#لعبة_ الزمن
الشخصيات ونبدة عن الرواية
ناضت نجاح من النوم لمت شعرها فوق وخشت للحمام وطلعت تنوض في راجلها عامر ومشت تنوض في أولادها الاثنين يقروا صبح محمد يقرا الصف السابع واحمد يقرا في الصف الخامس ومشت توتيلهم في الفطور فطروا وسقدتهم للخدمة وللمدرسة
وبعدها خشت للحوش تشوف فيه مقلوب من أمس بدت الضم في الحوش ومشت تنوض في صغارها التانيين مجد يقرا صف الثالث وأمجد يقرا صف أول واتنين صغيرات بنات قمر عمرها خمس سنوات وقدر عمرها ثلاث سنوات
دخلتهم للحمام وغيرتلهم وقعمزتهم تفطر فيهم
وبعدها كملت حوستها جي وقت عالمدرسة لبستهم ليقروا وجي الباص وطلعتهم ليه وخشت
قمر: ماما نبي رسوم
خشت نجاح: للدار القتها مقلوبة بالألعاب ... تو ياماما ليش الألعاب مرمية في كل مكان
قمر: هذا مش أنا هذا مجد وأمجد
نجاح: باهي بنيتي الكبيرة صح
قمر: رفعت ايديها فوق وترفع في رجليها ايه أنا كبيرة
نجاح: ابتسمت معناها بنيتي بالضم الألعاب كلهم وبتحطهم في السلة
قمر: لااااا نبي نتفرج
نجاح: شن رايك نلعبوا لعبة
قمر: بحماس شن هي
نجاح: لو كل يوم الألعاب الضميهن في الليل عندي ليك شوكولاتة
قمر: من عشاق الشوكولاتة كعادة الصغار لكن بالزايد الدير أي شي على خاطرها ناضت بسرعة وبدت الضم في الألعاب
ونجاح مشت الدير في الغداء
أنا نجاح: متزوجة من واحد اسمه عامر مسيبه قرايتي من ثالثة ثانوي خديت الشهادة وقعمزت عندي 6 صغار ربي يباركلي فيهم متزوجة كبير أهله عنده ثلاث خوت زوز متزوجين عمار ومحمود واحد قاعد أعزب أنس وزوز خوات متزوجات رندة ورانية ماشاء الله وأنا الكنة الكبيرة كان بيتلاقوا عندي وكان بيديروا شي عندي مناسباتهم لماتهم عندي أمه وبوه متوفيين وأنا عندي خو واحد اسمه أكرم متزوج زوجته فاطمة عنده بنت وولد وأختين متزوجات منى وليلى هذي عيلتي
عامر: أنا موظف محاسب نخدم في شركة وحالي ميسور متزوج بكري من وحدة اسمها نجاح زواج تقليدي الحمدلله مهتمة بيا وبصغارنا ونعم الزوجة مافي شي منقصاته علينا وعلى أهلي ومتحملنا منه هلبا وان شاء الله تسامحنا
كانت فيه وحدة تخدم معاهم في الشركة حاطه عينها على عامر معجبة بيه
اسمها عفاف: ياناري عليه كيف يجلط
صاحبتها مروة: تي خلي الراجل في حاله متزوج وعنده حتى صغار
عفاف: وكان يعني الشرع محلل أربعة يتزوجني الثانية
مروة: ان شاء الله تكلبي
عفاف: أنا مكلوبة من عند غادي بيه
مروة: فكينا من دعوتك
عفاف: لمت الأوراق هدوما بنرفعهم للمحاسبة لعموري حبيبي
مروة: لا حول ولا قوة إلا بالله
عفاف: بخت ريحة وزادت على هذاكا الروج لمن بعيد يعيط وطلعت هديكا القصة من كثر الصبعات ماعاد تعرفيه شعر بني آدم ولا شعر عنزة ومشت تتمايل دقت الباب عامر اوبس قصدي أستاد عامر
عامر :رفع عيونه وبعدها نزلهم يكمل في خدمته تفضلي آنسة رفاء
عفاف :أنا عفاف
عامر: مايهمش تفضلي
عفاف: جبتلك هدي الأوراق وقربت منه قريب لصقت فيه على أساس تمدله الورق وتشرحله عليهم
عامر: شم ريحتها داخ واستك ماعاد عرف شن يقول ... اها معليشي فهمت فيك تتفضل
عفاف: وطلعت تتمايل ومشت لمكانها والضحكة شاقة فمها شق
مروة: ان شاء الله خير
عفاف: مشيت في الأول ماعدلش عليه وبعدها قريب مات من قربي
مروة: ربي يهديك
عفاف: نبيك تساعديني كيف نقدر نجيبه لصفي
مروة؛ لا والله مادخلني بيك شن قالولك يوم وتانيك شادة واحد طالقة واحد أنا المهزلة هذي مادخلنيش فيها
وهكي كل يوم عفاف الدير المستحيل مش تجذب انتباه عامر ليها لعند قعد يميل ليها ويفرح بجيتها تقول ناقصه حنان عطيه دمدام امشي يوم وجي يوم لاحظت نجاح ديما برا وسرحان ويفكر وتباعد عنها هلبا ومتنرفز وعلى أبسط شي مدايرلها مشكلة وتقول أكيدة مشاكل في الخدمة ومانبيش نزيدها عليه لفيه مكفيه
تطورت علاقة عامر وقعد اتصالات هو وعفاف وسهر في الليل عالرسايل نجاح تشوف فيه وتراقب ... نجاح: مادخليش الشك لقلبك عادي حالته وتتله طاسة شاهي ومشتله عامر الشاهي
عامر: انخلع ها شن فيه
نجاح: حالتك زادت عن حدها راه وين كنت هايم ومدتله طاسة الشاهي وناضت كان قلبها واجعها منه مشت لصغارها كل واحد تشوف فيه ورقدت
وهو كملها سهرة مع عفاف وهدرزة وحادف نجاح عالحيط ومايجيب من نجاح
ناضت اليوم لبعده الروتين اليومي وطلع للعمل
وصل للعمل لاقاته عفاف صبح عليها بابتسامة العريضة
مروة: شافتهم ومشتلهم وراها تجري شن درتي في الراجل ياحيوانة
عفاف: الراجل طلع عنده جفاف عاطفي ويبي شوية حنان من عفاف
مروة: لو تعرف مرته شن الدير فيك
عفاف: ماتخافيش هو واخد احتياطه لما في الحوش يكلم فيا رسايل
مروة: يافرحتي بيك
عفاف: مادخلكش تحسابيني زيك ياعانس خلى ندور من ياخدني مش زيك الدور في النصيب
مروة :مانبنيش سعادتي على حساب غيري ياخنابة التريس أنا ماناخدش راجل وهو عايش مع مرته
عفاف: مسكينة حتى أنتي من أول حركتين طاح طول يعاني هلبا مسكين من مرته
مروة: ربي يهديك والله ماعاد نعرفك هذي أنتي عفاف لنعرفها أو وحدة غيرها
عفاف: أصلا حتى أنتي ماعاد نعرفك يلا تشاو
مروة: حتى أنا مايلزمنيش صاحبة زيك
نجاح اتصلت بيها حماتها الو كيف حالك رندة وكيف حال صغارك
رندة باهيين الحمدلله كيف حالك أنتي وخوي والصغار
نجاح الحمدلله بخير
رندة بنقولك يانجاح بعدين العشية بنجي أنا ورانية
نجاح تفضلوا الحوش حوشكن
رندة تمام هيا توا مع السلامة
نجاح مع السلامة
مشت تشوف في بناتها
القت قمر الضم في الألعاب وحتى قدر قعدت التبع فيها شن الدير
نجاح ابتسمت قمر قعدت الدير فيهم حتى من غير مقابل
.
.
.
يتبع لو عجبتكم المقدمة نكمل الباقي بالأحداث الحلوة
أنت تقرأ
لعبة الزمن
ChickLitرواية ليبية خيالية فيها معظم الأحداث من الواقع الليبي تحكي عن زوجة حضرت جميع أنواع القدر وأقساه من لعبة الزمن
