ليلة من العمر

البارت الخامس والثلاثون

كاعدين انا وامي
سألتها:- ماما اسالج
- كولي ماما
بيلسان:- بيت عمو اكو احد منهم ديحجي يسال عنج شي
سكتت ونزلت راسها
بيلسان:- شو سكتي
باوعتلي:- ماما ناس اصحاب شغل يعني اكيد ماعدهم وقت
بيلسان:- شنو ماعدهم وقت تره هذا مو عذر
-ميخالف امي اني مارايده منهم شي
بيلسان:- ولا انا بس داكول يجون يسالون عنج يشوفون شتحتاجين لعد مو على اساس هما اخوانه شو بس راح محد معترف بينا
- بيلسان الدنيا متعبه مانصير احنا وهي على ناسها
بيلسان:- ابقي هيجي انطي عذر لفلان وفلان
داحجي اندك الباب
طلعت بالمطبخ اشوف وفتحته خالتي طلع زوج خالتي
سحبت الحجاب وطلعت سلمت عليه
طلع جايب توزيعات اكل للاربعينيه ثواب
طلعت امي من الباب
بعد توه جاي وواكفين بالحوش سمعنا صوت سيارة وكفت كبال البيت
وصوت خبصه
فتحنا الباب باوعت لكيت اوس
مادري ليش فز گلبي !!
شفته جايب صناديك غراض
هو ووياه شباب ومن ضمنهم ابن جيرانه محمد صديقه
كامو يدخلون الصناديك للحوش
دخلوا هما للمطبخ انا بقيت واكفه
اباوعله وهو مخبوص والمنطقه كلها اللتمت عليه
اسمع خالتي تحجي ويه امي دكللها
لبنى:- يايمة نسيبج يبيض الوجه
جانت خبصة من خبصة
شال صندوك ودخل شافني واكفه باوعلي رفع حاجبه وگال
اوس:- ها؟
بيلسان:- ها
اوس:- على جوا يلا ..واكفه هنا شكو
بيلسان:- اريد اشوف التوزيع
اوس:- بعدين روحي هسه كلها زلم
باوعتله:- اوس
اوس:- يلاااا
صاح بيه راسا دخلت
بس بقينا كلنا نباوع من شباك المطبخ ...
البيت والدنيا احسها انخبصت وانكلبت يمنا
اهل المنطقة كلهم اجوي يمنا بالبيت
اوس وزوج خالتي ومحمد ابن جيرانه استلموا الثواب وويه شباب بعد
كاموا يوزعون ويخلون بالسيارات باقي الشباب ويروحون يوزعون
جانت لحظات مادري شكول عنها
بس دمعت عيوني
جانت سهله سهله والاكل ماشاء الله هوايه وبقى بعد هوايه
حسب ماسمعت مابقى احد من منطقتنا واللي يمها واللي ابعد وابعد ما استلم ثواب كلهم استلمو ومع هذا بقى بعد هواي
حتى باربعينيتك كل امورك سهله يا ابويه!! ..
للمغرب تقريباً خلصوا وكملوا
والشباب شطفوا الحوش ونظفوه بالكامل
انطا اوس قسم من باقي الثواب لمحمد وباقي الشباب كللهم وزعوهم على معرفتكم
زوج خالتي واكف ويا اوس ويسولفون احنا جنا جوا
من خلصو كلشي طلعنا امي واكفه من الباب وتحجي لان ميصير تطلع بس كلتلي اصيح اوس
طلعت وباوعتله
بيلسان:- اوس
باوعلي اشرتله بمعنى تعال
تقرب وهو مستغرب
بيلسان:- ماما تريد تحجي وياك
صاحته من خلف الباب:- يمة اوس
تقرب شوي من الباب
اوس:- عيوني عمة
-روح يا ابني الله ينطيك ويرزقك بجاه الانبياء والائمه كلهم بروح النبي محمد يجعل كل خطوه من خطوات حياتك خير وبركه ..مادري شحجيلك بعد بس هوايه ممنونه منك وماقصرت والله
اوس:- عمه شنو هالحجي يعني والله ازعل ..اني ابنج ماكو بينا هالكلام لاقصرت ولا سويت شي هذا عمي واي واحد مكاني يسوي اكثر هم
درت راسي وگلت:- لا ..ولد اخوه اللزم ماسوو هيج
-الله يحفظك لشبابك والله ينطيك لمن يرضيك ويحفظلك الوالد والوالده ويفرحون بيك بجاه هالليله يارب
اوس:- الله يحفظج النا يارب ولاتحجين هيج ماسويت اي شي هذا واجبي
- هسه اطمنت اني ..الله يحبه دزله هيج شخص يتكفل بكل شي يخص موتته
اوس:- اي والله يحبه ..مو علمودي بس لو تدرون الثواب اللي صار يمكن وصل البصره والله والثواب جان سهل لدرجة اول مره اشوفها واتخيلها الله يرحمه ويجعل مثواه الجنة
هو حجا هيج انا ماتحملت كمت ابجي واسمع صوت امي هم تبجي
بتعدت منهم ورحت دخلت من باب الاستقبال بقيت افتر بيها
راسي ديأذيني راح يقتلني ..
دخلت لغرفة امي
سحبت جنطتي طلعت حبوب المهدئ
قبل لا اشربهم دخلت امي وتمسح بعيونها
- ها يمه شتسوين
بيلسان:- جيت شوي ارتاح تعبانة
-اي والله اني راسي ديأذيني
بيلسان:- دنامي شويه ماما
راحت تمددت
بيلسان:- راح اوس وزوج خالتي؟
- اي راحو ..يايمه الله يحفظج هالاوس ويباوكلج بي على هالزلمه عاشت ايد اللي ربته
رحت كعدت يمها ..باوعتلي بنظره غريبة
-شو ماكو تعليق
بيلسان:- شنو
- دنكول الله يحفظه
وخرت عيوني من عليها وگلت:- اي الله يحفظه
الام:-الاهله ولحبايبه
باوعتلها مارديت شي ابتسمتلي وتمددت ..
حاولت انام ماكدرت
راسي من اخليه عالمخدة احسه ثگيل ويأذيني اكثر
تدمرت انا والقران ..
باوعت امي نايمة كمت طلعت بهدوء
اباوع ايدية ترجف وراسي موتني
دخلت للمطبخ شربت المهدئ وراسي احس اكو شي ديتكسر بداخله
كعدت عالكرسي وسندت راسي بيدية
فززتني صوت بنت خالتي رهف جتي يمي تركض
باوعتلها جايبه تلفوني گالت
رهف:- ديدك وخفت تفز خاله
اخذته منها باوعت داك علية اوس
فتحت الرسايل دزيتله:- ماجان يمي التلفون
شوي واتصل ودزلي
اوس:- طلعي للباب
بيلسان:- شكو
اوس:- ماكو شي بس اشتاقيتلج اريد اشوفج
ابتسمت وحسيت حرارة حتلت وجهي
عدلت شعري من مراية المطبخ وهدومي وطلعت
شفت ضوه سيارتة من جوا باب البرا
طلعت بهدوء سمعته نزل من السيارة فتحت الباب لكيته بوجهي مبتسم
دخل وسد الباب باوعت للمطبخ لايكون اكو احد
سحب ايدي وباسها
اوس:- شونج اليوم
بيلسان:- الحمدلله ..وانت
اوس:- هسه الحمدلله
بيلسان:- قبل شوي جنت هنا شوكت رحت ورجعت
حك بلحيته وگال:- فتريت هنا بالمنطقه بس ماتحملت اريد اشوفج
نزلت راسي وگتله
بيلسان:- شكرًا على اللي سويته اليوم
اوس:- هاا دورج مو كافي امج مامقتنعه لحد هسه ماسويت شي وهذا واجبي
بيلسان:- لا شنو جابرك انت
اوس:- گلبي
باوعتله وعيني وكعت بعينه
بيلسان:- باجر نرجع ؟
اوس:- بكيفج
بيلسان:- مو ماريد اعطلك عن شغلك
اوس:- شغلي انتي
بيلسان:- لا يعني انو مايصير تترك هناك وقابل تجي هنا تبقى مكابلني
ارس:- وشعندي غيرج اكابله
بيلسان:- اوووس كافييي
نزلت راسي مبتسمه كام يضحك ..
اوس:- رفعي عيونج لاتحرميني منهم
سحبني وكعدنا عالدجة مالحديقة
اوس:- شربتي الدوا
بيلسان:- بس المهدئ
اوس:- الباقي؟
درت وجهي سكتت
دار وجهي عليه بيده:- الباقي؟؟ باقي الدوا وين
بيلسان:- نسيته
اوس:-نسيتيه لو انتي اصلا ماجبتيه
وخرت من يما وگتله
بيلسان:- دكافي تره مو طفله تعاملني هيج
اوس:- هااا اختنكتني مو
بيلسان:- لا بس كافي تقيدني وتحسسني طفله
اوس:- لان اذا مو هيج ماتمشين عدل
بيلسان:- شنو هالحجي تره ماحب هالمعامله هاي عوفني براحتي
اوس:- اعوفج حتى الكيج واكعه من طولج
بيلسان:- مالك دخل بيه
اوس:- رجعنا على نفس الجملة
بيلسااااان لطولين الحجي وتلوصين
بيلسان:- انت لطوله ودكوم تصيح
اوس:-يعني هسه صرت اني السبب فوك ماخايف عليج وگلبي وياج وماريد نقطة تتأذين شهل عقليه اللي عندج انتي
اختنكت فجأة حجيت بلا وعي مني
بيلسان:- ماعلييييك بيه
باوعلي وسكت ..هز براسه
اوس:- تمام بعد مادخل
راد يكوم رجعت خليت ايدية على وجهي وبجيت
حسيت هالتصرفات مو انا اللي جاي اسويها
شي طلع خارج عني
هاي مو بيلسان ولا حتى روحها
تضايقت مني وحسيت كرهتني ..بجيت من ورايه هلمرة
رجع كعد يمي ماحجه شي بقى ساكت ..لحد ما هديت
وخرت ايدية وباوعتله داير وجهه وضايج
بيلسان:- اسفه
باوعلي وگال
اوس:- إذا خوفي يضايقج لهالدرجة ..مايهمني ولاتحسبين فد يوم من صدك مادخل بيج ..بيلسان شوكت تقتنعين انتي صدك روحي من هالدنيا هاي
بيلسان:- كتلك انا ماستاهلك ومافيدك
اوس:- بلا لواص
بيلسان:- والله
قبل لاكمل سد حلكي بيده
اوس:- هشششش هشششش كلتيها مره ماراح اقبل تكرريها
تقرب مني وقرب وجهه
اوس:- اذا انتي مافدتيني الدنيا بكبرها مابعد تفيدني ولا تهمني ..خلي هالشغله ببالج
بيلسان:- اسفة والله
اباوعله وعيوني مدمعه ..صافن بعيوني ووجه قريب مني
تقرب
غمضت عيوني
ماحسيت غير بوسه خفيفه على جفني
جسمي كله ارتعش
والدنيا كلها وكفت بيه
نسيت انا وين وويامن وشنو وليش
دخلت لغير عالم
ومادري شكد بقيت بهالعالم ..
عطره ضارب بخشمي
وخشونة ايده اللازمة ايدي
ضخامته اللي ضلها مغطيني
وجوده .. وجوده اللي زارع أمان بداخلي ماعرف شون اوصفه