#لعبة_ الزمن
الحلقة 2
بعد الغداء وتت صغارها ووتت روحها ووصلها عامر لخوها سلمت على فاطمة والصغار وخشوا الداخل
نجاح: تحول في عبايتها وين أكرم
فاطمة: في المربوعة قال بنرقد حمودي اليوم يعيط ماخلاشي يرقد
نجاح: اها باهي خلي نمشي نشوفه
طبعا فاطمة: طيبة وعادي قالت أخته تبي تهدرز مع خوها
قمر :مرت خالو عندنا عرس
فاطمة: ابتسمت عرس منو
قمر :عرس عمو أنس
فاطمة: والله باهي مبروك عليه
نجاح: مشت دقت الباب وفتحلها أكرم: نجاح جيتي
نجاح :ايه جيت كيف حالك وخشت
أكرم: اهو الحمدلله قعمز بحداها ان شاء الله خير يانجاح
نجاح :طلعتله الحديدة من يدها نبيك تبيعهلي يأكرم
أكرم: محتاجة فلوس ليش ماقلتيش نعطيك
نجاح: لالا مانبيش من حد نبيك يأكرم ترفعها للمحل تبيعهلي قديش تبيع بيعها
أكرم: وعامر شن قال
نجاح: قالي مانبيش بايعها هوينا عارفها متاع أمي
أكرم: باهي مادام هكي ليش بتبيعيها
نجاح: بعد أسبوعين عرس سلفي الصغير والعرس بيديروه عندنا وأنت عارف مصاريف العرس نبيهن ضروري
أكرم: باهي باهي خشي تو نبيعها ان شاء الله
خشوا للحوش وأكرم مشي دس الحديدة وطلع يهدرز معاهن
فاطمة: قالتلي قمر عرس سلفك مبارك عليه
نجاح: ايه والله الله يبارك فيك
فاطمة: وين بيديروه نتدكر انه باعوه حوش أهلهم
نجاح :بيديروه عندي
فاطمة: باهي تكسبي فيه أجر سلفك الأخير وقبلتي بتعرسوله في حوشك
نجاح: الله غالب يجوا يحطوك في الأمر الواقع ماعندك مابالديري
شوي وجن خواتها وهدرزة وجو مش عادي
طلع أكرم مشي للسوق وساوم الحديدة القاها بحدود الخمسة ألاف
في الليل:
نجاح :جي عامر وبتطلع تروح
أكرم: بكري العشية طلعت وبعتهلك وهذا حقك يانجاح
نجاح: شافت الفلوس بارك الله فيك وخيي اجعني مانفقدك
أكرم: ان شاء الله هيا مع السلامة
نجاح: مع السلامة
روحت للحوش دخلت صغارها ورقدت ومشت للدولاب وطلعت لفلوس من الشنطة ودستهم
عامر: شن الديري
نجاح: بنغير دبشي
عامر: اها باهي
فاطمة: ربي يعينها النجاح بالدير العرس في حوشها
أكرم: ديما أختي هكي لين تاكلها في روحها تحرق في روحها لعند أمتى هكي والدير راي لروحها
فاطمة: خيرها يعني
أكرم: ماخيرها شي بس أهملت روحها ماكأنهاش نجاح لنعرفها
فاطمة: صح واضح عليهم الهم والمسؤولية ومش راحمينها
أكرم: ربي يعينها
فاطمة: ان شاء الله
في اليوم لبعده كان حتى هو عطلة في الفطور
نجاح :عامر اليوم نبيك ترفعنا للمحلات نمشوا نشروا دبش للعرس
عامر: تو كلكم ماعندكمش ماتلبسوا
نجاح: من الأعراس لعندنا مقطعات بعضهن
عامر: باهي وأنتي هالأيام خلوقك في حكة
نجاح: أنا خلوقي في حكة أو أنت مقفص علينا الناس تطلع تشري للصيف والشتاء والعيد وكل ماتعجبها لبسة تمشي تشري واحني من العيد للعيد
عامر: نجاح خيرك هالأيام متغيرة ومعاد متحملة شي
نجاح: لأنه تحملي عنده حد معين وطاقة معينة ووصلت حدها نساوين خوتك يجوا هداكا الذهب واللبس وأنا زي المتشردة بحداهم وفي الأخير يطلعوا هازيين عليه ويقولوا فيها في عيني راجلك على قديش ماعنده فلوس لا عندك دبش ولا دوق وأثاث الحوش من وين حولتوا ماعاد غيرتوا فيه حتى دواسة الباب تصدق المعاناة لنحس بيها بالنقص أنا ماتكلمتش لكن أنت فتحت السيرة وتعرف ليش بيديروا العرس عندنا مش غلا فينا لا لأنه أثاث الحوش عادي حتى كسروا ولبزوا قديم مايغير شي كل وحدة خايفة على حوشها لمغيرة أثاثها مية مرة
عامر: هذا كله داساته عليه من أمتى هالكلام
نجاح: من سنين وأنا نبلع ونغص بيه
عامر: يصير خير
عامر: في العشية نرفعكم وتوا روحكم
نجاح: في خاطرها ااااااه بعد شني بعد مية تحقيق بعد ماطلعنا لمغطي كله ... باهي ان شاء الله
بعد الغدي انطلقوا للسوق وعمتك عفاف حرقت التلفون بالاتصالات
عامر: يشوف للتلفون وداره صامت شن بتشري للصغار
نجاح: عندهم لبس طلعة بس الحوش باد يبوا أقل شي كل واحد توتين حوش
عامر يعني 12 توتة
نجاح: جايبهم على من عابي الستة
عامر: باهي ماقلت شي هي اهو نخشوا لمحل الاطفال ودوريلهم
نجاح: باهي
خشوا للمحل هما وقومهم قصدي صغارهم
قمر :ماما ماما نبي فيلو
نجاح: فيلو شنو ياماما تلبسيه لبسه وبيقعد في الدولاب تو ناخدلك متاع بنت خالتك تلبسيه باهي
قمر: بس ماما هذا حلو
نجاح: تلبسي متاع بنت خالتي نعطيك شوكولاتة
قمر: دارت بصوابعها 👌 ثلاثة نبي
نجاح: باهي حاضر
شرتلهم لبس حوش ومشي عامر يخلص
محمد: بوي أنا نبي نشري زبون
أحمد :حتى أنا
عامر: تو وقته هذا
نجاح: مش التفقنا نشروا للحوش بس
محمد: أول أمس صغار عمي كلهم شاريين نقعدوا غير احني
عامر: باهي هيا نمشوا للمحل نشروهم
مشوا شروا زبونات للأربعة وكنادر
نجاح: مادام شريت للأولاد اشري حتى للبنات قفاطين
عامر :باهي ياسيدي هيا مشي
مشت شرت لبنات قفاطين
نجاح: مازال أنا ماشريت شي
عامر: فلست اليوم ماعاد عندي تشوفي فيا حتى أنا ماشريت شي
نجاح :باهي باهي خلينا نروحوا ماعاد نبي شي
(الأمهات ديما هنا ليضحن في روحهن المهم تشري لصغارها وتنسى روحها وكان ماحصلتش عادي )
روحوا للحوش والصغار فرحانين باللي شروه وكل واحد يلبس ويسلب تشوف في فرحتهم نست كل همها تقول العرس فرحة للصغار زي العيد لأنه مناسباتهم زي العيد من العام للعام
وعامر: طلع طول بيتصل بعفاف عاد اليوم بطوله ماتصلش بيها فتح تلفونه يمكن فوق من مية مكالمة شوية رن عليها وردت طول
عفاف: وين اليوم فايتني بالطويل
عامر: أنا هارب من المشاكل ماتزيديهاش عليه
عفاف: باهي حبيبي نبي نطمن لأنه طول اليوم نتصل بيك ومارديتش
عامر: اليوم مشينا شرينا للصغار دبش للعرس وكيف روحت
عفاف: باهي حبيبي ان شاء الله يبيدوا ويجددوا
عامر: ان شاء الله
عفاف: قرب العرس
عامر: أسبوع الجاي بيبدأ
عفاف: باهي ان شاء الله تكملوه على خير
مجد: ماما وين بابا يشوف حوايجنا كيف طلعوا علينا
نجاح :حتى هي تفكر وين مشي ... تو لما يجي وريهاله باهي
مجد: حاضر تو نوريهاله
قمر: ماما وين الشوكولاتة لتبي تعطيهلي عشان ماشريتش الفيلو
نجاح: مش شريتلك قفطان
قمر: بس أنا كنت نبي فيلو أبيض
نجاح: خلاص ياقمر
قمر: زعلت ومشت تعيط
محمد: كان برا وخش أمي ليش بوي قاعد في السيارة ويتصل
نجاح: عنده مكالمة ضرورية قال نكملها ونجي عارف الدوشة لصايره توا مش حيتكلم براحته
أحمد: ليش حتى أنتي أمي ماتخدميش زي بوي
نجاح: لأني ماكملتش قرايتي زيه نبيكم تقرو وتكبروا مش تخدموا زي بوكم
محمد: يتدكر في معاملة بوه ليهم ولأمهم في آخر فترة ... أنا مانبيش نكون زي بوي لأني حنكون أحسن منه
نجاح: ضحكت ان شاء الله وليدي هيا هيا لموا حاجاتكم علقوهم خلى نمشي نديرلكم العشاء باهي
كل واحد لم حاجاته وعلقهم
وخش عامر :السلام عليكم
نجاح: ان شاء الله غير كملت مكالمتك
.
.
.
يتبع
أنت تقرأ
لعبة الزمن
Genç Kız Edebiyatıرواية ليبية خيالية فيها معظم الأحداث من الواقع الليبي تحكي عن زوجة حضرت جميع أنواع القدر وأقساه من لعبة الزمن
