ليلة من العمر

البارت الثالث والعشرون

ثاني يوم كعدنا نحضر بالغراض
حضرت جنطة مليانه هدوم لان گال عمي باردة
صح جنت مو حابة الروحة
بس احس شي بداخلي شوي متلهف
يمكن لان اول مره بحياتي راح اسافر واصعد طيارة
وانوب تركيااا مو اي مكان ..
يالله تذكرت نورهان
شكد جانت امنياتنا انو نسافر فد يوم من نكبر ..نصعد الطيارة
ونمشي بالمطار
وينج يا بعد اختج وينج!!

موعد الطيارة جان فجر الخميس ساعة ستة
بس لازم نحنا من ساعة ثلاثه هناك لحد ما يكملون كلشي على وقت
ماكدرت انام زين ليلتها
كلش جنت مترتره ..حاولت اخابر امي ماردت علية
ضليت اللوب بمكاني بس اريد عيني تاخذ عالنومة عاد
توني غفيت حسيت على عمتي جاي تكعدني
باوعت للساعة جانت ٢ ونص ..كمت وكوة جاي امشي من النعس
غسلت وبدلت ..سحبت جنطتي ونزلتها لي جوا بس ماكدرت اطلعها
وعمتي هم تروح منا وتجي منا اشوفها كل شويه تدخل على ايسر
واعرف بيها ابد ماحابه الروحة علمودة بس هو تحسن حتى جابوله عكازات وبدا يمشي عليهن
كعد جدي ويانه حتى يودعنا
اليوم لاحظت شغلة انو علاقة جدي ويه عمتي كلش قوية
يعني يمكن يحبها اكثر من الكل
اجا فوك راسها جنا كاعدين بالصالة ننتظر اوس
خالد:- ها ابوية كملتو كلشي
اسيا:- اي يابة مابقى شي
خالد:- خوما راسج ديوجعج
اسيا:- لالا
خالد:- اشتريلج من الصيدلية دوا خاف تتعبين بالطريق وراكم بعد وين
حجاها هو وديمشي دخل للحمام
جنت داغفي على روحي من التعب وبس اسمع صوت عمتي يمي تستغفر
لحد ما سمعنا صوت سيارة اوس
دخل جنت كوة دافتح عيوني ..بس ركزت عليه مادري عيني ضربت راسا عليه
جان لابس بلوز اسود ويه بنطرون اسود وشعره شبه مخربط بس مزين لحيته مخففها
اجا ديسحب جنطتي وانا كمت احاول اشيل جنطة عمتي واطلعها
شافني اجا علية:- شداتسوين
بيلسان:- اساعدك
دفع ايدي بهدوء من ايد الجنطة:- دلزمي روحج بالاول باوعي عيونج شون صايره من النعس
اخذهم وطلع
كمنا انا وعمتي بالمطبخ دنعدل بنفسنا وحجاباتنا
طلع جدو من الحمام:- ها اجا اوس
بيلسان:- اي جدر
شمر المنشفة عالكرسي وطلع ورانا وكف بالباب
الدنيا جانت بعدها ليل ..دخل الغراض كلهم بالسيارة
خالد:- دير بالكم عليهم ابني وانتبه من الطريق دنيا لليل وهسه الشوارع عتمه
اباوع على اوس حتى هو نعسان وطالعة روحه بس ديهز براسه
سلم على عمتي وسحبني باسني من راسي
يمكن السبب اللي مخليني مرات احسه ماجدي
هو لان من انا وصغيرة ماعشت هالوضع وهالحنية
ماتربيت ويه جد ماواعية عليهم ..يعني اجدادي اللي من اهلي ذولاك كلهم جانو متوفيين قبل ما اوعي ..
صعدنا بالسيارة سلم على اوس وشفته باسه من راسه واجا صعد
اسيا:- ادخل يابة بارده لاتبقى برا
خالد:- لالا دروحوا انتو بالاول
بقى واكف بالباب لحد مامشينا ..دك هورن وطلعنا
الجو جان حلو بارد وهم لان دنيا ليل
كرفصت عند الباب ورفعت رجلية
جنت كلش نعسانة وبردانه بنفس الوقت ..انتبه علية اوس من المراية
ندار شافني ..جان معلك قابوطة عالگشن مالته
سحبه ومدلياه بدون مايحجي شي بس انطانياه
اخذته ولفيته علية ..كفخني عطرة على خشمي
خلاني اصحصح من قوته!!!..
مادري ان جان الطريق طويل هواي للمطار
لان جنت صافنة بالجامة وضاربة دالغة وكوة داحاول افتح بعيوني
احس بيهم ملح من النعس ..
وصلنا المطار
يمة احساس غييير حسيتني من ذوله اللي بالتلفزيون
دخلنا واوس ورانا
كعدنا بالصالة انا وعمتي وراح اوس اخذ الاوراق والشغلات كلها يما يكمل الاجراءات
خليت راسي على جتف عمتي
اسيا:- الله يسهلها علينا يارب
بيلسان:- شنو اول مرة تسافرين
اسيا:- شنو شايفتني بنت الاوادم كل يوم من دولة لدولة
بيلسان:- شعجب لعد
اسيا:- شعدنا يابنتي ..اوس وقيس بس اكثر شي يروحون علمود الشغل والمحل
بيلسان:- وليش مارايحة وياهم
اسيا:- لا يابنتي ماكدر جنت اعوف بيبيتج وجدج بس غير هسه انتو جبرتوني
ضحكت وباوعتلها:- انا اكول انتو جبرتوني وانتي دكولين انتو جبرتوني
اسيا:- انتي انجبي لاتخليني افتح هالموضوع مره الخ
بيلسان:- اوووه سكتت سكتت