كتاب الأمل 💜
الجزء 38
خرجات الطنوبيل من القصر او غادية جنب السور ، عقاب كيتكايس فالطريق ماعندوش مع السرعة، او أسماء تكات على الزاج كطل على الطريق او عقلها مشغول او قلبها مقبوط ملين فاقت فالصباح بحال ايلا حاسة بشي حاجة غادي توقع او تقلب الموازين ، بينما عقاب جنبها صايك او مركز مع الطريق مرات قليلة فاش كيشوف فيها كيلقاها كتسوف من الزاج ساهية، كيعاود يرجع عينو مع الطريق ، حتى تسمع صوت تليفون كيصوني خلاها تقفز من مكانها حينت كانت شاردة ، شافت فعقاب لي مدار حتى ردة فعل او شدات صاكها جبدات منو التليفون كتشوف رقم مداخلش عندها الكونطاك ، دوزات الخط او حطاتو على ودنها
أسماء: ألو ، السلام عليكم
صوت رجولي : عليكم السلام
أسماء ملين سمعات الصوت حسات بقلبها وقف او نفسها مابقاتش كطلع ، تكلمات شفافيها كيرجفو باغيا تنفي الفكرة لي جات فراسها : شكون معايا
............: باك
أسماء حطات يديها على فمها حابسة شهقتها او هضرات كتكابر باش دموعها ماينزلوش او هضرات بصوت مخنوق: ملين جاك رقمي
هضر بصوت غليض خلا يديها بدات كترعد :هادشي لي هامك وجدي راسك هاد السيمانة هاني فكازا ملين نصوني عليك جاوبيني
أسماء صافي مابقاتش قادرة تحبس فدموعها ، نزلو كيجريو او حيدات يديها من فمها : شنو باغي من عندي
............: ملين نجي غادي تعرفي ، ايام الحرية سالات هاني جاي نحدو هادشي (قطع الخط)
او هي حيدات تليفون من ودنها كتشوف قدامها او عينيها مغشيين بالدموع بينما عقاب لي غير شافها كتبكي وقف الطنوبيل او بدى كيشوف فيها كيحاول يفهم أش وقع ليها
عقاب بتساؤل: واقع شي مشكل
أسماء شافت فيه دموعها مزال نازلين ،او رجعات شافت قدامها: كننشك واش ارتاكبت شي معصية او ربي دابا كيجازيني (جرات كلينيكس بدات كتمسح فدموعها ) تقدر تحرك(شافت فيه ) سمح ليا
عقاب ماجاوبهاش حدو تنهد او عاود ديمارا الطنوبيل مكسيري حتى خرج الشاريع او هي تشوف فيه تاني
أسماء: باراك عليك
عقاب كيشوف فطريق :قولي فين غاديا نوصلك
أسماء شافت فيه : مانعدبكش
عقاب تنهد او شاف فيها هاز حاجبو: فين غاديا
أسماء: الكتاب ، حطني غير حدا الإقامة
عقاب هز براسو او شد طريق الإقامة حطها فراس الشارع او هي نزلات شكراتو او هو عاود ديمارا الطنوبيل تحرك من تما ، تمشات فالطريق جيهة الكتاب كتنهد او فينما تجي فبالها الأبيل كتحس بقلبها غادي يسكت ، فتحات الكتاب او دخلات خدامة مع العيالات بلا خاطر كتسنى غير يوصل لوقت تخرج فحالها او الوقت شحال داز طويل عليها ، حتى وصلات ل 11 خرجات او عاود طلعات الشاريع شدات طاكسي، لوجهة الفيلا ديال عائلة فرح ، بعد مدة وقف الطاكسي قريب من الحي ديالهم او نزلات كتمشى فداك الشاعر بلا عقل حتى وصلات الفيلا صونات او بقات واقفة كتسنى حتى فتحات ليها فرح شافتها او هي تبتاسم سلمات عليها بلابيز او هضرات : مرحبا بيك ، صافا
أسماء تمات داخلة : ماصافا والو
فرح جمعات الضحكة او سدات الباب عاد تبعتها : أش واقع
أسماء ضارت شافت فيها او شدات من دراعها غاديا جيهة الدروج: خالتي ثرية مكيناش اليوم
فرح بنفي: لا ليوم مشات الجمعية تشوف الأمور تما او أنا خديت روپو
*يتبع
أنت تقرأ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
