مرت فاتحتها بشكل شكد ما اوصفه مؤذي
احسني ماكدر اعبر عنه ..
قاسي والايام اللي بيها الفاتحة احس بيها ضباااب
وختنك خنك مو طبيعي ...
لمن جابوا تابوتها بالبيت كعدت يم طرف رجليها
واباوعلها وعيوني تصب
حاجيتها ..طلبت دكوم
توسلت بيها ترجع واسويلها كلشي تريده ..
ياقساوة اللحظه اللي تندم بيها على شي مايتصلح!!!
گتلها كومي وين عايفتني والمن؟
طول هالعمر جنا سوا هسه تعوفيني! ارجعي واللي يسلمج انا ماليه غيرج بهالدنيا كومي واوعدج اروح وياج لاخر الدنيا مو بس للمكتبة واشتريلج كلشي باقي بخاطرج ...
ايام كرهت بيها روحي ..
تمنيت من كل قلبي وكل مابيه من طاقة
يرجع ذاك اليوم وذاك الوقت واصلح غلطتي وجان ماخليتها تروح من بينا
جان هسه هي ويانه وراجعين لدوامنا سوا ...
يالله ..شون راح اكمل من غيرها؟
عمري ماحسيت بقيمتها ولا حسستها عن وجودها شكد مهم عندي
رغم عتمتها بس هي اكثر وحده جانت مستحملتني
مستحمله مزاجي ..عصبيتي ..عمرها ماضاجت مني وعمرها ماشتكت من حركاتي لامي وابويه
بالعمس انا الجنت اغار من دلال امي وابويه الها
جنت هواي أذيها بكلامي! ..
مرات من جنت ازعلها واشوف بعيونها القهره
اروح اراضيها بعدين بس ماجنت اسمع منها غير جملة وحدة
"مازعل منج ابد" ...
خسرتها وخسرت جزء جبير من قلبي وروحي وياها ..
الطابق الثاني ماصعدتله ولا طخيته من بعد الصار
صعدو بنات عمي وخالاتي جابو هالجم قطعة اللي طلعت سليمة من الحادث
وعمامي وولد عمامي نضفوا وكملوا كلشي فوك وابويه قفل الباب
الشي اللي قاهرني انو راحت وراح كلشي يخصها
هدومها ،غراضها ،كتبها وعطورها حتى فراشها لمحته صاير فحم
شغلة وحده بس بقت ذكرى منها
هو حجابها الابيض مرسوم عليه ورد الاقحوان جانت تحبه كلش
جانت نازعته بذاك اليوم بغرفة امي وابويه
من شفته برد قلبي وفرحت رحت ركض عليه اشم بي جانت ريحتها تارسته ..
نمت بالصالة وانا اسمع صوت امي تون وتبچي
وبابا ضارب عنده الربو من وره استنشاقه كمية من الدخان
البيت رغم كل اضويته وكل غراضه
بس احسه فاااارغ ومعتم
هو هيج قاسي الشعور لمن تفقد شخصك الاقرب لقلبك؟ ...
مرت الايام ببطئ
الطابق الثاني محد بعد يتقربله
جان صعب علية ارجع اداوم وجنت متوقعه اوكع بمرحلتي هايه واعيدها بس المديره والمدرسات من كد مايحبون نورهان تعاطفوا وياي ونجحوني
جنت اروح للامتحان من غير مادارسه كلشي اكتب اي شي واطلع بس نجحت
صديقتها صارت صديقتي المقربة يمكن هي شافت بيه نورهان وانا شفتها بيها من كد القرب الجانو بي
جان كلشي بغيابها اسويه من غير روح
ايام صعبة صعبة
تجاوزها ونسيانها جان اشبه بتعودك على تعايشك من غير ايدين!!
...
مرت ثلاث سنوات ..
منتظرة ياكلية تطلعلي
رايح اخو ليليان يستلم نتيجتي لان هي وياي رسبت بالسادس وصارت بنفس مرحلتي
بقيت اللوب وانا داحاول اطلعها من تلفون أمي
كاعدة على نااار وروحي تحوص
دك التلفون باوعت عمة نداء زوجة عمي منتصر
ماردت ارد لان مو بحال احجي ويه احد بس اتصلت اكثر من مره كلت عيب اخاف بيها شي
رديت:-الو
نداء:- بيلسان؟
حجتها وبسرعة انسحب التلفون من عدها
حسين:- ها بيلسان بشري
بيلسان:- ها حسين بعد ماطلعت
حسين:- صاير زخم عالروابط ولهذا يمكن
بيلسان:- رايح اخو ليليان هم يجيبلياها من المدرسة احتمال تفتح يمهم قبلنا
حسين:- اخو ليليان؟ ..اهاا وليش ماگلتيلي انا اروح اجيبلجياها
بيلسان:- مو هو رايح رايح يجيب ماليليان هم ف يشوف مالتي
حسين:- اي تمام ..من تطلع بشرينا
بيلسان:- اي اكيد
سده بوجهي !
شبي هذا اوي
حسين ابن عمي الجبير يدرس ترجمة مرحلة ثالثة شاب عادي حباب مابي شي
بس لأن محرومه من شي اسمه اخ وهو فتحت عيني عليه
ف ماكدر اشوفه الا اخويه ...
اوووي هسه اريد تطلع درجتي عاد مو راح تروح روحي
كل شويه واحد من امي لو ابويه يدخل علية
وها بشري!
واكللهم بعد بعد
اروح واجي بالغرفة
ماحس الا خبرت ليليان اريد ارد بعد ماعرف
كمت ارجف فتحته بسرعة وحجيت
بيلسان:- هاا كولي
ليليان:- نجحتي ولج نجحتييييي
حجيت ودموعي تنزل:- كولي والله
ليليان:- وعيونج الحلوةةةةة
بيلسان:- الف الحمدلله ياربي الف الحمدلله ..المعدل شكد
ليليان:- راح ادزلج الدرجات واحسبي
ختمته وياها ورحت ركض على اهلي ابشرهم
جان نجاحي من السادس يطلب معجزه
لان ماجنت ادرس زين وانا اساسا مو شاطره مكضيتها سخته
فرحوا وحضنوني
واخذ ابويه الدرجات يحسبلي المعدل
:- هااا احمد شكددد
:- والله عفية ببنيتي ولج عفيةة
اباوعله وانتظره يحجي :- شكد شكد
:- ٧٣.٨
كامت تهلهل امي وانا كمت اكمز رحت ركض حضنت ابويه
فرحت فرحة ماصايره
فرحة مافارحتها صارلي طول هالثلاث سنيييين
يالله شكد تمنيتها يالله!!! ..
بس جانت لوصة التقديم الها رأيي اخر
التقديمات بسنتي كلش مكروها وبيها ظلم
وصح نحنا جنا متوسطين الحال بس مو بحال مصاريف جامعة اهلية
لذلك جنت راح ارضى باي شي يطلعلي
وبعد اللوصه اللي صارت والخبصه عالتقديم وانا فرحانة مخليه اول شي قانون ومتامله يطلع
بس طلعلي محاسبه
جنت ويه ليليان واخوها ديرجعني بالطريق حسيت ردت ابجي واختنكت مادري ليش
وانتبهوا علية بس كعد اخوها يقنعني ان هالقسم زين ومفيد وبي هواي استفاده بالمستقبل اهمها ان الشركات تطلب اصحاب خبرة من هالقسم
ورجعت ايضا اهلي حجوا وياي وكالوا يفيدج وزين الج
كملت اوراقي ومعاملاتي بخلال اسبوع
جانت بس سالفة التقديم صعبه وراها كلشي نحل وصار سلسل نروح انا وبابا من الصبح نكمل كلشي ونرجع
ومره من المرات رحت عالفحص وهاي السوالف ماجان عنده وقت رحت ويه حسين وتندمت رحت وياه
يحسسني طفلة وماتعرف كلشي وهيج لو بيده يحاوطني وين ماروح
كملت كلشي بس الشغلة الوحيدة اللي تضوج انو الجامعة بعيدة عن منطقتي كلش بعيدة
وللحظات فكرت انو اكعد هالسنه واقصد السنه الجايه بس ترزلت من اهلي واتذكر ليليان گلتلي
-خير الج وراح تشوفين هالخير بعدين مو هسه وتفهمين حكمة رب العالمين بكلشي صار...
نزلنا للسوك انا ويه مرت عمي الثاني
واشتريتلي جم غرض للدوام حاولت اتاقلم واعيش حياتي
انو شسوي كلشي صار لازم يصير ومجبورين عليه
بس جنت متحمسه هواي
ماعرف شنو منتظرني ولا شنو راح اشوف واعيش
بس متحمسه وفرحانه ....
أنت تقرأ
ليلة من العمر
أدب نسائيكل شي يتحول فجأة ، كل شي تغير فجأة وكأنُ كل أيامك الحلوة عشتها بليلة وحدة .. . . يـ رب العين هاي العين ماترضى بوجه غيره يـ رب عينه وحگ عينه حسرتي لشوفته چبيرة يـ رب العين مشتاگتله ماجتها مراسيله يـ رب العين إذا تبچي أراضيها بتفاصيله باوعلي ...
