كتاب الأمل 💜
الجزء 73
تسمع صوت تليفونها كيصوني ، شافت المتصل او طلعات عينيها فيهم بتوتر لقات كلشي مشغول بالهضرة او هي توقف من بلاصتها خارجة كتزرب فخطاويها ما وقفات حتى دخلات البيت ، طرقاتو او دوزات الخط او هي كتمشى مبعدة على الباب
فدوى: ألو مونى قلتي ليوم تجيبي ليا الغراض مالك تعطلتي
مونى: هانا فالطريق ، غير شوفي كيف الديري تلقاي ليا باش نعطيه ليك
فدوى : صافي ملين توصلي صوني عليا
قطعات الخط او بدات كتعض فضفارها او هي غاديا جاية وسط البيت او كتفكر لشي حيلة باش تخرج عندها ، حتى طاحت فكرة فبالها خلاتها تبتاسم ، خرجات من البيت او نزلات كتجري مع الدروج حتى وصلات التحت او تمشات الصالون ، دخلات عليهم او هوما كيهضرو
فدوى: عقاب بغيت نخرج واحد الساعة
عقاب طلع فيها عينو: لفين
فدوى: خاصني شي حاجة
عقاب: سيفطي الكارد
فدوى : لا لا بغيت نمشي راسي باش نجيب على دوقي ، حينت مكيجيبوش لي وصيت عليه كيف هو
عقاب رجع عينو قدامو: دي معاك شي واحد
فدوى ابتاسمات: غادي ندي معايا شي خدامة
عقاب هز براسو او هي خرجات من تما كطير نيشان الكوزينة ، عيطات لوحدا من الخدامات قالت ليها تبدل حوايجها باش تخرج معاها ، تسناتها حتى لبسات او خرجو من الباب اللور مشات الباركينغ هزات طنوبيل ركبات فيها او جنبها الخدامة ، او ضارت خارجة مع الطريق الباب لي تفتح ليها من طرف الكارد او ساقت حتى وصلات الآخر الشارع او فرانات كتسنى اتصال من مونى
مدة مكانتش طويلة بانت ليها سيارة سوداء من نوع داسيا او هي تكلاكسوني خلاتها توقف
فدوى شافت فالخدامة: خليك هنا
فتحات الباب او خرجات عاد خرجات عندها مونى فيديها بلاستيكة كحلة ، سلمات عليها او مداتها ليها
فدوى كاتشوف فديك الميكة: دابا هادي اشنو فيها
مونى شافت فالميكا لي فيديها: داكشي لي عطيتيني قرات عليه شي حاجة او رشات عليه شي ماء او عطاتني معاه شي بخور او شي جداول فالوراق قالت ليا ديهم حرقيهم او داك الرماد ديريه فالماكلة او لا الشراب ديال الراجل او انا حرقتو او جبت ليك غير الرماد حينت عارفاك ماعندك كي ديري تحرقي وسط القصر
فدوى هضرات مخرجة عينيها: اصاحبتي قلت ليك خدمي لمراتو ماشي ليه
مونى خنزرات فيها: ابنادما ياك بغيتيه مايبقاش يشوف فيها اولا يحمل الشعرة منها ، هادشي ايلا كلاه غادي ينفرها او انا متأكدة غادي تعجبك النتيجة
فدوى كاتشوف فديك الميكة: متأكدة أصاحبتي غادي غير يكرهها مايوقع ليه والو ، انا راه مشكلتي معاها مابغيتش نآديه
مونى بقلة حيلة: شوفي السيدة خدمتها پروفيسيونيل او عارفة اش كدير ، قالت ليك راه الشوفة ماغاديش يبقى يطلعها فيها او واخا يكون كيتسطى عليها غادي يكرهها فمرة
فدوى: او شحال باش تبان النتيجة
مونى: عطيه ليه او نهار اولا يوماين غادي تشوفي كلشي على عينيك او داوميه فينما يبان ليك بدا كيرجع كيف كان عطيه ليه حتى يطلقها او غادي تشكريني
فدوى تبسمات: لهلا يخطيك عليا والله ، كون ما انت كون راه باقيا مقاتلة معاها
مونى: انت لي عندي او محتاجاني مانقدرش نخليك فهاد الورطة
فدوى سلمات عليها بلاپيز : الله يسهل عليك ، شكراا بزاف
مونى : هانيا ، بسلامة
مشات مونى ركبات فطنوبيلتها او زادت او فدوى رجعات الطنوبيل حطات داكشي لور او تحركات مع الشارع تمشي تجيب شي حاجة باش ماتحصلش
*يتبع
أنت تقرأ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
