ليلة من العمر

البارت الثالث والثلاثون

وجه قيس وحالته مادري ماطمنتني
احس اكو شي لان مو طبيعي اذا مايتشاقه ويبزع روح الواحد هذا مو قيس
توترت والنغزه اللي بداخلي كبرت
وصلنا البيت جيت انزل گال قيس:- انتظري شويه
باوعتله مستغربه
بيلسان:- ليش شكو
قيس:- خلي يجي اوس
بيلسان:- قيس صاير شي لتضم علية؟
قيس:- خلي يجي اوس
باوعتله مادري شونه
ماتحملت فتحت الباب ونزلت شنو كاعدة بالسيارة انتظره جوا عود
دكيت الباب طلعتلي خاله هاجر
ومن شافتني وجها اصفر
هاجر:- هلا امي
بيلسان:- خاله هاجر شكو؟
هاجر:- طبي ماكو شي
حجتها وطلعت على قيس
نزعت الحذاء ودخلت لكيت ماكو احد بالصاله بس سمعت صوتهم بالاستقبال ..فتحت الباب شفت عمو محمد وجدو وبيبي وزوج عمة نعمة الغثيث كاعدين وبصراحة هما مايكعدون هالكعده الا اكو مصيبه
كلهم باوعولي حجا جدي
خالد:- تعاي بنتي طبي وسدي الباب
دخلت وسديت الباب وكعدت بالطرف وانا عيوني تترقبهم واريد بس اعرف شكو ..گلبي كام يرجف
بيلسان:- شكو شصاير
اباوع بالوجوه ..حجا عمي محمد
محمد:- ابويه انتظر خلي يجي اوس گال اني احجي
خالد:- شنو الاستفاده هي تاليها راح تعرف
حجيت بلا وعي:- شنو شعرف احجو عاد الله يخليكم
لحظات وگالت بيبي
جليلة:- يمة الرجال اللي جنتي عنده واللي رباج ..توفى
صفنت ..
حرفياً صفنت
ومو بس صفنت احس كل حواسي صفنت وياي وتريد تستوعب
نطقت بكلمة وحده
بيلسان:- منو؟
عمو محمد گال:-والدج
كلشي بيه افتر
الدنيا بعيني لحظتها صارت قطعه سوده ..سواد مخيف
اباوعلهم وانا اريد اي شي يكلي لا جذب ماكو هيج شي
كمت وكفت على حيلي واريد احجي ماعرف شنو بعد احجي
اباوعلهم واحد واحد ..اتمنى احد بيهم بس يگلي غلط
بسرعة انفتح الباب ودخل اوس وصافن بيه
اوس:- گتلكم انتظروني ماريد احد يگللها هسه
نداريت عليه باوعتله
بيلسان:- اوس حباب گول هالشي مو صح
اوس:- من رخصتك جدي
اشرلهم يطلعون برا
بيلسان:- جذذذذذذذذذذب
صرختها ووكعت بالكاع
بسرعة اجا حضني قوي وانا بس ارجف بين ايديه
انفتح الباب صاح
اوس:- طلعو براااااا ماريد احد هنااااااا
كمت اتحرك بقوه واللوب وانا بين ايديه واملخ بقميصه بس بدون ما ابجي
او اطلع اي صوت
لزم وجهي:- بيلسان ابجي..ابجيييييي لاتخوفيني عليج
اباوعله عيوني جامده ونااااشفه وبس اتنفس بقوة
اجر النفس كوة
كلشي بيه يرجف من راسي لحد اصابع رجليه
وماداحس بشي ثاني
احسني جنت بعالم غيييير عالم اتمنى بس اطلع منا ومارجعله
اريد احد يكعدني من الحلم اريد بنان تطب علية للغرفه تحسسني
لو صوت المنبه يفززني واكعد من هالكابوس
بس للاسف ماجان كابوس
جان اقوى منا لأن بأختصار
جان الواقع ! ...
كام يروح عني النفس
يضرب على وجهي اوس يحجي وياي فاقده بين ايديه
بسرعه شالني ومددني عالقنفه وصاح
اوس:- جيبولي مي بساااااع
دخل عمو محمد ويه خاله هاجر ركض
كام يشمر علية المي وعلى وجهي
ماكو بس اصفن عيوني جامده
احس ديحجون بس مداسمع ولا شي
ونه باذني قويةةةة حيل ..مخليتني ماسمع ولا اشوف ولا اركز
رفعني اوس عليه ويضرب على وجهي بقوة
اوس:- احجي شيي ..سوي ردة فعل
بيلساااااان اصحيييي اروحلج فدوه بس احجي اي شي
باوعتله وهمست
بيلسان:- اريد بابا
كامت تبجي خاله هاجر وجتي يمي
هاجر:- ماما هذا قدر الله ادعيله واترحميله
باوعتلها:- لا هو ..هو ما مات ..مايموت ويعوفني
حجيتها وانفتح شلال اله اول ماله اخر
كمت اللطم واملخ بروحي واصرخ
بيلسان:- بابااااااات باباااااااا ما ماااااات
يمي اوس وخاله هاجر وعمي محمد بس يهدون بيه
يحاول اوس يلزمني ماكدر وكعت بالكاع من الصراخ والبجي
لزمني من ايديه باحكام ويحاول يحضني بقوة حتى لا اذي نفسي واللطم
ماكو فايده فقدت ماكو شي ماسويته بس اريد گلبي يبرد احس بدون وعاتي جاي اتصرف
كام يصب على وجهي مي ولازمني قوي ويمي يمكن كلهم بس انا ماجاي احس بشي ولا اشوف احد
واسمعهم يحجون وياي بس ماجاي افتهم لو اركز بشي
شالني وصعدني لفوك وانا ارافس بي لا ارادياً وابجييي
خلاني على فراشي ولزمني من ايديه واصرخ واعيط وبحيث صوتي مابعد يطلع
فجأة صاح بيه:- كافيييييييي اهديييييي
كمت اناشغ اباوعله وانا بس عيوني تصب
اوس:- كافي اروحلج فدوه كافي
حجيت بنبرة رايح صوتي
بيلسان:- اريد اروح لبابا
اوس:- اوديج والله بس لزمي روحج وكافي
كمت ابجي اقوى:- اريد هسه
اوس:- كومي بدلي انتظرج برا
قبل لايطلع گال:- لاتسوين شي بروحج بدلي واطلعي
حجاها وطلع كمت ركض عالكنتور اطلع هدوم وجسمي كله يرجف
بسرعة مادري شلبست اي شي اجا كبالي وطلعت ركض جان واكف جوا يم الدرج
شافوني كلهم صاحو هاا
اوس:- راح نروح على بيت اهلها
جليلة:- تطولون؟
اوس:-بيبي والله مادري رايحين هسه
انا جنت برا داللبس بحذائي ماسمعتها بعد شحجت
طلع وانا كمت اركض احس بس اريد نوصل وگلبي رايح من البجي
لحد هسه احس مثل اللي متبنج ماجاي احس بكلشي
الطريق صار شطوله علية
بقى يهدي بيه ولزم ايدي بس ماكو انا بغير دنيا تماماً
وصلنا منطقتنا شفت سيارات وخبصه كبال بيتنا
گلبي شكد ما اكول لزمه شعور مو حلو ومؤذي ماراح اكدر اوصفه بالضبط بحيث بعد توه وكف بس يريد يلكي مكان يوكف السيارة بسرعهة بدون ماركز فتحت الباب ونزلت سمعته صاح
ارس:- اوكفي بيلساان دقيقةةة
ماسمعتله كمت اركض جان مليان زلم بباب بيتنا بس مانتبهت وماركزت منو
بسرعة دخلت من بينهم وانا عيوني تدور مادري عليمن ماما لو باابا بس روحي جانت مفرفحه وامشي بدون وعاتي
ماحس الا اسمع صوت نحيب ماما وبجيها وانا بعدني بباب الداخل
شفتها بالاستقبال كاعدة وحوليها النسوان ولازميها وهي بس تبجي
شفتها هيج يمكن جان اسوء واسود يوم بحياتي
جان اسوء منظر ممكن يمر على عيوني
وكعت عيونها بعيوني وانا بعدني واكفه صافنه ماعرف شسوي
بعدني احس بحلم ورايده اي شي يكعدني منا
هي شافتني كامت تعدلت بس متت قهر ماكدرت تكوم حيلها رايح من كامت راسا وكعت على ركبها
ركض دخلتلها ووكعت بحضنها وابجييييي يمكن بجي سنين بجيت وهي تبجي وتمسح على راسي ودگول
- راح ابووووج ولج راااح عامود وسند هالبيييت راح ابو الضحكه والوجه الحلو ...ولكم وين انطي وجهي هسه وييييين عفتني ويييين
تحجي وانا اعصر بهدومها وابجي
وخروني النسوان من يمها كوة سحبوني
عيوني جنت مغمضتهم بعد ماكدر افتحهم احسهم انلزكوا
كمت اناشغ وروحي راحت بعد ماكدر اخذ نفس
وحده من النسوان صاحت
- مي عالسريييييع
جابولي مي وكامو يمسحون على وجهي ويريدون يشربوني وانا ماكدر اثبت
مادري شكد بقينا على هالحاله
لحد ماسمعنا صوت انو اجت الجنازه ..
يمة هاللحظه هاي!
يمة شكد هدتني
يمة شكد متت انا بهالوقت هذا الف موته ..
طلعنا وانا اشوف گبر ابوي دخلوه للحوش
لا هذا هو اسوء شي يمر على عيون الانسان
هذا اسود شي يحسه الشخص
هذا هو الموت البطيء
هذا هو معنى شنو يعني يموت احساسك وقلبك وروحك تحترك وانت بعدك عايش وحي
كلشي بهالدنيا مايسوى لمن شفت هاللحظه هاي
كلشي بهالدنيا صار باهت وتافه من اكبر لاصغر مشكلة لمن شفت أعز شخص بحياتي بهالمكان هذا ..
سكتت عيوني على رغم من صوت الصراخ والبجي اللي يمي
بس جنت احس هالشي مايكفي الدموع
صافنه عليه وانا ساكته
ابويه جان يلبس من هاي البيريات هواي لأن جان مايحب الصلعه
جانو مخليين البيريه مالته على قبره
اباوعلها وبدت عيوني تصب بس بسكوت
اباوع عمامي يمة ولازمين القبر ويبجوووون وولد عمامي واكفين بصفحه
اصدقائه
جوارين المنطقه
كل العالم احس زلم الدنيا كلها موجوده بجنازته
شكد جانو العالم يحبوه وشكد جان اجتماعي لعد ..
شالوه حتى يروحون للدفنه
باوعت امي لبست حذائها تريد تروح گلولها ميصير هي تجي ويانه لان باعتبار هسه دخلت العده ومايصير احد يشوفها
انا ماتحملت بسرعة طلعت
شفت ابن عمي حسين
بيلسان:- حسيين
حسين:- بيلسان شوكت اجيتي
بيلسان:- اريد اروح وياكم
حسين:- زحمة شيجيبج
قبل لا احجي سمعت صوت اوس
اوس:- بيلساااان
جاي علينة ..اجا يمي وقبل ليحجي گتله
بيلسان:- اريد اجي وياكم للجنازه
باوع لحسين ورجع باوعلي وگال
اوس:- تمام امشي
حجاها ولزم ايدي وسحبني
صعدنا بالسيارة ومشى وراهم للسيارات
جنت بس صافنه بالمكان وصافنه بالسيارة اللي بيها ابويه
وصلنا المقبره ونزلوا بقيت كاعده خفت وگلبي وجعني
اجا فتحلي الباب اوس وكعد ادنى يمي
لزم ايديه
اوس:- بيلساني ..روح اوس هذا يومه وهذا الشي كلنا رايحين عليه اتقبليه وبمكان ماتبجين ادعيله
باوعتله انا احس راسي مبند
بيلسان:- خايفه
اوس:- اني يمج ..تريدين نبقى بالسيارة؟
هزيت براسي بمعنى لاء
اوس:- لعد امشي
كومني وطلعنا
جنت لازمته من عكسه وامشي وروحي ترجع الف خطوه
گلبي وجعني
وكفنا شوي بعيد وشفتهم
شفت قبره وشفت الحفره
شفته وهما لافيه بالابيض
شفته لذاك الجبل اللي جان يلمنا كلنا
اللي جنا كلنا مستندين عليه
اللي لحد هسه اذكر لمن ماتت نورهان
رجع للبيت وحضني انا وماما حضنه بحيث حسيت روحي فتت باكثر مكان امن بهالدنيا ..
شفته اللي جان ماكو بحنانه وحبه اليه
دخلوه للحفرة
نزلت دمعه احسها چوت خدي وعصرت على ايد اوس
مابعد اكدر اوكف رحت كعدت على حجره قريبه منا
واباوع كلهم ملتمين ويشمرون بالتراب حتى اوس
كمت احجي بهمس ..
لا هذا المكان مو مكانك
كوم حبيبي كوم
والله ماتلوكلك هالنومة
كوم بيلسان اجت هيج يهون عليك ماتشوفها ؟ هيج انطاك گلبك حتى ماتباوعلي
بابا ليش تعوفني لوين رايح وتاركني
المن تاركني بابا كوم حباب ..
احس گلبي وكف
كمت اجر النفس كوه
عيوني غووشت وبدت الالوان والرؤية تروح مني
خليت ايدي على صدري وانا روحي جاي تروح وايدي الثاني ااشر بيها اريد اي شخص يجيني يساعدني
ماحس الا ركض اجاني اوس
اوس:- بيلسان شبيج .. شصاير شبيييييج
كام يضرب على وجهي
واندار صيح
ارس:- بلا زحمة اريد ميييييي
ورجع ندارلي
اوس:- اسحبني نفس اسحبني نفس ...بيلسااااان داتسمعينيييي
اسحبي نفسسسس بقوة
فتح الحجاب من على ركبتي وكام يهفيلي
جابو مي عالسريع فتحه وخلاني اشرب
رجع غسلي بي وجهي
العالم انخبصت بيه وهو مايدري شيسوي
سمعت واحد گال
- هاي منو وشتقرب للميت
واحد ثاني ردله :- يگولون بنته
- مو ماتت؟
- الثانية
وراح ذاك ومادري شبقى يدردم
جسمي كله لزمته رجفه مو طبيعية
رجعلي نفسي شوي شوي وعيوني توضحت ..
اوس:- بيلسان كومي نرجع
هزيت براسي بلاء
اوس:- شنو مستفاده باقيه هنا كومي وجهج صار قطعة صفره
بيلسان:- لا ماريد
سكت وبقى يباوعلي
اجا عمي الجبير فوك راسي وادنى يمي
بس شفته نزلت دموعي
هو مايشبه بابا بس مادري لان من ريحته
جانت عيونة حمررر دم ووجها شاحب
باوعلي وگال بصوت مبحوح
منتصر:- بنتي بيلسان
كبل ليكمل وكعت بحضنه وكمت ابجي
يمسح على راسي واسمعه يوّن ويگول
منتصر:- ااااخ ااااخ ..اخخخ ياخوي اااخ
وخرني ولزمني من وجهي
مسح دموعي وگال
منتصر:- لو هو جان موجود ماراح يرضى هالعيون هيج تتعب ..كومي رجعي سمعي الكلام
بيلسان:- عمو
حجيتها وكمت ابجي
منتصر:- ماراح يرضى اللي داتسويه داتفتهمين
هزيت براسي بأي
منتصر:- كومي لعد رجعي امج محتاجتج هسه
باوع لاوس وگله
منتصر:- العفو بس منو حضرتك؟
اوس:- ابن عمها وخطيبها
منتصر:- هاا انت حفيد الحجي خالد
اوس:- اي نعم
منتصر:- اهلا وسهلا بيك ابني
اوس:- وبيك اكثر عمي
سندني هو وعمي وكومني عدل هدومي وحجابي
اوس:- من رخصتكم بس اوصلها
منتصر:- اخذ راحتك ابني ودير بالك عليها
سلم عليهم ومشاني للسيارة
صعدت وانا اباوعلهم من بعيد
احس هسه فعلاً اقتنعت انو راح
لمن اخر حبة تراب نزلت فوكاه
لمن كعد الشيخ يم راسه حتى يقراله
لمن سمعته يگللهم :-روحو من هنا راح اللقنه ..
هنا فعلاً انكسرت
واقتنعت انو راح بعد هاهيه
والحلم اللي جنت اتمنى اصحى منا طلع واقع ولازم اتقبله ..