكانه مستمر بالضحك علي شكلها الطفولي وجريها وهي تغني وترقص بخطوات طفوليه...
لا يعلم لما هو سعيد ويضحك من قلبه حقا ولكن يرفض فكره انه يحبها ويبرر هذا الشعور بانها مختلفه ونوع جديد لم ولن يراه مره اخري...
____________________________________
اما شمس التي جرت الي اعلى لتختبأ من محمد ولقصرها وحجمها الصغير اختبأت بالدولاب...باحدي الغرف...
محمد بضحك: شمس طب تعالي وانا مش هعملك حاجه...، مهو مقلب حلو بصراحه عجبني... بس دا مش معناه اني هعديه عادي كدا...
لم يتلقى اجابه ليخرج من هذه الغرفه...ويذهب لغرفه اخري مجاوره... لتخرج هي من الدولاب...
شمس بفرح: هيه فلت منيهم ههههه معرفش يمسكني...
ظلت تلف وترقص بمكانها وتغني: جامد ايوه انا جامد طبعا مانا عارف...
وبتلك اللحظه خبطت قدمها بالمرآه لتقع وتتحطم... لتقف هي ماكنها بصدمه وهنا فتح الباب ليجدها تقف وعيناها ترمش بسرعه وتضم ذراعها بجوارها وكأنها كتكوت صغير سقط بالماء...
محمد بضحك: اي الي عملتيه دا...
شمس بطفوله: مش انا...
محمد: اومال مين...
شمس وهي تمد شفتها السفليه بطفوله اكثر: مش عملت حاجه وبعدين انت السبب...
محمد وهو يضع يده بجيبه بثقه: مانا السبب عشان كدا كسرتيها...
شمس: تؤ مش انا...
محمد: اومال مين بقا... العفريت صح...
شمس بتوتر: تصدق ممكن برضو...
محمد: بت تعالى هنا... انا سكتلك من الصبح... خدي بقا...
شمس: تؤتؤتؤ عيب ي استاذ ي محترم تمد ايدك ع بت اي قله الادب دي ماما ربتك كدا ولا صحيح اوباااا اي الي انا بقوله كدا... ثواني كده... ممكن اسالك سؤال...
محمد بضحك: اه طبعا اتفضلي
شمس بصوت منخفض: هو انت دلوقتي واحد عادي ولا الدكتور بتاعي
محمد: لا ي ستي انا دلوقتي واحد عادي مش دكتور ولا حاجه دلوقت...
شمس وعادت لصوتها العالي: طب مانا ماشيه كويس اهو اي ي استاذ ي محترم انت عايز تضربني وتمد ايدك ع بنت انت لالا فضيع فضيع... اه عرفاكم عرفاكم انتم بقا المتحرشين بتوع الاتوبيس والقطر و المترو صح... تؤتؤ راحت الشهامه راحت الجدعنه راحت راحت...
محمد بضحك: الله ي فنانه الله ع الاداء والابداع والدقه ف التمثيل ههههه بحب كل مسرحياتك وبدخلها كله....
شمس بابتسامة ثقه: لالا دي اقل حاجه عندي...
عدلت الجاكت الجلد التي ترتديه واكلمت: مبحبش اتكلم عن نفسي كتير...
هنا سحبها محمد من الجاكت كالارنب من قفاها...
محمد: بقا انا تمسكيلي سكينه وعايزه تموتيني دا انا هعمل منك كفته...
شمس: اي دا بحبها وياريت بق معاها سلطه طحينه او بابا غنوج وشويه جرجير وميه سلطا يااااه ابداع..
محمد: يخربيتك انتي بتقولي اي انتي واقفه ع عربيه كفته ولا مصمت ف الشارع...
شمس: الله مش انت اللي قولت...
محمد: بت انتي عايزة تشليني...
شمس: اااااه
محمد: ااه وكمان بتعترفي من اول الم...
شمس: لا من غير الالم اصلا اصل بص احنا الاتنين ولا اقولك اعمل الي تعمله انتم اصلا صنف زباله وتستاهلم كل حاجه اصلا..
محمد بغضب: والله وانتم الي ملايكه يعني صح وبعدين مش ذنبنا انك بتحبي واحد مش معبرك تمام.
هنا وقع كلامه عليها كالصاعقه لم تستطع الرد عليه وتجمعت الدموع بعيناها..
شمس محاوله الثبات: تقصد اي...
محمد: ولا حاجه بس متخديش ذنب حد بحد تاني وصلت انا مش هوووو...
فورا تركته شمس وجرت الي الخارج...
________________________________
اما بالنسبه لنور التي ظلت تجري وماهر يجري خلفها وتضحك بشده وهو ايضا...
نور بضحك: ي استاذ انت بتجري ورايا هو انت تعرفني عشان تجري ورايااا...
ماهر: ما هو اول تعارف بنا عايزه تموتيني يبقا اكيد لازم اطلع عينك...
نور: طب بس نتفاهم انت اي الي جابك معاهم دول عصابه وانت شكلك راجل طيب ومحترم.
ماهر بضحك: ههههه طيب مين انا لالا انتي لسه متعرفنيش بس دا انا زعيم العصابه دي...
اتجهت نور الي الكنبه والقت بجسدها عليه...
نور: لا خلاص تعبت اي دا مش قادره اجري تاني كفايه..
ثواني والقي ماهر نفسه بجوارها...
ماهر: ولا انا والله انتم جيبني مصر عشان اجري..
نور: اي دا هو انت مكنتش ف مصر..
ماهر: لا كنت ف المانيا ولسه جاي..
نور: واو المانيا انا بحب البلد دي جدا لما روحت مع بابا عشان شغله كنت طبعا لوحدي ومفيش حد معايا وهو مشغول بحكم الشغل ف كنت بتفسح هناك لوحدي واشتريت لبس كتير من هناك...
ماهر: اها البلد هناك فعلا تجنن...
نظرت نور اليه واكملت بضحك: اكيد بتلمح ع البنات صح..
ماهر بهستريا ضحك: هههههه انا والبنات اي دا لا بجد هموت مش قادر....
نور: اي انا مقولتش حاجه تضحك...
ماهر: لالا قولتي استني هقولك ههههه اصل انا... انا خطبت 6او7مرات وفركشت...
نور بصدمه: نعم... اي دا.. قصدك ارتباط عادي يعني..
ماهر: لالا انا مش بحب جو ارتباط من غير حاجه رسمي وكدا لا احنا ممكن نتكلم نتعرف وكدا وبعدين لقتها عجباني ع طول بخطبها بس للاسف مبتستحملش... وبنفكرش..
نور بعدم فهم: يعني اي مبتستحملش هي عربيه... اي الكلام دا..
ماهر: بصي انا هقولك.. يعني انا ليا طباع غريبه شويه.. او يعني ناس كتير بتشوفها غريبه ف بالتالي هي مش بتستحمل الطباع دي وبتزهق او بتحصل مشاكل ف بنفركش...
نور بتوتر: اممم طباع زي اي مثلا...
ماهر بابتسامه: لا مقدرش اوصفلك بس ممكن بما اننا هنكون صحاب تعرفيها مع الوقت...
نور بابتسامة وهي ترفع شعرها: ومين قالك اننا هنكون صحاب...
ماهر وهو يقترب منها: قلبي...
نور بتوتر: ماله...
ماهر: حاسس..
نور وهي تبتعد قليلا: اه صح انا معرفش اسمك ولا حاجه عنك...
ماهر بغمز: شوفتي قولتلك هنكون صحاب..
نور: حضرتك ف بيتي يبق اكيد لازم اعرفك..
ماهر: طب قبل ما اقولك انا مين... هو انتي عايشه لوحدك يعني فين جوزك اهلك... كدا..
نور بضحك: هههه جوزي لا انا مش متجوزه ولا مخطوبه حتي احنا شله كلها سناجل الا اتنين بتحبو اتنين مش معبرنهم و واحده بيتقدم ليها الف عريس وترفض و واحده قرت فاتحه وبعدين الموضوع مكملش مستحملش جنانها بق ههههه
ماهر: طب اهلك فين...
نور بحزن: امممم والدي و والدتي منفصلين من زمان اوي وانا عايشه مع بابا بس هو مسافر عشان شغله و.. ماما سافرت من وانا عندي 10سنين ومعرفش عنها حاجه خالص بس يعني بابا قالي انها اتجوزت وعايشه حياتها عادي وراميه بنتها...
ترقرقت الدموع بعينها ف وقف وسحبها من يدها الي حضنه.. لتبكي هي بشده وكأنها كانت تنتظر ان يسأل احدهم هذا السؤال لتنفجر باكيه...
ماهر وهو يمسح ع ظهرها بحنان: انا... انا اسف بجد مكنتش اقصد والله حقك عليا...
كانت تتعلق برقبته كالاطفال وتبكي بشده..
نور ببكاء: انا... انا محدش سألني عنها حتي صحاب كيان وشهد و روضه... محدش فيهم سألني ف مره هي مامتك فين وبتكلمك ولالا... هي مره واحده انا كنت بحكلهم عن خناقه مع بابا ف شهد قالت ومامتك سكتت قولتلها ماما مش هنا... ومحدش سأل حتي هي فيييين..
ماهر: طب خلاص بقا بالله عليكي شوفي بوضتي الميك اب بتاع العفاريت بتاعك..
نور وهي تضربه وتضحك: انت بارد ع فكره...
ماهر: اي دا لحقتي تعرفي ي اختي اصبري دا انا هطلع عينك... ههههه
ابتعدت نور هنا بعد ان ادركت انها تتعلق به بتلك الطريقه...
نور: انا... انا اسفه بجد مش عارفه انا عملت كده ازاي..
ماهر بثقه وغرور: لا انا عارف ان عندي جاذبيه وكاريزما تسحر اي حد
نور: لا والله..
ماهر بضحك: خلاص بق بهزر والله يلا قومي اغسلي وشك وبالله عليكي تغيري الاسود دا عشان كرهته علي ايديكم.. هههههه
نور: اي وحش الاسود ولا اي..
ماهر: بعيد عن ان القالب غالب بس هو جامد ونفس الوقت قمر عليكي وبرضو مرعب بعد الي حصل برا..
نور: خلاص ماشي شكرا ع كل دا...
ماهر: you're welcome
نور: انت جاي من المانيا كلمني الماني طيب...
ماهر: بس كدا حاضر ي ستي كنتي بتسألي ع اسمي صح... وبشتغل اي..
نور: ايوه... اتفضل قولي اسمك وشغلك وعندك كام سنه بالالماني...
ماهر بابتسامه جذابه: Ich bin Maher, Ich werde Ingenieur، Ich habe 29 Jahre alt
نور: واو نبره صوتك حلوه اوي ف النطق... ي..
ماهر: اكيد اسمي باين ف النطق..
نور بضحك: بهزر ي ماهر هههه اسمك حلو.. ومهندس كمان..
ماهر: مهندس برمجه وعندي شركه حاسبات وبرمجه ف المانيا.. بس جاي هنا اجازه المفروض بس بيني وبينك كدا بأسس شركتي الجديده هنا..
نور: وبيني وبينك ليه..
ماهر بغمز: عشان يبق اول سر بنا اشطا..
نور: اشطات.. يلا بق نشوف البنات ماتو ولا اي. ههه
_____________________________________
اما زعيمه العصابه هذه...
كانت تجري واختبأت خلف حائط حتي لا يراها...
اياد: دا انا لو مسكتك هعمل منك شاورما ي شهد اصبري عليا بس... اه استخبيتي مانتي جبانه اقول اي... تعمل المصيبه وتجري.. عيله صغيره صحيح..
ظل يلف حول نفسه يبحث عنها وهنا امسكت شهد تفاحه من طبق الفاكهه المجاور لها وحدفتها بظهره..
اياد: ااااه ي بنت... والله مانا سيبك...
اتجه الي المكان الذي حدفت منه التفاحه... ولكن اخرجت هي طرف قدمها ليقع هو ع وجهه..
شهد بضحك وهي ترقص: ههههه ولسه ايوه ولسه ايوه ي شهوده ي جامده...
جائت لتجري ولكن رفع هو الاخر قدمه لتقع هي الاخري..
شهد: اااه ي ابن الغبيه... ولاااا انت بتوقعني..
اياد وهو يقف: وانتي يعني الي عملالي رز بلبن وبعدين لسانك دا هقصه ليكي..
شهد وهي تقف مره اخري: اتكلم علي قدك ي شاطر..
اياد وهو يقترب منها: انا لو اتكلمت علي قدي هتزعلي جامد ماشي ي عسل...
شهد: اي دا هو محدش قالك اني بحب ازعل جامد ولا اي... اصل انا لما بزعل بزعل الي مزعلني هو والي يتشددله كمان...
اياد: لا دا انتي جامده بقااا..
شهد: هو محدش قالك دي كمان... تؤتؤ فايتك كتير..
اياد: اي الي هناك دا..
نظرت شهد باتجاه عيناه ليحملها هو فورا...
شهد: انت بتعمل اي اوعااااا نزلنييييي...
اياد: مش انتي جامده بقا ومش بتخافي اصبري علياا
شهد: انت رايح فين سبنيييي نزلني ي حيوان ي برج اللطخ ي انسان بعقل بغل... نزلنيييي...
اتجه اياد الي الحديقه الخلفيه حيث مكان المسبح.. شهد: اياد لالا والنبي ايااد لا المياه لا اياااد عشان خاطرييييي
لم يبالي بصراخها والقاها بالمسبح دون تفكير... ووقف هو ينظر اليها بنظرات انتصار...
اياد بفخر: هيه كدا واحد واحد...مش عملالي جامده ومش عارف اي...
ثواني وصرخت شهد: اياااد الحقني مش بعرف اعوم...
ظلت تصعد الي اعلي وتهبط الي اسفل بحركات عشوائيه...
اياد بخوف: دا بجد مش بتعرفي تعومي...
لم تجيبه ليخلع قميصه و رمي بنفسه ف حوض السباحه...
ثواني وصعد بها الي اعلى...
اياد: شهد شهد انتي كويسه... شهد ردي عليا...
لم تجيبه وضع يده ليسمع نبضها ثواني واقترب منها وفعل لها تنفس صناعي..
لتفتح شهد عيناها وتكح بشده...
شهد وهي تتنفس بشده وسرعه: يخربيتك كنت هتموتني ي غبي...
اياد: انا مكنتش اعرف انك مش بتعرفي تعومي...
شهد: اي دا ثواني كدا هو انت عملتلي تنفس صناعي.
اياد بتوتر: امممم يعني كنت اسيبك تموتي...
شهد: ما تسبني اموت ولا اغرق انت ازاي تقرب مني اصلا... وبعدين انت.. انت قليل الادب...
اياد: تصدقي انا غلطان... ولا اقولك احسن عشان تدوقي من الي عملته فينا جوا... بت انتي جدودك ريا وسكينه صح...
شهد: بق كدا طيب...
تمالكت شهد قوتها ودفعته ليقع بالماء...
شهد: خليك ف المياه بقاا...
اياد بضحك: انت غبيه ي بت دا انا ابويا لقبه البحر واخويا الحوت وانا لسه مطلعك من المياه... ترميني فيها كدا هخاف يعني.. هههه بس شكرا الواحد كان حران والله...
شهد بغضب: اوووف مستفز والله لوريك...
اياد وهو يخرج من الماء: طب بعيد عن اي حاجه روحي غيري هدومك عشان متبرديش..
شهد: متعملش نفسك خايف عليا...
اياد: انا بتكلم بجد روحي غيري البسي اي حاجه من عند نور هتاخدي برد...
شهد: ملكش دعوه.. انت مالك...
اياد بغضب: بقولك روحي وكلامي يتنفذ عشان انتي عرفاني مجنون و اشيلك تاني واخليكي تغيري غصب عنك كمان...
شهد بخوف: لالا خلاص والله هروح اغير اهو...
جرت شهد من امامه بسرعه الي الداخل...
__________________________________
هنا خرجت نور اليهم ونادت بصوت عالي بالحديقه..
نور: بناااات شبااااب تعالو...
ماهر: كرييييم اياااااد محمد واحمد كله يجيييي..
نور: والبنات كمان يجووو
اجتمع الجميع وذهبوا الي نور وماهر...
نور: بصوا بق اولا المقلب ممكن يكون كان سخيف وحلو ف نفس الوقت بس اهو عملنا حاجه جديده سوا يمكن التلج الي بنا يسيح..
ماهر: يلا كدا بق صافي ي لبن... هاا ي شباب..
كريم: خلاص مفيش حاجه عيال صغيره برضو..
كيان: متقولش عيال...
نور: ي ستي انا عيله ملكيش دعوه... خلاص صلوحه..
اياد: صلوحه... مش كدا ي شهوده..
شهد: اممم ماشي صلوحه..
ماهر: طب يلا ي نور خدي البنات واطلعو غيروا الاسود دا ومعرفش شهد وكيان مبلولين ليه كدا..
كيان وشهد: نصيب الاسود.. منه لله السبب بق.
ماهر بضحك: من اعمالكم... هههه المهم يلا اطلعوا كلكم البسوا حاجه تانيه واحنا هنطلب اكل ونعدل الدنيا كدا...
نور: لا عادي هكلم الدادا تيجي تعدل كل حاجه..
ماهر: ي ستي مش مهم عشان نعرف نقعد ع ما تيجي يلا بس اطلعوا..
كيان: خلاص تمام يلا بس نور انتي عندك لبس ليا صح..
نور: عيب ف حقي والله ي بنتي انا فاتحه اتيليه فوق هتلاقي كل حاجه هههه
روضه: بصراحه اه عندها لبس يفتح مصنع...
نور: الله اكبر عدي ي جزمه قدامي...
صعدت الفتيات الي اعلى لتغير ملابسهم واستمر الشباب بالترتيبات اسفل واختار ماهر فيلم من المكتبه المجاوره لشاشه التلفاز اما كريم ف طلب اكل من مطعمه... لتبدأ الليله بالنسبه لهم..
يتبع...