ادمنت حدة عينيه

بارت 34

اشتهيت انشاف بعيونك
مليت الوجوه المو مثل لونك
انه لو بيك لو يمك هناك ارتاح
يا عافيتي اربعينك ما يشبهونك

******************************

عمر ـ شبيك نائل
نائل ـ ماكو شي هيج
عمر ـ حاس بيك والله صعب تشوف محبوبك گدامك يقاوم المرض وانته ما بيدك تسويله شي
نائل ـ وانته شنو معرفك بهيج شي
شفته مد ايديه ورا ظهره
عمر ـ محسوبك حبيبة عمري ماتت بين ايدي

نائل ـ شنوووو صدك عود
عمر ـ اي والله وبعد هم الشكل سبحان الله فتون نفس الملامح ونفس الاسلوب ما تشوف روحي رفت الهه
صرت اراقب ادق تفاصيلهه وروحهه المرحه صرت اتمنى اسمع صوتهه
نائل ـ سبحان الله الله يصبرك بس اللي سويته ويه فتون مو شي يستدعي انو تتطاول وياهه هالشكل

عمر ـ ردت بس احجي وياهه وروح عزيزة روحي بس هيه طلعت تركض ومن جريت ايدهه صارت على صدري
نائل ـ بس جان المفروض تحجي وياهه وتفهمهه انو هيه تشبه شخص عزيز عليك مو تستدعيهه بحجة درجاتهه ومستواهه
والاحسن لازم تبتعد اكثر لان القرب يولد القهر وانته تعرف بيهه متزوجه صح

مشينه وگعدنه بالحديقه
عمر ـ اي صح والله بس بعد صارت
نائل ـ بعد منا وهيج سيطر على نفسك حاول تبني حياتك الى متى تبقى هيج بدون زواج
عمر ـ ما اعرف والله بس ما الي نفس بالنسوان من بعدهه والله هاك شوف الخاص مالتي شگد ما ارد والله هيه ما حبتني لشكلي ولا لصيت اهلي

جنت صغير 17 سنه وحبيتهه 3 سنين يله تزوجنه من بعد عذاب 9 مرات يطلبهه الي واثق واهلهه ما يقبلون ما خلينه لا شيخ لا سيد ملينه كلش واهلي ملوا الا انه روحي صارت بيهه
ومن اشوف دمعتهه تنزل روحي تروح وياهه لما بيوم اجتني وگالت يردون يزوجونهه لابن خالهه گلبت الدنيا ساعتهه
وراح واثق وياي وشيوخ ومن ضمنهم شيخ عشيرتهم نخيناه وگوه يله وافقوا بيومهه الدنيا بكبرهه ما وسعت فرحتي سويناهه خطوبه وعرس باسبوع واحد

نائل ـ كمل كمل يله وامسح دموعك اعرف العشك وشلعان گلبه احجي
عمر ـ اي وبعد زواجنه بشهر طلعت حامل ويا فرحتنه واثق ذبح الذبايح ووزعهه على الفقراء والمحتاجين بقت للشهر السادس وارتفع ضغطهه كلش وشكل وياهه صرع
نائل ـ لا حول ولا قوة الا بالله كمل

عمر ـ اي نقلناهه للمستشفى واسبوعين هيه تحت العنايه وسوولهه ولاده مبكره والطفل سقطته وتوفى بنفس الساعه
بقيت مگابلهه اسبوعين ما فارگتهه ساعه گد اغسل وارجع يمهه امي واخواني حجوا رادوا ما رديت عليهم عفت الجامعه لما كثرت غياباتي وامتحاناتي كلهه رسوب
واثق حاول يقدملي اجازه ورفضوهه وما اهتميت بقيت وياهه اعيش كل لحظه بلحظتهه لما بيوم اااخ يا ذاك اليوم

نائل ـ كافي اذا تتعب لا تحجي
احجي وياه وامسح بدموعه حضني وبجه بصوت عالي
عمر ـ نائل ماتت بين ايدي والله بقت تنازع بروحهه وعينهه بعيني لهسه اتذكر من لازمه ملابسي بكل قوتهه وعيونهه تتوسلني
نائل بقيت سنه كامله دمعتي ما نشفت والله ردتهم يدفنوني وياهه بس ما خلوني وصاروا يحجون علي