ليلة من العمر

البارت الثاني عشر

اسيا:- خلصي وجدج يريدج بالصالة
هزيت براسي:- اي حاضر
خلصنا عالسريع ونظفنا كل شي
عدلت هدومي ونفسي ودخلت للاستقبال
جان بس هو كاعد بالاستقبال
جان بيده السبحة ومنزل راسه ..انتبه علية
ابتسم واشرلي اروح اكعد يما
رحت كعدت ..

...........................
خلينا نبين فد مقطع معين حتى تتوضح السالفة يمنا اكثر*

ليلة اول يوم العيد
لمن الكل خلص وراح حتى ينام
دخل الجد للغرفة جانت بيبي كاعدة عالسرير توها خلصت صلاة
تنهدت وگالت:- ايييييه ..يمكن هسه اني اسعد انسانة بهالدنيا هايه
خالد:- عسى گليبج دائما فرحان يا ام محمد ..بس خير
اندارت عليه وگلتله:- ليش ما افرح واني شايفة كل احفادي وثمرة تعبي كبالي ملتمين ..تدري انو كبل جانت نغصتي الوحيدة بنت علي
وهسه الف الحمدلله بعد اسمه ربي استجابلي هالامنية
ابتسم:- الف الحمدلله ..اي والله الف الحمدلله
جليلة:- انطيتها عيدية مو
خالد:- اي شوون ..اصلا بيني وبينج انطيتها اكثر الكل گلتلها تعويض عن ذيج الايام ..وهمين خطية وراها دوام وگالت صارت بالجامعة
اندارت عليه بسرعة:- منو بالجامعة ..روفان؟
خالد:- اي يا ام محمد شبيج غير عشرين سنة عمرها
جليلة:- وراح تداوم يعني
خالد:- هي تريد وحجيت لمحمد گال اني ادبر سالفتها علما تطلع مستمسكاتها
سكتت فجأة وصفنت
باوعلها:- خير ..سكتي شو!
جليلة:- اخاف احجي ودگول تفكيري تفكير قديم
تعدل ويباوعلها
خالد:- احجي اسمعج
جليلة:- البنية جبيرة وعلى وجه زواج ..والبنية حلوة وبنت بغداد
خالد:- اي؟
جليلة:- بصراحة يا ابو محمد اني ماتحمل بعد تروح من كبالي
خالد:- ما فتهمت شنو يعني
جليلة:- ماريدها تروح من كبالي بعد افتهمني ..يعني باجر بعد باجر تجيبلي واحد من دوامها والله تريد تتزوجة وتطلع من عدنا
حتى حرام علينا نوكف بقسمتها مانكدر نگوللها لا
خالد:- اي لعد شنو ..تبقيها هيج يمج مثلا
اندارت صارت كباله وتقربت تحجي بصوت خافض
جليلة:- ببالي شغلة واتمنى توافقني عليها
خالد:- اي دحجي عاد
جليلة:- ليش ماناخذها لاوس
باوعلها مستغرب:- اوس؟!
جليلة:- اي هم ابن عمها اولى من الغريب ..وحتى همين تبقى كبالنا لاتطلع من بيننا مرة الخ
خالد:- والله يا ام محمد موضوعج غريب الصراحة ..اوس نهائيا مابباله هالشي
جليلة:- مو حتى نضرب عصفورين بحجر شبيك ..لايبقى يلح ويلج بسالفة يريد يسافر ..يستقر هنا وينجبر يبقى
صفن بيها مايعرف شنو يرد
وهي منتظرته يگول الموافقه عاد
وكأنه هو العريس!!
جليلة:- وافق يا ابو محمد واللي يسلمك ..هاي امنيتي بهالدنيا هاي
يعني هم راح ترجعون تحرموني من حفيدتي بعد كل هالسنين
هو شباقيلي من عمري اني واعيشه بعد بعيده عنها ..هاي بنت علي قطعة من روحي تدري لو لا
رفع عيونه عليها ..جانت عيونها مدمعه
ابتسم وگللها:- اللي تريديه يگلج تم ...

.................................

رحت كعدت يما
بعده صافن بالسبحة وشكله ديفكر بشغلة
خفت من هذا وضعه حسيت وراها فد مصيبة جايتني
والله اعلم!
رفع راسه وگال:- الله يقويج جدو ..تعبتي هاليومين مو
بيلسان:- لا والله عادي بالعكس اجواء حلوة واول مره اصلا اعيشها
خالد:- الف الحمدلله ..اييه الف الحمدلله
كام يتنهد وهو يباوعلي
رجع وخر عيونه ويلعب بخرز السبحة
خالد:- رايدة بموضوع ..واني عرفتج عاقلة وتفهمين
بيلسان:- اي احجي جدو
باوعلي وبدا بالحجي:- نحنا ماصدكنا ترجعيلنا ..روفان بنتي والله يوم اللي لكيتج وعرفت عنوان البيت اللي جنتي بي ماتدري شصار بيه
وبصراحة لاتحسبين روحج صارلج جم يوم يمنا يعني بعدنا متجنبين منج ..تدرين انو بيبيتج روحها صارت بيج من كبل ماتشوفج ولو بيدها لحظة ماتبعدين من يمها
سكت ورجع ضحك وگال:- ذاك اليوم من رحتي ببيت عمج
صرعتي كل شوي خابر محمد او واحد من الولد خلي يجيبها
ابتسمت وانا عيوني عليه
عيونه جانت بيها شويه دمع
صفنت بي ..هو يعني معقولة روحهم هلكد صارت بيه؟
بهالسرعة يعني شو انا لحد هسه ماحس بشي اتجاههم!
سكت لحظات ورجع كمل:- راح اجي بسرعة ..الموضوع اللي رايدج بي ..اريدج لاوس
جتني الضحكة بس استحيت اضحك
مافتهمتها بقيت صافنه بي مستغربة
ومنتظرته يكمل كلامة ..الي هو شنو رايدني لاوس؟
بشنو رايدني حضرتك!
خالد:- اوس ابن عمج حزام ضهرج ..ولو تفرين الدنيا كلها ماتلكين واحد راح يخاف عليج بكده يمكن هو مايبين هالشي ولان بعدكم توكم متعرفين ..بس اوس زلمة ..زلمة من صدك
وبعدين هو اولى من الغريب ..يجي واحد غريب مانعرف اصله من فصله وشنو من شي يروح يسوي بيج شي اني شسوي بهالحاله؟ ..يمكن اموت بكاعي والله
روفان انتي مو بس حفيدتنا ..انتي امانتنا كلنا ..وكلنا لازم نراعي هالامانة
اصفن بي ..كلامة سطرني
احس مثل الشي الثكيل ووكع على راسي
لساني انكعد اريد احجي اكول لا افتهم السالفة بعد
ماكو ماكو صفنت طفيت كلني
بيلسان:- جدو ..كلامك على عيني وعلى راسي
بس
سكتت شوية ماعرف شنو ارد وشنو اكول
اباوعله ديباوعلي ومنتظرني انطق الكلام اللي ماجاي يرضى يطلع مني
وخرت عيوني من عليه وحجيت
بيلسان:- اولا انا مامستعدة لهيج موضوع ومسؤولية ..انا اريد اكمل دراستي و
قاطعني وهو يگول:- محد گلج ماراح تكملين ..وهالزواج ماراح يوقف تعليمج ودوامج بالعكس راح يكونلج سند بهيج اوقات
باوعتله وانا كل نظرات الرجاء بعيني
بيلسان:- جدو
كبل لا اكمل رفع اصبعه وگال:- اششش لاتنطين رأيج هسه ..فكري بالموضوع زين من كل النواحي ..مامستعجل على اجابتي ولا حتى اوس
ولا حتى اوس!!!!!
يعني اوس يدري
انصدمت صدمة عمري يمكن
اريد اكله اوس شنو موقفه ..يعرف لا
مادكرت احجي كلمة بعد
احس الصدمة انصعقت براسي وخلتني مشلوله عن الكلام
هزيت براسي فقط وطلعت من يما
احس ضاكت علية الدنيا وضاك نفسي
لا ياربي لا
لا مو هذا اللي جنت منتظرته
ولا هذا الخططتله
ماجان ببالي يصير هيج
صعدت بوجهي للغرفة
اروح واجي ..عقلي وكف عن التفكير
انشليت من فوك لجوا
شسوي ياربي ..ياربي انتي اللي خليتني بالموقف
وانت اللي تكدر تطلعني منا
ماريد ماريد والله
يعني فوك الموضوع فوك ما اوس العريس
زين ليش يالله ليييش
زين هو يعرف؟ ..ماعارض ماكال لا
شعجب هو ماطايق يشوفني ولا يحجي وياي
انوب اصير مرته!
اوووووف جانت عايزتني بس هاي السالفة
جديات بس هالسالفة ناقصتني ..
الليل كله افكر والف حسبه تجيبني وتوديني
اخر شي فكرت احجي ويه اوس واكله عالموضوع
مثل ما هو صريح وياي وحجيالي ماطايقني ومامتقبلني بدون مايراعي مشاعري
انا هم اروح واحجي وياه اكله يرفض او يسوي اي شي
المهم هالمهزله وهالاهانة لنفسي ماتصير
ماصدكت يصير الصبح كعدت اول وحده غسلت وبقيت بالغرفة انتظره يصعد او اللمحة فقط حتى احجي وياه
يمكن فوك المية مره وكفت كدام المرايا وارتب بكلامي
يعني كل المواقف اللي دانحط بيها
اول مره انحط بيها وماعندي خبره ولا حتى سامعه احد واكع بيها حتى اعرف شون متصرف وانا اتصرف
داخبط واللوصها وانا بمكاني
نزلنا تريكنا جانو بيت عمي بعدهم موجودين
بس خاله هاجر وبنان واوس
قيس وعمي طالعين من الصبح گالوا
كوة كعدت وياهم واكلت
فكري جان بغير مكان ومستحيه حتى اباوع لجدي او لاوس
احس روحي مكشوفه
ودايقرون افكاري وبشنو داخطط ..
هسه غير يخلص ويصعد حتى نحجي وياه
مو كاعده على اعصابي حتى ماكلت مثل البشر
وبعد عناء خلص وكام دخل لجوا
انتظرت دقيقة وكمت عود حتى لحد يفهم كايمة وراه
صعدت شفته فوك بالممر
بسرعة رحت وراه ..گلبي كام يرجف
بس گلت الا احجي وانهي هالموضوع
مو لعبة ولا شي بسيط

بيلسان:- اوس
اندار وهو يعدل بلحيته:- هاا
ماعرفت شون ابدي الموضوع
استحيييت هواي وگلبي رجفته دمرتني
تلبكت وبين علية هالشي
انتبه گال:- حجا وياج جدي؟
باوعتله وهزيت راسي بمعنى اي
اوس:- وشگتيله؟
بيلسان:- انطاني وقت افكر
هز براسه وگال:- وناويه تفكرين ليش؟ 
باوعت بعيونة:- انت ليش ماعارضت ..شعجب اوس الصريح واللي مايرضى بالشي الغلط ..شمعنى هالمره سكتت
هز بچتافه وگال
اوس:- لان متاكد انتي راح تعارضين وترفضين
بيلسان:- انت لو مموافق ماتخليني بهالحصره هاي
اوس:- تكدرين دگولين لا
بيلسان:- وانت ماتكدر؟ ..انعكد لسانك لمن انعرض عليك الموضوع قبلي يعني!
اوس:- لا ..بس ماكدر اكسر كلام جدي ..وانتي صلفة متوقعج تكدرين
تقربت وگتله:- لاتتجاوز ..ومثل ما انا راح اگول لا انت هم راح دگول لا ..لاتريد تطلعني مو زينة كدامهم
اخذ نفس وزفره وگال
اوس:- باعي ..لا اريد اطلعج مو زينة ولا مادري شنو ..مثل ماراح ترفضين راح ارفض وتنقفل السالفة ..وهااا أهااا لا تتوقعين اقبل بهالسالفة البايخة اللي مطلعها جدي ولو منو يجي ماراح تتم
بيلسان:- يعني شايفني انا اللي رايده وهيج كاتله روحي
اوس:-المهم ..انقفل الموضوع وهاهية اني احجي ويه جدي
بيلسان:- ايييي من البداية ..اووي
وخر عيونة وگال:- شكد تلغين لخاطر الله
بيلسان:- ميته ..ميته عاللغوه وياك
حجيتها وتركته ونزلت
بس نوعاً ماطمنت
لان خلص هو مادام رافض وانا رافضة
معناها الموضوع كله مرفوض من اهم طرفين ..
ماحجيت لامي
لان اساسا الموضوع انسد قبل لاينفتح ...

مر باقي اليوم بشكل عادي
رجعوا بيت عمي واللتهيت ويه عمتي ..
العيد طبيعته بس اول يومين
وراها حتى زيارات مابعد احد يجي
ثاني يوم كبل مانكعد عالريوك
شفت جدي كاعد بالصالة وديشرب القهوة لوحدة
رحت يما:- صباح الخير
رفع راسه:- هلا هلا ..صباح النور
بقيت واكفه يما ..انتبه علية
ابتسم وگال:- عسى ماشر ..احجي
كعدت يما وگلت:- اريد اطلب طلب
ضحك ..ذب فنجان القهوة كباله وباوعلي بعيوني
خالد:- اسمعج كولي
بيلسان:- .............
.
.
.
للحكاية بقيـــة

البارت تحسوا طويل لو قصير؟
لأن داحس قصير وحدث واحد ديصير بي
فـ اذا عدتكم تعليق على شي بالرواية كتبولي
وبعيني💙

#منة الله_الأيوبي