كتاب الأمل 💜
الجزء 96
مع وقت الظهر فالقصر ، داخل يوسف لابس جبادور كحلة او يديه فجياب السروال القندريسي لي لابس ، كيتنهد حتى بغا يدور مع الكولوار او هي تخرج فيه راضية مسبقة عكازها قدامها شافتو او هي تبتاسم
راضية: فين كنتي اولدي
يوسف توقف او وجه نظراتو ليها بهدوء: كنت فالكتاب الحاجة
راضية محافظة على ابتسامتها: ماشي بزاف عليك اولدي ، شوف شي واحد يمشي فبلاصتك
يوسف حرك راسو بنفي: ختي أسماء سلمات ليا خدمتها فيدي او ان شاء الله انا قايم بيها حتى ترجع
راضية : لي بغيتي اولدي انا خفت عليك غير من التعب ، الله يكون فعونك
يوسف حرك راسو: امين الحاجة
راضية هزات يديها طبطبات على كتفو برضى او تخطاتو غاديا جيهة الصالون او هو رجع كيتمشى فداك الكولوار لي كان طويل او فارغ ، بملامحو الهادئة حتى وصل لراس او ضار من جيهة الضوء حتى خرج فالجيهة اللورانية ديال القصر ، تمشى فاتجاه لاصال حتى دخل ليه او حط يديه على الجبادور كيسلت فيها حتى بانت ليه فدوى خارجة من الفيستيال لابسة كولون ديال السپور او ميني من الفوق فالرمادي او شعرها مجموع كوپ شوفال او على وجهها ابتسامة ، حدو شافها او هو يضور عينو جنب او طلق الجبادور لي كان كيحيد فيها او تكلم بهدوء
يوسف : شنو كديري هنا أمدام
فدوى تمشات جيهتو كتعوج حتى وقفات قدامو او هو قالب عينو كغظ من البصر او كيسمع الكلامها
فدوى: جيت ندير الرياضة عندك شي مشكل
يوسف تمشى خارج: نخلي ليك لاصال حتى تسالي او راجع
فدوى وقفاتو بكلامها: جيت عندك باش ادربني بنفسك
يوسف بلاما يضور: خدمتي مع الكارد ماشي معاك انت
تمشى تاني او هي تكلمات بصوت مرتافع: كنتي واحد الوقت كتبغيني او متشوق نكونو فدار وحدا شنو تبدل دابا حتى مابقيتيش باغي حتى طلع فيا عينيك
يوسف مزال كيتمشى كيشوف قدامو او تكلم بهدوء: وليتي رخيصة (ارررعد هههههههه)
خرج من تما ساد الباب ديال الزاج او هي بقات فبلاصتها كتغدد باغيا تبخخ الدم ، ولات كتشوف دابا لا ديدي لا حب الملوك ها عقاب تزوج عليها او جالس يتسارا مع مراتو مخليها فحال المنفية فهاد القصر حتى حد مامسوق ليها ، او يوسف حتى هو لي كانت باغيا تبني معاه حياتها مابقاش حامل الشوفة فيها او مالاقياش حتى كيفاش تصلح الأمور او هادشي لي مخليها باغيا الطرطق
فمكان آخر او غير فمدينة كازا نفسها ، داخل المول او بالضبط فأحد البوتيكات ديال الملابس الحجابية ، فرح واقف مطلعة عينيها فدوك العلاقات او كتشوف فالكساوي او الجلالب او العبايات لي معلقين او كتنهد على ملامحها الهدوء ، شافت جنبها او حركات يديها لموظفة تما لي جات عندها بسرعة او تكلمات
فرح كتشير بيديها: جبدي ديك الكسوة اختي ، بغيت الأبيض او الكحل (سكتات شوية او كملات) او دوك جوج كساوي لي جنب بعضهم حتى هوما جبديهم ليا ، اوووو ديك العباية ديال الصلاة حتى هي
الموظفة هزات براسها او بدات كتجبد ليها ، حتى جبدات كلشي ، شداتهم او مشات لاكيس خلصتهم او جمعوهم ليها عاد خرجات من المول ركبات فسيارتها او ديمارات الوجهة الفيلا ديالهم
مدة مكانتش طويلة سطاسيونات الطنوبيل فالداخل ديال الفيلا او هزات دوك الصاشيات فيديها او دخلات كتمشى بشوية عليها حتى بان ليها ماريا شادة فدراع خوها او نازلين من الدروج ، تقدمات جيهتهم او هو يوقفها رشيد خوها كيبتاسم
رشيد: ماقلتيش ليا بلي أسماء تزوجات
فرح و أخيرا بانت الإبتسامة على وجهها: مجاتش الفرصة او انت عاد جيتي البارح ماجاش حديث يخليني نجبد الموضوع
رشيد هز براسو: مبروك عليها ، من البارح انا كنصوني عليها تليفونها طافي ، كانت وصاتني ملين كنت غادي باش نجيب ليها معايا ملحف او جبتو ليها او صونيت باش نقولها تجي تاخدو ، ولكن جاوبني راجلها او من بعد تقطع الخط ماعرفتش علاش (ابتاسم) لمهم ايلا هضرتي معاها قولها تجي تديه اولا ديه ليها انت بيدك
فرح هزات براسها: هي دابا مسافرة خلي حتى تجي او نديه ليها
رشيد هز براسو او تحرك هو او ماريا او هي طلعات لبيتها جبدات دوك الكساوي حاطاهم فوق النموسية او كتشوف فيهم عينيها مبشرين
فرح: غادي يجيني هادشي زوين (ابتاسمات) يا ربي تجمعي بيني او بينو فالحلال
حالتك صعيبة اختي فرح 😂😂 شتو نوات دير الحجاب غير باش يبغيها
أنت تقرأ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
