لعبة الزمن

لعبة الزمن 9

#لعبة_الزمن
الحلقة 9

حطلهم عامر الفطور وهو دمه محروق وهداكا الشاهي من كثر ماهو قوي رايح زي القطران والصغار ماقدروش يشربوه صبلهم حليب
عامر: اشربوا أو نوضوا من بحدا وجهي
قمر: بس ماما ماطيبش في الشاهي هكي
مجد: ماما الدير فيه حلو هذا مر
عامر: هذا الموجود ونوضوا لأمكم الطيبلكم وطلع قربع الباب مشي لعمه اسمه علي
عامر عمي أنا بنتزوج
علي: اهبلت أنت ماهو أنت متزوج وولدك محاديك ماشاء الله
عامر: منتزوج الثانية
علي: نجاح في شن منقصة عليك وهي قايماتك أنت وعيلتك حتى من عرس خوك قبلت الديره عندها من مازال مرأة ترضا هكي
عامر: أنا مش متريح ونبي نتزوج تبي تمشي معاي تخطبهالي
علي: نجاح تعلم بيها الدوة هذي
عامر: لا ماتعلمش لكن ماعندهاش ماتمانع لأنه هي مقصرة في حقي
علي: لا حول ولا قوة إلا بالله كلم مرتك وبعدها نشوفولك راي

عامر: تامة وخليك قد كلامك
روح عمك عامر: وهو مش ناوي على خير خش للحوش ... محمد لم خوتك وامشي لعمك أنس
محمد: كان واضح الخوف والشرار لفي عيون بوه خدي خوته وطلع ومشي بيهم لحوش عمه وهما مش فاهمين شي ولا عارفين شن بيصير فيهم
عامر: خش للدار نجاح نجاح نوضي
ناضت نجاح: وخافت من صوته نعم عامر شن فيه
عامر: أنا بنتزوج وبناخد مرأة تانية عليك
نجاح: استكت ماعاد عرفت شن بتقول كانت تتوقع في يوم بيقول انه بياخد لكن مش بالسرعة هذي
عامر: ليش ساكتة هو أصلا ماعندكش عليش تتكلمي لأنه من حقي وأنا قديش ليا محروم مش قايمتني ولا مهتمة بيا ولا مدورتني
نجاح: ههههههههههه قعدت تضحك بهستيريا ههههه عندك أنا ظالمتك معاي وأنا لمش قايمتك لا أنت ولا صغارك لأنه لو قايماتك مش هذا حالي من كثر طلباتك يابيك ماعاد عندي وقت نلحق نشوف للمراية ونشوف وجهي شن حاله لكن عنده حق قمتك أنت ونسيت روحي سهرت عليك وعلى صغارك ونسيت راحتي طيبت وخدمت هذا وهذاك ونسيت إنه نبي من يخدمني أنت حرمتني من صحتي من راحتي ومن نفسيتي ومن كل شي الناس تتزوج عشان تتهنى وأنا درت كل شي ولليوم ماكنتش مستكثرة عليكم قلت هذي عيلتي وحقهم عليه لكن من اليوم لحد هنا وبس تبي تتزوج اتزوج لكن أعرف حاجة إنه ليتزوج لحالته متريحة مش حوشه زي هذا لعايشة فيه مامخلي واحد إلا ماهزي عليه عندهم حق يهزوا عليه إذا كان راجلي مش حامد ربي على عنده وحاط عيونه يمين ويسار ومش معبية عيونه
عامر: ايه مش معبية عيوني والقيت وحدة تعبيلي عيوني
نجاح: ايه والوحدة هذي لتحكيلها في أسرار الحوش لأنا البقرة والعجل والغوريلا ولديما صنتي بصل وطبيخة وحلبة على قولتك أو أنا لشعري أربعة وعشرين ساعة مشفشف ولما نعرفش نلبس وأنا الغبية والجاهلة لسيبت قرايتي وماكملتهاش ومش حضرتك لقلت معاش نبيك تكملي ومش حضرتك لبطلتني وتبي وحدة متعلمة وقارية لكن أنا على بنعاتب على بدل الأصل بالمقلد ولبدلك بالفول بدله بقشورة
عامر: أنتي تفتشي في تلفوني
نجاح: بارك الله فيها بنتي لتعرف رمز تلفونك ولخلاني نفتح عيوني ونشوف أنا شني في نظرك أنا الخدامة لعنة الله عليك شفت شي بعيوني مانتوقعه حتى من عدو مش من راجلي وأب صغاري هكي هانت عليك العشرة اطلع عليه الدوة هذي سيورك في يوم تجيني ونادم وأنا مش حتلقاني لأني حنكون في مستوى أعلى منك
عامر: هذا لناقص غير نجي في مستواك
نجاح: تبي تتزوج عندي شروط ترضا بيهم تسقد طريقك زينة لانه لبدلني ماعاد يلزمني ايوا
عامر: نسمع قولي شن شروطك
نجاح: أولا نبي الطلاق لأنه مانبيش واحد على ذمتي مستحقرني عند أحقر الناس
ثانيا نبي المؤخر متاعي كامل مش ناقص ولا قرش وأنت عارفه قداش 40 ليرة ذهب
ثالثا تكتب الحوش باسمي أنا والأولاد ولأنه من حقي لفنيت عمري فيه مش نكملوه حطيت ذهبي كله فيه قريب بعت حتى كلاويه والفم ساكت هذا كله وياريت نفع فيك
عامر: راك تنسي هذا حوشي حتى أنا
نجاح: لكن هو من حقي بالك تبي تلزني أنا وياهم للشارع
عامر: ماقلتش بنلز حد لكن الحوش يقعد باسمي
نجاح: يفتحلك ربي مش تخليه باسمك بعدين أنا عشتك معاك بأسوء حالاتك بفقرك وغناك بس أنتم الرجالة لتتقبل وتعيش معاك وراضية أنتم لما تغنوا مش حترضوا بيها صدق لقال ليكثر عليه فلوس يضياق حوشه وتشيان مرته
عامر: شن تخرفي أنتي

نجاح: شرطي هو هو خلي نكمل الباقي لأنه لتحملته منك كله مايستاهلش نبي تعويض عليه وبعدها تزوج من تبي رابعا الحوش نبيه مأثث بالكامل ومن أحسن وأرقى الأثاث وأنا نمشي نختاره ومن غير زواق وصيانة للمطبخ من زليز لعند الولاعة بالكامل بعد مالدير هذا كله توكل تزوج حتى عشرة غيري لهانت عليه العشرة ان شاء الله يتزوج من غيري عشرة لأنك أنت ماعاد تلزمني بأي شكل من الأشكال
وخامسا حنرجع نقرا ونشوف من صاحبة العلم ومن الجاهلة يأستاذ ماتحسابش العلم والجهل والتربية الباهية بالمستوى الدراسي الحمدلله صغاري متربيين أحسن تربية وأنا مفتخرة بالشي هذا وتوا تفضل من اليوم مكانك مش في الحوش مش نخلوك على راحتك أنت والأستاذة وتقرمني على راحتك بالك اليوم أشبح شن نطلع في نظرك شي جديد
عامر: كان مصدوم وفاتح عيونه مش متوقع ردة فعل نجاح كان يحسابه بتكسر وبتعيط لكن كانت أقوى وردت اعتبارها بكلمات نزلت زي السم عليه خلاته صغير في نظرها ويستاهل

نجاح: مشت وسيباته وهي حاسة انه اتخدت القرار الصح وإنه ماظلمت حد لأنه هي المظلومة وهكي تكون ردت اعتبارها على كلمة مقايلها عليها وخدت حقها منه ثالث مثلث اتصلت بنورة الو اهلين نورة :كيف حالك
نورة :الحمدلله بخير
نجاح: بالله ابعتيلي الصغار
نورة: لاباس عليك قالي محمد إنك مريضة ان شاء الله أحسن
نجاح: حست نجاح إنه عندها ولد ينسند عليه مشي ودس شن في الحوش لأنه سمعت شن قاله بوه ... الله لايوريك باس كنت تعبانة شوي وتوا وليت أحسن لأنه هي فعلا ولت أحسن مافشت غلها في السيد عامر
نورة: باهي ان شاء الله ... محمد توا اتصلت ماما وقالتلكم تعالوا
محمد: باهي حاضر لم خوته وروح بيهم والقي الحوش هادي جدا الطيح اليبرا تسمعيها مشي لأمه أمي خيرك تبكي
نجاح: شافتلهم كلهم واحد واحد عشانكم بس نبي ندير المستحيل عشان حقوقكم
محمد: شن تقولي أنتي
نجاح: تو تكبر وتفهم بس نبي لو مهما صار توعدوني إنكم ماتسيبونيش بروحي
كلهم جوها وحضنوها ماما حني مانسيبوكش
عامر: طلع شافهم بالوضع عرف انه من اليوم خسر عيلته عيلته يلي كان لما يشوفهم بالوضع هذا يفرح بس اليوم لا
ربي يبعد عنه بنات الحرام وخرابات البيوت حوش كان ينضرب بيه المثل في كل مكان في يوم تهدم كل شي
.
.
.
يتبع