كتاب الأمل 💜
الجزء 89
وصلو او نزلات هي اللولة كتمشى او هو موراها بخطواتو المتوازنة او كيشوف فمشيتها لي كان ظاهر فيها العيى حينت وقفات المدة طويلة
طلعو السويت او غير دخلات حيدات داك الطالو لي فرجليها كتنهد براحة او هو جنبها حيد ديك الجاكيط او نزل السروال بقى غير بالبوكسور ، جبد شورط لبسو او بقى من لفوق عريان او تمشى جيهة الفوطويات هز الپيسي او جلس او هي بدلات حوايجها لبسات كسيوة فالأسود قصيرة فوق الركبة او مشات جبدات مشطة كتمشط فشعرها حتى سمعاتو تكلم
عقاب: أسمااء
أسماء ضورات غير راسها : نعام
عقاب كيشوف فالپيسي : عندك مع الفرنسية
أسماء باستغراب: اه
عقاب ضور ليها راسو : اجي عندي
أسماء حطات المشطة او وقفات كتمشى عندو او جلسات جنبو كتشوف فيه
عقاب كيشوف فالپيسي: عندي هنا شي ضواسا خاص يترجمو او انا ماعنديش الوقت (شاف فيها) او حتى ايلا سيفطتهم يترجموهم ماغاديش يوصلوني غدا ، واش ترجميهم انت
أسماء هزات براسها : واخا
عقاب وقف من بلاصتو او مشا البلاكار جبد منو پيسي آخر او جا جيهتها جلس جنبها او قاد الملف لي تكتب فيه عاد مد ليها الپيسي
عقاب: ضابطة الفرنسية مزيان بعدا
أسماء طلعات فيه حاجبها: من نيتك كتقول هاد الهضرة
عقاب هز براسو : مانعرف (مد ليها ملف)
او هي شداتو بدات كتقرا او ترجم بتركيز تام او عقاب جنبها قايم بنفس العمل او كل مرة يتنهد بعصبية ساخط على الوضعية مكيحملش الخدمة الناقصة ، حتى ضربات 12:00 عاد حطات أسماء الپيسي على الطابلة او هي كتحرك فيديها بتعب او عقاب ضور راسو كيشوف فيها باستغراب
عقاب: ساليتي
أسماء شافت فيه: Oui , j'ai fini (اه، ساليت)
عقاب هز حاجبو او هز البيسي من على الطابلة او حط لي كان فيديه او بدى كيقرى مامتيقش بلي سالات قبل منو ، قرى شوية فالبداية او شوية فالوسط او هو يحبس او شاف فيها مزال ماتاق
عقاب: متأكدة هادشي درتيه راسك
أسماء ناضت من بلاصتها او تكلمات بافتخار : Oui,mon mari (نعم ، زوجي) (هزات فيه حاجبها ) ياكما كان يحساب ليك جاية من عصر الجاهلية
عقاب باقي مامصدقش بلي ترجماتو بهاد السرعة : اجي كملي هادشي لي بقى ليا
أسماء رجعات جلسات او جرات البيسي من يدو ، او هو وراها فين وصل او بدات كتقرى او تكتب او هو متبع ليها العين كيتسناها تغلط باش يضرب ليها خدمتها فالزيرو ساعة والو الحرف هو الأخير مانساتوش حتى كملات او رجعات حطاتو او ناضت مشات السرير او هو متبع ليها العين حتى دخلات فالفراش او رجع كيشوف قدامو ، دار حفض لدوك الملفات فالپيسي او سدو او ناض دخل جنبها او هي ملين حسات بيه جنبها قربات منو او عنقاتو او تكلمات او هي مغمضة عينيها
أسماء: بغيت نسولك
عقاب : اهم سولي
أسماء :تقدر تفكر شي نهار الطلق فدوى
عقاب نزل ليها عينو اش هاد الأسئلة كتسول هاد السيدة او تكلم بهدوء: الحد الآن مكاينش شي سبب يخليني نفكر فالموضوع
أسماء فتحات عينيها كتشوف فيه عينيها فعينيه: ايلا قلت ليك بلي انا كيبقى فيا الحال ملين كنشوفك معاها او ملين كتبات معاها فنفس البيت مكنعسش او شحال من مرة كنبدى نفكر كيفاش نجيبك عندي ، هادشي مايخليكش تحن فيا
عقاب حدو كيشوف فيها اش غادي يقول ليها ، بلي فدوى مراتو الأولى او كيشوف راسو ايلا طلقها بلا سبب غادي يتسمى ظلمها ، او ثاني حاجة هو أصلا واخا معاها فنفس البيت من بعد ماتزوج أسماء قرب منها غير مرة وحدا حينت هي قولباتو ماشي حبا فيها ، اه هو مابقاش باغي فدوى او لاقي راحتو مع أسماء اكثر او شي مرات كيقول كون جات أسماء قبل فدوى كانت غادي تكون الحياة زوينة ، ولكن مع الأسف جات فضروف أخرى او هو مالاقيش حل او واخا كيحاول يعدل كيلقى راسو مع أسماء او ناسي فدوى او إحساسو اتجاه أسماء ماشي إحساس أنها مجرد زوجة ولكن هي شي حاجة اكثر او عندو مشاعر ليها مختالفة مي مزال ماظاهراش شنو هي
*يتبع
أنت تقرأ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
