#لعبة_الزمن
الحلقة 16
في يوم الأحد عامر كمل أوراق نجاح المطلوبة ومشي لكلية الآداب وسجل في الكلية قبولها بالواسطة لأنه القراية بادية ليها وقت عامر: كلم قديش واحد عشان يقبلوها وانقبلت باشتراك تخش عالفاين والعام لبعده تستمر عادي
عامر: روح للحوش وهو نابتتله قرون
نجاح: خيرك تقول ابصر من ماتلك 😒
عامر: حشمت روحي مع مية واحد الناس لما تبي تقرا تجي في بداية السنة مش مستاقظتلي توا
نجاح: والحلقة الاخير قبلوني
عامر: قبلوك وتمشي للامتحان طول اشتراك يعني
نجاح: باهي لكن قديش ليا مبطلة زعمك ننجح وبنخش عالامتحانات وأنا مش فاهمة شي
عامر: وين نندري بيك
نجاح :عادي كان مشيت حضرت هكي
عامر: عادي لكن من بيوصلك ومن بيهتم بالصغار بعدك
نجاح: تو نلقى حل وبعدين الصغار يقدروا يهنوا على رواحهم مش صغيرين يبوا رضاعة
عامر: أنا مش شاد حد ولا قاعد مع حد دبري راسك
نجاح: هذا لفالحين فيه أنتم تبوا المراة الدير كل شي على راسها مافيش داعم بكل لا نفسي ولا جسدي
عامر: يشبحلها وشن شاطك للقراية توا
نجاح: طلعنا جاهلين وماننفعوش شن مازال تبي ثاني تخليني مازال نقعد في الحوش ومادة سيقاني
عامر: لا حول ولاقوة إلا بالله كلمة وطلعت آسفين
نجاح: لما تتأسف أعرف كيف تتأسف ياريت الكلمة هذي قلتها ليا لخواتك لنساوين خوك كنت قبلتها لكن قلتها لوحدة لانعرفها ولا تعرفني وحدة بتجي ضرة عليه تو فهمت شن موقع كلامك فيا
عامر: والله لنادم
نجاح: يجيك يوم لاينفع الندم نقعه واشرب اميته وخشت وسيباته
هل فعلا عامر نادم عالكلام لقاله لنجاح ولكن بعد شني الكلمة فات فيها تطلع خلاص ماعاد فيها فايدة
.
.
بعد مرور شهر:
بالفترة هذي عامر كمل تأثيث شقته وعفاف توتي في دبشها ولعرسها وهي فرحانة بالطير وفرحتها مش عاطيتها لحد
وبهالوقت نجاح بعدما سجلت في الكلية ومدايرة اشتراك مالداومش وتمشي
اليوم بيجوا يركبولها المطبخ لاختاراته
من الصبح العمال عندها تركيب وتخبيط والدنيا شايلة
في الليل كملوا مازال الثلاجة والغاز وحاجات الثانية غدوا بيرجعولهم
مجد: مشي يجري قعمز في الدولاب ماما المطبخ حلو
قمر :وبدت تلود فيه ماما أنا اليوم بنرقد هنا
نجاح: ههههههههه تبو تجمدوا في هالصقع
مجد: وين سريري خيره ماجابوشي معاهم أنا كنت نراجي فيه
نجاح: هدوما مش متاعين السرير يامجد قاعدين ماكملوشي سريرك
مجد :اها هذا عليش ماجابوشي
نجاح: ايه
في اليوم لبعده نجاح: رن رقم على تلفونها محمد تعالى رد فيه رقم يتصل
محمد: باهي خدي التلفون واتصل الو من معاي
المتصلة: أنت لمني مش هذا رقم نجاح
محمد: أمي هذي مرأة تسأل عليك
نجاح: تسأل عليه خدت التلفون الو من معاي
مروة :ياحيوانة أنا مروة وين نسيتيني
نجاح: اها ايه تدكرتك نسيت ماسجلتش رقمك
مروة: من السمح لرد عليه
نجاح: نغار عليه ايوا
مروة: تي ماقلنا شي ياودي
نجاح: هذا محمد ولدي
مروة: هذا ولدك الكبير
نجاح: ايه هو
مروة: شن جو عامر
نجاح: يوتوا ياحنة للعرس
مروة: وأنتي شن جوك وشن دايرة
نجاح: ماشية في الحوش
مروة: نبي الانجاز مانبيش شن الديري حضرتك
نجاح: اشتركت في الكلية
مروة انجاز معتبر باه شن تاني
نجاح: خدمت مطبخ كامل مش تجي تشوفيه وخدمت صالون للصالة وديار للصغار وهذا الموجود حاليا
مروة: في تطور وشن درتي في خليقتك
نجاح: قاعدة زي ماهي
مروة: خليقتك هدي تبي كرد بالموس خليها عليه أنا تو نرفعك لمركز تجميل تقول ايش ماعاد تعرفي حتى روحك
نجاح: ان شاء الله لكن هذا وين
مروة: لا مش بعيد هلبا
نجاح: ربي يستر من راياتك
مروة :غدوا جاياتك الصبح دبري
نجاح: غدوا لا خليها بعد غدوا
مروة: خيره شن عندك
نجاح: عندي عمال قاعدين ماكملوش باقي دولاب المطبخ
مروة: باهي لبعده دبري راسك صغارك دبري وين تحطيهم
نجاح: وين بنحطهم
مروة: عند وحدة من سلفاتك
نجاح: عند نورة ممكن كلا الثانيات أنا وياهم مش أوي
مروة: خلاص شوفيها
مر يوم ثاني وانتهى واليوم لبعده
كلمت نجاح : نورة الو نورة كيف حالك اليوم
نورة: تمام الحمدلله كيف حالك أنتي
نجاح: بالله نورة بنطلب منك لو نخلي عندك الصغار عندي مشوار
نورة: عادي جيبيهم وامشي لمشوارك
نجاح :تسلميلي تو نبعتهم
نجاح: أمجد ومجد ألبسوا حوايجكم المدرسة وأرفعوا شناطيكم وامشوا لحوش عمكم أنس وين يجي الوقت تعالوا عشان تمشوا المدرسة تمام
أمجد: أمي أنتي وين ماشية
نجاح: عندي مشوار بنمشيله خليكم غادي لين نجيكم باهي مانعطلش مرات نروح قبل ماتمشوا للمدرسة باهي
أمجد: باهي
نجاح لبستهم ولبست البنات وسقدتهم
نجاح: هيا امري لله خلي نتصل بيه نوقضه بالك بعدين نطلع من غير شوره اتصلت بعامر وتسمع في صوت عفاف بحداه وهي كان تلقى تطلعلهم من التلفون وتخنقهم وتعجنهم في بعضهم
عامر: الو
نجاح: عندي مكان وبنمشيله
عامر :المطلوب نرفع لا
نجاح: حتى أنا مش طالبة منك ترفعني بتجيني صاحبتي بنطلع أنا وياها
عامر: نروح ونتفاهموا
نجاح: ماعندك على شن تتفاهم صاحبتي وبنطلع معاها ومتصلة نخبر فيك بس والصغار عند أنس وتوا مع السلامة كمل باقي هدرزتكم بالك قاطعتكم وسكرت على وجهه
طلعت نجاح بعد مارنت عليها مروة وتسقدت لمركز التجميل
جتهم الموظفة: تفضلوا
مروة: نبي عناية كاملة للبشرة من الألف للياء
الموظفة: تفضلي معاي
خشت نجاح: وبالخشة هذي قالت وين كنت وين دافنة روحي
.
.
.
يتبع الأحداث القادمة
أنت تقرأ
لعبة الزمن
ChickLitرواية ليبية خيالية فيها معظم الأحداث من الواقع الليبي تحكي عن زوجة حضرت جميع أنواع القدر وأقساه من لعبة الزمن
