كتاب الأمل 💜
الجزء :4
بعد مدة تسمع صوت موطور جاي . دارو جيهتو كان الأب ديالها جاي على صونطروا(103) ديالو
وقف حداهم او نزل
اب أسماء(بأدب): سمحي لينا أأستادة عدبناك
الأستادة خديجة : ماشي مشكل
مشات الاستادة او أسماء هزات الجلابة لي كانت لابسة تحت منها سروال جينز او ركبات من ورا باها شادا فراسها حتى تحركو من تماا
بعد مدة كانو فمكان شاسع فيه عدة أراضي خاوية او ديور قلال مبنيين بالقزدير ، هاد المنطقة كانت البراهمة فمدينة سلا
كان فيها غير المنازل العشوائية مزال ماداخلش لبلان لهاد المنطقة ، كان لي شاري شي أرض باني فيها من الطوب او مسقفها بالقزدير او الميكة او عايشين فيها
تمشاو فهاديك الأرض المتربة مدة او باها موراها شاد موطورو جارو حينت ماغاديش يبغي يمشي ليه على التراب
حتى وصلو لوحدا من هادوك ديور العشوائية كان بابها من الخشب او مصبوغة بالجير الأبيض فوق الطوب مباشرة بلا مرطوب
دقو على الباب او بقاو واقيفين مدة طويلة حتى تفتح ، كانت الأم ديال أسماء هنية لابسة بيجامة او دايرا الخمار على وجهها
هنية : دخلو ، دخلو
دخل الأب ديال أسماء هو لول جار معاه موطورو حطو حدا الباب او دخلات من وراه اسماء لي سدات الباب ديال برا ،
ملين كدخلي مع الباب كتلقاي الكوزينة فالجنب هي الاولى كانت صغيرة مساحتها مكتعداش زوج ميترو على زوج ميترو
فيها ثلاجة صغيرة او بلاكار تحت منو طابلة على شكل بوطاجي من الخشب فوق منها فورنو او الشبكة ديال الماعن
من موراه كاين صالون لي كان مفرش بسدادر ثلاثة او عاد كان باب دخلاني فيه بيت نعاس مفروق بخامية فيه نامسية من جنب او الجنب لاخر فيه ماريو
حطات اسماء شكارتها فالبيت الآخر ديال النعاس
او رجعات عندهم الصالون
ياله جلسات او هي تخرج مها من الكوزينة كتمسح يديها فالفوطة
هنية : نوضي احبيبتي لديك الكوزينة طيبي الباك الما يغسل رجليه ، او طيبي معاك العشااا ، شفتك غير جيتي جلستي
ناضت اسماء من بلاصتها بلا نقاش ، تخطاتها او مشات الكوزينة
دير لي قالت ليها مهااا
طيبات الما او عطاتو الباباها يغسل رجليه او رجعات تاني الكوزينة باش تطيب العشا
08:00 مساءا
تحط العشا على الطابلة او ضارو عليه كياكلو
كان الصمت سيد الموقف كلشي كياكل
من بعد ماتعشاو هزات من قدامهم الماكلة رجعاتها الكوزينة او مسحات الطابلة .... غسلات الطبسيل عاد رجعات الصالون، لقات كلشي مشا البيت باش ينعس
دخلات عليهم هزات مانطة او رجعات الصالون قادات المخدة او حطات عاد المانطة ، مشات جيهة الضو طفاتو او بدات كتحاول تمشا او مادا يديها قدامهاا باش مضربش شي حاجة اولا تطيح
وصلات البلاصتها ، تخشات تحت الملاية او غمضات عينيها ، باش تستقبل الغد ان شاء الله
⚡ العودة للحاضر ⚡
سدات الكتاب او رجعاتو البلاصتو، بقات مدة كتشوف عاد وقفات تحركات برجليها لجهة السرير .... تكات عليه او ضارت جيهة الكوافوز شافت فالساعة .... كانت كتشير ل 01:25
أسماء : بففف فات الحال بزاف
غمضات عينيها باش دخل فسبات عميق
*يتبع
أنت تقرأ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
