لعبة الزمن

لعبة الزمن 32

#لعبة_الزمن
الحلقة 32

الحياة ديما معكوسة يوم نفرح ويوم نبكي دقيقة نبكي فيها ودقيقة فيها نفرح
سبحان من يبعت الفرحة من وسط الحزن والكآبة لنتيقن إن رحمة الله واسعة
اللهم رحمةً واسعة بعبادك 🤲

فاطمة: تسمع دق الباب ناضت مخلوعة تشوف في ولدها محمد ومرته وصغاره قدامها ومعاهم الشناطي ... ضحكت شن الديروها هنا بقشيشكم
محمد: تقبلي بينا نعيشوا معاكم
فاطمة: ضحكت من وسط خاطرها ونزلت دمعة على خدها كانت بحال وقعدت في حال ثاني خشوا خشوا مرحبتين بالغالي لجاي بيسكن عندي
اللهم جبراً اللهم صبراً اللهم عطفاً ورحمةً أوصى الله بالوالدين إحسانا فمأبهانا عندما نرضي والدينا لكي يرضى عنا الله ويبارك لنا في حياتنا وحياة عائلتنا وزوجنا وأولادنا

خشت رندة ووراها صغارها وشناطيها دخلهم معاها محمد
جايبة معاها غداها لكانت مجهزاته عشان عزوزتها بتجي عندها بس صار العكس حطاته في المطبخ وجهزت السفرة وطلعت الشرشاف ونادتهم عشان يتغدوا
مش شي سهل داراته رندة في هذا اليوم كبرت بعين راجلها وعين عزوزتها هي عندها حوش لكن رضت تاخد بخاطر راجلها وتمشي تعيش مع أمه لأنه مامعاها حد وفعلا هذا بنت الأصول زي ماتعاملي أمك عاملي عزوزتك والعزوز ماليها كان ولدها يعانيها

وصلت نجاح للحوش ومعاها ليلى ومحمد
نجاح: كانت شوي وحتنفجر مهما كان هذا مش ساهل
ليلى: طمني بالك يانجاح تو نقول لمجدي يشوفلك محل ثاني شن رايك
نجاح: تمام ان شاء الله لسيبنا هو الخاسر مش احني لسيبنا ندوروا غيره
ليلى ان شاء الله

آمال: تتصل بعفاف شن جو عفو
عفاف: اهلين امال هاتي ماعندك
آمال: اليوم شري شفرة جديدة ورقمها 09********
عفاف: تم شكرا بارك الله فيك هيا مع السلامة
آمال: ولو نحن بالخدمة المهم نبي البضاعة لتجيبي فيها
عفاف: لما نمشي عند أهلي تعالي خوديها سلام

عفاف :سجلت الرقم واتصلت بمحمد
محمد: لا هكي هلبا حتى بعد مادرت شفرة اليوم قاعدة بغبرتها ماسرع وصلتي فيها
رندة: جاته خيرك شن في
محمد: الرقم لكان يتصل بيا توا عاود حتى عالشفرة هذي
رندة: شن اللصقة هذي هات أنا نرد عليها نوريلها مالطة من وين تفتح
محمد: مدلها التلفون لكان عالق بالاتصالات
رندة: فتحت الخط وتسمع في كلام مستفز ومقرف لدرجة لا توصف ... وربي العظيم لخلق السموات والأرض وربي العالي لما نخليك أيامك سود ياحيوانة 😡
عفاف: نجلطت من الصوت من وين طلعلها كملت بكلامها لمتجعون عرفتها انه هذي رندة ... اوبس انتي مرته حبيبتي عطيني حمودي حبيبي استاحست صوته الحلو لما يرقد قبل مايسمع سوتي النعوم
رندة: الرقم هذا أنسيه فاهمة كلامي أو لا أحسن مانجيب رقمك وأنتي مني ونقربعها فوق راسك ياحقيرة ياسراقة الرجالة يامريضة الراجل متزوج
عفاف: هههههههه عادي نجي زوزة تانية أنا ماعنديش مشكلة نتزوز هذا ونتلق منه ونسوف غيره حبي
رندة: لما يجي على راسك نوريك شن هي المرأة ثانية وسكرت على خليقتها
محمد: كان رعب راكبة من رندة لأنه لما تحمق ماتعرف حد تضرب حتى الضرب 😂 رندة أنا والله ماتصلت بيها ولا كلمتها
رندة: دير حل للرقم ديرله حل وإلا هو بيخرب بيناتنا فاهم أو لا وإلا نخرب عليك عيشتك وأياماتك سود مني وماني راحماتك فاهم أو لا
محمد: حاضر والله لما نشوفله حل كله إلا زعلك رنودة
فاطمة: خيركم صوتكم لوين
رندة:: ضحكت هذا محمد ماجابليش لوصيته عليه قلتله نغبرها عليك بعدين وتشبحله
محمد: ضحك ضحكة صفراء ايه اهو توا ماشي نجيبهالك وطلع يجري أمه نقداته من رندة لكن قديش بيهرب سيوره مروح
خوف محمد من رندة مش خوف منها لا خوف من إنه يخسرها هذا الخوف نتيجة حب طرفين نتيجة اهتمام كل طرف بالآخر جرب خسرها مرة بعد تهور خواته وحاولوا يخشوا بيناتهم وصلت بينهم لباب الطلاق وماعاد يبي يخسرها مرة ثانية على نفس السبب فزي ممحمد مهتم برندة حتى هي مهتمة بيه وتبي راحته والدليل برضى انه تسكن مع أمه