لعبة الزمن

لعبة الزمن 8

#لعبة_الزمن
الحلقة 8

نجاح: ضميته أنا والصغار بكري
نورة: ربي يعطيكم الصحة والله
أنس: المفروض خواتي ماروحوش لين داروهلها مش للدرجة هذي يخلوها عليك
نجاح: عادي حوشي مش غالبة فيه
أنس: هيا أنا طالع السلام عليكم
نجاح: وعليك السلام

بعدها لحظة صمت على روح الشهداء
نورة: ماشاء الله حوشك قنين
نجاح: ايه صح قنين مع ضحكة صفراء قنين شنو وهو حتى من الفرش من وين ماعاد غيرته ... بس قديش ليا ماعاد غيرت فيه شي
نورة :مش شرط التغيير حتى يكون حلو المهم النظافة والحاجة لمرتبة
نجاح: ايه صح

شوية وجو رندة ورانية خشوا
رانية: حي ضميتي والله قبل بنعاونوك جايين
نجاح :خشي خشي استاقظتي بكري لبيضم من الصبح
رندة: ههههههه قصفاتك من عندكم
نجاح: جايين نورة وأنس داخل خشوا

سلموا وباركوا
تعرفوا على نورة وهي تخش الخاطر وطيبة زي نجاح مش زي اللفعات وداد وعلا
جي عامر: سمع صوت هدرزة ... نادى نجاح نجاح
نجاح: ناضت بعد سمعاته ينادي نعم عامر
عامر: من هنا
نجاح: خواتك ومرت خوك أنس
عامر: اها باهي جيبيلي تلفوني نسيته هنا تلقيني في المربوعة
نجاح: حاضر من عيوني في خاطرها أكيد بتكلم المحبوبة طول النهار عاد من غيرها
مشت للدار وخدت التلفون فتحاته وسجلت رقم عفاف لأي طارئ أو فكرة جهنمية ومشت رفعتهله ... اهو تلفونك ومن بكري هو اتصالات ورسايل ماشاءالله الخدمة حتى نهار الجمعة مش مسيباتك وخشت داخل قعمزت معاهن
عامر: قعد واقف يحاول يفسر كلام نجاح بس ابعد تفكيره من الدماغه منين بتعرف وهو مداير للتلفون رمز مشي للمربوعة واتصل بعفاف ياحنة
عفاف: وينك من بكري نتصل بيك ونبعتلك في رسايل ماتردش عليه
عامر: التلفون كنت ناسيه في الحوش وآخرلك مرة تعلي صوتك عليه
عفاف: آسفة بس والله نشغلت عليك حبيبي وين ماتردش عليه
عامر: شن تبيني طول النهار والتلفون على ودني
عفاف: دير حل ياعامر وهذا غير خوي كل يوم جايبلي يبي يخطب عندك هالأسبوع ماتخطبنيش بنوافق على صاحب خوي واهو قلتلك وسكرت في وجهه

عامر: اوف اوف لازم ندير حل ونمشي نخطبها وإلا بالضيع مني قعد يفكر شن بيدير مع نجاح ومن بيكلمه يمشي يخطبهله

نجاح: ناضت بالدير العشاء للعيلة لعندها وهي تبي أي يشغل ايديها عشان يمشي لتفكر فيه
رندة: نجاح أنا نطيب عليك أنتي اليوم سارحة هلبا
نجاح: قعمزت عالكرسي... رندة نسألك سؤال لو في يوم القيتي راجلك يخون فيك شن الديري
رندة: تلفتتلها سؤال غير متوقع ومن نجاح لأنه لو سألاته علا أو وداد عادي تتوقعها لكن إلا من نجاح وهل انه تقصد على عامر وهذا كله تفكر فيه في لحظات ... نجاح خير شن فيه
نجاح: سألتك سؤال وجاوبيني
رندة: هو ماأنه لو دارها نهاراته سود مغبرات
نجاح: ولو في يوم جاك راجلك وقالك بنتزوج شن بالديري
رندة: جت قعمزت بحداها تكلمي يانجاح عامر يخون فيك صح ويبي يتزوج
نجاح: مسحت دموعها ايه يارندة اليوم شفت الرسايل لبيناتهم شي مانتحملش نشوفه بعيوني لأنه في الأخير طلعت وحدة في نظره لاننفع نكون زوجة ولا أم مقايل عليه كلام ليها يغطي الشيطان منه وجهه أنا بعد هالعمر هنت عليه هكي يدير فيا حتى لو ماعاد طايقني مايتكلمش عليه للغير هذا من غير متكلم على جسمي رايح تنايا  وشعري لديما مكشكش هذا غير لمازال ماقريتاش
رندة: حضنت نجاح خلاص يانجاح إلا مانلقوا حل خلاص هدي بالك عيب قدام نورة جاية أول مرة مانبيش تشوفك بالحالة هذي صح
نجاح: مسحت دموعها ايه صح خلى نمشي نغسل وجهي ونجيك
رندة: تمام أرجوك نجاح انسي شوي لعند تروح نورة مش حنروح لعند نلقوا حل ان شاء الله
نجاح: هزت راسها وطلعت

بعد العشاء روحت نورة ورانية قعدت رندة بس
نجاح: بتفكير في خاطرها أنا مفروض ماحكيتش لرندة مهما كان يقعد خوها وتكون صورته قدامهم أحسن مايكون
رندة: نجاح وين مشيتي
نجاح:  أنا لنستاهل أنا المهملة أنا أهملت نفسي وشكلي في سبيل راحتهم طول اليوم نكد ونغسل ونطيب نحسابه هذا حاجة باهية نفتخر بيها طلع عيب ليا وقعدت تبكي بشكل مش طبيعي ماأوعرها لما تكوني بنية صافية وتلقي الخونة من وراك ومن أقرب حد ليك

رندة:  خلاص يانجاح هدي روحك
نجاح: مسحت دموعها خلاص أنا هديت روحي مش لازم نبان ضعيفة قدام صغاري لانه أثري يبان عليهم
رندة: هذي نجاح لنعرفها رن تلفونها حي جي هيا مع السلامة نجاح ولينا يوم ثاني نهدرزوا بيه
نجاح: ان شاء الله مع السلامة سقدتها وخشت لصغارها لرقداته وبدلتله وهكذا ومشت للمطبخ ترد في الماعين
عامر: خش نجاح
نجاح: تمسح في الصونية ومش لاهية بيه ولا تسمع بيه
عامر: علّا صوته نجاح نكلم فيك
نجاح: من الخلعة طاحت منها الصونية نزلت تلم في المتكسر بدون ماترد عليه لأنه يستاهل أكثر من التجاهل
هو طلع حامق كيف ماتردش عليه ومشي يطنفر والقي عمتك عفاف تتصل بيه وكملها مكالمات غرامية
نجاح: بعد مالمت المكسورة فتروشة فتروشة زي قلبها المتفترش لكن من بيلمه قلبها ورماته في الكناسة وطلعت من المطبخ مشت للدار تسمع في اتصالات عامر هو ومحبوبته وماأصعبها تسمعي الخيانة بودانك ياريت قعدت على عيونك بس
على قديش من مرة بتفتح الباب وبتهجم عليه بس تتراجع وفي الأخير مشت للدار وقعدت تتفرج عالتلفزيون لعند ماخداها النوم ناضت في الليل متلجة من كثر الصقع من غير غطاء راقدة
ناضت طفت التلفزيون ومشت شافت الصغار وخشت للدار القت عامر راقد ... هذي فرصتك يانجاح لباقي التفتيش خدت التلفون ودارت كدا صوت حتى تتأكد إنه راقد مزبوط حمدت ربي إنه نومه تقيل أثقل من دمه وطلعت تجري للدار وفتحت هذاكا التلفون القت صور هو وياها فتحت البلوثوت وبعتاتها لتلفونها الصورة وكملت باقي الصور ... هي واضح إنه معاه في الخدمة الصور كلهم في مكتب معناها تشتغل معاها
وفتحت عالمكالمات لكانت بالساعات وهو حتى دقيقة معاها مايطقهاش وشافت الرسايل يبعتلها في كروت وهي الكرت يحسبلها فيه بهديكا الحسبة مش يجيبلها ومرمر عيشتها وأيامتها الحرف السود حتى لكانت مدايراته عادي توا قعد عندها مش عادي قرت كل الرسايل لبينهم وهي الدمعة في عينها مخنوقة مقهورة تمالكت نفسها وردت التلفون في مكانه وهي حطاته وهي تقلب للجهة الثانية وهي قلبها قريب مات تحسابه ناض بعدها ارتاحت لما ماعاد تحرك حطاته ورقدت لليوم الثاني وقررت اليوم مش حتنوض
عامر: ناض ومستغرب نجاح قاعدة لتوا ماناضتش  ...  نجاح نجاح 
نجاح هممممم
عامر: نوضي ديري الفطور
نجاح: أنا ماعنديش جهد دبروا روسكم ورجعت رقدت ولا على بالها ومع إنه بياكلوها الصغار مساكين لكن لازم من المجازفة
عامر: مشي للمطبخ فتح الثلاجة حط الشاهي عالنار محمد
محمد: نعم بوي
عامر: تعرف تقلي دحي
محمد: ايه نعرف
عامر: تعال اقلي لخوتك أمك ماناضتش اليوم

.
.
.
يتبع