كتاب الأمل 💜
الجزء 68
حطها على السرير او بدا كيحيد ليا فطالون لي فرجليها او هو كيتنهد ، من بعد عاد داز حيد ليها شال لي فوق راسها او غطاها ، تمشى خارج من الجناح او مشا الجناح لي فيه فدوى ، غير فتح الباب او هي ضور عندو بسرعة او دارت يديها موراها فحال ايلا مخبية شي حاجة
عقاب هز حاجبو : اش واقع
فدوى ابتاسمات ابتسامة صفرة: ا والو غير كنت كنهضر مع صاحبتي او ملين دخلتي على غفلة خلعتيني (جبدات تليفون من موراها كتوريه ليه )
هو حدو شاف فيها بنص عين ، بانت ليه ماشي تالهيه ، هز الپيسي ديالو او تمشى خارج ، غير سد الباب او هي تنهد بصوت مسموع ، فحال ايلا حمل او تحيد على كتافها
فدوى: مالو مامشاش الخدمة اليوم
عند عقاب لي رجع لعند أسماء حط البيسي على الفوطوي او مشا بدل حوايجو لبس ملابس ديال الدار او مشى الفوطوي قدام أسماء جلس او شد البيسي خدام فيه
بعد مدة كتجاوز ساعتاين او هو فبلاصتو ماتحركش بمرة ، أسماء بدات كتفتح عينيها كتشوف فالغرفة باستغراب حينت آخر حاجة بقات فذاكرتها أنها كانت فالصالون مع باها او عقاب ، ناضت جالسة او شافت قدامها كيبان ليها عقاب غايص فخدمتو ، حطات رجليها على الأرضية او وقفات كتمشى حفيانة مع ذلك صوت خطاويها وصل لعقاب خلاه يطلع فيها عينو او هضر : فين غاديا
أسماء شافت فيه: سمح ليا برزطتك كنت باغيا نزل التحت بغيت ناكل
عقاب : جلسي انا نوصيهم يجيبو ليك غداك
أسماء هزات براسها او تمشات جيهتو حتى جلسات جنبو فالفوطوي او هو هز الفيكس كيوصي الخدامات او رجع شاف فيها لقاها مترقباه بعينيها
عقاب هز حاجبو : مالك
أسماء ابتاسمات: والو
هو رجع عينو الپيسي او تكلم : اش بان ليك فشي عطلة
أسماء باستغراب: فحالاش
عقاب كيشوف فالپيسي: ماعرفتش شي بلاصة باغيا تمشي ليها
أسماء عضات شفتها التحتانية : الصراحة كنت باغيا نمشي لشي إسطبل او توحشت الركوب على الخيل
عقاب شاف فيها : طلبتيها رخيصة انتغداو او نمشيو
أسماء بحماس : بصح
عقاب هز حاجبو بمعنى من نيتك او هي طارت عليه باستو من حناكو او ناضت كتنقز الدرسينغ مخلياه غير كيشوف عاد كانت قبل ساعات كتبكي اش وقع دابا ، الميزاج ديالها كيتقلب فساعتو فحال الطقس خلاه مستغرب من هاد الانسانة ، رجع عينو البيسي او بعد مدة قصيرة خرجات عندو لابسة عباية فالأسود او وقفات قدامو او هو طلع فيها عينو عاد تكلمات بابتسامة
أسماء بتساؤل: زوينة
عقاب طلعها او نزلها او ابتاسم جنب: كتهضري على العباية اولا عليك
أسماء شافت فراسها : قصدت واش العباية جات عليا زوينة
عقاب رجع عينو البيسي: كلشي كيجيك زوين
أسماء ابتسامتها زادت عراضت او جلسات جنبو لاسقة عليه او بدات طل على داكشي لي فالپيسي كان كيقرى ليزيميل لي عندو حتى حس بنفسها كضرب فحنكو او هو يشوف فيها
عقاب هاز حاجبو : خليني نركز
أسماء شافت فيه: غا ركز خليني نقرى معاك او نفهم هاد الخدمة عندك
عقاب تنهد غادي يهضر او هو يتسمع الدقان فالباب: نوضي حلي الباب راه جابو الغدا
*يتبع
أنت تقرأ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
