ليلة من العمر

البارت الثاني

مرت تسع سنوات
كبرت وصار عمري ١٧ سنة
جنت بصف رابع ونورهان بالخامس
نورهان شخصية معتمة وغامضة وهاااادئة
وحيل فقيرة حتى صديقات ماعدها بس وحده جان اسمها ليليان
قليلة الكلام واحس شخصيتها كلش ضعيفة
يمكن لأن اهلي يدللوها هواي حتى ويه بنات عمي ماتختلط وتبقى لوحدها او تكعد يم امي
لمن كبرت شوي قلت ضوجتي اتجاهه
كبرت وصرت طايشة مو الطوش اللي يصاحبه اصدقاء سوء لا
بس جنت وكحة وماعندي ذاك الاهتمام بشي
بس مع هذا جنت هواي ازعلها واضوجها واكسر بخاطرها ..
بيوم جان مصادف ٢٢ من شهر الثالث
مستحيل انسى هاليوم مستحيل!!
جنا واكفين انا ونورهان ننتظر الباص حتى نرجع للبيت خلص الدوام
نورهان:- ويي بيلسان تعاي وياي للمكتبة بس رايده لشتري من هذا الدفتر الملاحظات
بيلسان:-بله ماتكعدين ..روحي طالعه من التعب
نورهان:-حبابه والله محتاجته
بيلسان:- دروحي ذيج هي المكتبة تخافين
نورهان:- ماكدر لوحدي كلها شباب تعاي وياي
بيلسان:-حبابه لاتلحين تعبانة
نورهان:-بس للمكتبه
قبل لاتكمل عطت:- ماااتحرك منا والله كتلج لاتلحين
سكتت ووخرت من يمي شوي
وصل الباص ورجعنا للبيت
انا اول ما اوصل البيت راسا ابدل ملابسي واغسل وانام حتى ما اكل
صار المغرب كعدت لكيت نورهان كاعده على سريرها وجاي تكتب درسها
كمت غسلت ورجعت للغرفة شفتها حاي تلم بغراضها ودخلت بالفراش
بيلسان:-شنو راح تنامين؟
نورهان:-راسي يوجعني
بيلسان:-اكو مخبل ينام هيج وقت؟
نورهان:-وشعليج انتي
بيلسان:-طبج طوب
حجيتها ورحت علكت المنشفة عالباب وطلعت
ماجان عدنا مبايلتت بذاك الوقت نحتاج شي ناخذ مبايل أمي
بس جان واعدنا بابا يتشريلنا مبايلات من نوصل للكلية مع العلم حالتنا متوسطة جانت بس لأن علمود دراساتنا
حياتنا هادئة وبسيطة صح عندي كومة شغلات اتذمر منها واضوج
بس عايشة حياتي جنت ..
المهم جانت الدنيا ليل
جنا كاعدين بالصالة انا وابويه وامي كاعدة بالكاع تسوي البانية
دانتفرج عالتلفزيون وبوقتها جان اكو برنامج مالاغاني يطلع بالاسبوع مره وكلش يعجبنه
الام:- بيسو كومي كعدي اختج جانت منتظرته
بيلسان:- دخليها نايمة هسه
الام:- كومي لاتصيرين حقيرة صارلها زمان نايمة لا تروح ماتكدر تنام بالليل
بيلسان:- ماما عوفيني حبابه مابيه حيل اصعد
الام:- مو تحبه للبرنامج
بيلسان:- باجر عود تشوفه بالاعادة
الام:- شكد خبيثه
تمددت كبال التلفزيون وكعدنا نتفرج
غرفتنا جانت بطابق الثاني ونورهان نايمة فوك
نحنا وملتهيين وصوت التلفزيون عالي
مانسمع الا صرت دكة بابنا قويه
بابا صاح:- نصووو هذااا صوت الباب يمكن
الكونترول جان يمي نصيته وبقينا نسمع فزينا من صوت الباب
الام:- ياستار منو هذا
كام بابا ركض يشوف منو هذا الجاي يدك هيج وشعنده
شوي ودخل ابويه وهو يصيح
الاب:- كوموووو البيت جاي يحترررك
وكع كلبنا وفزينا ركض كمنا طلعنا انا وماما نلكي المنطقة كلها طالعه واكفه بباب بيتنا تشوف شصاير
باوعت لفوك وشنو اشوف!!!!
الطابق الثاني ديلهب صاير قطعه من النار محاوطتنا من كل الجهات
المنظر مرعب مرعب!
الدنيا صايرة مضوايه من كثر النار
من صدمتي ردت اصعد بدون وعيي سحبني ابن ام غسان وصاح علية
امي وكعت بالكاع وتصرخ
زلم المنطقه اللتمت تطفي النار ويانه
بابا اختفه بداخل البيت
النسوان تسكت بامي واللي يصرخ وياها والجهال مخبوصين
الدنيا انكلبت وكل هذا
ماجاي احس بشي بس اريد اطمئن على نورهان وبابا
كمت اللوب اريد ادخل ماكدر
مانحس الا نسمع صوت سيارة الاسعاف والاطفاء جتي مسرعة
فرغولها مكان
فوك العشر دقايق بابا فوك لا هو بين ولا نورهان
الاسعاف صعدو فوك والاطفاء تطفي بهالنار اللاهبه
الفرع انقفل من الخبصة الصارت
وانا واكفه مثل الصنم اتصفن بالوجوه
بامي التصرخ باسم نورهان
والباب اللي دانتظر يطلع منا بابا ونورهان
فجأة نزلوا زلم ساندين بابا وهو شايل نورهان اللي صايره قطعة سودة كلشي مامبين منها
منظرهم مؤذي بكل معنى الكلمة وبعمره ماراح يروح من عيوني!
بالكوة ساند روحة
بس ماترك بنته
عيونه باوعت لماما وبيهم الف سالفة
لحظة كلنا سكتنا بيها وبس نترقبهم
دخلوهم بسيارة الاسعاف ومشت بيهم
رادت امي تلحكهم شخطت يمنا سيارة باوعنا طلع ابو غسان
اشرلنا نصعد
صعدنا انا وهي بسرعة وطار بينا ورا سيارة الاسعاف
لازمه ايدي وترجف وتبجي وابو غسان يهدي بينا ويطمنا
انا جسمي كله يرجف ومصدومه رجليه احس مابعد تحملني
طريق المستشفى صار شطوله علينا واللحظه صارت بساعة عدنا
وصلنا نزلو بنورهان ركض اللي جانت عبارة عن جسد
جسد صافي
جسد على هيئة فحمة سوده
نورهان ام ذاك الجمال والملامح الهادئه !!..
اخذوها من عدنا بالطوارئ
وكف ابويه منتجي ايديه عالحايط سحبته امي
تحجي وياه وهو بغير عالم
مخنوك والغصه احس انا جاي احس بيها
مابيه حيل يحجي يأشرلها بعيونه بمعنى
مادري مادري!!
رحت سحبت امي من يما وكعدتها عالكرسي
بعد ربع ساعة من الانتظار المرعب
طلع الدكتور وكمزنا عليه
-الحرك ماخذ منها ٩٠٪؜ ماراح نكدر نسويلها اي شي هسه
خليناها بالانعاش لان فاقده مستنشقة كمية لا قليلة من الدخلن لدرجة واصل للمخ
حجت امي وهي كوه تطلع من عدها الكلمة :-يعني شنو ..شنو
اشرلها بتعبير مافتهمت معناه ورجع گال :-ننتظر ٢٤ ساعة هي تحددلنا شنو راح يصير ..اعتذر من رخصتكم
حجاها وراه
عافنا بحيرتنا وخوفنا
اباوع على امي وابويه واحد يصفن بالثاني وعيونهم تحجي دموع
سمعنا صوت بيت عمي منتصر عمي الجبير ابو حسين
امي من شافت مرت عمي من قوة الدموع والشهكة رادت توكع من طولها بسرعة سندناها وابوية اختنك بسرعة اخذه عمي منتصر وابن عمي حسين طلعوه برا
جانت لحظات مو بس صعبة
كدما ما قاسيه ومرعبة
لحظات تقتل الواحد الف مره
مو يكولون اصعب شي الانتظار؟
لا اصعب شي من تنتظر شي مجهول
شي مصيري ماتعرف شنو راح يصير
شي الـسيء مالته يقتل !!!
المستشفى خبصنا بس همين ماجاي اشوف اي احد كبالي
بس امي اللي كاعدة وسانده راسها على مرت عمي
صافنه وماعرف شنو اسوي
الف فكرة جتي براسي ومع هذا احسني مبنده من فوك لجوا
من جسمي وعقلي لحد اطراف شفتي
مابيه حتى احجي
كمت ورحت يم امي من الخوف اللي منتاب قلبي لحظتها وكأني راح اشفى او يروح هالخوف
وكاني اريد اشفي اللي صار اليوم!
غفيت لا ارادياً على جتفها وعلى صوت همسها وونتها وهي تبجي وتدعي الليلة هاي تعدي على خير
اتذكر بوقتها جانت دكول "اللهم ان مسني الضر وانت ارحم الراحمين"
رن باذني ولا اراديا لساني وقلبي وراها كامو يرددون هالدعاء ..
..
فتحت عيوني كوة
بدت شوي شوي يتوضح النظر عندي
بديت اركز
مادري شكد نمت ولا شون
بس اتذكر فتحت عيوني واستقر نظري على امي الواكعه بالكاع ومنتهيه
وابوي اللي كاعد ومخلي راسه بين ايديه وكاعد يما ابو غسان وعمي منتصر
تعدلت بسرعة اريد اعرف شنو الصار واستوعب
كمت فزيت ورحت يمهم ولساني معقود اخاف احجي
او ماداكدر احجي
بيلسان:-شصاير ..شكو
كامت اني تون
ونه بوجع
ونه صوتها يمرد الگلب
ونه بيها الف حسره وعتاب
الف قهره
ونه تحسسك شكد هالدنيا قاسيه ومكروها!
-راااحت ..راااحت ياامي اختج راااحت
راحت بنية هالدنيا راااحت ولج ياماما ليش عفتيني ولج لييش
مثل النيزك على قلبي صار كلامها
لوهله حسيتني بحلم وهالشي اصلا جذب كله وهاي نهايات الحلم
بس شوكت؟
شوكت تجي تكعدني امي من النوم ومن هالحلم ويخلص عاد
شوكت يدك المنبه
شوكت اسمع صوت نورهان وهي تحركني حتى اكعد؟!
وكفت اصفن حسيت احد سحبني
باوعت حسين ابن عمي
حسين:-بيلسان ..ماعرف شنو اكول بس هذا قدر الله
وقدر الله وماشاء فعل
حجا هواي كلام بس ماسمعت غير هالجمل
اصفن بوجهه وانتظر اجابه جذابه تجذب كل هالكلام
انتظر شي واحد يطمني
انو لا
نورهان ماراحت وهي جوا وهسه راح تطلعلنا
نورهان صح هادئه بس نورهان قوية
انتو ماتدروها شكد قوية والله انا اعرفها!!!
انا؟
انا السبب! انا من عساني متت ولا شفت هاليوم
ليش ماسمعت كلام امي ورحت اكعدها من النوم
ليش تركتها لوحدها بالغرفة؟
ليش عاملتها بقوة ولج لييش ...
الحرك اللي صار بسبب الصوبة الكهربائيه
جانت وحدة من رجليها مكسوره وماتوكف بشكل عدل
واكعه وحاركة السجاد والغراض اللي بالغرفة
ولسبب انو غرفتنا جانت شبه معزوله عن باقي البيت والطابق الاول ماحسينا بيها بس الناس اللي برا شايفين النار من الشباك ..
يالله
شنو گالت روحها اخر شي؟
شجانت داتحجي وبيمن استنجدت من شافت النار
صاحتني معقول؟
صاحتني انا اللي مارضيت اصعد اصحيها عالبرنامج
يالله يالله
انا شون راح اكمل؟ ....
.
.
.
.
للحكاية بقيـــة

.................................................................................

كلش اكره البارتات اللي بالبداية لأن تصير ممله واحداثها بطيئه
بس جايتكم بالاحداث ميخالف
واعتذر عالسحكات

#منة الله_الأيوبي