ليلة من العمر

البارت الثامن

ضرب ايده جدي بقوة على ايد القنفة
كلنا فزينا وباوعناله
باوع لعمي محمد واوس
-التحليل ماسوي
واللي اعرف بي مسوي من وراي لو بعده ديحجي بهالموضوع ماراح يصير خير والله العظيم ..روفان حفيدتي وبنت اخوك وبنت عمكم
روفان بنتنا الضاعت ..وقسم بالله اللي يعاندني اتبرى منا
ومو مهم تصدكون اهمشي اني وجدتكم مصدكين ..صاار؟
دخلت عمتي مدرعمة وتحجي بعصبية
اسيا:- والله روفان بنت علي ..وشيلوا سالفة التحليل والقران عيب عليكم مابقى الا يلعب بعقلكم راوي افندي
تعدل اوس وتقرب من جدي گله:- زين جدي ..فهمنا واحجيلنا شحجيت ويه الرجال
خالد:- يارجال
اوس:- اللي رحت عليه اول مره ووصلك السالفة
خالد:- ابوك يعرف وهاهية ..محد گلك لاتجي ويانه
قيس:- ميخالف جدي ..ماعلينا من كلام راوي
بس نريد نعرف مهما جان انكتبت بأسمنا
باوعلهم جدي وتنهد:- راح احجيها
ولمرة وحده بس وراها تنقفل السالفة وماريد ملحه زايده ..
تعدلوا كلهم بكعدتهم
وسحبتني عمتي كعدتني يمها
وكأنهم متحمسين يسمعون قصة مشوقه
وبده جدي يحجي بالموضوع
-مر علية تاجر قبل جم يوم من الموضوع
كعدنا نسولف وسالفة تجيب سالفة ..حجالي انو اكو رجال خوش ادمي جان يشتري منا بضاعة بس صارله ثلاث سنين بطل من العمل
گال بنته توفت قبل ثلاث سنين وشوي صار كئيب وماعنده شغف بشي
فـ بسياق السوالف كتله ماعنده اولاد ..گال عنده بنية الخ بس يگولون العالم مو بنته الحقيقية انقذها من حادث مادري شنو
شدتني السالفة بس المشكلة التاجر ماجان يعرف الموضوع كله
طلبت منا يحجيها گال ماعرف بس انطاني رقم واحد وگلي هو يعرف بالسالفة ..خابرته وحجيت وياه
السالفة شدتني اكثر من عرفت معلومات ..طلبت اسمه الكامل ومنطقته وعنوانه بالضبط
وكلمن يعرفه وقريب عليه خليته يحجيلي السالفة ..صح اغلبهم ماجان يعرف بالموضوع زين بس كلهم حجوا نفس الشي
انو عنده بنية من قبل عشرين سنة انقذها من حادث وسجلها باسمه بعد ماتوفوا كل عائلتها ومايعرف عن باقي اهلها شي ..
رحت حتى عالمنطقة جانت قريبة من منطقة بيت علي القديم
وسألت عليه بالشهرين اني الرجال مامطلعه من بالي لحد ماقررت اروح عنده اني ومحمد ونتفهم الموضوع كله
بس مارحت لحد ماتأكدت من الموضوع لدرجة تأكدت من راح نروح راح الكي بنت علي وراح اخذها وياي ..
كعدنا وسمعنا السالفة من الرجال وحجالي عن اليوم والمكان والسنة اللي صار بيها الحادث ..وصدك اذا تتذكر محمد
علي بوكتها جان راجع من بيت اهل المرحومة وبعد اسبوع وشويه تلكينا خبر وفاتهم من المستشفى
وسألنا عالطفلة كالوا زلمة انقذها وماخذها وحاولنا طول هاي الايام نلكيه بس ربكم جان قافلها عليها عشرين سنة ..

هو يحجي وعيوني شلال من الدموع
كزبر جسمي من السالفة والكلام كله
جنت مخنوكة واريد ابجي ..واشتاقيت لاهلي
والشغلة الاكبر انك ينشك بيك وتكون كاعد بوسط ناس على اساس اهلك وهما جايين ينظروك بغير نظرة
صعبة اول مره يصادفني هيج موقف بحياتي حتى ماسامعه بي ..
كلهم بقوا ساكتين
سحبتني عمتي لحضنها كمت ابجي واشهك
كام عمي محمد وتقرب مني
طبطب على ايدي وگال:- كافي بجي هذوا انسد الموضوع ..بسج عمو هذوا احنا لو مامتأكدين انتي بنت اخوي ماجان بقيناج بينا
جليلة:- مادكول هالحجي من جان ذاك ابو المصايب ..غثيتو البنيه وهي يتيمة ماخفتوا من ربكم
سحب راسي وباسني من كصتي وهمسلي:- بسج عمو انسي الموضوع
ماكدرت احجي ولا حتى اسكت
ابجي وعيوني شلال اريد اوكف عاد ماكدر
تنهد جدي من غير مايحجي اي شي وطلع
طلع وراه عمي ..باوعت علينا بيبي وگالت هي ودادكوم
جليلة:- جهال وسلموكم موضوع
حجتها وطلعت ضايجة ..
باوعت عليهم عمتي
جان اوس وقيس كاعدين كبالنا
قيس يلعب بتلفونه واوس منتزل نظراته بالكاع ويهز برجله
اسيا:- وانتو هم ..مو اول ماتحجون ويه بعض تتعاركون
انسوا الموضوع وانتو ولاد عم ومالكم غير بعض ..ماعدكم بس هالبنت العم لتخلون الغريب يدخل بينكم ويلعب بعقلكم
قفل تلفونه قيس وباوعلنا گال:- لا عمتي الحلوة ..قابل شصار
اسيا:- ماداحجي عنك ..داقصد اخوك
رفع عيونه عليها وگال:- ماحجيت شي غلط ولا تجاوزت
وخرت من حضنها بسرعة وباوعتله وصحت
بيلسان:- لمن تشككني وتأيد كلام زوج عمتك اللي كاعد يتهم ويغلط على شخص رباني وتعب علية كل هالسنين ولا فكر يشمرني بالميتم ويگول انا مامجبور بيها ..كل هذا وماغلطت؟
رفع اصبعه بوجهي وگال:- اولا لاتصيحين
ثانيا زوج عمتج هم واني ماحجيت ولا كلمة على الشخص اللي رباج وماشمرج بالميتم
بيلسان:- بس جنت دادكول كلامة صح وهو كل كلامة يحجي على ابوية وعلى انو نحنا نصابين وفايتين نجذب عليكم
اوس:- لا تفهمين الحجي من كيفج ..اني جنت اقصد عالتحليل
بيلسان:- وعود شنو قصدك دكلي ليش احترك دمج من جبنا سالفة التحليل؟ ..شنو هالرسالة المُبطنة
اوس:- مو حرمة اني حتى احجي رسايل مبطنة ..من اقصد شي احجيه بوجهج مو خايف منج
عاطت عمتي اسيا:- اووووووه والتالي يعني
رفع رجليه قيس عالقنفة وگال:- لابشرفج جنت متونس
خزرت قيس ورجعت باوعتلنا:- انتو الثنين
قفلوا الموضوع هذوا الكبار سدوه انتو شنو هسه جايين تحجون بي وتتعاركون ..بطلوا عاد اياكم اسمعكم تتعاركون بعد
سكتت ورجعت تباوعلي وتباوعله ونحنا ثنينا واحد مخنزر بوجه الثاني
اسيا:- انحلت السالفة وهذوا ..اتقبل الموضوع اوس
قيس:- موضوع ماصاير حتى بمسلسلات الاتراك
باوعت عليه وصاحت:- قيس
باوعلها ورفع حواجبه:- ها صاير؟
ضحكت مسحت دموعي اباوع على اوس ديباوعلي وضايج
جرت نفس وعافتنا وطلعت
رجع ضهره قيس وگال:- يلا رجعوا كملوا معليكم من كلام عمة
اوس عدل بالكعده وطلع تلفونه ومسوي نفسه ملتهي بي
بقيت كاعدة واخزر بي وقطع هالصمت مره الخ قيس وسألني
قيس:- اكلج ..انتي شمخلصه
بيلسان:- سادس ادبي ..وانقبلت بقسم محاسبة وعلى اساس ابلش دوام بهالاسبوع بس اجت هاي السالفة
قيس:- حرامات خوش قسم ..اوس يعرف جماعات يكدرون يضبطولج هالسالفة حتى تداومين
باوعله اوس وگله:- منو گلك اعرف؟
ماباوعتله ولا سويت نفسي مهتمه لكلامه
بس گلت:- اروح على جدو احجي وياه مو مشكلة
والله لايعوزنا لاحد
تركتهم وطلعت لان اذا بقيت دقيقة الخ
مامسؤوله عن اللي راح اسويه بهالكائن
شكد جنت محترمتة واعجبت بي من اول نظره الصراحة
هسه تبخرت كلها وصرت داشوفه قطعه سوده تعكر العين ..
داعبر اروح للمطبخ سمعت صوت واحد يبشبش
باوعت انتبهت ايسر واكف عالدرايج ويصيحني
بيلسان:- وياي؟
ايسر:- اي داصيحج بس ماعرف اسمج هههه
باوعتله بنظرته شرايد
ايسر:- شصاير
بيلسان:- شنو
ايسر:- جان صوت صياحات وعوكة
بيلسان:- اي ونحل الموضوع
ايسر:- موضوعج؟ يعني يخصج
بيلسان:- اي
ايسر:- هاا عبالي علية يعني
ضيقت عيونه مامفتهمه شديحجي
ابتسم وگال:- هيج هيج ..من رخصتج اروح اكمل نومتي
حجاها وصعد
طلعوا الشباب وعمي بس جدي بقى ويانه بالغده
جان الغدة اكثر غدة هادئ وماكو بس صوت الصحون والخواشيك
محد حجا ولا كلمة احس الكل جان مغثوث
وجدي متعصب مبين عليه
انا الدمعة جانت بعدها بعيني بحيث لو واحد حاجي وياي نص كلمة انفجر بي
وجنت محتاجة احجي ويه امي بس استحيت اعوفهم واصعد للغرفة
حسيت راح يحجون عني شي مادري ليش
للعصر بعد ماخلصنا وغسلنا
گلتلي عمتي اصب الجاي وادخله لجدي انا
وبنفس الوقت جوي عمي وارس وقيس دخلوا للصالة يم جدي
ف صبيت للكل ورحت اقدملهم
هديت شوي بس احس بعد دمي حار
قدمت الصينية لجدي اخذه بدون مايباوعلي
عبرته ورحت على عمي سمعته گال
خالد:- لعد شكد مو مرتاحة هنا اللي تتمنين تطلعين مو بنتنا
باوعتله حجاها وهو يخوط بالاستكان
احس اشخط خاطري من گال هيج
خليت الصينية بصفحة بدون تردد ورحت يما كعدت
بيلسان:- لاااا ..افتهمتني غلط والله
شلون مارتاح وانا ببيت جدي ..وعيونك جدو ماجنت اقصدها العفو والله
رفعه راسه وباوعلي مبتسم
خالد:- كلمة جدو من لسانج كافية ..لاتعتذرين بنيتي اتشاقه وياج
تقربت منا وبسته من راسه
وسحبت ايده وبستها:- والله مو قصدي ..بس تعصبت ومعرفت شنو كمت اخربط بالحجي
قيس:- هاي انتي هم هيج
باوعتله مامفتهمه:- شنو
قيس:- اخينا هم من يتعصب يجفص
حجاها وأشر على اوس ..باوعله اوس وكام يخزره
خالد:- المهم ..حضري روحج بنتي باجر
حتى تروحين نطلعلج مستمسكات باسمج واسم اهلج الحقيقيين
حجا اوس:- اثبات نسب يعني؟
خالد:- اي
باوعله ورجع گال:- معناها لازم التحليل
زكح جدي:- اوووس ..رجعنااا
اوس:- اي غير اثبات نسب مايصير بدون تحليل
خالد:- ماعليك انت ..عندي واحد مقرب هناك وهو يسويلياها
سحب تلفونه اوس بضوجة ورجع ضهره عالقنفة
باوعت لجدي وگلت:- زين جدو انا اريد اكمل دراستي
حط الاستكان عمي عالميز الطبلة وگال:- شمخلصة انتي
بيلسان:- خلصت سادس وهالسنة قدمت طلعلي محاسبة يعني انقبلت بيها
محمد:- اي زين لعد ..اوس يدبرلج هالسالفة
باوعتلهرفع راسه هو وبيده التلفون
باوع لابوه بنظرة مالواحد ضاج
ابتسمت وشلت الصينية وطلعت ...
اوس مابالعني ومارايدني بينهم ..ميخالف مثل ماكاعدلي عالكلمة انا اعرف شنو اتصرف وياه ..
مر باقي اليوم بشكل طبيعي
للمغرب رجعوا بيت عمي وبقينا بس انا وعمتي
حجيت ويه امي شوي بالليل
بس ماحجيتلها احس اكو جان شي بداخلي منعني احجي السالفة
گلت مو انا وبعيده هم اشيلها همومي
مجرد گتلها جان اليوم عدهم عزيمة واللتهيت ..
ثاني يوم كعدتني عمتي الصبح جان
عمي جاي حتى ياخذني نسوي المعاملة مالنسب مدري شسموها
وهو شغلة بهالمكان
تريكنا ووراها اخذ كل المستمسكات من جدي حتى مالتي جانت عنده بس هويتي يمي وطلعنا
وبلشت رحمة الله مالواسطات
بلد مايمشي بس بالواسطات وكل معقد ينحل بالواسطة
بحيث طلبوا التحليل وطلبوا ابويه احمد وجدي
بس هذا الرجال اللي صديق جدي وجان موصيه عالسالفة
حلها بمعرفته مافتهمت شسوه بالضبط بس اللي عرفته نحلت
وبعد تعب ودوخة وروحة وجية
تسجلت باسم روفان علي خالد
وامي لمى عبدلله
كالو انطونا يومين وتكمل
لزمت هويتي القديمة ..مشيت طرف اصبعي على الاسم
"بيلسان احمد" ..
صفنت انا وين ..فجأة طلعتلي حياة وعيشة جديدة ماجانت ببالي بيوم
عشرين سنة انا عايشة ببيلسان
هسه تجي الدنيا وتفاجئني بروفان؟!
احس نفسي بحلم ..حلم مو حلو
حلم بي ضباااب كلشي بي مو واضح
اجذب لو اگول تاقلمت واحد بالمئة ..احس روحي خطار
واريد ارجع لاهلي باسرع وقت ..مع العلم ابد ماحسسوني بشي
ولو راح يصيرلي اسبوع وانا عدهم
بس مادري شعور بداخلي مزعج وغريب
گلبي مامرتاح لكل هالايام والفترة ..
صافنة بالكاع واكفه بالممر واجاني عمي
محمد:- ها عمو ..جايج هسه اوس يوصلج للبيت اني بعد عندي شغلة اريد اكملها
هزيت براسي:- تمام عمي
محمد:- تعاي نطلع عالباب حتى من يجي نشوفه
وكفنا انا وياه برا دقيقة ووصل اوس
بس شافه دخل عمي لجوا .. عبرت الشارع
استحيت والعبره كلها انا افكر شون راح اصعد وياه
وزين كدام لو خلف؟
مشيت وانا مترددة بين كدام يما وبين خلف
اخر شي لزمت ايد باب الكدام
نزل الشباك وگال:- صعدي خلف ..راح اجيب قيس
حجاها بدون مايباوعلي
تنرفزت من تصرفة ..مادري اذا هو هيج طبيعته
لو لان كارهني
خاف هذا هم خايف عالورث؟ اي طبعا اكيد
هي الدنيا كلها ميته عالفلس بقت عليه مثلا! ...
صعدت وماحجيت كلشي
صافنة بالشباك والف حسبه تجيبني وتوديني
شوي ووكف بمكان ..اجانا قيس وصعد كدام
قيس:- السلام عليكم عليكم السلام ..اكلك اليوم سيارتك بيها شي غريب شمسويلها
اندار عليه وگال:- هاا ..كملتو كلشي
بيلسان:- اي بس كالو بعد ثلاث او يومين وتطلع
قيس:- يعني هاهية صرتي بنت عمنا حقيقتًا وهويتًا
بيلسان:- اي
حجيتها وضحكت ضحكة خفيفة
صابت عيني عالمراية لكيت اوس يباوعلي
بسرعة وخر عيونة وعدل المراية وخرها من عني
شويه وگال قيس:- ها صدك تره اليوم هاجر عازمتج يمنا
بيلسان:- شنو ..محد گلي
قيس:- لا اني قيس مو محد
بيلسان:- لا يعني اقصد هسه عرفت منك
قيس:- محد بينا عنده رقم تلفونج حتى نخابرج

بيت عمي محمد يصير بالفرع اللي يم بيت جدي
يعني قريب بحيث واحد يروحلة مشي
وصلنا بيت عمي وهاجر من اول ماشافتني انخبصت بيه
ومن تشوفني بس تبوس بيه
فرشت سفرة شطولها جنها لعشيرة مو لنفر واحد مثلي
لمتهم ماخذه قلبي ومحد محليها بكد تحشيشات قيس على كلشي
من اجنا عمي اللتمينا كلنا
صح هما هم بعد ما اخذوا علية بس خاله هاجر منطلقة
ماخلتني اغسل المواعين بالبداية
بس كادرت اتحمل اكل وابقى كاعدة مامتعودة
بقينا بس انا وخاله هاجر ماعدين بالصالة
عبر اوس من يم الباب وكف وگال:- اني صاعد انام
هاجر:- اي حبيبي ماعليك من روفان ..اليوم راح تبات هنا
حجتها وباوعتلي فرحانه ..باوعلي ورجع باوع لأمة وگال
اوس:- بس شسمة ..بيبي خبرت گالت رجعوها المغرب
هاجر:- لاااا
لزمت ايديها وگلت:- ميخالف خاله اجيكم غير مرة
حك بشواربة وگال:- اخذي رقم قيس وخبريه إذا ردتي ترجعين
هاجر:- قيس طالع مايرجع لليل
ماباوعتله ولا هتميتله
باوعت لخاله وگلتلها:- عادي انا ارجع عرفت الطريق
اسلوبة وتصرفاتة وكلامة يخلي الواحد كوه يكرهه
قبل لايطلع گال:- زين ...
.
.
.
للحكاية بقيـــة

بدون مراجعة اعتذر عن السحكات💙

#منة الله_الأيوبي