كتاب الأمل💜
الجزء 65
فاقت قبل الفجر اغتاسلات من الحيض اللي لقاتها سالات
كانت لابسة عبايتها او ساجدة على صلايتها لله عز وجل، او صوت تنخسيسها كيتسمع فالجناح مهموس ، ناضت من السجدة او الدموع باقين واحلين فشفارها او عاود سجدات تاني كتبكي او تناجي ربها
من بعدما سالات صلاتها جمعات الصلاية او هزات المصحف من على الكوافوز او توجهات البالكو لي كان فيه كرسي ، جلسات عليه او طلعات عينيها كتشوف فمنظر شروق الشمس بتأمل ، الشي لي خلاها تفكر أيامها فالشقة ديالها ، كانت كتجلس بزاف فالبالكو او هي كدعي ربي ييسر طريقها ، فحال ايلا كانت كتحس بلي من البالكو الله اقرب ليها من داخل الغرفة ، زائد داك التأمل فخلق الله كان كيخليها اتخشع فالدعاء كثر
نزلات عينيها المصحف لي بين يديها او فتحاتو او هي كتكلم بهمس شديد ماباغياش تزعج عقاب فنومو : اللهم لك الحمد ، لا إله إلا أنت الحنان المنان، بديع السماوات و الأرض ، ذو الجلال و الإكرام، برحمتك يا أرحم الراحمين ، بسم الله أصبحنا و أمسينا ، أشهد أن لا إله إلا الله و أن محمد رسول الله ، و أن الجنة حق و النار حق ، و أن الساعة آتية لا ريب فيها ، و أن الله يبعث من في القبور ، الحمد لله الذي لا يرجي إلا فضله ، ولا رازق غيره ، الله أكبر ليس كمثله شئ في الأرض و لا في السماء و هو السميع البصير ، اللهم إني أسألك في صلاتي و دعائي بركة تطهر بها قلبي ، و تكشف بها كربي و تغفر بها ذنبي و تصلح بها أمري و تغني بها فقري و تذهب بها شري ، و تكشف بها همي و غمي ، أمين ياا رب العالمين
جبدات سورة البقرة او بدات فتلاوتها بتأني ، بدون كلل او ملل حتى استاقرات الشمس فالسماء او علنات على طلوع الصبح او تسمع أذان الصبح فالأذن ديالها خلاها تنطق صدق الله العظيم او تنوض من مكانها مرجعة القرءان البلاصتو او رجعات تاني صلات الصبح ، سالات او بغات تجمع الصلاية او هي تسمع عقاب كيدوي
عقاب: غير خليها انا غادي نصلي
أسماء شافت جيهتو او هزات براسها او هو مشى لدوش توضى او خرج صلى ، عاد لبس حوايجو او شاف فيها كانت جالسة على السرير باين فيها التوتر
عقاب: ياله
أسماء وقفات من بلاصتها او تمشات جيهتو او هو تما خارج او هي جنبو ، غير وصلو الدروج او هو يتفتح الباب ديال الجناح لي فيه فدوى او خرجات راسها كطل حتى بانو ليها اختفاو من أنظارها عاد دورات عينيها على الكولوار كتأكد بلي مكاين حتى شي واحد ، او هي تسد باب جناحها بشوية او تمشات بواحد صندالة بلا گومة باش مايتسمعش صوت خطواتها ، دخلات الجناح بخطوات تقال او سدات موراها الباب عاد تمشات الحمام مباشرة ، بانت ليها السلة ديال الحوايج قلبات وسطها كتلقى حوايج عقاب او أسماء بقشات بيديها حتى هزات ملابس داخلية ديالها ،هزات القميجة لي لابسة او دارت داكشي فالسمطة ديال السروال مخبياه عاد خرجات بنفس الطريقة كيف دخلات
رجعات الجناح او هزات تليفونها صونات على مونى كتعلمها باش تجي تعطيها لي وصات عليه
*يتبع
أنت تقرأ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
