ليلة من العمر

البارت الأربعون

جتي بسرعة لزمتني من شعري وجرتني ادفع بيها ماكدر
بيلسان:- عوفي شعريييي ..ااااخ عوفينييي
نعمة:- ياجذابة يا حياله روحي للبيت الحراميه اللي لفج انتي واهلج الحراميه
بيلسان:- عوفينيييييي
لزمتني وتسحبني وسحل من شعري الدرج كله
مابيه اقاومها هي اضخم مني ولازمتني باحكام
جتي بنان ركض:- عمة عوفيها الله يخليج مو هيجي عمةةةة
رادت توخرني من بين ايديها دفعتها وصاحت:- وخرييييي من وجهي انتي الثانيه ..
الا علمتج هالبربروووك هالحراميه والحياله ولج والله جان گلبي حاسس بس اهلي الغشم صدكوا بيكم انتي وابوج الجذاااب
بيلسان:- ماسحملج تمسين ابويه بكلمة اااااخ
نعمة:- اييي مو طابخيها ثنينكم سوه زحمة على ذيج الشوارب الجانت بوجهه
اوخر بيدها اللازمة شعري ماكدر وتشنجت ركبتي وهي تسحب بيه
بيلسان:- تروحين فدوة لقندرته والله
نعمة:- ايييي من يدري من اي مزبله جايين وطالعبن من الدنياااا
انا اصيح وهي تصيح ولازمتني من شعري وتسحل بيه
نزلتني جوا وانا بس اصرخ
بنان تريد توخرني من يمها ماتكدر بنان انعم مني بعد
اباوع وكعت عيني على بيبي كاعده بصفحة وتباوعلنا كلشي ماسوت اي ردة فعل ..اباوعلها واصرخ:- بيبييييييي ساعديني الله يخليج
نعمة:- بيبي موووو يا حيوانة بيبي مو ..ولج مالج مكااان بعد يمناااا روحي للبيت اللي لفج انتي وجيفتج وخياساتج ولج وييين بعد تجذبون انكشفتوا بعد هاهيه
بيلسان:- عمة والله انا مادري شي والله العظيم ماااادري بس عوفينييييي
نعمة:- اي اي دروبكم لعبوها على غيرناااا يا حراميةةةةة
سحلتني سحلة بعمري ماراح انساها بحيث هي وداتسحل انسلخ فخذي بحافة الكاونتر بالمطبخ هي وداتفعني
روحي شاطت كمت افرفح مادري شسوي بس اصرخ وهي تسحل ولا هامهما تريد تطلع نار گلبها اي قوة اتجردت مني بهاللحظة سبحانك ربي
اسمع بنان تصيح وتخابر بالتلفون:- تعاااال لحكوا روفااان تعاااال الله يخليك عالسريع
كمت اصرخ:- خبري اووووووس بناننن عليج الله
نعمة:- هالوليد قشمرتي عليه ووكعتي بحبج
وييين تروحون من ايدنا ويييين عبالكم نبقى على عمانا الله لا يوفقكم دنيا واخرى الله لا يرحم ابوج
الله يشوفنا بيج يوم اسود اكثر من اليوم اللي شفناج بي وجيتي لهالبيت من عساها تطلع بيكم
بيلسان:- عوفينييييييي اااااخ ماماااااااا ...بناااان لحكينييييي
طلعتني لبرا وهذا كله سحل ماكدر اقاومها ماحس الا فتحت باب البرا
وشمرتني شمره شون تشمرون الجيس مالزباله عينن هيج
وكعت عالسلخه ووجهي على الشارع
نعمة:- ماشوف وجهج هنا لا وحق الله اذبحج بيدي يابنت حراميةةةةة
حجتها وسدت الباب بقوة
اريد اكوم مابيه بعد ..كمت اسحل بس اريد اتعدل
اريد اخذ نفس بعد ماكدر
عيوني غووشت وراحت الالوان ..گلبي لحظتها يمكن وكف
اريد اجر النفس ..اريد احس بشي بعد ماكو
روحي رايحة من وجع رجلي ..
ماحس الا سيارة وكفت بسرعه شحطت يمي
نزل قيس واجاني ركض
قيس:- روفااان شصااااير ..روفااان كومي كومي
ماكدر حتى ارفعله ايدي
شافني منتهيه ادنى مني سحبني وكومني صعدني بالسيارة كوة روحي رايحة ماداحس بجسمي
رجع صعد وشحطها عالسريع ومشى
انطاني كلينكس وانا بس ابجي بهدوء
دموعي داتحركني من الوجع ومابيه الحيل حتى احجي من الصراخ
بيلسان:- قيس عليك الله فهمني شصاير
قيس:- روفان طلع التحليل
سكتت وانا اباوعله انتظره يكمل
كامت شفتي ترجف
باوعلي:- طلع مو متطابق
صفنت بي ..تجمعت وجمدت الدموع بعيني:- يعني شنو
قيس:- حجي عمج صحيح
بيلسان:- لا مستحيل لا عيدو مره الخ اكيد بي غلط ..
اوس وينه اوس وييييينه
صاح:- هاي من الصبح نتصل عليه ماكو
بيلسان:- وانت وين ماخذني دقيقةةة
قيس:- مادري والله مادري بس روفان
باوعلي ورجع گال:- من الاخير تره نلاصت بالاخص بينج وبين اوس
بيلسان:- شنو ..انا
انا مالي علاقه انا شعليةة خبرلي اوس حباب
قيس:- ماعليج ادري بس الكل حقد هسه والكل يريد يخرب ويطلع حرگة گلبة وماكو داعي اگلج انو اكو ناس جانت منتظره هالشي
اباوع كدامي وعيوني تنزل واحس الدنيا صفرت كلها
جسمي يرجف رجلي تصل علية من الوجع ووجهي احس جاي تطلع منا حرارة من خدي اللي وكعت عليه
وكف بالشارع العام بصفحة
ودار وجهه
بيلسان:- شراح يصير بعد جدو وعمو محمد وين
قيس:- جدي بالشغل وابويه جان يم ابو التحليل هو وراوي
كام يزفر بضوجة ..باوعلي:- مسحي وجهج ديطلع منا دم
لزمت الكلينس وامسح بوجهي والدموع التنزل احسها جاي تجويني
للحظات وجتني سيارة سريعة شحطت ووكفت كبالنا
فزيت باوعت لكيت سيارة اوس
بسرعة فتحت الباب ونزلت امشي وانا اعرج بسبب رجلي ..نزل هو هم
اجا علية شون الوالده اللي مضيعه ابنها
هيجي بالضبط رحت ركض عليه وسحبني لحضنه
ابجييييي بحرگه يمكن بجي سنين بجيته بهاللحظة هاي
بيلسان:- اوس شفت شسوو بيه اوووس وينكككك عني وينككك
ساكت كلشي مايرد بس حاضني وعاصرني بحضنه
وخرت راسي اباوعله مايباوع بوجهي
سحبت وجهه علية عيونه يوخرهم
جانت عيونه حمره دم
بيلسان:- اوس باوعلي ..باوعليييييي اووووس
رفع عيونه
هدتني النظره ..اللمعه ماكو !
مختفي كل الامان والحب اللي جنت اشوفه بيهم
هاي مو عيون اوس
ولا هالنظرة اللي جان يباوعلي بيها ..
عيوني بس تصب
بيلسان:- انا مالي علاقة والله ماجنت ادري الله العظيم
وداعتك وروح بابا
فرك عيونه ولزم ايدي ومشاني فتح باب السيارة الخلف وطلع جاكيت طويل لفه علية لأن جنت طالعه بالتراك البجامة مالنوم والبنطرون مشكوك من الرجل
عافني وصعد
بسرعة فتحت الباب وصعدت يما وعيوني تراقبه اريد اي كلمة لو ردة فعل منا
بيلسان:- اوس احجي شي الله يخليك لاتخليني اموت بعد اوووس حبااااب ليش هيج دتعاملني
احجي كول اي شي ..لاتخليني هيج الله يخلييييك
اوووس
حجه بصوت مبحوح:- ماعندي شي احجيه هسه
بيلسان:- يعني مصدكهم؟
مصدك انو انا اللي يد بهالشي مصدك انو انا جذبت عليكم؟
اوس انت اكثر بشر عرفتني بهالدنيا واكثر واحد يعرفني من نظرة عيوني
سحبت وجهه علية وصحت
بيلسان:- بااااوعليييي باوع لعيونييي
شوفني داجذب لو لاااا باوعلي وشوووفني زيييين اوس لاتموتني بقهري شبيييك جاوبني
يباوعلي وساكت بس ..نظرات عيونه قتلتني الف مره
انهديت بالبجي ماعرف بعد شسوي
وخر ايدية وتعدل شغل السيارة ومشى
امسح بوجهي وابجي احس لعنة وداعيشها
اريد بس اصحى من هالكابوس
طول الطريق ساكت مايحجي شي ..اباوعله ساااكت والهدوء محتله
وانا بناري احترگ ..
اباوع طريق بيت اهلي
كلشي ماحجيت رجعت راسي عالكشن واصفن
اباوعله ايديه وصكته عالستيرن طالعه دماراته
اريده بس يحجي شي لو يغلط انا قابله بس لا يعوفني بهالوضع
وكف كبال بيتنا مابيه حيل حتى انزل
باوعتله راسا دار وجهه للصفحة الخ لمحته دمعت عيونه
ماحجيت عفته بدون ما احجي شي ونزلت
بس نزلت وسديت الباب مشى عالسريع وعافني
دكيت الباب طلعت بوجهي خالتي ضربت على صدرها وصاحت
لبنى:- يمة اسم الله الرحمن هااااي شنو
بيلسان:- ماما وين وليش ماداتشيل التلفون
لبنى:- بنتي تلفونها انكسر اليوم جبناه ..شبيييج شبي وجهج
تجاهلتها ودخلت ركض ادور على امي
ادور بالغرف وبالصالة ماكو
جانت كاعده بغرفتها
دفست الباب بقوة ودخلت فزت من شافتني:- بيلسااان شكو
كمت اصيح:- هسسسسه تفهميني السالفة كلها
جتي خالتي:- يمه بيلسان اهدي شبيج
صحت:- وخروووو عنيييي
رجعت باوعت لامي:- شو ساكتةةةةة داكلج احجيييييي
اشرت لخالتي تطلع ..طلعت وسدت الباب
كعدت كبالها كرفصت:- ماما الله يخليج فهميني ابوس ايدج كوليلي الموضوع شديصيييير راح اموووت
لزمت وجهي وكامت تبجي
وانا صافنه بيها منتظرتها بس تحجي
- والله مالي دخل انا ووالله ماردت يصير كل هالشي بس ابوج السبب هو اللي عاند
بيلسان:- شنو ليش ..شنو الساااالفة وبابا شمسوييي
كامت تبجي:- لمن اجوي بيت الشيخ خالد وكالوا حفيدتنا يمكم خفنا ..ابوج خاف يكللهم بنتهم ماتت
شفتي ترجف كتلها:- نورهان؟
هزت براسها بمعنى اي ورجعت تحجي وتبجي:- كتله هاي بنتنا شون نتركها بيدهم يكلي لعد هسه يكولولي ماكدرت تحافظ عالامانه واني مو كدها وذوله اهل عشاير ماكدر ادخل بمشاكلهم اكيد ماراح ياذون بيلسان نخليها يمهم
صفنت بيها ..لساني انعقد:- ماحسبتو حساب لبعدين؟
الام:- ابوج والله ابوج
حجتها وكامت تبجي
عقلي افتر وخرت من يمها وانا راسي راح يموتني
رجعت باوعتلها:- عمي شون عرف واجا هد علينا
رفعت راسها باوعتلي وتحجي وتشهك:- مو جان اكو سالفة بيع البيت والورث
بيلسان:-اي؟؟؟؟
- خفت ياكلون حقج يا بنتي ..ونزلك من لساني وحجيتلهم الموضوع
اباوعلها وعيوني تصب ..كمت وكفت
احس الدنيا افترت بيه ..انا وين وشديصير؟
ماحجيت بس كلمة وحده
باوعتلها وگلت:- ياويلكم من الله
وطلعت تلكتني خالتي جايبتلي مي
لبنى:- اشربي واهدي يا خالتي باعي شحالج هاي ليش صاير وياج هيج
بيلسان:- خالتي عوفيني الله يخليج
حجيتها وكعدت بصفحة وبس ابجي
ماعرف شنو بعد راح اشوف ..ماعرف شراح يصير بحالي بعد
ابجي ومابيدي شي غير البجي ..ضعفت ضعفت
انكسرت الف كسره احسني ...
نمت بمكاني من البجي والتعب
ماكعدت لحد ثاني يوم الصبح
اول شي ردت ادور على تلفوني بعدين تذكرت انا اصلا ماجايبته
فزيت على تلفون ماما ادور عليه جان كل ظني راح يتصل اوس لو يحجي شي
بس خاب ظني!
مالكيت بس رسالة وحده فتحتها من رقم غريب
"كل الغراض والذهب ترجعلنا والعقد ينفسخ ولا احنا نعرفكم ولا بعد تعرفينا"
رجعت ايدي ترجف ..عيوني داخت
عالسريع طلعت المكالمات ودكيت على اوس
مره مرتين تلاثه فتحه راسا حجيت
بيلسان:- شنو هالرسالة
حجا بصوت مبحوح:- يا رسالة
بيلسان:- اللي دازيها لماما
اوس:- مادري يارسالة
بيلسان:- يعني مو انت دازها
اوس:- بيلسان اني بحال ادز رسايل هسه
صحت بي:- شبيييك شبيييك فهمني الله يخليك لاتعوفني هيج
فهمنيييي ..مو على اساااس انا يمج وانا يمج
اوس:- شفهمج بس كليلي شفهمج ..نلاصت تدرين شنو نلاصت يعني بعد هاهيةةة كلشي انتهاا داكل خـ.....ا ومحد جاي يحس ولا راح يفيد بشي السالفة كلها وكعت فوك راسي ومحد ديفكر كل واحد جاي يطلعلي قرار من كيفة واني مثل الزمال لازم ارضى بي واسكت وانييي لحد هسه مامستوعب اللي صااار
بلعت ريكي وكتله بصوت مبحوح:- شنو يعني
تنهد وكال:- روحي هسه
بيلسان:- دقيقة
سده بوجهي
دخيل الله شبي هالرجال راح يموتني ..عيوني كامت تصب
شنو هالرسالة من منو لعد؟
شنو يعني انتهى كلشي؟ ..اكيد يتشاقة اكيد
لا مامعقولة ..
اندك الباب واسمع صوت خالتي دكول
لبنى:- هلا ابو حسين تفضل
عمي؟؟
بسرعة عدلت نفسي وطلعت صار بوجهي هو وحسين وعمي عمار
منتصر:- بيلسااان ..اجيتي بعد عمج
وكفت خزرته وكلشي مارديت
منتصر:- ووجع شكو مخنزره فوك ماخلصناج منهم
عمار:- هاي شبي وجهج بنتي
تقرب حسين مني وكال:- أذوج؟؟ كولي والله هسه اروح احرك الدنيا عليهم
اباوعلهم وگلت:- ارتاحيتو؟ خربتو كلشي لو بعد اكو
منتصر:- واحنا شعلينا ..انتي شرفنا وعرضنا شون ترضينا نبقيج ببيت غريب ..الله يرحمك يا اخوي شووون رضيت بهالمهزله شوووون
بيلسان:- بس جان ابنهم عاقد علية وجان عرسنا يعني ماجان راح يصيرون غرباء
منتصر:- وتبقون عايشين بهالجذبه اللي حتى حارميج من امج
ضحك وكتله:- شكد بالك يم امي انت
صاح بيه عمي عمار:- بيلساااان احنا عمامج وهسه احنا الوصيين عليج اللي صار لازم يصير جان لان هالشي غلط اتقبلي الموضوع
صحت:- وانا ماريددددكم ماريدددد اعيش وياكم خربتو حياتي من الله لايوفقكم ولا يشوفكم يوم عدل
منتصر:- احنا شعلينةةةة ذيج هي امج وانجازي وياهاااا والله وثم والله لو جنت ادري جان كتلت اخويه ولا خليته يسوي هالسوايه هااااي
بقيت اباوعلهم جتي خالتي علية سحبتني لجوا
لبنى:- شبيج تره هما مالهم علاقة وكلشي سوو حقهم عمامج وبنت اخوهم ببيت غريب شنو تريدين يسوون
كعدت عالكرسي وروحي احسها فايره مو بس اعصابي
سمعته ديگول
منتصر:- وينج تعاي
رحتله من الباب:- ها
منتصر:- تعاي كعدي وخلي نتفاهم ..رايح لبيت الشيخ خالد وراح ننهي كلشي
صفنت بي وجسمي يرجف:- شتنهي؟
منتصر:- ماعدنا بنت الهم وهذا اخر كلام
مادري شون طلعت مني وگلتله:- هي بكيفك لازم
انا حجيتها ما احس الا كام وصلخني ذاك الجف
بسرعه فزو عليه
حسين:- ابوية لاااا لااا
عمار:- منتصرررر شسوييييت
منتصر:- حتى تعرف شون تعدل اسلوبها ويه عمها الجبير
اجا يمي عمي عمار وكعدني وكعد يمي
وانا ايدي على خدي مصدومة ماداستوعب اللي داعيشة ..
عمار:- بيلساان ..احنا بمقام ابوج واخوي مارباج ماتحترمين الاكبر منج ..اسكتي وافتهمي من عدنا
نزلت دموعي واحس الغصه وصلت لخشمي
الدنيا وكل اللي بيها ديكفخني ومحد وياي!!
كام عمي منتصر وكال:- اني رايحلهم ان كلتي اي او لا وهذا اخر كلامي ماااعدنا بنت الهم ..داتسمعيييين
حجاها وطلع هو وحسين ..باوعلي عمي عمار تنهد ورجع طلع وراهم
جتي امي وخالتي يمي
حجت امي:- عجبج؟
باوعتلها وانا عيوني دم:- كله منج ..وين تروحون من الله ويييين وييييييين
بقيت كاعده بمكاني واعصر بهدومي بحرگة
وبيدي تلفون امي
اخابر اوس مايرد علية وماعندي رقم قيس لو بنان اتصل عليهم
روحي كامت تذوب شوي شوي
والوقت صار يعبر على روحي برصاصات ..
لليل اندك الباب طلعت ركض
طلع بوجهي حسين وبيده جنطه
حسين:- هاج لزمي هاي وحده حرمه من اللي هناك مخليه هدومج وغراضج كلها هنا
سحبتها بسرعه منا وكتله:- شصار وشحجيتوا
حسين:- حددو يوم يفسخون العقد
انصقعت ..اكثر خبر ماجنت متوقعته بهالسرعة هاي
ولا حتى اجا على بالي!!!
صفنت بي وعيوني كامت تجري
كلشي ماسمعت بعدها عفته ودخلت ركض لجوا
دخلت لغرفة الاستقبال وطلعت التلفون مالتي من الجنطة
دكيت على اوس فوك العشرين مره
سجلتله ڤويز:- ليش جاي تتهرب اوس وينك
رجعت دكيت على قيس فتحه
قيس:- الو
بيلسان:- قيس دخيل الله وين اوس
قيس:- روفان وعيونج ماندري تعارك هو وجدي وطلع مادري وينه هاي حتى اني جاي افتر عليه مادالكي
بيلسان:- شنو ليش ليش تعاركوا
قيس:- ماراضين يبقى عاقد عليج ..جدي كله اغضب عليك لو بقيت وياها
كمت ابجي واصرخ:- انا شعلية انا شنو ذنبييي انااااا
قيس:- كتلج نلاصت بينج وبين اوس وربج يسترها واليوم جوي عمامج وحددو كلشي
بيلسان:- هو جان وياهم
قيس:- قصدج تعارك وياهم
بيلسان:- قيس بربك لاتحجي تلاصم شصاااير راح تموتونييي
قيس:- يعني شصاير تعارك وياهم مايريد يفسخ العقد وصاروا عمامج ويه جدي ضده لحد ما جدي صاح يتبرى منا ومن كلشي يملكه وطلع اوس ولحد هسه ماكو شي عنه ولا ندري وينه
بيلسان:- ليش ماجاي حتى يجاوبني هاي من يوم الصارت السالفه
قيس:- روفان اوس جان عنده سفرة مهمه كلش بالشغل وجتي هالسالفه يعني من صدك كلشي نلاص عليه هسه
سكتت ..ماعرف شحجي وشنو اللي لازم احجيه هسه!
بيلسان:- بس طمني عليه الله يخليك
قيس:- تمام بس حاولي لاتتصلين باي شخص من بيت جدي
بيلسان:- ليش
قيس:- بس سمعي الحجي
نهيته ويه قيس وانا بس اصب دمع
كعدت بالكاع ماعرف شسوي
رفعت راسي للسقف وكلت:- يارب انت حلها من يمك يااارب ..يارب تعبت يااااارب ...وينك عني
ساعدنيييي ماعندي غيرك ولا اليه هسه احد
يارب ..انت تسمعنيييي
بقيت ادز رسايل لاوس واتصل عليه بس ماكو اي رد
اخر شي دزيتله:- وينك من يمي؟
مو على اساس دائمًا راح تكون يمي وماراح تتركني؟
وشمرت التلفون وبقيت اصفن ..
ورا يومين والنار تاكلني وخاف جان قيس يرد عليه صار حتى هو خطه مشغول ومايرد
اندك الباب الصبح فتحته بنت خالتي
طلع عمي منتصر
منتصر:- وين بيلسان
طلعتله:- ها
منتصر:- بدلي بنتي يلا رايحين للمحكمه
صفنت وانا جسمي كله تشنج:- وين ..محكمتيش؟
تنهد وكال:- بنتي اليوم فسخ العقد
احس انزرعت بمكاني حتى جسمي اريد يرجع يرجف ماكو
سحبتني خالتي:- خاله ماجاي تسمعين يلا تسعجلي
باوعتلها:- ماريد
لبنى:- شنو ماتريدين؟
تبقين على ذمته؟ ..ترجعيلهم وترجعين لذلهم من بعد اللي صار
تريدين ترجعين لناس مارايديج بينهم؟
من طيح الله حظج اذا نزلتي دمعة وحده بس علمودهم لو عليهم
اصفن بيها ..ماعرف شنو اردلها
ماراح تحس بناري ولا راح تحس باللي داحس بي
ناااار نااار ..والف شعور تجمع علية بوقتها
للحظات فكرت انو راح اشوف اوس ويمكن اكدر احجي وياه
ركض رحت بدلت ومادري اصلا شنو لبست
شافتني امي
- وين
مارديت بسرعة لبست وطلعت
رحت ويه عمي واصك على سنوني من الخوف ورجليه تطابك وحده بالخ من الرجف اللي مو طبيعي
جانت المحكمه يمنا يعني مو يمهم
وصلنا نزل عمي ولزمني من ايدي ومشينا
احس گلبي يركض كبل رجليه مادري شنو راح يصير بس اريد اشوف اوس
وكفني عمي:- باعي بنتي
اني اللي داسويه لمصلحتج ..العالم مارايديج ولو بقيتي لحظه وياهم راح ينتقمون منج لان مامصدكين انو انتي مالج دخل بالسالفة
حاقدين عليج وعلى ابوج وعلينا كلنا
اباوعله عيوني تنزل الدموع بدون اي صوت ..تنهد ومسح على راسي:- اللي دنسويه الصح ..اتحملي وكوني صبورة
شحجي وياه؟ شگله؟
شون راح اقنعة وشنو اگله اصلا ...
التقينا بالمحامي
انا كل هالشغلات ماداحس بيها ولا داسمع شديحجون
ماداستوعب اللي ديصير لحد هسه!
اجا يمي المحامي وكعد يكلي هيج وهيج گولي وانا عقلي مشوش اصفن بي وماعرف شديحجي
دخلنا ..فزيت ورجف گلبي صار بوجهي هو وعمي محمد وجدي
لا اراديًا ردت اتقرب اروحله سحبني عمي من ايدي
منتصر:- وييييين شحجيت
نداريت واباوعله بين عمي وبينه
مادري شصار بيه وشصار بداخلي لمن اباوعله وهو حتى مايباوع بعيوني ..داير وجهه وملامحة الهادئه مثل ماهي
لعد وانا؟ ..انا اللي حالتي انگلبت بايام قليلة وهو عادي؟!
بقيت اصفن بي اريد بس يباوعلي يحجي شي المهم لايبقى هيج متجاهلني ..تجاهله وعدم نظرة اليه كسرني الف كسرة والله!
صار موعدنا وصاحولنا
دخلنا للقاضي ...ولاول مره احس بهيج شعور
واعرف انو اكو شعور هيج مقرف ويهد الحيل ويموت الانسان وهو صاحي ..
انا وياه واحد كدام الثاني وكدام القاضي لحتى يفصلنا عن بعض!
احنا اللي ماصارلنا هواي من وكفنا نفس هالوكفه بس لمن عقدنا وجنا بوضع غير عن هسه وحاله غير عن هسه!!
نحنا اللي من كثر حبنا نحس نعقد گلب بگلب الثاني ..نحنا اللي قبل ايام من هسه جنا فرحانين ونحضر لعرسنا
هيج وصل بينا الحال!!
شعور شكد ما اوصفه ماكدر انطيله حقه
شعور هدمني ..
اسمع القاضي يردد ويحجي ويه المحامين
صافنه بي ودموعي ناشفه
اللحظات اللي تم كلشي وتم الفسخ العقد
رفع عيونه ووكعت بعيوني ..ونطق الكلمة النهاية بصوت مبحوح ويرجف!!
جانت ابشع لحظة اعيشها بحياتي كلها
الدنيا سودت بوقتها بعيوني وانا اباوعله
احس هذا مو اوس اللي كبالي
شكد مادكولون كرهته شعوري جان طاغي اكثر وانا انتظره يسوي اي شي وهو ساكت ومنزل راسه
ماتوقعته لهالدرجة ضعيف وماله كلمة
ماتوقعت نفسي راح اهون هيج ..من اول محطه
من اول وكعة ..من اول صدمة يتركني ويروح!!!
جان جدي والمحامي وعمي هما اللي كلشي سوو ..
اباوعله واريد اطلعه من روحي ماجاي اكدر
اريد اكوم اركض عليه
اريد اروح احضنه ابجي اضربه
اريده يسوي اي شي ينهي هالكابوس اللي احنا بي
بس هو جان بدون اي ردة فعل
والاصعب ان اعرف جاي يحس بشعوري
جاي يحس بيه وهو هم مثلي ضايع ..مثلي مكسور
لأول مره اشوف اوس هيج مجرد جسد
حتى ساكت ماحجه بس بلحظة اللي ساله القاضي ورد بصوت مبحوح "نعم موافق"
انا روحي جاي تتكطع وهو ساكت
انا جاي احترك وهو بارد
انا داموت دارجف گلبي راح يوكف وهو واكف بذاك طوله وعيونه ماتطخ عيوني
ليش اوس؟ ...اريد اروح اگله هاهيه يعني من صدك؟
اصعب لحظة من تهون بوقت جنت متاكد من انتصارك!! ...
طلب مني القاضي ارجع كل الشغلات اللي اخذتها من ذهب وتجهيزات
رديتله:- اساساً طلعوني من البيت بدون ما اخذ اي شي
رد عمي:- سيدي احنا اصلا مارايدين منهم شي وكل غراضهم مارايديها بس يكفونا شرهم
حجه عمي محمد:- شنو نكفيك شرنا ابو حسين ليش شسوينالكم هاي فوكاها
باوعلي عمي وسحب وجهي عليه وكله:- كل هذا ودكولون شسوينا اذيتولي بنت اخوي وهيج العشم تاليه
محمد:- والعشم انتو تجذبون علينا؟
على يا عشم جاي تحجي
حجه جدي بصوت هادئ:- محمد سد الموضوع
مابعد النا حجي وياهم
حجاها وطلع ..جان اوس واكف بصفحة منزل راسه
باوعله جدي وحجه بصوته الضخم:- يلا اوس
فز وطلع وراهم
بقيت اباوعله على وعسى يندار ويباوعلي
على وعسى مايحرمني منا للمرة الاخيرة ..الله يعلم يمكن بعد بحياتنا مانلتقي ..هيج وداعية مايريد حتى يندارلي بنظرة وحده
وحده بس!!!
ماكو احس دار حياته كلها عني مو بس ضهره
طفى كلشي بعيني بروحته ..حسيته طبق الباب على گلبي من طلع
طبقه على حياتي وسعادتي وروحي اللي بقت وياه متشبكة ...
انكسرت ..انكسرت من هالمنظر والطريق كله راسي مشوش وما ببالي شنو ديحجي وياي عمي
صافنه بالشباك ودموعي تنزل
فزيت على صوت رساله بتلفوني
بسرعة طلعته گلبي رجف گلت اكيد اوس
بس انكسر واهسي من شفتها من قيس دزلي
قيس:- حقج كلشي تسويه ..وكلشي تحجيه والله بس لاتزعلين من اوس لو تعرفين الشي الجاي يمر بي هسه ماتلوميه ..ماراح اگلج مع السلامه لأن مانتهت بينا بعد
سكتت وكلشي ماجاوبت ولاهتميت
اي كلمة بهالوضع هذا بعد ماتفيد وراح تكون كلش تافهه بنظر الشخص
اي شي هسه مابعد راح يفيدني ولا راح تطفي هالنار !!

وصلني البيت نزلت بهدوء ..امشي على گلبي من الوجع والثقل اللي داحسه جنت بهالوقت
الدنيا المغرب دكيت الباب طلعت بوجهي بنت خالتي رهف
رهف:- ها بيلا شصار وياج
دفعتها بهدوء ودخلت للبيت وعيوني عدله بس اريد ادخل 
تلكتني امي بالمطبخ كاعدة ..شافتني بسرعة فزت وتصفن بيه
باوعتلها نزلت دمعتي وهي صافنه بوجهي
باوعتلها وانا بداخلي وجع هالدنيا كلها وتعبها ..باوعتلها
بيلسان:- شنو كالت روحكم وانتو تعذبوني وكل مره تخلوني بوسط النار؟ ..شنو راح دكولون لربكم من يسالكم شمسوين بهالبنيه
جنت مختنكة ..مختنكة لدرجة الكلام ديطلع من روحي
باوعتلها:- عاجبج هيج يعني؟
هسه ارتاحيتي لمن راح تشوفيني اموت الف موته باليوم الواحد
عاجبج هيج وانا روحي جاي تطلع مني؟
نزلت راسها وكامت تبجي
بيلسان:- ماما انتو دمرتوني ..ولا بعمري راح اسامح على هالشي اللي عشته ولا على كل شعور جاي احسه هسه وحسيته قبل من اخذوني ..ياريتني ماجنت بنتكم ياريتني متت بمكان اختي ..اختي؟؟ حتى الشي الوحيد اللي جنت مصدقته طلع جذب ..
ياريتني متت قبل لا اعيش حياتي هاي

حجيتها وسحبت الكرسي الكبالي وشمرته بالكاع بقوة
جتي بسرعة علية خالتي وتبجي وتريد توكفني
لبنى:- اروحلج فدوه خالتي لاتسوين بروحج هيج الله يخليج
باوعتلها وابجي
بيلسان:- خالتي راح اموت
لبنى:- اسم الله على روحج يا يمة لاتحجين هيجي
غصتي بعد ماكدر اكتمها ..باوعت لامي وبسرعة سحبت ايدها وخليتها على گلبي
اباوعلها:- حسي
شوفييييي گلبي والناااار اللي دتاكل بي هسه..ماما شوفي شسويتوا بيه ووين خليتوا حالي ..داتحسييين بيه داتحسييييين
كامت تشهك وتبجي وانا ايدي ترجف فوك ايدها
وجسمي كله احس صار قطعة جمر ونااار
ادنت يمي خالتي وحضنتني:- كافيج يا ماما كافيج هما الاي خسروج والله هما
باوعتلها:- خالتي طلكني ..يگله القاضي موافق على فسخ العقد يگله اي موافق
خالتي دمرني وهو مايباوعلي حتى ..هسه يحسبني جذبت عليه وانا والله العظيم والله مادري بالسالفة والله
تباوعلي وتبجي:- راح يعرف الحقيقية بعدين ميخالف
باجر بس يحس على نفسه شسوه يجيج يبوس القنادر
دفعتها:- شنو يحس على نفسه؟
نحنا الغلط نحنااااا اللي جذبنا نحنا اللي دخلنا على جذبة وعيشناها بشي جذب ..نحنا الغلط وانا هسه بعينه اكبر وهم عاشه بحياته
رادت ترجع تحضني دفعتها كمت وعفتهم ركض دخلت لجوا وخليت وجهي عالمخده واريد بس اصرخ لو اسوي اي شي تطلع الغصه تعبت تعبت
ماجاي ارتاح ..ماجاي تطلع الغصة
بجيت بجي بحياتي ماباحيته وهم مارتاحيت ..
بقيت كل شويه ادخل واطلع
جنت احس عندي خيط امل انو كلشي يرجع مثل ماجان
جان عندي شوية امل انو ارجع لو يدزلي اوس بحيث التلفون ماعفته من ايدي ولا لحظه ..كل شويه ادخل على حسابه وماكو اي شي منا
لحد ساعة ١٢ ونص بالليل
بالضبط بهالوقت جنت كاعده ويه بنات خالتي
جتني رساله ..فزيت وانا اقرا اسمة
اسمة اللي اول مره يرجف گلبي لهالدرجة عليه
رجفة خوف وتوتر ..رجفة وجع
رجفة شوق ..انتظاااار
اكثر من ما هي رجفة حب
فتحتها وانا ايدي ترجف وكل حواسي متوقفه
حتى عيوني مغووشه ....
.
.
.
للحكاية بقيـــة

#منة الله_الأيوبي