#لعبة_الزمن
الحلقة 28
أيام جديدة تمر على أبطال روايتنا المهم والغير مهم ربي يجعل أيامكم كلها فرح ❤️
بما أنه بدت العطلة الصيفية بدت أجواء النو في ليبيا والمعروف عندنا في الفترة الأخيرة توكات وقطع الضي ربي يهدي البلاد والعباد
نجاح: ولعت المكيف وقعمزت في الدار بعد ماكانت برا تجيب في حاجات ناقصة للحوش وتسلم في طلبية حلويات هي ومحمد
محمد: خش نو نو اليوم ناقصة جيلاطي 🍦 ودلاع 🍉
أحمد: كنتوا طالعين خيركم ماجبتولناش معاكم مش سادني قاعد معاهم
نجاح: بعد مابردت شوي غير اسكت جبنا معانا وريح لسانك ... خشت للمطبخ شن تبو الغداء
أحمد: نبو سلاطة
نجاح: تم غالي والطلب رخيص
قعمزوا يتغدوا
نجاح: أحمد نوض أغسل الماعين أنا تعبانة وبنرقد
أحمد: هو أحمد شن عنده حاجة ثانية يديرها غير غسل الماعين
نجاح: مشت فرشت قدام المكيف وحطت راسها عالمخدة وكيف بينعسها النوض والضي يقول طاف يهرب الضي اوووووف هالضي لهرب
قمر :ماما وينك ظلام
نجاح: تعالي قمورة وين قدر
قمر: رقدت وجت قعمزت بحدا أمها ماما وين الضي خيره ظلام
نجاح: الضي هرب
قمر: أنا حميت هلبا نبي مكيف
نجاح: اوووف شن هالحالة عطيهم ماينزعهم هربوا الضي هالناس والدنيا تقلي برا لا رحمة ولاشفقة بالعباد
محمد: أمي الضي هرب خيرهم
نجاح: مرات عطل تو يجي نوض جيب مراوح في الدولاب خلى نمروحوا بيهن لعند يجي الضي
نجاح: كملت قايلتها كلها وهي تمروح لين يدها طابت
(هذا حالنا بدي كل صيف للاسف 🥺🔥)
جت العشية ونجاح ناضت فتحت البيبان وشافت لقدر من كثر النو لعند طالعة وراقدة عالزليز قامتها ورفعتها لسريرها وشافتهم الباقي لمكسد يلعب واستغربت انه أمجد ومجد ماهناش تسمع في صوت برا طلعتلهم لقتهم يلعبوا بالبشكليطات في هالنو والدنيا قاعدة مابردتش ولو شوي
نجاح: خشوا نهاركم أسعد على روسكم تضربكم قطرة خشوا
أمجد: عيينا من داخل انحبسنا طلعنا نلعبوا
نجاح: خشوا يأياماتي شافتهم جبهتهم حامية زي النار خشوا اغسلوا ايديكم ورجليكم مازال الطلوع لعند الجو يبرد طشة وبعدها اطلعوا
خشت داخل نجاح تلفونها يرن شافاته القاته ليلى أختها الو كيف حالك ليلول
ليلى: الحمدلله حال النو والضي الهارب
نجاح: والله حالة هالضي يلطف بينا ربي في هالنو
ليلى: النو ماعندك مالديريله والضي
نجاح ::والله كيف جيت بنقيل قدام المكيف كيف حطيت راسي والضي ينطفي وياناري على بنيتي القيتها راقدة عالزليز من النو
ليلى: يالطيف ولعنا المولد ولعنا بيه المكيف اهو طشة يبرد الحوش خير من بلاش
نجاح: انا ماعنديش مولد
ليلى: ديريه في بالك واشريه
نجاح: ان شاء الله فيه مجموعة طلبيات جاياتني بنلقط بيهم
ليلى: زدتي تشكيلات
نجاح: ايه زدت مجموعة كل خميس وجمعة تجي رندة تساعد فيا بيهم
ليلى: ماشاء الله على وخيتي الفالحة
عامر: رجعت علاقته بعفاف زي قبل بعد مابدت تهتم والدير ومش مخلياته يتنفس دقيقة وين مايطلع هي في جرته خايفاته يمشي لنجاح
عفاف: ناضت من النو عامر دبرلي حل ماعاد نتحمل
عامر: شن تبي ندير نكلم شركة الكهرباء ونهددها
عفاف: نسافروا اهو الصيف جي
عامر: والخدمة وين بتمشي
عفاف :مادخلنيش مانيش قاعدة في ليبيا
عامر: تي غير اسكتي أكيدة عطل اليوم شوي ويجيبوه
عفاف: جيبلنا مولد مستحيل لو هرب مرة ثانية نرقد بلا مكيف
عامر: مولد شنو
عفاف: نبي مولد
عامر: منه لغدوا ساهل
عفاف: نبي نطلع نتدهور أي شي
عامر: حاضر حبيبتي تأمري أمر
عفاف: مشت وهي في قمة السعادة إنها بتطلع مع أنه كل يوم طالعة
ركبوا للسيارة ومروا بطريقهم لحوشه كان عامر يشوفله لعند فاته مرة مرة يأنب فيه ضميره لكن هيهات
خدوا حاجات من الطريق ومشوا لمصيف خدوا طاولة وكرسيين ومظلة وقعمزوا عالشط
أنت تقرأ
لعبة الزمن
ChickLitرواية ليبية خيالية فيها معظم الأحداث من الواقع الليبي تحكي عن زوجة حضرت جميع أنواع القدر وأقساه من لعبة الزمن
