#لعبة_الزمن
الحلقة 11
وصل عامر هو وعفاف للمطعم اختاروا طاولة وطلبوا فطور وفطروا وتكيفوا شاي وأجواء جميلة ورومانسية وعمكم عامر: لأول مرة يحس بي هالشعور ... تصدقي أول مرة نستمتع بالفطور زي هاليوم ونفطر مع وجه حلو يفتح النفس تفطر عليه هو ساد وتحلى بيه
عفاف: وين تلقيها هي من غادي يابال تغزل بيها وعبر عن نقصه بكل المعاني ... ان شاء الله ياحبيبي كل يوم تتصبح وتتمسى على وجهي الحلو
عامر: مبتسم ومستمتع عالآخر وحاط يده على خده عالطاولة ويشبحله بتأمل عن قريب ان شاء الله 😍
عفاف: ان شاء الله
عامر: حول يده وشاف الساعة هيا نرجعوا عطلنا
عفاف: حادر حبيبي أموري
روحوا للشركة وأمورهم لوز وسعيدين عامر وكأنه عايش حب جديد عايش مراهقة متأخرة مادوروشي
عفاف: خشت على مروة اهلا بالعانس
مروة: أهلا بخرابة البيوت
عفاف: حطت ايديها في نصها شن تقصدي أنتي
مروة: زي ماقصدك في كلمة عانس العين بالعين والسن بالسن
عفاف: تعرفي مانبيش نفسد مزاجي الحلو على وحدة زيك
مروة: ربي يعينه هو قاعد منخدع في الوجه الحلو سيوره شايفك على حقيقتك وأنا لنعرفك ليا سنين نخدم معاك
عفاف: هذا شي مايهمكش يأبلة
مروة: هههههههههه نستنى في اليوم لبنتشمت فيه عليك
عفاف: عفوا شن قلتي
مروة: سلامة قلبك
انتهى الدوام مروة ركبت سيارة وتستنى في عامر أمتى يطلع عشان تطلع وراه الطريقة الوحيدة لتوصل لنجاح
طلع عامر بعد ماودعاته عفاف وركب سيارته هو يفكر شن يستنى فيه هاليوم في الحوش ولع السيارة وطلع
ولعت وراه مروة: مشت وراه بعيد شوي لعند وصل الحوش شافات للحوش تتأكد شافت الصغار طالعين بيركبوا الباص ... تمام عرفت الحوش مازال الخشوش كيف نزلت خشت للسور تراقب وخايفة يشوفها عامر حيعرفها تدعي إنه مايشوفها وصلت للباب ودقت
طلعتلها نجاح: هو شادة قدر نعم تفضلي من أنتي
مروة: أنا مروة ###
نجاح: ماعرفتكش وضحيلي من بالزبط
مروة: أنا صاحبتك في الثانوية
نجاح: رجعت بذاكرتها للثانوية قعدت لحظات تسترجع في لنساته حطت قدر عالوطاء ومشت سلمت على مروة سلامات طويلة
مروة: ههههههههه باهي لعرفتيني قريب لزيتوني
نجاح: هههههههه تفضلي تفضلي
مروة: معليشي سامحيني جيتك في وقت غير مناسب
نجاح: لا عادي في أي وقت تعالي
مروة: تشوف للحوش وخايفة يطلعلها عامر
نجاح: لاحظتها مافيش حد كان أنا والبنات الأولاد في المدرسة مجموعة مشت ومجموعة قريب تجي
مروة: ابتسمت ليش أنتي قديش عندك
نجاح: عندي 6 زوز يقرو صبح زوز يقرو عشية وهدو بناتي قمر وقدر
مروة: ياوخيتي ماحلاهم ربي يخليهملك
نجاح: تشوف لروحها نمشي نغير ونجيك تمام قمر اقعدي مع خويلة مروة حاضر
قمر :حاضر أنا كبيرة نعرف
نجاح: هههه ايه كبيرة
مروة: ياوخيتي على هاللسان
عامر: قمر ياقمر
قمر: حي هذا بابا مشتله تجري
مروة: من الرعشة قريب ماتت
طلعتلها نجاح: شن دايرة
مروة: ماشية حال الخدمة
نجاح :ماشاء الله باهي على الأقل وحدة منه كملت وخدمت
قمر: بابا
عامر: وين أمك
قمر: معاها مراة
عامر: باهي ناديلي عليها
قمر: خشت ماما يبيك بابا
نجاح: استغربت ناضت نستادنك شوية يامروة
مروة: ابتسمت خودي راحتك
نجاح :طلعت نعم عامر
عامر: نبي دبش بنغير
نجاح: شافتله من فوق لتحت باهي تو نجيبلك خشت الداخل جبدتله دبشه قمر تعالي ارفعي هذا لبابا
قمر: باهي خداته منها ورفعاته لبوها لنصه يكر في الوطاء مسحت بيه الدنيا كلها يستاهل بابا دبشك
عامر: وين أمك لعطاته ليك مرمدتيه
قمر :شافتله أنت ليش تكشخ عليه 🥺
نجاح: سمعت بنتها وتكشيخ عامر جتها حضنتها خلاص ياقمر خشي الداخل مش لو أنت بتتزوج وبتعيش حياتك معناها تنكد عيشتنا البنت ماجت في شي هي لكانت رافعتهلك وفرحانة تنوض أنت تكشخ عليها ونعم الأب كلا أنت والنعم خشت وسكرت الباب في وجهه
مشت لقمر خلاص ماما ماعاد يكشخ عليك تمام
قمر: راقدة وتبكي مانبيش بابا عيط عليه
نجاح: ابتسمت نعطيك شوكولاتة بس ماعاد تبكي
ناضت قمر :مسحت دموعها حاضر نبي شوكولاتة توا
مروة: مبتسمة على براءة قمر ترضا بأي شي وتنسى شن مشكلتها
نجاح: مشت جابتلها عصير وشربوا
مروة: بنتك تهبل ربي يحفظهلك
نجاح: ياريت ننسى زي ماهي تنسى ياريت نرضى زيها بأي شي
مروة: أنتي ماتعرفيش سبب زيارتي صح
نجاح :نحسابك تدكرتيني بعد هالسنين وجيتي زرتيني
مروة :هو صح بس في سبب ثاني
نجاح: شن هو
مروة: أنا نشتغل مع عامر راجلك في الشركة
نجاح قعدت تشوفلها وبس
مروة: صح تتفاجئي متوقعة ردة فعلك وعفاف ليحبها تخدم معاي
نجاح: كيف يعني عفاف صاحبتك
مروة: أنتي تعرفي
نجاح: نعرف وبيتزوجها وأنا ماعاد يلزمني لبيتزوج هوينا قدامه حاطتله شروط ينفدهملي وأنا نسيبلها واسعة وعريضة
مروة: كيف يعني بالسهولة هذي تسلمي راجلك ليها
نجاح: هو لاختار هالطريق مش أنا لحطيته
مروة: فكري بعقل يانجاح دافعي عن نفسك لاخر رمق
نجاح: شن هو صغير وجت خداته من يده واحد طول بعرض وقاعد بعقله على شن بندافع على ولا شي ماخلالي شي هو حتى نفتح فمي
مروة: ناوية بتطلقي قصدك
نجاح: ايه وهذا كان على رأس الشروط
مروة: وشن ثاني
نجاح: قالتلها على شروطها كلهم
مروة: شروطك كلهم عندك حق فيهم ومن حقك بس إلا الطلاق نجاح ماتطلقيش
نجاح: ليش مانطلقش منه بعد ماطلع عليه لمايطلعش نكون مطلقة ولا يكون متزوج عليه ناخد الأصعب عشان تسهل حياتي لبعدين ماناخدش الساهل ونمشي للأصعب
مروة: فكري في صغارك في بناتك في أولادك كيف بتربيهم من غير أب مهما كان ديريه باب عالكلاب يوم هذا عطل هذا غاب هذا مرض من بيرفعه أكيد مش أنتي بتجري وراهم من شارع لشارع أو من مصحة لمصحة فهمتي عليه
نجاح: فهمت عليك
مروة: فكري في كلامي كويس وبعدين قرري هذا قرار مصيري لي صغارك قبلك أنتي أنا عشت بعيدة عن بوي ومجربة هالشعور ويقولوا اسأل مجرب ولا تسأل طبيب
قعدت شوي وروحت مروة ونجاح قعدت تفكر فكرة ترفعها وفكرة تجيبها فعلا هذا قرار مصيري ومش بتقرر على نفسها بس عالكل ودائما الأم تقع ضحية التضحية في كل شي عشان صغارها لبست ملاية
شافت الصغار لروحوا من المدرسة ليبدل وليتغدى ....
طلعت لعامر دقت الباب وخشت القاته يتصل قعمزت لعند كمل
عامر: هذا أنس يت...
نجاح: ماعاد يهمني بمن تتصل أو ليش عندي كلمتين بنقولهم وبنمشي في حال سبيلي
عامر: أنا لبنتكلم توا وخليتك تحكي وسمعت شروطك وماتكلمتش بس فكرت ماليا أنتي خدعتيني
نجاح: من لخدع من أنت أو أنا لطول هالوقت تتكلم مع وحدة مش معروف أصل بوها من وين وأنتدا راقدة على وداني
عامر: لو بتغرميني في شروطك عشان نطلقك نقدر نرفع عليك دعوة في المحكمة ونخليك تطلعي بدبشك وصغارك تحلمي تشوفيهم
نجاح: نتوقع منك أي شي مانستبعدش الشي هذا وحتى أنا عندي مانقول
عامر: تفضلي نسمع فيك
نجاح: أنا فكرت واتخدت قراري
.
.
.
يتبع
أنت تقرأ
لعبة الزمن
ChickLitرواية ليبية خيالية فيها معظم الأحداث من الواقع الليبي تحكي عن زوجة حضرت جميع أنواع القدر وأقساه من لعبة الزمن
