#لعبة_الزمن
الحلقة 5
فرقوا الروزاطة والعبعمبر وحاجات الفاتحة المعروفة عاد
وعالمغرب كان البازين في الصواني والصفر مستفات ويحطوا الصواني ويرفعوا وعشوا الناس وخشوا يبدلوا للسهرية
نجاح: تعالي ياليلى ديريلي مكياج
ليلى: راجي نبدل قبل
رندة: تعالي نجوحة نمكيجك ونقهروا الحسادية
رانية :جو كلا أنتي يارندة
خش ولد رانية :ماما
رانية: نعم ياعلي
علي: بابا برا يبيك
رانية: وأخيرا شكله جي هيا طالعة
طلعت ودخلت الحاجات معاها
وداد: ماشاء الله يارانية وخدت طرف وبتحطه في فمها
رندة: خداته هذا للناس قبل وبعدها احني حتى لجاباته مادارت ديرك
وداد: طلعت مطرمة وقريب تطربق قعمزت بحدا الناس زي البرانية وتهز في رجلها من كثر الأعصاب
رانية: شن درتي يارندة خليتيها تتسمسم
رندة: هذا لنفهمه هذا لفي دماغي من بكري مبلوطة مقعمزة ووقت لاكال تلقيها تانية كمامها هي الأولى لولا نجاح جايبة من يطيب كمهذا مالقينا من يطيب لجاية غير ترص
رانية: لا حول ولا قوة الا بالله رندة فكينا من المشاكل
رندة: فاتتها ومشت طلعت وبدت أجواء السهرية الجميلة من دربوكة وشاهي وقهوة وحار ومشروب وأغاني
عامر: نجاح يانجاح
نجاح: مشتله نعم ياعامر
عامر: مديلي سورية بنغير ودخلي الصغار حوليهلهم خلوهم حالة دبشهم
نجاح: خشت جابتله سوريته نادهالي
عامر: باهي خداها ولبس وطلع نادى عليه وقاللهم خشوا لأمكم
وهما خاشين معاهم عمهم العريس
نجاح: باركتله مبارك عليك يأنس ان شاء الله بالدرية الصالحة
انس: الله يبارك فيك نجاح البركة فيك عاد
نجاح: هذا أقل شي نديره لوخيي صح أو لا
أنس: وخيتي وأعز
نجاح: هيا مع السلامة توا خلى نغير للصغار ونشوفهم بالك يبوا حاجة
أنس: تمام ربي يعاونك ان شاء الله مع السلامة
خشت نجاح الداخل وغيرتلهم تو هكي يامجد معقولة السورية تخليها هكي سودة
أمجد: ماما هذا مجد كان يلعب في التراب
نجاح: حقا يامجد
مجد: بضحكة ايه لعبت شوي
نجاح: مادام بتلعب ليش ماجيتنيش غيرتلك تو شن بينظفها هذي
مجد: قعد يمس في خدودها ماما أنتي حلوة اليوم
نجاح: زيد لسن مش ننسى شن مداير حتى من قدر الصغيرة مادارت ديرك شد ألبس تو غدوا شن بتلبس
مجد: عادي أغسليها غدوا نلبسها
بعد مالبستهم طلعت ومشت للحمام تنقع في هديكا السورية وتكد عشان تنظف وهي رايحة تقول واحد يخدم بيها في الورشة
رندة: وينك يانجاح وأنتي ديما حاصلة
نجاح: اهو جاية كنت نكد في سورية مجد
رندة: خليها حتى بعدين
نجاح: بنخليها لالا والله بعدين ان شاء الله نلود عالدنيا ونرقد ماني فاضية بالكد
رندة: باهي خليها التنقع وتعالي ياحنة يبوا الكنة الكبيرة بيغنوا عليها هي الراي وهي الشيرة
ضحكت نجاح: باهي هي جاية
مشت نجاح للخيمة ودخلوها ترقص 💃
رندة: ياسلم كنتنا الكبيرة هي الراي وهي الشيرة
ليلى: ياسلم وخيتي لتفرح لتفرح بجيتي
ناضت عمتك وداد: يامبروك عليه سليفي ان شاء الله يعمر حوشه كيفي
رندة: والله كانهو زيه مانبوه
رانية: تي اسكتي وانتي تعلقي
رندة: يانجي وخيي الكبير على راسي كيف الشنبير
رانية: يانجيلي مصماص الكرشة واليوم عرسه
نجاح: لولولولولولولولي
أنت تقرأ
لعبة الزمن
ChickLitرواية ليبية خيالية فيها معظم الأحداث من الواقع الليبي تحكي عن زوجة حضرت جميع أنواع القدر وأقساه من لعبة الزمن
