#لعبة_الزمن
الحلقة 31
جميلة تلك هي الحياة ترسل لنا أشخاص على هيئة ملاك يشاركونا أحزاننا قبل أفراحنا وتجدهم في الحزن قبل الفرح في الكرب قبل الفرج
فالحياة تأخد منا أشخاص وترسل لنا أشخاص
كنجاح ربي خدي منها عامر ولكن مازال عائلتها تحبها وأكثر من قبل متمسكين بيها لأنها هما شاهدين على معناتها
مش يعني لو هي حماة معناها ماتحبش مرت خوها وترضا بالهلاك لحوش خوها زي ماداروا حماوات رندة والعكس الصحيح زي مادارت رندة هي وأختها وخوهم سيبوا خوهم عشان نجاح لأنهم هي فعلا بنت أصل وهنا مش نكارات الجميل لمدايرتلهن وخيرها سابق ومايبوش يخسروها على خاطر تهور خوهن وهباله وهو غالط في حق عيلته ومايبوش يمشوا معاه لأنه مهما دار خوهم فيها قاعدة تستقبل فيهم زي قبل وتصرف وتخدم من جهدها بدون ولا كلمة
كوني نعم الكنة لتحب عربها وتودهم زي أهلها وكوني حماة لمرت خوك زي رندة ورانية
ليلى: جابت الكيكة وحاطين طاولة كبيرة حاطينها فيها مقرمشات سناك وأشياء جميلة أخرى للتسلية
كانت الكيكة مكتوب عليها ألف مبروك النجاح نجوحة سنة أولى ✅️
قطعت الكعكة ووزعوها في صحون وأكلوها منها والفرحة ضاهرة على وجوهم بالأخص صغار نجاح بالزايد وبنجاح أمهم
تمت الحفلة وروحوا معظمهم
أكرم: اتصل بنجاح نجاح تعالي برا نبيك
نجاح: اهو جاي
طلعت برا القاته يراجي فيها
نجاح: لو جاي وتبي ترفع صغاري لبوهم لا ومستحيل نسلمهم ليه وأنا سألتهم ويبوا يقعدوا معاي
أكرم: حضن نجاح معقولة نسلمهم بايدي مستحيل أنا عارفك قديش متعلقة بيهم أنا نعطيك هديتك وبس
نجاح: ابتسمت كانت خايفة ينفد كلامه لقالهلها شكرا أكرم أنت وجودك جنبي أحلى هدية نبي حقي من عامر ومش حنتنازل على أي شي لانفقة ولا مؤخر ولاشي نبيهم كامل يحاسبه الطلاق كلمة وقص هو
أكرم: والله ماني منقص قرش فيه هالكلب لحد اليوم تخدمي فيه وتساعدي في ظروفه وفي الأخير عطاك كانشو
نجاح: ربي يحفظك ليا وخيي
أكرم: ابتسم بقهر على أخته لأنه لعايشاته ماتوديه لعدو هيا ناديلي على فاطمة بنروحوا
نجاح :حاضر خشت داخل فاطمة قالك أكرم هيا
فاطمة: ناضت ولمت صغارها وروحت
نجاح: مشت لليلى قعدنا أنا وياك
ليلى: نجاح تعالي قعمزي فضفضيلي
نجاح: رقدت على ركبة ليلى اااااه ياوخيتي شن بنشكيلك لبنشكيلك
ليلى: فضفضي لفي خاطرك قاعدتلك للصبح اليوم
نجاح : أنا مش قاهرني طلاقي أبداً نكون مطلقة ولا نكون على ذمة واحد مش مقدرني ولا عارف قيمتي اللي حاقرني في قلبي صغاري وبس هذا بوهم سندهم ينشد بيه الظهر قبل مايروح قاللهم مادام اخترتوا أمكم ماتجوش يوم وتقولوا وين بوي هذي كلمة تنقال لصغار في عمرهم حتى من محمد لفاهم وواعي مش حيتحملها الكلمة ولا نرضاهله
ليلى : الله غالب ياوخيتي مكتوبلنا وحدة منا تعيش هكي ظروف
نجاح: عندنا أيام في هالدنيا بنشوفوهن سوى رضينا أو مارضيناش الله غالب وأنا راضية بقدري وكل شي ليه حكمة من عند ربي ويكونوا صغاري خير ليا في محياي وبعد مماتي
ليلى: ان شاء الله يكونوا صغارك سند ليك لأنه مش حينسوك في يوم هذا لأنك وقفتي على رجليك مشيتي للتعب بعد ماكنتي متريحة بس عشان مش حينسوا خدمتك مش حينسوا إصرار عالقراية مش حينسوا تعلمك للسواقة عشان ترفعي فيهم وتجيبي مش حينسوا قرش صرفتيه عليهم
نجاح: لو نعيش في العمر مية مرة ويكون هذا حالي ندير زي مادرت وأكثر لوقفوا لبوهم اليوم ومارضوش يمشوا معاه الديريلهم كل شي
أنت تقرأ
لعبة الزمن
ChickLitرواية ليبية خيالية فيها معظم الأحداث من الواقع الليبي تحكي عن زوجة حضرت جميع أنواع القدر وأقساه من لعبة الزمن
