#لعبة_الزمن
الحلقة 19
في صباح يوم جديد على أبطال رواياتنا :
الشمس تشرق على الجهة الشرقية قبل الغربية
اصبح الصبح عند عامر وهو يتقلب ومش جاية نوم ويحلم بأحلام غريبة
عفاف: خيرك عموري
عامر: ارجعي ارقدي أنا مش جايني نوم
عفاف: سلامة قلبك حبيبي
عامر: وقعد شارد الذهن وغايب عن الواقع
بعد مر الوقت ناضت عفاف: ... عامر هيا خلينا ننزلوا ونمشوا نفطروا وأنت وعدتني نمشي لريف متاعهم
عامر: ابعد كل الأفكار لفي راسه ايه صح أنا واعدك وحنوفي بوعدي اليوم نمشوله
عفاف: تسلم حبيبي لمش مخلي شي في خاطري
الصباح الجميل في ليبيا الحبيبة
نجاح: ناضت ونوضت محمد وأحمد هيا راجعوا مابين مادرتلكم فطور
أحمد: أمي أنا خايف مانجاوبش
نجاح: ليش خايف الامتحان ساهل جدا اعتبره كانه اختبار غير زايدين شوي اسئلة وبس
أحمد: الرياضيات صعب
نجاح: توكل على ربي وراجع وتكون ناجح من الأوائل أولاد نبيهم مش أقل من الممتاز ايوا
أحمد: حاضر حنكون أنا الأول
نجاح :شطور
قعمزوا فطروا ولبسوا حوايجهم وطلعوا
نجاح: ولعت السيارة ورفعتهم للمدرسة وهذي كانت أول مرة ترفعهم فيها وحست بانجاز كبير داراته إنه اعتمدت على نفسها (الضربة القوية تقويك ماتكسرك)
نجاح: بالتوفيق حموداتي تأكدوا من إجابتكم كويس وماعمركم تغيروا إجابة متأكدين منها صح
محمد: حاضر أمي ادعيلنا
أحمد: حتى أنا ادعيلي
نجاح: ابتسمت ربي يوفقكم حبيبات قلبي والنجاح والتوفيق ليكم أمتى تكملوا
محمد: تعاليلنا الساعة 10 نكونوا مكملين
نجاح: خلاص تم يعني بعد ساعتين هيا انزلوا بسرعة
نجاح: روحت للحوش وهي سعيدة وفرحتها مش عاطيتها لحد حاسة بالاستقرار وجمال العيشة لما يكون كل شي بايدك وتكوني بسيارتك وتوصلي عيلتك وتنفدي طلباتهم من غير ماتستني حد زي ماكانت تراجي من عامر كل لمرار لشافاته توا بتنساه وكل الحياة بيدها لكن هل بالدوم السعادة بدون نكد طبعا لا
شافها أنس: وهي خاشة وقعد مصدوم ماكانش يعرف إنها بدت تسوق نجاح: هذي أنتي
نجاح: ضحكت على صدمته ونزلت هذي أنا كيف حالك
أنس: قعد يشوف في السيارة لا والله وإنك درتيها يانجاح تستاهلي
نجاح: شكرا يأنس وأنا خبرت خوي وأسفة ماقلتلكش
أنس: مش ضروري تتأسفي من بعد عامر الشور شور خوك أولى مني صح
نجاح: ايه لكن حتى أنت وخيي للقيته صغير في الإعدادي
أنس: ههههههه اسكتي ردي بالك تفضحي بأي شي أسرار الحوش ماتطلعش
نجاح: شبحتله على جنب اها فهمت من شن خايف خايف من نورة تسمع بيهم
أنس: هههههههه خلاص بتخبريها خبري
نجاح: عيب احني مانحكوش أسرار حد
أنس: باهي
نجاح: هيا مع السلامة
أنس: مع السلامة حتى أنا وقت عليه
نجاح خشت للحوش ونوضت الصغار
مجد: ماما حتى اليوم بترفعينا أنتي
نجاح: وين
مجد: للمدرسة
نجاح: وأنتم مش عندكم باص
أمجد: وخيره رفعتي أحمد ومحمد
نجاح: لأنهم هما من الأول ماعندهمش باص
هيا افطروا بسرعة عندنا مشوار
مجد: وين
نجاح: عندي موعد في المركز نحطكم عند خالتكم ليلى وبعدها لما قريب الوقت نحطكم لمدرستكم شن رايكم
أمجد ومجد: موافقين
فطروا ولبسوا ولبست بناتهم وركبوا في السيارة ومشوا لحوش ليلى خشت في السور وتبيب
طلع راجل ليلى: لما لقاها مراة خش لليلى امشي شوفيها هذي مراة ومعاها صغار
ليلى: مستغربة طلعت شافت مراة في السيارة ولابسة خمار مشتلها
نزلت نجاح: وحولت الخمار مفاجأة
ليلى: نجاح هذي أنتي من أمتى هذا كله
نجاح: دسيتها عليكم نبيها مفاجأة
ليلى: لا هو مفاجأة مفاجأة فعلا لانها كانت فاجعة
نجاح: عالعموم عندي موعد في المركز بنخلي الصغار عندك
ليلى: حاضر من عيوني ديري بالك روحك
نجاح :حاضر مع السلامة نزلت خمارها وركبت السيارة وانطلقت
طلع راجل ليلى: من لجي
ليلى: تلفتت وهي تضحك على أختها ماتشوفش الصغار صغار نجاح
راجلها :ماتقوليش كانت نجاح هذي
ليلى: وهي فرحانة والله إلا هي لنجاح بشحمها ولحمها
راجلها: والله صحة على يدها دارت سيارة امالا بتراجيه للسيد
ليلى: ايه والله صدقت ربي يحفظها وخيتي من العين
راجلها: من عيونك امالا
ليلى: خزي عيوني حشاها وخيتي ربي يحرصها ويبعد عنها كل شر
راجلها: هيا أنا طالع
ليلى: باهي مع السلامة سقداته وخشت أمجد تعال جاي أمك من أمتى وهي تتعلم
أمجد: ليها وقت تجيها وحدة تمشي معاها وتروح بيها في العشية وخالي أكرم شرالها سيارة أمس
مجد: سيارة ماما حلوة
ليلى: ههههههه ايه حلوة
أنت تقرأ
لعبة الزمن
ChickLitرواية ليبية خيالية فيها معظم الأحداث من الواقع الليبي تحكي عن زوجة حضرت جميع أنواع القدر وأقساه من لعبة الزمن
