#لعبة_الزمن
الحلقة 13
وصلت عمتكم نجاح لمحل السيراميك وهي عيونها قلوب قلوب قريب هبلت في جرتهم عندها حق مسكينة كانت محرومة من طلعات زي هاذي
نجاح: حي ياعامر محلاه وتجري للثاني حي ياحي ماحلاه شكله بنغير رايي ديرلي حتى الحمامات
عامر: قلتي مطبخ أنتي بس
نجاح: بشرط الدولاب لنختاره أنا 🤨
عامر: المهم فكيني من سريب الحمامات
نجاح: حتى هذا باهي في الوقت الحالي كملت تدهويرها في هذاكا المحل وعمتك عفاف قريب حرقت التلفون بالاتصالات يشوف فيه ويرده لجيبه ونجاح تشوف فيه تزيد تعطل
عامر: بعد صبر طويل هيا نجاح اختاري واحد أو نطلعوا
نجاح: نطلعوا نشوفوا واحد ثاني أو نطلعوا نروحوا مع تفنيصة
عامر: بنروحوا
نجاح: امالا مازال بنختار لأني محتار بين مطبخين البني أو البيج اللونين هذوما مدايرينهم علا ووداد
عامر: تو احني جايين بنتبعوا الناس شن مدايرين
نجاح: لا أنا بنختار أحسن منهم
عامر: باهي أنا لتوا قاعد نساير
نجاح: باهي لما بيبدوا يزلزوا أحني وين بنمشوا وين بنطيب أكيدة عمال وبيقعدوا للغداء والفطور
عامر: مش عندك مطبخ برا ارفعي بضاعتك واقعدي فيه لين يروحوا
نجاح: والله طلعت تفكر شكله طلعت منك فايدة هالعفاف
عامر: نجاااااح
نجاح: باهي اسكتت اهو بنختار البيج
عامر: باهي بنمشي نحجز فيه ونجي
نجاح: باهي تمام
وهكي تهنت عمتك نجاح على مطبخها وروحت للحوش وهي فرحتها مش عاطيتها لحد وصلوا قريب المغرب وخشت غيرت حوايجها
وبدت في حملة المطبخ بتفضيه عشان غدوا بيبدوا بيكسروا
نجاح :هيا يأولاد نلملكم الماعين وسقدوهم للمطبخ لبره
محمد: أمي خيرك اليوم
نجاح: عندي نشاط زايد اليوم مانبي شي يعكرلي مزاجي هذا وين بنعيش أيامي بيقعد عندنا مطبخ جديدة
أحمد: حقا أمي بتشري الثلاجة الكبيرة
نجاح: ياعيني ثلاجة وغاز كبير ورخامة من الباب للباب هيا ارفعوا هدوما مش تجوا ترفعوا الثاني عامر :جاهم شن هالدوشة
نجاح: بنفضي المطبخ شن دوشة مازال هذا حصتك بالطلع الثلاجة
عامر: هبلت هالمراة في هالمغاريب
بعد ساعتين كانوا الماعين كلهم برا والمطبخ مافيه كان غاز وثلاجة ودولاب عادي متاع لوح
نجاح: محمد تعال امشي نادي على بوك قوله أمي تبيك
امشي محمد ينادي على عامر
نجاح: هيا بنرفعوا الغاز والثلاجة
عامر: خليهم غدوا
نجاح: شكله مش ناويين تتعشوا اليوم
عامر :اووف اوووف حتى أنا مالقيت ماندير
نجاح: في خاطرها بالدير غصب عنك ... هيا هيا نشطوا روحكم
طلعهم عمكم عامر يتحلحز في الثلاجة هو ونجاح ومعاهم محمد وبعدها الغاز وهكي كملت نجاح نقلها كله
عامر: الدولاب ماتقوليش اليوم
نجاح: ماعاد عندي جهد اليوم خلاص عظامي بيطربقن هذا غدوا لما بتجيب العمال قوللهم يطلعوه
محمد: صح يابوي عيينا اليوم
عامر: شبحلهم على جنب باهي خلوه لغدوا
نجاح: طلعت برا توتيلهم في العشاء اتصلت ليلى أختها بيها الو ليلى شن جو
ليلى: شن صاير يانجاح حتى من صوتك يضحك
نجاح: فرحانة خليني بالك اطقيني بعين
ليلى: خزي عليك من أمتى هالكلام بيناتنا متصلة بيك غدوا بنجيك بنهدرز
نجاح: لالا وين غدوا عندي عمال
ليلى: بسم الله عمال شنو
نجاح :ياحنة وخيتك لأول مرة في حياتها تضحك الدنيا في وجهه وغدوا عامر بيبدالي في صيانة المطبخ غدوا بنبدا نكسر الزليز وبكري العشية مشيت اخترت الزليز يجلط ياليلى كان شفتيه
ليلى: باهي لربي هداه هالعامر وبالسرعة هذي دارهلك وهو كيف طالع من عرس سلفك
نجاح: قتلك فكينا منك ساد من الحسد
ليلى: خزي أنا بنحسدك شن بنودك غير الباهي غير مستغربة
نجاح :من اهني وماشي حولوا نجاح وحطوا نجاح ثانية جديدة بنايلوها جاية
ليلى: ربي يجيرنا من لجاية
نجاح: ان شاء الله المهم لما نفضى نكلمكم الفترة هذي مش فاضية
ليلى: ان شاء الله تكمليه على خير
نجاح: ان شاء الله هيا مع السلامة
وتت الصفرة وحطت فيها حاجات خفيفة ورفعتها معاها
نجاح: أحمد امشي جيب البخشة والخبزة
أحمد: امشي باهي
جي فرش وقعمزت نجاح هيا من يبي نص يقولي
مجد: وين بابا
نجاح: مسحت على وجهه محمد امشي نادي عليه
محمد: باهي امشي نادى عليه وجي قعمز
خش عامر: وهو حاسس نفسه غريب وكأنه مش حوشه (كم غريب هذا الشعور تشعر بنفسك غريب داخل منزلك )
نجاح: شافاته القاته واقف ويشوف فيهم ويراقب في حركاتهم ... بتقعد واقف هكي وماتبيش تتعشى
عامر: قعمز بعيد على نجاح مقابلها
نجاح: تشبحله على جنب شن تبي نديرلك
عامر: أي شي
نجاح: حتى سم
عامر: يفنص ويأشر عالصغار مش وقت بصارة مالغة
نجاح :في خاطرها اه لو القتل حلال ماتاخدوا غير رصاصة في راسك وراسها لكن الله غالب جيت نخاف ربي والله كمهذا وريتكم الويل مش نجاح لتنخان .... دارتله نص هاك شد
عامر :كلي وناض طلع للمربوعة طول ماهو نقعمز وهذا التلفون يهز
خش للمربوعة رد عليها نعم ياعفاف
عفاف: أنا توا طلعت عفاف بس وين حبيبتي
عامر: ماعاد تخنقيني بالاتصالات مانردش عليك معناها مش فاضي وأنتي عالقتها في مية مكالمة وأكثر اليوم نخنقت ماعاد عندي ماندير كان نرد عالاتصالات ماوراياش خدمة وعندي صغار بنهتم بيهم بنشوف طلباتهم
عفاف: تمام وسكرت في وجهه
وهي الدير في الحركة هذي وتسكر عارفة بيجي ويستسمح منها ويصالحها فلهذا ماحرقتش دمها كملت جوها عادي هذي أصحاب الدم البارد
أحمد: أمي ليش بابا يرقد برا
نجاح: شافتله شن بترد عليه لأنه مريض وخايف يدعينا عرفت كيف
أحمد: مريض من شنو
نجاح: مرض معدي ونصحه الدكتور يبتعد عن الناس بقدر المستطاع عشان مايندعيوش منه
أحمد: اها باهي
نجاح: خافت يزيد يسألها ماعاظ عندها ماتكدب كدبة ثانية ...هيا يلا عالنوم غدوا كلنا ورانا نوضة بكري مافيش حد بيرقد للعشرة كلنا نفس الوقت
مشت رقدتهم كل واحد في مكانه ومشت لدارها وحاولت ترقد كل هالقوة لمتلكتها اليوم والضحك والجو كله انتهى وأصبحت ضعيفة وهشة وتبكي وتندب على حياتها أنا شن درت مش حتى ياخد عليه مراة مش درت مش حتى يتزوج ويحب غيري شن ناقصني
محمد: دق الباب أمي
نجاح: مسحت دموعها بسرعة وخدت نفس عميق نعم محمد تعال خش
محمد: قرب منها وقعمز عالسرير أمي ليش تبكي
نجاح: تدكرت أمي بكيت لأني مستاحشتها هلبا هو فعلا في هذي اللحظات أكثر شخص تحتاجيه بجنبك هو أمك الشخص الوحيد ليفهمك عكس الغير
محمد: أمي ماعاد تكدبي عليه أنا مش مصدق شي عارف إنه بوي بيجيب وحدة تانية وبيتزوج
نجاح: قعدت تشوفله وساكتة ... من وين عرفت
محمد: هداكا اليوم سمعتكم تتكلموا كنت جاي نبي بوي يفهمني في الرياضيات لكن صار انه سمعت تكلميه انه بيتزوج عليك
نجاح: خدت محمد وحضناته أنا آسفة لأنه أمكم ماكانتش بالقدر الحلو لبوكم وعيشتكم هالأيام بوكم اختار غيري وأنا مانقدر ندير شي
محمد: مسح دموع أمه أمي أنتي تقعدي أحلى وأحسن أم في الدنيا إذا ماعاد عاجبة بوي ساد تعجبي فينا احني ومش ماحسستينا بشي أنا فخور بيك هلبا
نجاح: وليدي البطل ماعاد نبي شي من الدنيا غير نشوفك قدامي كبير وناجح ونقول هذا ولدي وكبر
محمد: ضحك حاضر بنكبر وبنجح زي ماقلتيلي
نجاح: ايوا ماتخلي شي يعرقل قرايتك لأنه هذا مستقبلك شوف زيي أنا بطلت قراية واهو توا مقعمزة
محمد: ارجعي اقري
نجاح: ابتسمت على تفكير محمد :حتى أنا هذا لنفكر فيه وعن قريب بنرجع نقرا
محمد: عادي نرقد جنبك
نجاح: تعال
نجاح تلفتت وراها القتهم كلهم واقفين حتى احني نبوا نرقدوا
نجاح: تلفتت لمحمد وشافت لأحمد
أحمد: احني اسمعنا كل شي ياماما
نجاح: تعالوا حبيباتي
كلهم رقدوا معاها يمين ويسار المهم يرقدوا ... أنتم أملي الوحيد في هالدنيا ندير كل شي عشانكم
مجد وقمر وقدر كانوا مش فاهمين شي شن يعني زواج وشن يعني مراة تانية
أمجد: ماما احني معاك ديما
أحمد: احني نوقفوا معاك لعند تكملي قرايتك
نجاح: ابتسمت هذو أولادي وهكي نبيهم لازم نوقفوا مع بعض ونشدوا في ايدين بعض
كلهم: حاضر
نجاح: لا رسمي مربية جيش 😂
.
.
.
يتبع حلقة طولتهلكم شوي عشان عيونكم
أنت تقرأ
لعبة الزمن
ChickLitرواية ليبية خيالية فيها معظم الأحداث من الواقع الليبي تحكي عن زوجة حضرت جميع أنواع القدر وأقساه من لعبة الزمن
