ليلة من العمر

البارت الرابع

نشرت هواي اليوم بس بس تعويض عن الايام الفاتت
وهم حتى اللي حابب يقراها هسه راح يلكي بارتات هواي يصبر روحه لحد ما انشر بعد
—————————————————-———————-
*نرجع لقبل عشرين سنة من وقتهم الحالي*
"جنا راجعين من بيت اهلها
بسمة:- احمد خفف السرعة والله گلبي ديوجعني
احمد:- تره سبعين جاي امشي
بسمة:- ياسبعين حتى الطفلة ببطني كامت ترافس
احمد:- ها ولج جاي تتواكحين من هسه
خليت ايدي على بطنها واتلمس الطفلة اللي مكملين بكلشي وبس منتظريها تحن علينا وتطلع
بسمة:- يمعود دنتبه للطريق هسه
لحظات نداريت وماشوف الا حادث كبالي
من فزتي بسرعة شحطت ووكفت السيارة
احمد:- الله اكبر
بسمة:- ياستار يالطيف يالله شنو هاي
انزل شوف شصاير ..

الناس ملتمه والشارع سادي من الازدحام
نزلت السيارة جانت مگلوبة والعالم حوليها رحت يمهم
فززني صوت عجوز يمي يبچي
سألته:- خير عمي ..شكم نفر جانو؟
-عائلة يابني وجاي نسمع صوت طفل ومحد ديكدر يطلعها والاسعاف هاي صارلنا ساعه متصلين وتاخروا
الواكفين كلهم جانو زلم كبار بالعمر
الطريق جان طريق سفر مو أي واحد يجي منا
تقربت من السيارة صوت طفل ديبجي بنحيب
تقربت اكثر وگتلهم:- بس ايدكم وياي اطلع الطفل
حاولت بالكوة بكل ماعندي من قوة وطاقة دخلت للسيارة هي ومگلوبة
لكيت طفل يطلع عمرة شهرين كلش صغير وكوه وجهه يبين
بس سبحانك ربي سبحانك جنا ملاك وجهه ابيض كطن ونوراني
سحبته لحضني وطلعت للعالم انخبصو اكثر
اباوع الام والاب
شحجي! منتهييين ماكو لاحس ولا نفس بيهم
الاب طاك الاير باك بوجهه مخربله وجهه وملامحه كلها والام فاقدة
دامسح على وجه الطفل واحاول اسكته
سمعت صرخة واجاني واحد يركض علية
-خوية الحك الحرمة اللي بسيارتك جاي تصرخ وتصيحك
احمد:- يالله سترك
عقل مابقى براسي رحت ركض عليها
احمد:- خيرج شصاير
بسمة:- احمد راح اولد ..راح اولد احمددددددد روحي راح تطلع
احمد:- اكيد لو بس تقلصات مو وقتها بشرفج
بسمة:- ياتقلصات رااااح اموووووت
جرتها بعيطه انخبصت روحي بعد ماعرف شسوي
والطفل بيدي رحت يم العالم وگلت لواحد
احمد:- عمي مرتي ولاده اخذو الطفل سلموه للشرطة
صاح واحد من بينهم رجال جبير
-ابني مادام رايح للمستشفى اخذ هالجاهل وياك خليه هناك ..الشرطة بشنو راح تفيده غير تبهذله حرام علينا حتى
كلهم ايدوه بالحجي وانا ماجان عندي وقت افكر بشي ابد
وصلتني عيطة بسمة كطعت سلسلة افكاري اللي داحاول اجمعها كلها
قربت الطفل لصدري ورحت ركض بوجهي للسيارة صعدت
اسوق والطفل حاطه على صدري وهو يصرخ وبسمة تصرخ
وانا انشلشت روحي
بسمة:- منو هالطفل احمددددد
احمد:- طلعته من الحادث بس هو باقي عايش بين عائلته
بسمة:- وشجايبه وياااااااك
احمد:- هسه شجاج عوفي الطفل
بسمة:- احمد طك مي راس الطفل احمددددد
اباوع الكشن وهدومها صارو مي
انثولت ماعرف شسوي صحت:- شنو هذاااااا
بسمة:- مي مالطفلللللل
احمد:- يعني شنووووو
بسمة:- يعني استعجلللللل
صرخاتهم صرعتني والطريق للمستشفى شوي بعيد واساسا بهيج مواقف واحد يصير الطريق عليه اطول من طريق لباكستان
وصلت المستشفى بالف يالله وياعلي
وكمنا نتراكض ببسمة والطفل بعده بيدي
شفت ممرضة بسرعة انطيتها الطفل تخليه بالخدج ووكفت انتظر بسمة تولد ..
من بعد كل هالخبصة وهالدوخه
بعد ساعتين ونص ولاده
طلعت الدكتوره وبيدها طفلة انطتني هي
اباوعلها سمره وحواجبها ثخان
سود وعيونها متوسطه بس بعد ممبين لونهم
كبرت بأذنها وانا اشم ريحتها يالله اول طفل شكد شعور غريب
دخلت على بسمة وبوست راسها وتحمدتلها عالسلامه
جانت منتهيه عالاخير
كوه فتحت عيونها ووجها اصفر شاحب كموني
صاحتني الدكتورة رحت يمها
-مبروك ما اجاكم ويارب تتربى بعزكم ودلالكم
احمد:- الله يبارك بعمرج شكرا
-رايده اكلك على شغلة
تغيرت ملامح وجهيي:- اي خير ان شاء الله
-خير ان شاء الله ..هذا اول طفل الكم؟
احمد:- اي نعم
-باوع ماحجيت هالموضوع كدام ام البنية ..زوجتك بُنيتها حيل حيل ضعيفة وماضم عليك الصراحة جنا راح نوصل لمرحلة صعبة جدًا اليوم
احمد:- مافتهمت شنو يعني
-قدر الله ..جنا راح تفقدها بس ربك حماها وحفظها
لاتخاف هي هسه بخير وبحالة ممتازة لكن طلعنا بصعوبة هالمرة ربك وحده نجاها وكتبلها عمر ..المرة الجاية ماعتقد لا جسمها ولا گلبها يتحمل سواء العملية أو البنج
صفنت بوجهه:- يعني شنو ..مازين عليها العملية؟
-اني داحجيلك الصراحة واني دكتورة وانت لازم تتفهمني ..الولادة الثانية ماعتقد راح تتحملها وتطلع منها لاقدر الله
سكتت ماعرف شنو احجي وشنو ارد
صارلنا سنتين متزوجين
وعانينا لحد ما وصلنا لهالحظة وهاي راح تكول اول واخر مرة!!
اخر طفل!!
طلعت من يم الدكتورة وانا راسي مسطور
شراح احجي شراح اكول لبسمة
جنت دامشي واصفن احجي ويه روحي
الحمدلله على اللي صار
لو ليش ياربي هيج صار؟!
فززوني وهما يصيحوني بالتسجيل الطفلة بالمستشفى
رحت واتفاجئة انو كل ظنهم الطفلين هما اطفالي!
والطفل اللي طلع من الحادث ايضًا بنية ..
وكفت صفنت ويه نفسي قبل ما اسوي اي شي
فكرت فكرت
وكلام الدكتور وكلام الناس اللي جانو هناك ومنظر بسمة وهي طالعة من العملية وجملة الدكتورة "الله وحده نجاها"
افتر عقلي ومابعد اكدر استوعب شديصير
كول هيج وبدون وعاتي سحبت وسجلت الطفلتين بأسمي على انهم توأم
ولاحد شاف ولا احد درى ولا احد سألني حتى الممرضة اللي اخذت الطفلة مني اول مادخلت شافتني وماحجت كلشي !! ..
بقينا ليلتين بالمستشفى محد اجا من اهلنا لان بعيدين وكلنالهم ماراح تفيد جيتكم بشي نحنا راجعين اصلا
وثاني يوم من دانطلع رحت على بسمة شفتها شوي صحصحت ورجع لون وجهه تقريبا وحجيتلها الموضوع
صفنت بوجهيي وسكتت :- سجلتها بأسمنا؟
هزيت براسي بمعنى أي
بسمة:- وراح نربيها نحنا؟
احمد:- الطفلة اهلها توفوا وتيتمت وربج اله حكمة خلاها بطريقنا
بسمة:- بس نحنا عدنا طفلة مو محرومين!
احمد:- بس هالطفلة راح تنحرم من اهل ..وطفلتج راح تنحرم من اخ واخت
بسمة:- مو ضروري يكون عدها نربيها لوحدها
تقربت من يمها :- شضارج لو ربيتي طفلين؟
بسمة:- شنو جابرني اربي طفلة مو بنتي؟
لزمت ايدها وباوعتلها:- الطفلة يتيمه ويمكن ربج رزقنا بيها ويمكن هي اللي كومتج بالسلامة ..شنو خسرانين لو ربيناها واعتبرناها ويه بنتنا؟
بسمة:- احمد الا ماعدها عم او خال هسه ديدورون عليها مخليها بالملجأ ونفضها
احمد:- اللي ديدور عليها راح يلكاها وصدكيني الا ماراح يجي يوم وترجع لعند اهلها وبعدين مو حرام تعذبيها تخليها بالملجأ وهي بهالعمر؟ ..نربيها نحنا ونكسب بيها أجر وهم باجر تكبر وتصير اخت وسند لبنتنا ياحبيبة
باوعتلي بعصبية وسكتت
بالبداية هواي عارضت اجيبها يمين تجيني يسار
لحد ماشافت الطفلة لانت شوي بس بقت حسيتها مو راضية
اول ايام جانت تعتني بس ببنتنا وانا اهتم واوكل وانظف الطفلة الخ
جانت ماترضى حتى تطخها
الكرايب كلهم حتى اهلي واهلها گلنالهم جانت حامل بتوأم بس ماحجينا لاحد خفنا من العين والحسد والطفلة عمرها طلع شهر وشوي وناعمة مايبين عليها ..
شوي شوي بدت بسمة تتعلق بالطفلتين
وسميناهم على نفس الوزن
بيلسان ونورهان
وهيج مشت على انو نحنا عدنا بنتين توأم ...."

يحجي وانا صافنة والدموع جامدة بعيني
اريد اخذ نفس ماكدر احس اختنكت ودخل شي بصدري
نزل راسه وگال:- وصدك اجا اليوم اللي يخلي اهل هالبنية يوصلولنه عن طريق ناس معارف وكومة طرق دلوهم علينا بس لان ربج كاتبلهم ترجع لحضنهم
عيوني تترقبه اريد يرفع راسه ويباوعلي
غووشت عيوني بالدموع ..نطقت بس كوة
-وهالطفلة ..منو بينا؟
جنت اتمنى يگول نورهان
جنت اتمنى ماينطق اسمي لو يكول انتي
اباوع على حلكة واترقب الكلمة
حجت امي بصوت مبحوح
-انتي ..

نداريت عليها جانت واكفه وراي
منزله راسها وعيونها للكاع ودموعها شلال
وكفت بيه الدنيا بهاللحظه هاي
اباوعلها وارجع اباوع لابويه واصفن بيهم
بيلسان:- والجماعة اللي اجوي البارحة؟
-ذوله بيت جدج
غصيت:- لا بابا لاااا لادكولها
انا ماعندي غيركم انتو اهلي ...
كامو يبجون ثينهم ..مسحت وجهي وگلت
بيلسان:- منو يگول حجيهم صحيح احتمال غلطانين بالعنوان
باوعلي ابويه وگال:- لا صحيح الزلمة اللي جان بالحادث ابنه يصير وجانو راجعين من عدهم بيومها على نفس الطريق ونفس اليوم واكو ناس داليهم واصفيلهم علينا انو اخذنا الطفلة
بيلسان:- بس انت گلت محد يدري بهالموضوع والكل يعرف انو البنتين بناتك
باوعلي ويحجي بنحيب:- بنتي قدر ربج هذا من يكول للشي كن فيكون ماعرف شون ومنو سألين بس ماكو شي يبقى مضموم للأبد ..ماكو
حجاها وكام يبجي ..كمت كرفصت يم رجليه واباوعله
بيلسان:- يعني راح ياخذوني؟ ..لا بابا لاا الله يخليك ماريد
ماما غصت بدموعها وابوية مايباوعلي من كد البجي
رفع راسه وگال:- باجر جايين ياخذوج يابنتي
وخرت من يما مصدومة
لحد هسه مامستوعبه شديصير
يارب يطلع حلم
يارب يطلع كابوس اي شي
المهم اصحى من هالموضوع
صدمة صدمة انا اللي بحياتي مانمت ببيت غير بيتنا وبعيد عن اهلي
هسه يجي الوقت اللي افاركهم بي؟!
هزيت براسي بمعنى لا:- ماريد اروح ..ماريد
حجيتها وبجيت
شعور مو حلو حسيته
على غفلا يطلع عندك غير اهل
واهلك اللي ربوك وتعلقت بيهم كل هالسنين واللي مستعد تضحي بكلشي علمودهم ..يطلعون مو اهلك!!

مرت هالليلة هاي بشكل موجع
موجع كلش ومؤذي
نمت بحضن امي وانا ابجي وهي تبجي
صعبة صعبة منين ماجيبها صعبة
بعدني صغيرة وبعدني ماشبعت منهم ومتعلقه بيهم
والله مو مال اعوفهم والله ! ...
ثاني يوم كعدت مسطورة
بداية الاسبوع اللي جنت متحمستله من شهر
هيج يمر علية ويجيني؟!
بيتنا انكلب خبصه
جوي بيت عمامي كلهم وخالاتي
البنات حوليه مسطولين مايعرفون شيحجون
ايدي كامت ماتلزم غرض كلهم هما ساعدوني بلم احتياجاتي وهدومي
انطونه خبر انو راح يجون ساعه خمسة العصر
احس جايين ياخذوني على حبل الاعدام ..
يمكن تشوفوها مبالغه
وتشوفوني داكبر الموضوع بس صعبة من راح تتغير حياتك ١٨٠ درجة والاصعب انك راح تبدي بمكان انت بحياتك ماشفته ولا تعرف اي شخص بي ومجبور تبقى
صعبة من على غفلا يجون ناس ويگلولك نحنا اهلك
شون وليش وشوكت !!
مادري مادري بس هي السالفة معقده وصعبه ...
اندك الباب كلنا فزينا وانخبصنا
وانا روحي احس كامت تأذيني
دخلوهم للاستقبال ونحنا كاعدين بالصالة جنا بعزا
البنات يمي يحاولون يصبروني ويحجون شغلات تضحكني بس ماكو انا عبوس قمطريرة ...
شوي وطلع حسين باوعلي وجهه ضايج معبس
حسين:- خلي شي على راسج وتعاي دخلي يريدون يشوفوج
ردتله خالتي:- ليش شدعوة راح ياخذون وياها صورة
باوعتلي امي وعيونها وارمه من البچي وگالت
-كومي ماما ذوله مو غريبين عليج ..بيت جدج هذول
تنهدت وكمت داعبر من يم حسين وكفني وهمس
حسين:-بيلسان گولي اي شي هسه واني اوكف بوجه الكل والله ! ...
.
.
.
.
للحكاية بقيــــة

#منة الله_الأيوبي