كتاب الأمل 💜
الجزء 76
أسماء بقات غير كتشوف فيه مجاوباتوش او هو عاود تكلم هاز حاجبو : بقا ليا غير نبدى نراضيك اأسماء
أسماء شافت فيه: صافي غير نزل بغيت نجرب طنوبيلتي اليوم نمشي بيها الكتاب
عقاب هز براسو او نزل من الطنوبيل او شاف فالكارد داير ليهم حركة باش يفتحو الباب او هي نزلات الزاج وقفاتو
أسماء: قول لشي واحد يجيب ليا صاكي
عقاب شاف فيها او رجع تمشى بلما يجاوبها ، بعد مدة جات عندها الخدامة فيديها صاكها مداتو ليها او هي ديمارات خارجة من القصر
⬅️⬅️⬅️⬅️ بعد ثلاث أيام ⬅️⬅️⬅️⬅️
أسماء فجناحها جالسة على السرير او جنبها مريم كتشوف فيها كيف كتحرك فرجليها بتوتر او الدموع واحلين فشفارها
أسماء صوتها كيطلع باح حينت حابسة البكية : ول البارح كان خاص يكون عندي او ماجاش ، او ليوم هانتي كتشوفي 12:00 ديال الليل او مزال ماطل عليا ، زيد عليها حتى الفطور هو اللخر مابقاش كياكلو معانا ، وجهو مابقاش كيتلاقا مع وجهي
مريم كطبطب عليها او كتحاول تواسيها او تهدنها : غادي يكون غير مشغول ابنتي او مالقاش الوقت يجلس معاك
أسماء حركات راسها بالنفي او دموعها نزلو مسرسبين: شي حاجة اخرى مخلياه مبعد عليا (طلعات فيها عينيها مدمعين) ياكما يكون مل مني او مابقاش باغيني
مريم بقات فيها حسات بقلبها كيتقطع عليها او هي كتشوفها كتبكي او ترجف بهاد الطريقة: لا ابنتي شنو كتقولي (بدات كتمسح ليها فدموعها) خلي حتى لغدا او تلقاي ليه قولو واش شاغلاك عليا شي حاجة (ابتاسمات ليها كطمنها) ماغادي يكون والو
أسماء بقات غير كتشوف فيها او دموعها نازلين مابغاوش يحبسو كتحس بقلبها بارك عليه شي واحد ، من جيهة توحشاتو من جيهة ثانية الغيرة لي كتاكل او هي عارفة كيبات جنب فدوى هاد الأيام كتحس براسها غادي تسطى ، هاد الثلث أيام لي مشافتوش فيهم خلاها فحال الحنش لي مقطوع ليه راسو مالقات جهد ، بينما مريم كتشوف فيها بقات فيها بزاف ، حتى هي ملاحظة ولدها مغير او غير على نقشة كانت كتقول شي مشكل فالخدمة ، ولكن ملين وصل الأمر لأنه يهمل أسماء هنا استغربات
مريم : تكاي ابنتي نعسي ، او يصبح او يفتح
أسماء دخلات ففراشها او مريم ناضت كتقاد عليها الغطا او هي كتحسر على حالها ، طفات الضوء خلات غير الفيوز شاعل او خرجات سادة موراها الباب ، بينما أسماء بقات كتشوف فداك الظلام او عينيها كيقطرو بالدموع ، ماقادراش تصبر حينت بصح بغاتو او هاد الإهمال ديالو ليها خلى قلبها كيتقطع او ماقادراش تصبر على لي واقع ، بداو كيدوزو قدام عينيها لقطات معاه كخليوها تزيد تزير على الغطاء او دموعها كيزيدو ينزلو اكثر ،
أسماء بصوت هامس او بترجي صوتها بالكاد كيخرج من حلقها : اللهم يا فارج الهم ، و كاشف الغم ،فرج همي و يسر أمري ، و ارحم ضعفي وقلة حيلتي ،و ارزقني من حيث لا أحتسب
كتنطق فالدعاء او قلبها كتحس بيه غادي يوقف او مزير عليها بزاف لدرجة ماقنعاتش من البكى ، بدات كتقرى فآية الكرسي فخاطرها او هي مكمشة عينيها كتحاول تحبس دموعها
نعسات مخلية خطوط الدموع على خدودها لي تزنگو او رجفة شفايفها لي طيباتها بالعضان بقات ملاحقاها وسط نومها ، او مرة مرة تقفز بشي شهقة حتى تسمع أذان الفجر خلاها تفتح عينيها او تنوض من سريرها بملامح ممحية او باين الحزن او الإرهاق فعينيها ، مشات الدوش توضات او خرجات لبسات عبايتها او حطات صلايتها كتصلي او فكل سجدة كتبكي ، او تدعي ربها ايلا كان حبها ليه عندو ضريبة لي هي الإهمال من طرفو ، غير يدي روحها حينت ماقدراتش تصبر حتى يوماين فما بالك بهادشي ايلا طال مدة طويلة
*يتبع
أنت تقرأ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
