ليلة من العمر

البارت الأول

تعيش فترات وايام يصير كل ما تتمناه انو تلمس وتحصل شي حقيقي ،
حقيقي ومطمئن من غير أي خوف وأي سؤال وحيرة تحتله
من غير حذر منك وانو لا تخاف تتقرب ،
جزء صافي يحسسك بأمان كلما اشتد بيك الخوف من كلشي تطمئن بفكرة وجوده الحقيقية وآلامنا ،
وعزائي لك لو انكسر أمانك من أكثر مكان معتبرة أمان ..

——————-——————————

-مامااا بيلساان ..تعالي
بيلسان:- هاا ماما
-تعالي حبيبة بس وصلي هاي لبيت ابو غسان
جنت كاعدة داللعب ويه أختي نورهان ذبيت اللعبة وكمت رحت للمطبخ
بيلسان:-مامااا خلي نورهان تروح
-لا حبيبي انتي الجبيرة مايصير
بيلسان:-انتو مو دكولون نحنا توأم شون انا الجبيرة يعني اجينا بنفس اليوم
-اي تمام بس انا هنا اقصد الكبر بالعقل مو بالعمر
بيلسان:-يعني انا اذكى من نورهان
نداريت على نورهان جانت واكفه بباب المطبخ وعيبتلها
تحولت تعابير وجهه وصارت تريد تبچي ..صاحت بيه أمي
-اهووووو بيلسان وتالي وياج بچيتي اختج همين ..يلا شو روحي انطي هالصحن عاد بسرعة
رحت اخذته بضوجة وطلعت من ضوجتي عالقصد لبست نعال نورهان وطلعت
يعني شدعوة هلكد يحبوها ويخافون عليها من الريشة بينما انا طز بيه ولا يهتمولي ..مو بس هي صغيرة
انا هم صغيرة
انا هم بنتهم
اصلا ثنينا عمرنا ثمان سنوات بعد !...
امشي واحجي ويه روحي من العصبية
بيت ابو غسان يصير يم بيتنا من جهة اليمين بس مو طبك حايط عالحايط ويانة لأن جان اكو چولة أو مثل ساحة مالسيارات صغيرة فاصلة بيننا بس هما الوحيدين جيرانة وقراب علينا من المنطقة
دكيت الباب طلعلي أبنهم الصغير
انطيته الصحن وقبل لا اروح شافتني امهم من الحوش صاحت
ام غسان:-بيلسان هلا خاله تعال حبيبتي دخلي
بيلسان:-لا خالة بس ماما دزتني اجيبلكم الصحن
ام غسان:-يولي تعالي دخلي دقيقة لحد ما اخليلكم سويت شون برياني بادري امج تحبها ..تعالي تعالي ويه الجهال لحد ما اكمله
ابتسمت ودخلت للصالة
صار بوجهي ولد كاعد ويه ابنهم الجبير محمد والجهال بالكاع فارشين الالعاب وكاعدين
محمد:-هلو بيلسان شلونج
بيلسان:-زينة
حجيتها وكعدت يم الجهال لأن اصلا جانو اصدقائي بالمنطقة دائما اكون وياهم مع العلم اصغر مني هما
كاعدة وياهم ومستحية من هذا الولد لان ماعرفه واول مره اشوفة
محمد كام مادري وين راح
بمسافة قريبة من هالولد تقرب يمي انا جنت منزله راسي
قرب ايده وكرصني من خدي وگال
-انتي شسمج؟
جاوبت من غير ما اباوعله :-بيلسان
اوس:-بيا صف؟
بيلسان:-أول
اوس:-اممم شكد عمرج
انداريت عليه وسويتله باصابيعي ثمان سنين ورفعته كدام وجهه
اوس:-لعد المفروض بالثاني
بيلسان:-اي مو رسبت وبابا خلاني ابقى بالاول
اوس:-لازم كسلانة ليش رسبتي
تعدلت وكملت حجيت بانفعال :-لا والله بس هايه الحقيرة ست اسماء ماتحبني لان ضربت ابنها الخبيث كسر قلم أختي
ضحكت وگال:- عفية عليج لعد
بيلسان:-انت بيا صف؟
اوس:-اني بالثالث متوسط بس ماراسب ابد
بيلسان:-يعني اكبر مني ومن اختي نورهان
هزلي راسه بمعنى أي
طب محمد وگله:- يلا اوس خلي نروح للدورة
طلعوا وبنفس الوقت صاحتني أم غسان رحت اخذت الصحن ورجعت لبيتنا ...
وره ثلاث أيام هيج
رحت العصر للدكان اللي براس المنطقة ماما وصتني على غراض بحكم ماعندي أخ بس أنا واختي نورهان وبابا يتأخر بالشغل وأمي مو من النوع اللي تطلع من البيت أبد فـ جنت أنا اللي اقضي هالشغلات
شفت نفس الولد اللي شفته ببيت أم غسان
ابتسملي وانا هم ابتسمتله
جبت الغراض وانطيت الفلوس وأنا وداطلع صاحني
اوس:-اوكفي
انداريت عليه تقرب وانطاني نستله
اوس:-هاي الج
انشك حلكي من الابتسامة واستحيت اخذتها
گتله:-شكرا
وراسا طلعت ركض وفتحتها بالطريق واكلتها قبل ماتشوفها نورهان وتبچي ..