#لعبة_الزمن
الحلقة 26
أنس :امالا وين مسيب المدام لتنازلت وشرفتنا
عامر: عند أهلها
أنس:نتوقعها منها والله ياوخيي أنت واحد مكار ونكد مافي حد متحملك كان نجاح وبارك الله فيها كان مني طلقتك بالعشرة
عامر: أنس فكني من دوشتك راهو ماعاد متحمل
أنس: الحق فيا مش فيك نجاح اوخيتي صارلي عايشة معانا 14 سنة إذا كان أنت مش حاسبهم صح أنا نحسبهلك شوف اخواتك لما يجو لهنا كأنهم جو لحوش بوهم وأمهم ويحاولوا بقدر الإمكان الحوش هذا ماينهد وأنت قاعد تهدم فيه بايديك
عامر: أنا ماهدمت شي اهو قاعدين تجو للحوش ومانقطعتوش لابسببي ولا بسبب شي ثاني
أنس: لأنه نجاح هكي من الأول قلبها طيب لا قد مادرت فيها قاعدة مستقبلاتك وأهله متعبرتهم أهلها زي ماكانت قبل نجاح ماتغيرتش بس أنت تغيرت هلبا لمفروض خونا ومايتغير علينا نتوقعها من بنت الناس لكن مش منك تتغير على خوتك احني لديما معتبرينك زي بونا لأنك خونا الكبير ولأنك خوي الكبير مانرضالك بدمار حوشك مانرضاش ببوي يهدم حوشه بايديه يجيك يوم ياخوي تندم أشد الندم على زوجتك وصغارك في يوم سيبتهم حتى دقيقة والدورهم ماعاد تلقاهم
ناض أنس من بحداهم يشوف في الأجواء
وعامر: قعد في مكانه هو تفكير يجيبه وتفكير يرفعه
بدأت الأجواء جميلة عند العائلة بسعادة ويملئ قلوبها فرح
كان محمد فاتح اللابتوب ويتفرج عليه القي على شن يهيم
عامر وأنس واقفين بجنب الشواية ويشوو
نجاح ورندة ورانية ونورة يهدرزوا وماخلوا على من هدرزوا
والصغار يلعبوا بجنبهم سعداء
هذي صورة الحياة السعيدة بشكل خارجي فقط والقلوب أدرى مابها
كملوا الشواء وحطوهم وتجمعت العائلة حوالين بعضها وأكلوا بسعادة وهدرزة جميلة لموا سفرتهم وغسلوا الماعين
نجاح: هيا النوضوا نخشوا داخل الدنيا صقع
رندة: لالا خلينا هنا الجو حلو البسي حاجة فوقك وتعالي قعمزي
نورة: ايه الجو حلو مع النار خلينا هنا لاحقين عليهم الحيشان
كملوا هداريزهم وروحوا لحوشهم دخلت رندة صغارها وخشت وقعدت نجاح: الضم في الدنيا من لقاعد
عامر: كان يتصل برا وخش نجاح
نجاح: كانت لاهية نعم
عامر: أنا أسف
نجاح: الأسف هذي على شن بالزبط لأنه فيه هلبا يبن أسف عليهن
عامر: على كل شي
نجاح: لو جبت حاجات للصغار مايعنيش أني حنسامحك
عامر: ليش طلبتي أني نجي إذا كان ماسامحتينيش
نجاح :يهمني في الدنيا هذي صغاري وبس وعدم وجودك يأثر عليهم نحاول بكل جهدي مانحسس بالنقص عن غيرهم لا أكثر أو أقل
عامر: يعني مش عشاني
نجاح: تحلم شكلك نجاح المسالمة ولتسامح أنساها أو عشان مرتك الجديدة ماشية حرجانة عند أهلها تبي يطبطب عليك ويواسيك ضحكت على جنب باستهزاء وخشت
عامر: قعمز عالكرسي خلاص ياعامر شن صايرلك أنا اخترت هالطريق لا تراجع اخترت لأني حبيت عفاف وقاعد نحبها بس خليها تتربى ونجاح قعدت أم صغاري ومن يوم مفضلة الكل عني الموضوع هذا انحسم ومافيشي تراجع
نجاح: كانت جاية تلم الباقي سمعت كلامه رجعت للحوش هذا غير قلت تغير عمره مالإنسان يتغير في يوم وليلة
أنت تقرأ
لعبة الزمن
Chick-Litرواية ليبية خيالية فيها معظم الأحداث من الواقع الليبي تحكي عن زوجة حضرت جميع أنواع القدر وأقساه من لعبة الزمن
