#لعبة_الزمن
الحلقة 23
عفاف: مقعمزة مع أمها الدق في الحنك
فوزية: شن اخبار عيلتكم
عفاف: عطيهم ماينزعهم واصلا ماشفت منهم حد ولا نبي نشوفهم دروحهم جايين مع ضرتي وقالبين وجوهم علينا
فوزية: بينهم عارفينها وعشرة عمر معاهم أكيد بيجوا معاها تو مع الأيام يتعودوا عليك حتى أنتي أنتي خشي فيهم وواصليهم وخشي بالطيبة واطلعي بالطيبة
عفاف: ناقصني غير نواصلهم هذا غير رندة الحقيرة لهددتني في نص حوشنا لما نوريها
فوزية: ربي يهديك يابنيتي البنات الفالحات لما تبي تعيشي خشي العيلة بنية بيضاء وقلب صافي مش يحبوك ويحترموك لكن أنتي بالديري راسك من راسهم ماتلقي كان الكره فيهم
عفاف: مايهمنيش المهم نعيش مرتاحة وبعيد عليهم
نجاح: مقعمزة الدير في الحلويات تكركب وتحط ظهرها خلاص ... خلاص كلا أنا ظهري
محمد: ارقدي شوي وبعدين كملي
نجاح :من بيديرلنا العشاء احميدة نوض
أحمد: لالا ساد مخليني نغسل في الماعين هلبا حتى عشاء
نجاح: هيا وراس احميدة وفكنا من نقيقك
قمر: ماما أنا نديرلكم عشاء حلو هلبا
نجاح: سلم بنتي الشطورة لبطيب عشاء لأمها
أحمد: باهي اهو نضت لكن مافيش حد يتكلم كان ماينفعش
نجاح: مش حنقولوا شي عارفينك شيف
محمد: لا مش حنقولوا شي
مشي أحمد: للمطبخ وهو يفكر شن يخترعلهم من أكله كان عنده شغف للمطبخ طلع لحم من لفريز وجبد الطنجرة كان يشبح في أمه كيف الطيب تبعها كيف الطيب قشر بصل وقطعه وبعد مانزلوا دموعه كلهم صب الزيت وحط البصل شطشطه طشة وحط اللحم وحط حاجات المكرونة والطماطم وصب الميه وغطى الطنجرة المطبخ فيه شفاط فلهذا ماسمعوا شي ولا شموا شي
نجاح: في بالها مدايرلهم دحي وشاهي وتمت لهت في دير الحلويات وماستغربتش من تأخيره
أحمد: من الاستمتاع واللحظة لعايشها كان كل شوي يشوف في الطنجرة ويدوق فيها قريب كملها 😂 وبعدها حط المكرونة ومشي للثلاجة طلع السلاطة قطعها وغسلها وقطع معاها خضراء أخرى وحطها في صحون ومشي للطنجرة حركها ونقص عليها النار لعند طابت صبها في الصونية كبييرة وحطها في صفرة ورفعهلهم حط الصفرة وقعمز هيا تعالوا كولوا وقولوا بعدين أحمد مايدير في شي
نجاح: شافت للصفرة هيييي أمتى لحقت الديرها
أحمد: يبوس في ايديها بايديا درتها
نجاح: ناضت غسلت ايديها وجت سلم ايدياتك فلاحة وليدي دارلنا مكرونة
تعشوا مكرونة أحمد وناضت نجاح: خدت قسم من الراحة بتغسل الماعين لقت هذاكا المطبخ الله لاتروعك لكن ابتسمت قالت عادي خلي الولد يتعلم لأنه لو حاسباته عليهم ماعاد حيدير شي غسلتهم وكملت رفعتلهم عصير وشوكولاتة دعم حتى يعاونوها رشوة يعني 😂
عامر: قاعد في الحوش وقاعد من غير عشاء ويتفكر ويقول أكيدة توا ياكلوا ويتعشوا ومتحسر لكن خلاص ماعاد عنده مايدير طاح في شباك الساحرة الشريرة (خشيتلكم في عالم الانيمي)
اتصل بيها شن نجي نروح بيك
عفاف: نبي نبات خواتي جايات من بعيد ونبي نهدرز عليهم ونعطيهم هداياهم
عامر: تم زيدي اقعدي يتدكر في اللعبة لقبل بياخدها لقمر في تركيا وهي ماخلاتاش وقالت بتوزع الهدايا قال حس الحوش ضاق عليه وانخنق طلع للشارع يتمشى وهايم القي روحه قدام حوشه يتأمل فيه مفتوحات ضياته وصوت الصغار وواضح الحركة والسكينة لسيبهم فيه ومشي وهو الخسران القي روحه عايش منبود بين أربع حيطان
قعد يتأمل في الحوش لعند سيارة تمشي وتجي قطعت تفكيره رجع روح للحوش ورقد طول
أنت تقرأ
لعبة الزمن
ChickLitرواية ليبية خيالية فيها معظم الأحداث من الواقع الليبي تحكي عن زوجة حضرت جميع أنواع القدر وأقساه من لعبة الزمن
