ليلة من العمر

البارت الرابع عشر

رفع عيونه علية وگال:- ابن عمج موافق ..انتي ليش ماموافقه؟
باوعتله باستغراب والصفنة سطرتني
بيلسان:- منو؟ ..اوس موافق!
صفن بيه:- اي وليش مايوافق ..بنت عمة ومالج غيره ولا اله غيرج
بيلسان:- لا جدو ..نحنا حجينا وثنينا ماموافقين
ردت اكمل قاطعني گال بعصبية:- شنو داتلعبون علية انتووو ..هو رجع فتح الموضوع ولو ما موافق ماراح يرجع يگلي احجي وياها
احس مثل الكفخني على راسي من بعد هالجملة
هو كله يرجع يحجي وياي!
لالا اكو شي مامفهوم
مابعد افتهم شهل انسان اللي بشخصيتين
احس وكعت بورطة بس رب العالمين راح يكدر يطلعني ويخلصني منها
خالد:- انطيتج وقت وسمعتج وخليتج تفكرين ..بس لاتنسين انو اني الجبير والجبير يفهم اكثر من الصغير ..لاتحاولين تكسرين الكلمة لان بعدج ماتعرفين عواقبها
بيلسان:- جدو يا عواقب ياكسر ..هذا مو لعبة هذا زواج
انداريت من عليه نزلت عيوني:- وبصراحة انا مامفكرة بهالموضوع ..وحتى وان فكرت انا واوس مانتفاهم مستحيل
خالد:- الولد رايدج
باوعت عليه:- وانا ماريده
عاط:- روفااااااان
نزلت عيوني وحجيت بصوت هادي:- جدو انا اريد اكمل جامعتي ..ما ببالي هالمواضيع والله ليش ماجاي تفتهمني
خالد:- هذا ابن عمج واحقلج من الغريب
بيليان:- ماداگول اريد غيره ..داگول الموضوع مو ببالي
خالد:- ميخالف خليه ببالج
باوعتله:- لا ..ماريد ماريد
تحولت نظرات عيونه
انعكدت حواجبه من بعد هالجملة
سكت لحظات ورجع دار وجهه من عني وگال
خالد:- تريدين تكملين جامعة؟
حجيت بصوت مقهور:- اي جدو حباب
خالد:- ماتدخلين الجامعة اذا مو اوس عاقد عليج
بسرعة رفعت راسي عليه
انصعقت روحي
مثل الواحد انكفخ على وجهه
اريد احجي شي انطق كلمة اكول اي شي
مابعد اكدر ..جتي الدمعة بعيني والغصه تريد تطلع
بعده داير وجهه ويحجي بعصبية
خالد:- واللي عندي گلته ..مو على اخر زمن تمشون كلامكم علينا
اريد استوعب
اريد اصحصح
بسرعة اجا ببالي كلام خاله هاجر من گالت
جدج قاسي ولازم كلامة ميصير ثنين ولا احد يكسر كلمته ..
احس راسي صار بلوكة من الصداع والعصبية
نزلت دمعتي وانا اباوعله
اريده يباوعلي يرجع يگلي اشاقة
لاتنقهرين ..لاتبجين
اللي تريديه يصير!! ..
مو گلت كلشي يوم بعد يوم جاي يتعقد!
كمت وبسرعة كبل لا اطلع گلت:- من رخصتك
كمت افور ..هالشغلة مو بكيفهم
هاي حياتي وانا حرة بيها
ومحد اله الحق يجبرني بشي
بسرعة صعدت لفوك وانا ماجاي اشوف كلشي كدامي من العصبية
ولازمه نفسي كوة ما ابجي
صعدت للغرفة واروح واجي واحجي عليهم بگلبي
هو انا ماناقصني بس يصيرلي هالموضوع
حتى تكمل سالفتي
شسالفة يادنيا شسالفتج وياي!!!
كعدت عالسرير وسحبت التلفون
دكيت على ماما ..اتصل مره مرتين
بالثالثه ردت
مسحت وجهي وعدلت صوتي:- الو
-الو هلا بيسو شونج ماما
بيلسان:- هلو ماما الحمدلله ..انتو شونكم
-مو زينين والله يا امي ..ابوج هاي من رجعتي من عدنا وهو لازمه الصداع ماضل شي ماسويتله ومافاد
بيلسان:- سودة عليه ليش شنو السبب
- والله ماندري وماديقبل اوديه للدكتور
بيلسان:- وهسه وينه هو
- طب للغرفة كال احتمال انام ارتاح
بيلسان:- عمت عيني ..شجاه خلي يرتاح لايروح للشغل هم
- شسويله ماتدريه شكد عنيد ومايفيد الحجي وياه
بيلسان:- راح تخلين بالي ماما
- لا ماما لايضل بالج هسه عالادويه يخف ..المهم انتي شلونج شكو شماكو
نزلت دمعتي مسحتها عالسريع وگلت:- الحمدلله ماكو شي ..كاعدة وردت اسمع صوتج
ماحجيتلها شي ..حسيت مو وقتها وهي اصلا مو ناقصة
وان حجيت شنو راح تسويلي؟
راح اقهرها عالفاضي يكفي انا انمرد خاطري
ماريد ازيدها عليها بعد ..
بقيت الوقت كله فوك بس لليل نزلت تعشيت ويه بيبي وعمة
مالتقيت ويه جدي ولا شفته
الموضوع دياكل بقلبي وعقلي
يالله مثل ماخليته بحياتي شيله ولاتخليني اوكع بي ..
ثاني يوم الصبح
كعدت ونزلت جانو ماعدين بالمطبخ
شافتني بيبي:- صباح الخير عروستنا
باوعت على جدي سوه روحه ملتهي
رجعت باوعت لبيبي:- صباح النور ..بس بعد وكت على عروستنا
جتي عمة يمي وگالت
اسيا:- يمة يوم المبارك الاشوفج عروسه
حجتها وابتسمت
ماردت ارد جيت اكعد ردت بيبي
جليلة:- ان شاء الله ان شاء الله ..عن قريب
باوعت عليها جاي تباوعلي وفرحانة
نداريت بسرعة على جدي وگلت:- جدو انا ما وافقت بعد
خالد:- سألتج تريدين تكملين دراستج وگلتي اي ..ودراستج مربوطة ويه ابن عمج
كمت وكفت على حيلي واباوعله واحجي
بيلسان:- جدو مايصير هيج تجبرني انا ما موافقة
خالد:- مو بكيفج ..نحنا نعرف مصلحتج اكثر منج
بيلسان:- محد يعرف مصلحتي اكثر مني
ضرب ايده عالميز بقوة بحيث حتى فنجان القهوة انجب بالكاع
باوعلي مخنزر:- كلامي مايتكرر داتسمعيييين
حجاها وكام طلع بعصبية بسرعة كامت بيبي وراه طلعت هي وداتخزرني
سحبتني عمتي وكعدتني عالكرسي وكعدت يمي
اسيا:- شبون تتراددين هيج ويه جدج
نداريت عليها:- عمة ماشفتي شريد يجبرني وانا ماريد هسه ..لا اوس ولا غيرن اريد اكمل دراستي شبيكم
اسيا:- زين انخطبوا هسه وابقوا تعرفوا على بعض
بيلسان:- ليش ماجاي تفهموني انو انا ممخليه ببالي هالموضوع ..مو بسبب اوس رافضة ..واساسا اساسا انا واوس مانتراهم
والله لو تنطبك السما عالكاع مانتراهم
اسيا:- روفان انتي فهمينا ..جدج محد كاسرله كلمة
بيلسان:- يعني انخطب لواحد ماريده بس حتى لا تنكسر كلمته!
اسيا:- اي جدج هذا ..وبعدين رايدج لابن عمج مو غريب
بيلسان:- راح اللطم يالله
اسيا:- اللطمي ..سوي اللي تريديه
جدج حجا كلمة وانطا هالموضوع معناها اكيد شايفلج بي الخير ويعرف مصلحتج بي
باوعت عليها وصحت:- ماااااريد مااااااريد
دخلت بيبي وكامت تخزر بيه
اشرت بأصبعها:- اول واخر مرة اشوفج تتراددين ويه جدج
بيلسان:- بيبي ماريد اتزوج ..والله ماريد
جليلة:- ماگلنالج تزويجي هسه ..مجرد خطوبه
بيلسان:- اي وبعد الخطوبة راح نفلش يعني ..داگللكم ماريد
جليلة:- ابقي غني بهالموال ..شكد ماراح تعاندين جدج راح يعاند اكثر
وبعدين منو انتي جايه تكسرين كلمته وتعانديه
بحياتنا كلنا مازدنا كلمة بعد كلمته
بيلسان:- هاي حياتي ليش تدخلون بيه
اسيا:- روفاااان
نداريت على عمتي اشرتلي بمعنى اسكت
تركتهم وصعدت لغرفتي بعصبية
هما اذا اسمي جابريني بي
انوب ماريدهم يدخلون بحياتي؟
هو منو حتى لا اكسرله كلمة ..اوكي جدي على عيني وعلى راسي
بس هاي حياتي
وقراراتي انا الاخذها مو هما
باجر جمعة؟
اي باجر جمعة ..باجر يجون بيت عمي
واشوف اوس واحجي وياه وننهي هالمهزله اللي يريدوها تصير
باجر يا قاتل يامقتول
وانا وياك يا استاذ اوس نشوف منو اللي بشخصيتين وكل شويه بقرار
تلعب وياي؟ ..انا ام اللعب