ادمنت حدة عينيه

بارت 19

زعلان لو مشتاگلك بيش ابدي
بفراگ وجهك لو معزتك عندي
يوميه اطلع صورتك واصفن بيك
ومن وجهك اتخيل ملامح ولدي

*****************************

فاتنه ـ من سمعت اسمي هيج عرفت بي ضايج كلش گمت گلت
صباح الخير
ما رد انقهرت كلش غسلت وبدلت جينز وقميص وطلعت وياه
اخذني بدون صوت حتى ما قبل ياكل اي شي من اللي حضرته وصلني لبيت جدو وطلع
مو مثل كل مره يحضني ويبوسني دخلت والدمعه بعيني اول ما گالت بيبي شبيج انفجرت بالبجي

ام سليم ـ ياااا فتونه شبيج شصاير
فاتنه ـ بيبي اني حقيره والله حقيره يفكر بيه واني قهرته وضربته والله ما استاهل منه كل هذا الدلال والحب اني كلبه والله تدرين اتمنى الموت ولا اذيته
ام سليم ـ لا يوم اسم الله عليكم تعالي ارتاحي بعدين نحجي تعالي
فاتنه ـ اريد انام بحضنج فدوه
ام سليم ـ تعالي يوم تعالي

فاتنه ـ اخذتني للغرفه ومددت رجليهه خليت راسي على رجليهه وصارت تمسد على راسي واني كلش مقهوره بجيت لما تعبت ونمت

نائل ـ ادري جاي اقهرهه بس ما ادري ليش هيج جاي اسوي وياهه گلبي حيل شايل عليهه گوه اشتغل
حتى الولد انتبهوا علي مو مثل كل يوم اني مبتعد تقريبا ما اتعمق بالعلاقات حتى لا اتأذى
كل يوم هيج وقت اسمع صوتهه هسه ماكو گعدت على جهه طلعت الصور مالتهه شلون مخبله ضحكت وسديت التلفون وگمت اكمل شغل

ما اريد أأثر على شغلي واني اسبوع الجاي راح اخذ استراحه حتى اخذهه للبنان
واذا ما اكدولي نجاح العمليه 100 % مستحيل ابقيهه گبل اطلعهه للهند لنفس الدكتور مالتهه القديم
لليل كملت كلشي وصلت اريد اخذهه دگيت الجرس طلع جدهه

السلام عليكم عمي
ابو سليم ـ عليكم السلام هلا وليدي اتفضل
نائل ـ لا عمي والله تعبان خلي تجي فاتنه حتى نرجع
ابو سليم ـ والله ما ادري شنو اگول بس هاي معانده لا تاكل ولا تشرب بس تبجي شصاير بويه احجيلي
نائل ـ ما اگدر عمي اعذرني وين هيه
ابو سليم ـ هناك بذيج الغرفه
نائل ـ رحت دخلت للغرفه وهيه بس تشهك جريت نفس
فاتنه يله گومي نرجع

فاتنه ـ كلش مقهوره من نفسي وگلبي حيل يوجعني اخذت علاجي مرتين وما فاد حتى اختنكت واخذت الجهاز وما فاد
كلش اذيته شلون هيج سويت سمعت صوته بس من يگول فاتنه يعني بعده ضايج ما رديت

نائل ـ فاتنه گومي يله نرجع
فاتنه ـ لا رد
نائل ـ اعرف بيج ما نايمه گومي
فاتنه ـ لا رد
نائل ـ استغفر الله ربي واتوب اليه
رحت گعدت يمهه
فيلون گومي

فاتنه ـ درت وجهي عليه وبجيت حيل
ليش نائل ليش يجي من گلبك تخليني مقهوره ها اليوم لا سمعت صوتك ولا تحجي وياي ترا والله اموت اني لا تسوي هيج بيه فدوه
نائل ـ يله كافي نروح لبيتنه

فاتنه ـ رفعت راسي مسحت وجهي
اي نروح
گمت اريد اوگف راسي حيل يوجعني اول ما وگفت اختل توازني ردت اوگع لزمني
نائل ـ الله الله شبيج
فاتنه ـ ماكو شي بس دايخه شوي
نائل ـ گومي خليني اخذج للمستشفى
فاتنه ـ ما يحتاج اخذني للبيت
احجي واحس گلبي جاي ينقبض بقوه لزمت گلبي حيل
نائل گلبي يوجعني فدوه الحگلي