#لعبة_الزمن
الحلقة 17
عمتكم نجاح مستمتعة في هذاكا المركز شي مساج شي نظيف ديرما تقشير
مروة :شن شعورك اليوم نجاح
نجاح: ههههههه حسيت روحي في لقاء صحفي
مروة: خزي باهي نديروا زي زمان على أساس مديع والضيف
نجاح: والله شن بنقولك ياحناتي حتى في عرسي مادرته عروس إلا شوي
مروة: وخيرك ماتكونيش عروس مفروض ديما اهتمام لبشرتك وشعرك لرايح زي مكنسة حوش جدي
نجاح: احترمي شعراتي شوية خير مايزعلن ونقعد صلعة
مروة: البيك أمتى بيروح بي الهانم
نجاح: وقتك توا يامروة ضروري تنكدي عليه
مروة؛ باهي آسفة بس ماهو الهانم خدت إجازة شهر من غدوا ودروحه جاية تعزم فينا
نجاح: شبحتلها
مروة: لا تخافي مش ماشية هو أنا وياها مش عالأبيض من الأول وعزمتني عشان تقهرني لأنه ديما تقولي ياعانس وأنا النادي فيها خرابة البيوت
نجاح: اسم حلو يليق بيها الصراحة
مروة: ايه امالا شني مخربة حوش صاحبتي فوقها
نجاح: تلفتت لمروة شن كملنا اليوم مسموح نروح
مروة :ايه كملتي طلعت كيسة شدي البسي خمار
نجاح: خمار شنو أنا مانلبس فيه
مروة: وين ماتطلعي البسي وبالأخص توا مش كويس ليك الشمس بعد مامدايرة لوجهك هدا كله وعندك جلسات ديرما بتجيهم وبناخدلك من الصيدلية قناعات بالديريهم فيه منهم الصبح ومنهم في الليل وغير الواقي وكريم المرطب تنسي واحد نقتلك
نجاح: طلعت معاهم وركبوا في السيارة بالله هو توا شن مازال ينفع لبنديروه مفروض ليه وقت
مروة: حتى توا يشكروا فيه وراجلك قاعد معاك ماطلقك ولا مات كل شي يصلح تو تقولي مروة ماقالتهاش تو يرجعلك وتقول ايش
نجاح: ههههههههه ماعادش متأملة من شي هيا هيا خليني نروح وراي صغار وغدي
مروة: ماتقربيش وجهك لبخار الطنجرة مادابيك ابتعدي عنه وهواء الكوشة ولما بتطلعي برا حطي غطاء على وجهك وإلا بينحرق
نجاح: مالي ومال الشقاء خليتيني على بلاي الأول أنا مش متعودة عالروتين
مروة: شبحتلها على جنب لا عاجبك روتين الحوش امالا ديري لقتلك عليه كأنك الطيبي لعامر وتغيري لصغارك
نجاح: باهي ان شاء الله غير ديما دكريني لأنه ننسى هلبا
مروة: تم ياألبي أهم شي راك تنسي ردي بالك توري وجهك لسي السيد
نجاح: مازال بنوريه وجهي أنا خلاص نتعامل معاه بس عشان الصغار مايتحسسوش
مروة: مايعرفوش هما
نجاح: للأسف يعرفوا الثلاثة الكبار والصغار مايعرفوش شن يعني واحد يتزوج أو مرأة ثانية
مروة: أنا نبي نعرف واحد جايب قبيلة شن غنته في زواجه الثاني بيجيب قبيلة ثانية
نجاح: ماتحولي شي هالأيام
مروة: اهو وصلنا وزي ماوصيتك كل شي ليه وقت وكل يوم
نجاح: وهي نازلة ان شاء الله وادعي مانطيحش مع هلي حاطاته على وجهي
مروة: ماتخافيش يوم يومين وتتعودي
نجاح: ان شاء الله
خشت داخل القت عامر يراجي فيها خشت للحوش
عامر: لوين لتوا وأنا ماكملتش كلامي وقلتلك امشي
نجاح: عامر أنا من يوم فكرت فيه تتزوج عليه الرابط لبيني وبينك انقطع تعرف ليش
عامر: ليش
نجاح: أساس أي علاقة زواج الثقة الأمان الاهتمام الامتنان وأنت ولا واحد منهم القيته فيك طول عمري أنا لنهتم لكن بعدين شني طلعت صفر عالشمال توا أنا حرة بيني وبينك الصغار بس تبيهم تعال تفضل وشوفهم غيرهم لا وراك تنسى الحوش قاعد لليوم ماكتبتاش باسمنا مانسيتش الشي هذا نتوقع يوم من الأيام الديرلي زي علي في مسلسل على مر الزمان يجيب عليها مرأة ثانية ويسكنها في الحوش ويلزها برا هي وصغارها تقعد تلجي
عامر: مستحيل نديرها ونطلع صغاري من حوشهم
نجاح: اليوم ماديرهاش وغدوا الديرها بعدين الديرها ماعنديش ثقة فيك ولا في يوم ترجع ثقتي فيك زي ماكانت وألف مبروك مقدما زواجة الدهر يازوجي وخشت للحوش
عامر: قدامه أصيص ورد شاطه برجله وطلع بعد ماكمل الشقة قعد يبات فيها وماعاد يبات في الحوش إلا في الصبح يجي يرفع فيهم وبعدها يروح بيهم ويرجع كان وجوده في هالوقتين بس
أنت تقرأ
لعبة الزمن
ChickLitرواية ليبية خيالية فيها معظم الأحداث من الواقع الليبي تحكي عن زوجة حضرت جميع أنواع القدر وأقساه من لعبة الزمن
